Бројот на пациенти со инфламаторните цревни заболувања, како во светот така и во Макеоднија, се зголемува. Речиси 200 заболени на 100.000 жители има во земјава. Често пациентите доаѓаат во многу тежок стадиум на болеста, со изгубена телесна тежина, крвават, анемични, малаксани, постојано земаат боледување, а им е непријатно поради природата на болеста да се јават на лекар. Превентивните прегледи се клучни за раното откривање на овие заболувања, изјави денеска директорката на Универзитетската клиника за гастроентерохепатологија, проф. д-р Мери Трајковска, на одбележувањето на Светскиот ден за подигнување на свеста за инфламаторните цревни заболувања.

Таа посочи дека причината за пораст на тој број, а особено во индустријализираните земји, е што заболувањата се мултифакторијални, имаат влијание генетските фактори и факторите на околината, а најмногу стресот, една имунолошка реакција несоодветна на нормалната имунолошка реакција, практично имунитетот го напаѓа сопствениот организам наместо надворешните фактори.

– Недостига маркетиншка кампања за да се подигне свеста за заболувањето. Не само што луѓето не се свесни за болеста, туку поради природата на болеста, се работи за хронична дијареја и им е непријатно да се јават на лекар. Поминува долго време пред да се јават на лекар, кога се веќе во фаза во која се изнемоштени, кога не може да функционираат и кога веќе е поминат првиот воз, кој треба да се фати за терапијата да биде успешна – рече проф. д-р Трајковска.

Одговарајќи на новинарско прашање за тоа кои превентивни прегледи треба да ги направат луѓето, рече дека честопати им е непријатно бидејќи дијагнозата се воспоставува со ендоскопски преглед на дебелото црево, колоноскопија, со земање биопсија за хистолошка потврда на болеста. Појасни дека прегледот е малку непријатен.

– Луѓето се склони да им веруваат на своите пријатели, роднините, комшиите, меѓутоа може да направат едноставен преглед со земање фецес, измет, да се провери фекалниот калпротектин, кој е биомаркер и е карактеристичен за цревните инфламаторни заболувања. Ако тој биомаркер е зголемен, тогаш има индикација за посериозни натамошни испитувања. Значи, сите што имаат проблем со зачестено празнење на цревата, особено ако забележат слуз и крв во изметот, ако тоа се случува подолг период, повеќе од четирипати на ден и ако притоа им се намалува телесната тежина, треба веднаш да се јават на лекар за да се направат тие примарни лабораториски испитувања, кои не се непријатни, а ќе укажат кои иследувања понатаму треба да се преземат – рече проф. д-р Трајковска.

На овие пациенти им треба голема сестрана поддршка, не само медикаментозна биолошка терапија, туку бараат поддршка и од средината во која живеат, функционираат, бараат психолошка поддршка заради намалување на стресот, а тука има и некои теории за влијанието на цревниот микробиом, бидејќи во нашиот организам живеат милијарди бактерии кои имаат голем учинок во појавата на ова заболување.

– До пред пет-шест години немаше сериозен лек. Го поздравувам Фондот за здравствено осигурување (ФЗО) и Министерството за здравство кои во 2019 година овозможија во Македонија да влезе биолошката терапија која го олесни животот на овие пациенти. Оние кои одговараат на терапијата може да водат нормален живот, своите секојдневни навики да ги имаат како и останатите луѓе, да не бидат оптоварени со болеста и да можат да функционираат како и остатокот од популацијата. Со оваа иницијатива сакаме да ја подигнеме свеста за овие заболувања и да дадеме поддршка на тие кои имаат симптоми, а не се јавуваат на лекар, тоа да го направат што поскоро затоа што влијанието на раната дијагноза е многу важно за исходот на терапијата – истакна проф. д-р Трајковска.

Таа посочи дека сакаат да ги поттикнат пациентите повторно да се координирааат, да направат иницијатива за да може да ја постигнат својата цел за вклучување и нови терапии. Во последните две години, нагласи таа, има повеќе од 15 биолошки лекови кои се во фаза на предклиничко или клиничко истражување.

– Се надевам дека благодарение на Фондот и Владата ќе дојдеме и до овие препарати, затоа што има многу покомплицирани форми на болеста кои бараат повеќекратна терапија, синергистичка терапија од еден или повеќе биолошки лекови заедно – додаде проф. д-р Трајковска.

