Според урбанистичко планската документација на Град Кочани од 1998 до денеска и согласно Законот за градење на предметната локација на која функционира објектот дискотека/кабаре „Пулс“ не е дозволена пренамена од индустриски објект во објект за вршење угостителска дејност, додека од 2012 година инвеститорот почнува дел од објектот да го користи за намена дискотека/кабаре што е спротивно на ДУП и законската легислатива за урбанистичко планирање и градење, изјави вештото лице Душица Трпчевска Ангелковиќ, денеска во судницата во „Идризово“ на судењето за пожарот во кочанската дискотека, во кој загинаа 63 лица, а над 200 беа повредени.

Обвинителот Дарко Јакимовски, на почетокот посочи дека градежното вештачење е составено од повеќе области и денеска се продолжува со аспекти поврзани со урбанизмот и сослушување на вештото лице Душица Трпчевска Ангелковиќ, член на тимот што учествувал во изработка на градежното вештачење.

Во однос на урбанистичкото планирање за објектот, вештото лице посочи дека зоната Г10 на Град Кочани, каде се наоѓа дискотеката, од првиот Детален урбанистички план донесен 1998, како и последниот што е на сила донесен во 2013, не се менува и е наменета за лесна индустрија и мало стопанство.

– Од намената на објектот зависат сите останати параметри, како што се површина, височина, катност, позиција, пристап и паркирање. Од намената на објектот зависат неговите конструктивни, функционални и безбедносни барања кои градбата мора да ги задоволи – изјави Ангелковиќ.

Согласно Законот за градење, член 97, секој објект се користи за намената за која е предвиден и изграден.

– Конкретно објектот во која била сместена дискотеката или кабаре „Пулс“ е составена од две згради, од кои зграда 1 е изградена 1998 врз издадено одобрение за градба на деловно производен продажен објект. Зграда 2 е изградена без одобрение за градење и во 2011 година е легализирана со намена за лесна и незагадувачка индустрија. Во 2012 година објектот се употребувал согласно намената од ДУП. Од 2012 година инвеститорот почнува дел од објектот да го користи  за намена дискотека/кабаре што е спротивно на ДУП и законската легислатива за урбанистичко планирање и градење – појасни Ангелковиќ.

И согласно Урбанистичкиот план од 2013 намената, вештакот нагласи дека намената на објектот е Г3 – сервиси, а во компатибилни намени се Б1, Б2, Б4, Д2, Д3, Д4, Г2, Г4 и Е2 и ја нема намената Б3 која се однесува на големи угостителски објекти во кои спаѓаат и дискотеки и кабаре клубови.

– Според урбанистичко планската документација на Град Кочани од 1998 до денеска и согласно Законот за градење на предметната локација на која функционира објектот дискотека/кабаре Пулс не е дозволена пренамена од индустриски објект во објект за вршење угостителска дејност – изјави вештакот.

Легален пат за отворање на дискотека, појасни вештакот било да се поднесе иницијатива за измена на ДУП до Општина Кочани и да се предвиди како основна или компатибилна намената Б3. Следен чекор е да поднесе барање за пренамена на објектот во намена Б3 до Општина Кочани, изработка на основен проект за пренамена во кој ќе се вклучат сите барања за минимално технички услови кои објектот треба да ги исполни согласно Закон за угостителска дејност или да се отвори дискотека во друг објект во зона со намена Б3.

– Наместо да избере една од овие две легални можности, инвеститорот се одлучува да изврши нелегална пренамена на дел од објектот, постапувајќи спротивно на ДУП-от и регулативата – изјави вештакот.

Прашана дали Општината можела да реагира и на кој начин, кога веќе се вршела угостителска дејност дискотека во овој објект, вештакот рече дека Законот за градење покрај другото го уредува и начинот на употреба на објектите, а станува збор за објект од втора категорија, односно од локално значење и одобренија ги издава општината, значи дека општината е повикана да постапува по надлежноста, а тоа е да контролира дали објектот се употребува согласно даденото одобрение за градење и употреба.

– Реакцијата би била преку надлежните служби. Тоа се инспекциските служби, кои доколку констатираат дека на некој објект е извршена нелегална пренамена имаат право на сопственикот да му наложат да го врати објектот во првобитната состојба – појасни вештакот.

На прашање дали бидејќи веќе била издадена лиценца за дискотека/кабаре, дали тоа значи дека општинските инспекциски служби не можеле да реагираат, вештакот појасни дека тоа не е условено едно со друго.

– Овластувањата на градежната инспекција да реагира кога е извршена нелегална пренамена не е условена со издавање на било кој друг акт, без разлика дали е лиценца – појасни вештакот.

На прашање од обвинителот, да објасни како е можно во близина да има хотел, вештакот рече дека во ДУП-от постои парцела со намена Б5 – хотел, меѓутоа кај компатибилни намени графата е празна.

– Ова е затоа што овој објект постоел и функционира како хотел во време на изработка на ДУП-от и е евидентиран како постоечки и за овој објект планот не предвидува развој и проширување во планскиот период од пет години – изјави вештакот.

