Министерството за финансии од Буџетот изврши исплата нова транша во вредност од 6,9 милиони евра кон Развојната банка за поддршка на домашните компании.

Со исплатата на оваа транша вкупната поддршка на државата кон домашната економија изнесува 224,3 милиони евра од вкупно планираните 250 милиони евра за поддршка на домашните компании.

Владата ги обезбеди овие средства преку кредитна линија од Унгарската експорт-импорт банка со цел поддршка на домашната економија. Поддршката се состои од пласман на средства по поволни услови за компаниите во насока на реализација на приватните инвестиции, со што тие ќе обезбедат сопствен развој и поттикнување на економскиот раст.

Парите се пласираат до крајните корисници преку деловните банки, каматната стапка е 1,95% годишно, рокот на отплата е до 15 години и грејс период до 3 години.

Вкупниот буџет за поддршка на домашните компании предвидени во Буџетот изнесува 250 милиони евра, а вредноста на инвестицискиот циклус се проценува на околу 300 милиони евра.

The post УШТЕ 6,9 МИЛИОНИ ЕВРА КРЕДИТНА ПОДДРШКА ЗА КОМПАНИИТЕ Министерството за финансии ги уплати парите во Развојна банка appeared first on plusinfo.mk.

Премиерот Христијан Мицкоски денеска изјави дека има интерес од страна на банките за финансирање на брзата пруга и дека следната есен се очекува да почне реализацијата на тој проект.

– Имавме информација преку Министерството за финансии во која имаме необрзувачки индикативна понуда која во моментот ја разгледуваме. Донесена е одлука за избор на необврзувачка индикативна понуда и во периодот кој ќе следи ќе се влезе во суштината на преговорите, договор итн. – рече Мицкоски.

Условите, посочи, кои првично ги добивме се исклучително поволни, услови кои никогаш не би можеле да ги добиеме доколку не беше гаранцијата од Обединетото Кралство.

– Во овој момент работите одат во насока во која треба да одат, како што ги планиравме. Министерството за транспорт прави физибилити студија и студија за оценка на животната средина. Тоа е процес кој трае 270 дена и треба да заврши во мај, јуни. Потоа ќе се влезе вo избор на конкурентен дијалог за изведувач на проектот и очекуваме во октомври, ноември, следната есен да почне реализацијата на овој проект – додаде Мицкоски.

The post ИМА ИНТЕРЕС КАЈ БАНКИТЕ ДА ЈА ФИНАНСИРААТ БРЗАТА ПРУГА Мицкоски очекува изградбата да почне следната година наесен appeared first on plusinfo.mk.

Народна банка не ги утврдува каматите и стапките на кредитите но како централна банка укажуваат на една практика во светот која се заснова на процената на ризикот дека семејствата коишто за прв пат купуваат стан и живеат во него или куќа се помал ризик од аспект на сервисирање на обврските и тие добиваат поповолни услови – камати од банките, изјави денеска гувернерот на Народна банка Трајко Славески запрашан кога може да се очекува намалување на каматните стапки на кредитите за купување прв стан и намалување на процентот на учество за овие кредити.

Славески рече дека очекува светската практика да се види и во земјава со тоа што ќе ја применат комерцијалните банки.

-Банките имаат два и пол месеца за подготовка и очекуваме да се придржуваат на одлуката  од аспект на тоа што е во надлежност на Народна банка во регулирањето на учеството во однос на месечната рата на кредитот и она ограничување што се однесува на висината на сопственото учество и вредноста на имотот којшто станува залог – рече Славески.

Славески информира дека досега нема никаква официјални ниту неофицијална реакција од банките во врска со новите услови за намалување на учеството за кредитите за прв стан ниту за препораката за намалување на каматните стапки.

-Немаме, треба да ги слушнеме, најверојатно прават проценки и пресметки. Немам ниту официјална, ниту неофицијална најава од страна на банките. Мислам дека се уште е рано –  рече Славески.

Тој рече дека е релативно тоа дали се поповолни кредитите за учество од 10 или од 20 % во услови кога граѓанинот која сака да земе кредит нема доволно пари.

-Ако можете сега вие да земете кредит со 10.000 евра во денарска противредност за помал стан кој не мора да биде во центарот на Скопје, влегувате во решавање на своето сопствено станбено прашање. Ако ви се потребни наместо 10, 20.000 евра вие ќе треба да ги позајмите од некаде за што ќе плаќате камата или да речеме од своите најблиски, роднини, пријатели или потрошувачки кредит, што се има трошок. Сакам да кажам дека нема ниту еден аргумент дека ова не е поповолно или не би било поволно за некој што го нема решено станбеното прашање -рече Славевски.