Генералниот директор на ФЗО, Сашо Клековски рече дека биле едни од иницијаторите да се одбележи Светскиот ден за подигнување на свеста за инфламаторните цревни заболувања.

– Стремежот на Фондот е сите болести, ревматолошки, имунолошки, автонимуни, во која група се и инфламаторните болести на цревата, да направиме обид да се зголеми свесноста за побрзо откривање и да промовираме дека има и нехируршки начин на третман. На неврологија веќе постигнавме целосно вклучување на пациентите со мултиплекс склероза, се вклучуваат и други групи и сметаме дека и тука можеме да направиме подобрување со вклучување на повеќе пациенти со биолошка терапија, а не само со хируршки начин на третман, како што беше досега – додаде Клековски.

Пациент со Кронова болест, кој присуствуваше на одбележувањето на Светскиот ден за подигнување на свеста за инфламаторните цревни заболувања, изјави дека животните обврски за овие пациенти се потешки и посложени.

– Новите современи текови за лекување, третирање на овие пациени, ќе овозможат што подобар живот и сите овие предизвици со кои секојдневно досега сме се соочувале да бидат на многу пониско ниво, односно сѐ да биде подобро и понормално за функционирање – рече пациентот.

Одговарајќи на новинарско прашање тој посочи дека терапиите кои ги примаат тие пациенти овозможуваат квалитетен одговор на болеста и се заблагодари до медицинскиот тим од Клиниката за гастроентерохепатологија за сите третмани.

– Огромен напор вложуваат на Клиниката, а за пациентите битен е и разговорот посебно психо-социјалната поддршка и разбирањето од околината – додаде пациентот.

The post НЕ СЕ СРАМЕТЕ ДА ПОЈДЕТЕ НА ЛЕКАР АКО ИМАТЕ ЧЕСТА ДИЈАРЕЈА Расте бројот на пациенти со инфламаторните цревни заболувања appeared first on plusinfo.mk.

Црниот дроб е втор по големина орган во човечкото тело, веднаш по кожата, и извршува повеќе од 500 витални функции. Тој ги претвора потенцијално внесените токсини во помалку опасен, отпаден материјал, ја прочистува крвта и ги метаболизира хранливите материи и внесените лекови. Исто така го обезбедува телото со многу важни протеини. Но секоја година, илјадници луѓе се погодени од заболување на црниот дроб. Статистиката покажува дека 1,5 милијарди луѓе живеат со хронично заболување на црниот дроб, а годишно во светот од заболувања на црниот дроб умираат 2 милиони луѓе. Раната превенција може да спаси многу од овие животи.

– И покрај регенеративен капацитет, црниот дроб е многу подложен на оштетување од различни фактори, вклучувајќи вирусни инфекции, прекумерно консумирање алкохол, нездрава исхрана, дебелина и изложеност на токсини. Ако не се контролира, заболувањето на црниот дроб може тивко да напредува со текот на времето, што доведува до сериозни компликации како што се цироза, црнодробна слабост, рак на црниот дроб. На овој Светски ден на црниот дроб, императив е да го насочиме вниманието кон важноста на превентивните мерки, рано откривање и навремена интервенција за заштита на здравјето на црниот дроб. Ова вклучува усвојување здрав начин на живот кој вклучува урамнотежена исхрана, редовно вежбање и избегнување на штетни навики како што се прекумерно консумирање алкохол и пушење – истакнува проф. д-р Калина Гривчева Старделова, директорка на Клиниката за гастроентерохепатологија.

Вакцинацијата против вирусот на хепатитис Б, кој е една од главните причини за заболување на црниот дроб во светот, значително го намалува морбидитетот и морталитетот поврзани со црниот дроб. Пристапот до здравствени услуги и програми за скрининг е исто така од клучно значење за да се осигури дека лицата изложени на ризик од заболување на црниот дроб ја добиваат грижата и поддршката што им е потребна.

– Од 2021 година во Центарот за болести на црн дроб на Клиника за гастроентерохепатологија се спроверува национална програма за превенција и рана дијагностика на хепатоцелуларниот карцином. Со ова се превземат активности кон превенција, дијагностика и справување со целокупниот третман на хепатоцелуларниот карцином. Во Програмата за рана детекција и скрининг на малигни заболувања за 2022 година, беа обезбедени средства за набавка на тестови за рана детектиција на овој вид на карцином. Набавката на овие тестови продолжи минатата како и оваа година. На Клиниката исто така достапна е и антивирусна терапија за хепатит Ц, со што се превенира понатамошно оштетување на црниот дроб и развој на уште посериозни заболувања – истакнува Гривчава Старделова.

