Смртта на 32-годишниот Кристијан Јосип Периш во психијатриската клиника „Свети Иван“ во загрепскиот Јанкомир прерасна во еден од најголемите здравствени и правосудни скандали во Хрватска.

Периш почина на 21 октомври, а речиси 3 недели подоцна, откако во јавноста протече шокантна снимка од болничкиот видеонадзор, беа уапсени четворица медицински техничари осомничени за тешко убиство. На снимката се гледа како четворицата го тепаат Периш, му ставаат перница врз главата и со колената го притискаат врз вратот!

Случајот отвори сериозни прашања за начинот на кој бил третиран пациентот, за одговорноста на болничкото раководство, но и за односот кон лицата кои бараат психијатриска помош. Дополнителен потрес предизвика и веста дека неговата вереница, по неговата смрт, го изгубила нивното неродено дете.

Периш, поранешен атлетичар, дипломиран кинезиолог и долгогодишен тренер во спортот соборување рака, бил хоспитализиран на 21 октомври откако неговото семејство побарало медицинска помош поради неговата влошена психичка состојба, стравови и параноични мисли. Според семејството, тој не бил агресивен и мирно пристигнал со возило на Итната медицинска помош, во придружба на полицијата.

Сепак, Периш се плашел од болницата „Свети Иван“, бидејќи, како што подоцна изјавија неговите блиски, пред околу 7 години во истата установа наводно доживеал физичко насилство и давење. За тој настан семејството дознало дури по неговата смрт, од лице на кое Кристијан му се доверил.

На денот на убиството, полицијата двапати интервенирала во болницата. При првата интервенција, околу 15:23 часот, Периш мирно седел на клупа и, според полициските информации, не пружал отпор ниту бил агресивен. При второто доаѓање, околу 17 часот, полицајците го затекнале врзан за болничкиот кревет, видно зашеметен и дезориентиран. Медицинскиот персонал им соопштил дека пациентот е смирен и дека нема потреба од понатамошно полициско постапување.

Семејството и адвокатот Леон Зрниќ подоцна ги оспорија тврдењата дека Периш бил под дејство на наркотични средства или дека претставувал сериозна закана.

Клучниот доказ во истрагата е снимката од болничкиот видеонадзор, која ги регистрирала последните минути од животот на Периш. Според описот на снимката објавен во хрватските медиуми, настаните се случувале околу 20 часот, во период од нешто повеќе од 8 минути. На снимката се гледа како четворица медицински техничари физички го притискаат пациентот на креветот, додека е делумно врзан со ремени. Еден од нив му става перница на лицето, а други техничари со колената му го притискаат вратот. На снимката се гледа и лекарка која стои и не презема ништо.

Според полицискиот опис, употребата на сила продолжила и откако Периш престанал да дава отпор. По интервенцијата, персоналот забележал дека тој е без свест, по што започнала реанимација. И покрај обидите за оживување, Периш починал. Снимката, чии детали ги објавија хрватските медиуми, предизвика огромен шок и гнев во јавноста.

Особено вознемирувачки се наводите на семејството за она што се случувало по смртта. На блиските првично им било кажано дека Периш починал од срцева слабост. Семејството тврди дека кога конечно го виделе неговото тело, забележале модринки на вратот, рани под усната и траги од крв околу устата. Според нив, лекарка им објаснила дека повредите се последица од интубацијата, но тие не го прифатиле тоа објаснување. Семејството дополнително се вознемирило поради тоа што болницата не ги известила директно за смртта, туку прво ја контактирала свршеницата на Кристијан. Неговите блиски веднаш се посомневале дека станува збор за насилна смрт.

На 7 ноември, полицијата ги уапси четворицата медицински техничари, на возраст од 22, 28, 32 и 52 години, поради сомнение за тешко убиство. Според Обвинителството, тие постапувале спротивно на правилата на медицинската струка и на должната грижа кон ранлив пациент, нанесувајќи му повеќе повреди со употреба на физичка сила, од кои тој починал.

На осомничените им беше одреден едномесечен истражен притвор поради опасност од влијание врз сведоци, уништување докази и особено тешките околности на делото. Болницата покрена постапка за вонреден отказ на сите четворица.

Сепак, конечната причина за смртта сè уште не е утврдена, а се очекуваат дополнителни судско-медицински и токсиколошки вештачења.

Скандалот доби нова димензија кога дел од медицинските работници во клиниката застанаа во одбрана на уапсените колеги. На 9 ноември, околу стотина вработени се собраа на протест пред болницата во Јанкомир, изразувајќи незадоволство поради апсењата. Тие ги опишаа техничарите како искусни и квалитетни работници, нагласувајќи дека психијатриските одделенија се опасни и дека персоналот секојдневно се соочува со ризици при работа со агресивни пациенти.

Синдикалниот претставник Аријан Јариќ Дауенхауер порача дека не смее да се дозволи колегите да бидат прогласени за убијци пред завршување на истрагата. Вработените побараа и подобри услови за работа, обуки за хумано совладување пациенти, ангажирање обезбедување и формирање специјален тим за итни интервенции.

Овој протест предизвика дополнителни реакции во јавноста, бидејќи се случуваше во момент кога семејството на Периш бара одговорност за смртта на својот близок.

Најтешката нова информација ја објавија хрватските медиуми денеска, 10 ноември. Семејството на Кристијан потврди дека неговата вереница, со која очекувале дете, пред неколку дена ја изгубила бременоста.

„Убија уште една личност“, порачаа неговите блиски, кои сметаат дека смртта на Кристијан довела до уште една непоправлива трагедија.

Засега не е утврдено дали постои медицинска причинско-последична врска меѓу смртта на Периш и загубата на бебето.

Семејството, кое вели дека дополнително е трауматизирано и од објавувањето фотографии во медиумите, побарало и медицинска помош. Неговите блиски бараат одговорност од сите лица кои биле присутни за време на интервенцијата, не само од техничарите кои директно употребувале сила.

Случајот предизвика и институционален скандал. Министерството за здравство побара итен и целосен извештај од Градот Загреб, кој е основач на клиниката, за околностите на смртта и постапувањето на болничкото раководство. Особено спорно е што Министерството официјалната пријава за несаканиот настан со смртен исход ја добило дури на 9 ноември, речиси 3 недели по смртта. Семејството, пак, тврди дека кривична пријава поднело уште на 23 октомври, а адвокатот веднаш побарал да се зачуваат снимките од видеонадзорот. Според медиумските информации, полицијата ги презела снимките на 6 ноември, откако директорката на клиниката ги прегледала и забележала неправилности.

The post СМРТ ВО ПСИХИЈАТРИСКА БОЛНИЦА, ВИДЕО КОЕ ЈА ШОКИРАШЕ ХРВАТСКА Четворица техничари осомничени за тешко убиство на пациентот Кристијан Периш appeared first on plusinfo.mk.