На минатото рочиште, судскиот вештак и професор на Градежниот факултет при УКИМ, Горан Марковски, кој во време на изработка на градежното вештачење бил декан на Градежниот факултет, изјави дека градежното вештачење недвосмислено покажало дека во „Пулс“, системот, односно институциите и поединците целосно не функционирале и не биле почитувани ниту стандардите, ниту регулативата, ниту процедурите.

Тимот вештаци од Градежниот факултет, како што рече Марковски, со жалење констатира дека од противпожарна заштита во објектот каде се наоѓала дискотеката „Пулс“ биле преземени нула мерки. Прописни излези за евакуација од објектот имало нула, додека според површината на објектот капацитетот на гости бил 363, а критичната вечер имало над 600 посетители.

Со ова, како што е најавено, треба да заврши изведувањето на докази од Обвинителството.

Судењето го води судијката Дијана Груевска-Илиевска, а обвинението го застапува тим од 15 јавни обвинители.

Во пожарот во дискотеката „Пулс“ во Кочани на 16 март 2025 година за време на настап на групата ДНК, загинаа 63 лица, а над 200 беа повредени. Ова е една од најтешките трагедии во поновата историја на земјата.

The post ОБЈЕКТОТ НА „ПУЛС“ БИЛ НЕЛЕГАЛНО ПРЕНАМЕНЕТ ВО ДИСКОТЕКА Инспекцијата може да му наложи на сопственикот да го врати објектот во првобитна состојба appeared first on plusinfo.mk.

Една година по трагедијата во дискотеката „Пулс“ во Кочани, во која животот го загубија 63 лица, а повеќе од 200 беа повредени, јавноста бара јасен и издржан процес. Но, наместо судењето да внесе чувство дека работите се движат кон разрешница, сѐ погласни стануваат предупредувањата дека судскиот процес може да влезе во правен лавиринт ако обвинението не биде преиспитано навреме. Правната и експертската јавност критикуваат дека предметот е поставен премногу широко, со нејасна причинско-последична врска за дел од обвинетите и со ризик од долга и неизвесна постапка.

Што пишува Маглешов во својата анализа за Призма?

Најновото силно предупредување дојде на 22 март, кога новинарот на Призма, Васко Маглешов, посочи дека во истиот случај фактички се појавуваат две различни правни теории во рамки на едно обвинителство. Според неговата анализа, основните обвинителства тргнуваат од поставка дека сите инволвирани лица може да одговараат за тешки дела против општата сигурност, додека ОЈО ГОКК кај дел од полициските службеници применува поинаков пристап и раздвојува меѓу тешки дела и злоупотреба на службена положба. Маглешов предупреди дека токму ваквото разидување уште сега бара ревизија, за предметот подоцна да не падне на Апелација и да почне одново.

Официјалните потези на обвинителството дополнително ја отворија оваа дилема. Во соопштение од 30 јануари, ОЈО ГОКК објави дека по истрагата за 27 полициски службеници, обвинителен акт е поднесен против 13 лица за тешки дела против општата сигурност, обвинителни предлози против уште 12 за злоупотреба на службена положба и внесување неточни податоци, додека за седуммина истрагата е запрена бидејќи нивните надлежности не биле во директна причинско-последична врска со настанувањето на пожарот, а за дел од дејствијата е утврдена и застареност. Токму ова, според критичарите на обвинението, отвора суштинско прашање: ако за едни важи стандардот на директна врска со последицата, тогаш дали истиот стандард треба да се примени и за дел од обвинетите во главниот предмет.

„Колатерална штета“ на измените на Кривичниот законик?

Дарко Аврамовски од Коалицијата „Сите за правично судење“ деновиве оцени дека предметот за Кочани е „колатерална штета“ од измените на Кривичниот законик. Во интервју за Радио Слободна Европа тој објаснува дека процесот со 35 обвинети лица и три фирми е последица на овие законски измени, затоа што за дел од обвинетите делата за кои би можеле да ги повикаат на одговорност, се веќе застарени. Токму од тие причини процесот е преголем, лошо конципиран уште од старт и тоа влијае и на правичноста и на динамиката на судењето.

Плусинфо во неколку текстови кои беа објавени изминативе недели нотираше дека истата загриженост ја споделуваат повеќе адвокати, професори и правни коментатори.

Критиките на Јанаки Митровски, Владимир Туфегџиќ и на Гордан Калајџиев

Во анализа објавена на 3 март, пренесовме повеќе ставови дека обвинението мора да се темели на индивидуална, а не на „верижна“ или колективно растегната одговорност. Во истиот текст се наведуваат критики од Јанаки Митровски, Владимир Туфегџиќ и Гордан Калајџиев, кои од различни аспекти предупредуваат дека вака поставеното обвинение може тешко да се докажува, да создаде спор за правната конструкција наместо за фактите и на крајот да ги разочара токму семејствата што очекуваат правда.

Според адвокатот Јанаки Митровски за соизвршителство „мора да постои заедничко делување и особен, индивидуален придонес на секој обвинет“, а токму тоа „практично е невозможно да се докаже“ со вака поставено обвинение.