Во јули 2021 година беше потпишана и Национална декларација за рак на црниот дроб како дел од Европскит план за борба против ракот.

Милан Мишковиќ, потпретседател и програмски менаџер на здружението Хепар Центар Битола и претседател на Националната алијанса на пациентски организации, вели дека од суштинско значење е лидерите во нашата земја да обезбедат сите пациенти со болести на црниот дроб да имаат еднаков пристап до најдобрата индивидуална медицинска нега без оглед на потеклото, начинот на живот и видот на болеста.

– Светскиот ден на црниот дроб не е само прилика да го посочиме значењето на органот кој игра толку важна улога во нашето здравје, туку и време да се промовираат активности и иницијативи за превенција и рана дијагностика. Со обединени напори, како заедница на пациенти, медицински експерти и креатори на политики, можеме да создадеме значителни промени и да ги подобриме условите за здравствена заштита за сите – вели Мишковиќ.

The post ТОЈ Е ВТОР ПО ГОЛЕМИНА ОРГАН ВО ТЕЛОТО Чувајте го, неговата улога е витална appeared first on plusinfo.mk.

Премиерот Димитар Ковачевски, кој денеска, заедно со амбасадорката на САД, Анџела Прајс Агелер, придружуван од министерот за здравство, Фатмир Меџити го посети реновираниот дел на Клиниката за гастроентерохепатологија, истакна дека ова е прво вакво реновирање од како е формирана оваа Клиника по 1950 година. Средствата во висина од над 400.000 долари се обезбедени од Владата на САД, односно од американската Команда за Европа преку Програмата за хуманитарна помош од САД, преку која во тек е проширување и на капацитетите на Клиниката за хематологија, а се проширени капацитетите и се реновирани операциските сали на Клиниката за максилофацијална хирургија.

– Вкупно околу 14 милиони долари во изминатите 13 години е поддршката преку оваа американска програма за хуманитарна помош во здравството, образованието и во менаџирањето со кризи и ова е вистинско пријателство на дело. Тоа е потврда дека САД се наш најголем пријател од првиот ден на независноста до денес и во иднина. Република Северна Македонија е на вистинскиот колосек имаме вистински и искрени пријатели од меѓународниот демократски свет и ете ова значи да се биде кредибилен партнер на меѓународната заедница, рече Ковачевски упатувајќи благодарност до САД за огромната поддршка на земјава во сите важни процеси, но и на конкретно ниво преку проекти од суштинско значење за квалитетот на животот на нашите граѓани.

Тој нагласи дека здравството е врвен приоритет на Владата, за што во 2022 година е издвоен значителен дел средства за опремување со современа апаратури, мамографи, томографи и други апарати за најсовремена дијагностика на поголем број здравствени установи во државата, а меѓу другото, зголемени се и платите на здравствените работници, лекарите, медицинските сестри, капитацијата на матичните лекари.

– Продолжуваме да го унапредуваме здравството со истото темпо. Ние не трошиме за милионски жални врби, галии, стиропори и слични работи коишто ги гледавме во минатото, ние ги насочуваме парите кај граѓаните, се грижиме за потребите на граѓаните. Наша цел е европски квалитет на живот на граѓаните и со вистински пријатели како што се САД и ЕУ, Владата на Република Северна Македонија верува и јас лично верувам дека нема недостижна цел, порача Ковачевски упатувајќи благодарност и до ректорот на УКИМ, докторите и професори на оваа Клиника за нивната посветеност и професионален ангажман.

Министерот за здравство, Фатмир Меџити потенцира дека се посветени на подобрување на здравствениот систем во државата преку инвестирање во овој систем, за што во тек се инвестиции за обнова на здравствени проекти, кадар и за унапредување на условите за вработените. Меѓу главните приоритети се и покачувањето на платите и регулирање на статусот на здравствените работници, а се со цел граѓаните да добијат здравство какво што заслужуваат, да се врати довербата на пациентите и системот дефинитивно да функционира.

Амбасадорката на САД во земјата Агелер потенцира дека овој проект донација од 400.000 долари на Европската команда на војската на САД е само уште еден пример на долгорочната посветеност да и помогнеме на Северна Македонија да изгради доверба и квалитет во нејзините институции.