The post БАНКИТЕ ИМААТ УШТЕ ДВА МЕСЕЦА ДА ГИ ПРОМЕНАТ УСЛОВИТЕ ЗА КРЕДИТИТЕ ЗА ПРВ СТАН Славески очекува при утврдување на каматите тие да ја применат светската практика appeared first on plusinfo.mk.

Ова го изјави министерката за финансии Гордана Димитриеска-Кочоска во врска со преговорите со банките за делот од унгарскиот кредит од 500 милиони евра наменет за компаниите.

– Разговорите со банките ги почнавме некаде во август и од тогаш до денес сме имале состаноци. Пред две недели го постигнавме договорот во насока на дефинирање на каматната стапка и нејзиното субвенционирање од страна на државата, како што било впрочем и во минатото. Од 2011 година навака има многу кредитни линии коишто се поминати преку Владата, односно Министерството за финансии, дадени на приватниот сектор каде што субвенционирањето било од страна на државата. Ние пробавме да направиме обид со банките, барем да го поделиме тој трошок, но тие сметаат дека ризикот го преземаат, и тоа е така, ризикот го преземаат банките и за сметка на тоа нормално може да се појави некој ризичен кредит, затоа тие инсистираа каматата да ја покриеме комплетно ние и на крајот се согласивме – рече Димитриеска-Кочоска.

Отворено е, додаде министерката, прашањето за рокот на отплата на кредитите, каде што државата бара продолжување на роковите од 7 на 15 години.

– Ние баравме рокот на отплата да биде 15 години со вклучени 3 години грејс период, согласно интерни процедури и политики на банките. Тие имаат рокови на отплата од 7 до 10 години и оставивме простор тука да видиме како ќе се договориме во насока на тоа дали може да го продолжат рокот за отплата на кредитите, затоа што целата оваа суштина и ова учество на државата во одобрување на кредитите е токму насочено кон тоа да се одобрат кредити на приватниот сектор на еден подолг период, односно подолг период на отплата да има, затоа што сметаме дека така ќе се охрабрат уште повеќе кога ќе знаат дека во годината оптоварувањето е помало, ќе се охрабрат повеќе да инвестираат, тоа беше нашата идеја – рече Димитреска-Кочоска. 

The post ВЛАДАТА ЌЕ ИМ ЈА ПЛАТИ НА БАНКИТЕ КАМАТАТА ЗА УНГАРСКИТЕ КРЕДИТИ Компаниите нема да го имаат тој товар appeared first on plusinfo.mk.

Комерцијалните банки, согласно постојната законска регулатива од Законот за спречување перење пари и финансирање на тероризам, Законот за заштита на лични податоци, како и подзаконската регулатива, треба редовно да ги ажурираат личните податоци на клиентите. Во современи услови на сѐ позачестено користење на услугите на електронско и мобилно банкарство, согласно законските одредби за заштита на личните податоци и безбедноста на плаќањата, неопходно е банките да одржуваат редовна комуникација со клиентите, заради безбедно извршување на услугите и заштита на корисниците на финансиски производи и услуги, предупредува Народна банка.

– Банките треба да го потврдат идентитетот на клиентот или вистинскиот сопственик при воспоставувањето на деловниот однос. Секоја банка со интерен акт ја определува фреквенцијата на ажурирање на документите и податоците потребни за следење на деловниот однос со клиентите. При промена на некој од личните податоци (адреса, нова лична карта и сл.), клиентот е должен соодветно да ја извести и банката чиишто услуги ги користи – велат од НБ.

Оттаму додаваат и дека банките треба да ги информираат граѓаните  за наједноставниот, најлесниот и најбрзиот начин на кој можат да ги ажурираат своите лични податоци, како и колку често треба да врши ажурирање на нивните лични податоци кај банката (дури и тогаш кога нема промена на податоците).

-Во некои банки постои можност ажурирањето на податоците да се врши по електронски пат, без доаѓање на шалтер во банките.Изнаоѓањето начини за известување за новините во регулативата, како и редовната комуникација со клиентите за сите аспекти при користењето на услугите од банкарскиот сектор придонесува кон зголемување на довербата на граѓаните во банкарскиот сектор, а со тоа се намалува просторот за шпекулации и дезинформации коишто можат да ја нарушат стабилноста на банкарскиот систем – велат од Народна банка.

The post ПОТСЕТУВАЊЕ ОД НАРОДНА БАНКА Комерцијалните банки редовно да ги ажурираат податоците на клиентите appeared first on plusinfo.mk.

Кога ќе почнат да важат новите каматни стапки во банките ќе зависи од нивната деловна политика, но главно сите банки ќе ја следат Народната банка.

