Пациентот кој беше транспортиран од Турција по тешка повреда на рбетниот мозок е во стабилна состојба, виталните параметри му се добри и е надвор од животна опасност, истакна директорот на Клиниката за ТОАРИЛУЦ, д-р Игор Мерџановски.

Тој информира дека пациентот е контактибилен, свесен, дише самостојно и веќе започнал да прима храна по природен пат, а во тек е и физикална терапија во единицата за интензивно лекување.

-Пациентот е во добра состојба. Виталните параметри се стабилни. Вчера имаше покачена температура, но сите направени тестови се негативни на инфекција и најверојатно станува збор за реакција на транспортот и претходната операција. Од денес тој почна да се храни на уста и имаме подобрување на општата состојба – информираше директорот на ТОАРИЛУЦ.

Според него, во текот на следната недела се очекува пациентот да биде префрлен на Одделот за трауматологија, каде ќе продолжи интензивната рехабилитација, а потоа и во специјализиран центар за понатамошно закрепнување.

Одговарајќи на новинарско прашање дали летово се регистрирани случаи на тешки повреди при скокови во плитка вода, Мерџановски рече дека на Клиниката годинава нема примено такви пациенти, освен момчето кое се повредило во Турција.

Тој нагласи дека превентивните кампањи за безбедно однесување кај младите треба да продолжат, со цел да се подигне свеста и кај децата и кај родителите.

– Не треба да се скока во базени и во непроверени води. Ако тоа се прави, треба да биде во контролирани услови и под стручен надзор – потенцира Мерџановски.

Говорејќи за последиците од ваквите несреќи, тој појасни дека повредите најчесто ги зафаќаат вратните пршлени и рбетниот мозок и спаѓаат меѓу најтешките трауматолошки повреди. Според него овие повреди во најголем број случаи се иреверзибилни и оставаат траен инвалидитет.

Во изминатиот период на Клиниката за ТОАРИЛУЦ се примени поголем број пациенти повредени во сообраќајни незгоди, меѓу кои и околу петмина мотоциклисти со тешки повреди, а регистрирани се и случаи на колапс предизвикан од високите температури, информираше Мерџановски.

– Имаме пациент со повреда на вратот кој успеавме да го спасиме и очекуваме неговата состојба да биде добра. Имавме и пациент кој учествувал во сообраќајна незгода откако поради високите температури колабирал, изгубил свест и удрил во друго возило. И тој пациент беше опериран – појасни тој.

Тој апелираше граѓаните да бидат внимателни во услови на високи температури, да избегнуваат патувања во најтоплиот дел од денот и да внесуваат доволно течности.

Одговарајќи на новинарско прашање дали топлотниот бран влијае на бројот на пациенти со повреди, Мерџановски истакна дека ова лето се бележат повеќе случаи на колапси поврзани со жештините.

– Имаме градежни работници кои паднале, имаме пациенти кои колабирале додека управувале возило, а има и повозрасни лица кои поради топлината паѓаат и се здобиваат со различни скршеници – информираше директорот на ТОАРИЛУЦ.

Според Мерџановски, најчесто станува збор за фрактури кај повозрасни пациенти, кои потоа бараат оперативно лекување.

Тој препорача граѓаните да избегнуваат престој на отворено во периодот од 11 до 17 или 18 часот и да консумираат повеќе течности, следејќи ги препораките на здравствените институции и службите за итна медицинска помош.

The post МОМЧЕТО ДОНЕСЕНО ОД ТУРЦИЈА Е НАДВОР ОД ЖИВОТНА ОПАСНОСТ Мерџановски предупредува, жештините предизвикуваат колапси и кај возачите appeared first on plusinfo.mk.