– Во последните 10 години преку Европската команда на војската на САД обезбедивме преку 13,5 милиони долари за да го подобриме квалтитетот на животот на граѓаните на оваа земја. Преку проекти како овие САД и Македонија заедно ќе продолжат да градат поздрави, посилни и многу попресперитени земји, порача амбасадорката Агелер.

Директорката на Клиниката, проф. д-р Калина Гривчева-Старделова изрази задоволство од завршувањето на реновирањето на дел од Клиниката, кое е прво темелно реновирање по период од над 60 години, со што пациентите и вработените во оваа клиника добиваат модерен простор кој целосно ги задоволува највисоките стандарди за медицински третман и нега. Таа нагласи дека паралелно со реновирањето се одвивала и работата на Клиниката при што со посветеноста на секој еден вработен биле реализирани меѓу другото 18.118 амбулантски прегледи и над 2300 хоспитализации на пациенти.

– Пред неполни четири години го реновиравме третиот крак на Клиниката, а во амбулантниот дел го отворивме Центарот за болести на црниот дроб, што значи дека денес означуваме комплетно завршување на еден процес и може да се каже дека имаме најсовремени услови за работа што одговараат на терциерна здравствена установа која е единствена од ваков вид во земјава. Но, имаме многу планови за во иднина и нема да останеме на ова, порача Гривчева – Старделова.

Клиниката со помош на американската донација е реновирана од корен со поставување на водоводна и нова електрична инсталација и систем за вентилација и центарален кислород, а обновени се и работните простории на медицинскиот персонал.

The post ПРВО ТЕМЕЛНО РЕНОВИРАЊЕ ПО 60 ГОДИНИ Со американска донација дел од Клиниката за гастроентерохепатологија доби нов изглед appeared first on plusinfo.mk.

Со радиофреквентна аблација, која е ендоскопска техника, променетото ткиво се изложува на топлинска енергија со што се уништува тоа ткиво.

Проф. д-р Калина Гривчева Старделова, директорка на Клиниката за гастроентерохепатологија објасни дека воведувањето на новата метода носи големи придобивки за пациентите, како и заштеда за јавното здравство.

– Од сега пациентите ќе може да ги третираме во нашата земја, што за нив значи помали трошоци и побрзо добивање на потребната здравствена услуга, а за здравствениот систем е значајна заштеда, затоа што една ваква интервенција во странство чини и до 15.000 евра, а во некои случаи е потребно и повторување на интервенцијата. Значајно за Клиниката за гастроентерохепатологија е и тоа што има можност да стане регионален центар за овие интервенции, што може да даде значаен инпут во нејзината финансиска кондиција и можностите за понатамошен развој и унапредување на портфолиото на здравствените услуги – истакна проф. д-р Гривчева Старделова.

Постапката се изведува во амбулантски услови од страна на гастроентеролог, а пациентот е под анестезија. Денешните интервенции ги направи светски познатиот гастроентерохепатолог д-р Иво Бошкоски, кој е по потекло од нашата држава, а работи на Католичкиот универзитет, во чии рамки функционира поликлиниката „Агостино Џемели“ во Рим, Италија, во соработка со лекари од Клиниката за гастроентерохепатологија.

– При изведување на оваа процедура се користи електрода монтирана на ендоскоп за да се испорача топлинска енергија директно до променетото ткиво на хранопроводот. Гастроентерологот бира соодветна електрода за процедурата, што зависи од должината и количината на Баретовиот хранопровод. Овој процес обично трае околу 10 минути и резултира со аблација на ткивото. Во период од шест до осум недели, ткивото кое е третирано се заменува со нормална слузница – истакна д-р Бошкоски.

Баретов хранопровод настанува како компликација од долготрајна повторувачка гастроезофагеалена рефлуксна болест, односно оштета на хранопроводот предизвикана од враќање на киселината од желудникот во хранопроводот. Со цел унапредување на третманот на оваа состојба на Клиниката за гастроентерохепатологија се воведува и уште една метода за мерење на pH во хранопроводот и неговото движење со што може да се обезбедат точни информации за присуство на рефлуксната болест.

Континуираната 24-часовна pH-метрија е стандарден метод во гастроентерологијата кој овозможува директно и квантитативно мониторирање на киселинскиот рефлукс и дава показатели за одредување на соодветниот начин на третман.

The post ВИ СЕ ВРАЌА КИСЕЛИНАТА ОД ЖЕЛУДНИКОТ? Нова метода за третман на хранопроводот на Гастро appeared first on plusinfo.mk.