Истата слабост ја нагласува и адвокатот Туфегџиќ, кој според медиумските пишувања поднел и барање за преиспитување и надзор над законитоста на обвинението до надлежните обвинителски инстанци, повикувајќи се на Законот за јавното обвинителство. Според него делот за „верижна одговорност“ е проблематичен и дека за тешки дела против општата сигурност се бара директна причинско-последична врска меѓу непостапувањето и последицата.

Професорот Гордан Калајџиев предупреди дека вакво обвинение „не треба да помине“, бидејќи ќе чини многу, а тоа „е погубно за еден куп семејства“, со цел да го нагласи ризикот дека слаб или преобемен обвинителен акт може да произведе дополнителни разочарувања – токму кај оние што најмногу очекуваат правна разрешница.

Контрадикторностите на кои укажа Петре Шилегов

Во истата линија се и настапите на адвокатот Петре Шилегов, кого Плусинфо го цитираше и на 2 февруари и на 9 март. Тој побара Обвинителството повторно да ја преиспита основаноста за гонење на дел од обвинетите, оценувајќи дека пораките што доаѓаат од самото обвинителство создаваат контрадикторности во однос на ист настан и исти околности.

Судот, според истиот медиум, одговорил дека не може да ја запре постапката без официјално изјаснување од надлежното обвинителство, додека обвинителот посочил дека одлуките на ОЈО ГОКК сè уште не биле конечни во рамки на тој предмет. Тоа практично значи дека дилемата е отворена, но времето за корекција сè уште не е изгубено.

Официјалниот став на Обвинителството, до пред изборот на новиот обвинител пак, останува дека трагедијата е резултат на пропусти во подолг временски период и на конкретни дејствија на повеќе одговорни лица, поради што и е конструиран широк предмет.

Како ќе постапи новиот јавен обвинител Ненад Савески?

Тука се судираат двете линии: обвинителската намера да опфати цел систем на пропусти, и предупредувањата од дел од експертската јавност дека преобемно и правно нерамномерно обвинение може да го забави, ослаби или дури урне процесот во повисоките инстанци. Затоа, пораката што сега сè почесто се слуша е јасна, ревизија на обвинението не заради спас на некого од одговорност, туку заради спас на самиот процес и заради шанса правдата да стигне побрзо, појасно и поодржливо до крај.

Актуелниот јавен обвинител Ненад Савевски, како судија во Кривичниот суд Скопје, неколку недели пред да биде избран, на гостување во Телевизија 24, за предметот за дискотеката „Пулс“ во Кочани рече дека би сакал да има увид како дошло до кривичните дела кои беа квалификувани на товар на обвинетите.

– Секако би имал непосредна средба со обвинителите кои работеле во текот на истрагата, и сега како застапници на обвинението да добијам една јасна претстава како излезе оваа правна квалификација – рече Савевски на гостувањето во телевизијата на 24 февруари годинава.

The post САМО РЕВИЗИЈА НА ОБВИНЕНИЕТО МОЖЕ ДА ГО СПАСИ ПРОЦЕСОТ „ПУЛС“ ОД ЗАПЛЕТКУВАЊЕ На потег е новиот државен обвинител Савески appeared first on plusinfo.mk.

Во текот на денешниот ден на територијата на Македонија се регистрирани вкупно 10 пожари на отворен простор. Според информациите од Центарот за управување со кризи (ЦУК), од нив двa се активни, еден е под контрола, додека седум се целосно изгаснати. Пожарите се различни по природа, од нискостеблеста шума и сува трева, до депонии со ѓубре и стрништа, а интервенирале и противпожарни служби и локални екипи на терен.

Двата активни пожари се наоѓаат во Општина Кочани, на Царев Врв, каде гори нискостеблеста шума и сува трева, како и на патниот правец Тетово – Попова Шапка, во близина на ресторан „Ули“, каде се пали сува трева. Пожарот во Студеничани, на депонијата Дрисла, е ставен под контрола, но останува под надзор на противпожарните служби.

Седумте пожари кои се веќе изгаснати беа лоцирани на различни места низ земјата. Во Шуто Оризари, на улицата Хаџи Јован Шишко, избувна пожар на депонија, додека во Крушево се регистрираа два пожари – еден во село Локвени со сува трева и отпад и друг на градската депонија. Во Ново Село, селото Мокриево гореше сува трева и капини, додека во Велес, во селото Раштани, исто така се појави пожар на сува трева. Во Куманово, селото Колиќко зафати пожар на ѓубре, додека во Липково, селото Лојане, пламна стрниште.

Од ЦУК апелираат граѓаните да бидат внимателни при одење на отворено и да ги следат упатствата на противпожарните служби, особено во области каде се активни пожари или каде терените се суви и лесно запалливи.

The post ДВА ПОЖАРИ СЀ УШТЕ АКТИВНИ Гори во Кочани и во Тетово, состојбата во „Дрисла“ е под контрола appeared first on plusinfo.mk.