За експертите ова е очекуван потег на централната банка кој нема драстично да ја зголеми цената на парите, но ќе се одрази кај кредитите на граѓаните кои во најголем број се со променлива каматна стапка.

Граѓаните, како што велат, и не очекуваат нешто добро да им се случи, откако почна бранот на поскапување.

– Струјата скапа, парното и бензините исто така, влези во продавница секој ден нова цена. Хаос! А платите никако да скокнат. Секој ден попразен џеб, нови долгови, кредити па брзи кредити да се излезе на крај со сета ситуација. И сега и нова каматна стапка на кредитите. Кругот на задолжување никако да се затвори. Спиралата расте, но не знам до кога ќе издржиме – вели скопјанeц.

Професорот Зоран Ивановски вели дека овој очекувам потег на централната банка, нема драстично да ја зголеми цената на парите, но ќе се одрази кај кредитите на граѓаните кои во најголем број се со променлива каматна стапка.

– Еден од основните инструменти за обезбедување ценовна стабилност во услови на висока инфлација кој го има на располагање централната банка е корекцијата на каматата на благајничките записи. И затоа очекувано беше што Народната банка го искористи овој инструмент за да покаже дека е подготвена, пред сè психолошки, да реагира и да ја пресретне инфлацијата која кај нас главно е создадена од страна на понудата. Благото зголемување на каматната стапка на благајничките записи од 0,25 отсто, нема драстично да влијае на цената на парите, но ќе влијае на поскапување на кредитите кои кај нас главно се со променлива каматна стапка врзана за основната која ја одредува Народната банка – вели Ивановски.

Банките веќе најавија усогласување на каматните стапки со зголемувањето на основната каматна стапка.

– Комерцијална банка, како и секогаш досега, ќе ги следи сигналите на Централната банка. Со оглед на последователните измени на Одлуката за задолжителна резерва, како и последната промена на основната каматна стапка, банката ќе ги разгледа опциите за корекција на каматните стапки. Соодветно на тоа може да се очекуваат адаптирања на каматните стапки во согласност со деловни политики на банката – изјавија за Плусинфо од банката.

И другите банки, како што соопшти и Македонската банкарска асоцијација ќе ги следат сигналите на централната банка.

Колку ќе бидат засегнати граѓаните од новите каматни стапки ќе зависи какви договори потпишале со банките. Кај кредитите и депозитите со фиксна каматна стапка нема да има промена на каматите, но кај кредитите со променлива камата, какви што најчесто се договорите за кредитите, тогаш повисоката каматна стапка е неизбежна.

Од Комерцијална банка, советуваат граѓаните да ги препрочитаат договорите за кредитите и депозитите потпишани со банките.

– Бидејќи често се поставува прашањето за кои производи ќе важат измените на каматните стапки, ги упатуваме корисниците на банкарски услуги внимателно да ги читаат договорите што ги имаат со банката, без оглед дали станува збор за кредити или за депозити, бидејќи во нив е утврдено дали станува збор за примена на фиксни или на променливи каматни стапки. Вообичаена практика е промената на каматните стапки да не се однесува на фиксните каматни стапки се до периодот на важност на одредбите за фиксна каматна стапка или договорот за кредит, а истото се однесува и за депозитите – велат од Комерцијална банка.

Реакцијата на Народната банка дојде како одговор на растечката стапка на инфлацијата која во март се искачи на 8,8 отсто. Централната банка образложи дека мерката е превентивен одговор на растечките инфлациски очекувања, во услови на задржани оцени за отсуство на поизразени притисоци од домашната побарувачка и присутни надолни ризици за неа во следниот период.

„Главните фактори на поместувањата на ценовното ниво и понатаму се факторите на страната на понудата, односно цените на енергијата и на прехранбените производи, поради растечките увозни цени. На нив отпаѓа повеќе од три четвртини од растот. Сепак, имајќи предвид дека тие се влезен приход кај повеќе други производи и услуги, а застојот кај синџирите за производство ги поскапува и другите увозни производи, најновите податоци покажуваат дека растот на цените станува пошироко распространет. Ова заедно со долготрајниот ценовен притисок од првично очекуваните придонесува и за нагорни поместувања на инфлациските очекувања. Поизразени притисоци од побарувачката врз цените засега не се забележуваат, а воениот конфликт во Украина ги нагласува надолните ризици за домашната побарувачка во следниот период“, појасни Народна банка.

Зголемувањето на каматната стапка на благајничките записи, ќе значи дека банките ќе бидат повеќе стимулирани да запишуваат благајнички записи, како поисплатлив и посигурен пласман, отколку да даваат кредити.

The post ПРОВЕРЕТЕ ГО ДОГОВОРОТ ЗА КРЕДИТ! Доаѓаат повисоки каматни стапки appeared first on plusinfo.mk.