Многумина ме прашуваат зошто упорно возвраќам на соопштенијата што Кланот Дубаи во името на СДСМ ги лиферува во јавноста речиси секојдневно, на тие памфлети напишани од бездарници во класичен информерски денунцијантски стил, тие жестоки филипики со кои неколку безделници на Бихаќка решиле да бијат битка со мене.

Добро е тоа прашање – навистина, зошто им одговарам?

Зошто го правам тоа, кога и врапците знаат дека ова е акција на неколку будалетинки, кои сега случајно ја водат партијата од пораз во пораз, покажувајќи еве и на ваков начин, дека освен за кавги и за кампањи за дискредитација, не се способни за ништо друго. Најмалку да креираат идеи и политики. Зошто се тепам со една багра, којашто секојдневно ја уништува ионака драстично намалената доверба во СДСМ?

Будалите имаат право слободно да се глупираат

Искрено, немам одговор на тоа прашање што повеќето од вас ќе го разберат како разумен и логичен.

Ако ви кажам, на пример, дека ја почитувам слободата на говорот на баграта, нема да ми верувате. Па сепак, по десеттина „соопштенија за јавноста“, во коишто Штабот на будалите на Бихаќка јавно изрече десетици груби навреди и тешки клевети на моја сметка – а такви има и во последната нивна филипика – јас никого не тужев, не поднесов кривична пријава, не напишав претставка до никого, не побарав поддршка од новинарските здруженија и од моите колеги, не им се јавив дури ни на вистинските, а камоли на лажните пријатели.

Не сакам никој да ме брани и да го ограничи правото на Кланот Дубаи да ја води оваа глупава и губитничка војна со мене. Тие некадарници сигурно имаат добри причини поради кои ме сметаат за свој алфа-противник. Не сакам да се ограничи ничија слобода на говорот.

Да, будалите имаат право слободно да се глупираат!

(Последнава реченица е мој теоретски придонес кон разбирањето и толкувањето на највисоките стандарди на човековите права и слободи.)

Никако не можат да ми го најдат оружјето…

Затоа, одлучив на „соопштенијата“ на СДСМ да одговарам со колумни. Жестината на тие колумни и мојот вокабулар морав да го приспособам на категоријалниот апарат и на речникот што тие глупандери единствено го разбираат. Тоа беше предуслов да воспоставиме прооден комуникациски канал, ако ме разбирате.

Мислам, се потрудив јас и поинаку … На пример, се обидов да им укажам што значи принципот „на книга со книга“. Малку фалеше да ме пријават во Библиотеката „Браќа Миладиновци“ за грабеж на книги и за уништување инвентар.

Се обидов да ги предупредам дека ги чекам „на нишан“, што ќе рече со втренчено внимание и спремен за борба. А будалите поднеле пријава во полиција, во која тврдат дека поседувам оружје со кое наводно им се заканувам, поради што бараат да бидам повикан на некаков „службен разговор“ во полиција и да бидат преземени „други законски мерки“ за да бидам спречен да ja „реализирам заканата“.

Хахахахаха!

Толку се ненормални, што и во најновото соопштение ја тркалаат таа лага за моето „оружје“, кое наводно сум го криел некаде – навистина тоа го напишале, одете таму на нивниот сајт и прочитајте! – па јас сум требало да појдам во полиција да кажам каде е.

Ако се сеќавате, јас јавно ги повикав министерот за внатрешни работи Панче Тошковски и директорот на БЈБ Александар Јанев да упатат полициска екипа да изврши преглед на станот во кој живеам и на сите други места на кои будалите од Бихаќка се сомневаат дека чувам оружје, со кое наводно им се заканувам. Во оваа прилика повторно ја повикувам полицијата да го стори истото, а повикувам и претставник на СДСМ да им се придружи. Ветувам, ќе ги пречекам домаќински, празнично, со виски и апетисани.

Но, нека извини Кланот Дубаи, навистина не можам да си дозволам да појдам во полиција и таму да ги убедувам луѓето дека не поседувам никакво оружје и дека никому не му се заканувам. Полицајците си имаат работа. А освен тоа, со право ќе ме сметаат за луд, бидејќи сепак не е можно да се неписмени како авторите на филипиките од Бихаќка.

За гомнарите – само гомнарска цевка!

Таа багра таму, на Бихаќка, едноставно, не разбира ништо!

Мојот разговор со нив не може да се води на ниво на елементарна пристојност, нашите копја не можат да се вкрстат во рицарски стил, бидејќи таа багра не може да се препознае во еден таков дискурс.

Во еден добар македонски филм има една ваква, извонредна реплика (малку граматички ја прилагодив за оваа прилика, но суштината останува иста): „За гомнарите – само гомнарска цевка!“

Така е тоа со вакви нелуѓе: „You can’t live with them, you can’t shoot them“.

(Тука сосема куса дигресија: Пред да поднесат нова пријава против мене до полицијата за наводно „загрозување на сигурноста“, после овие две хумористично-сатирични реплики што ги цитирав, ги советувам авторите на глупавите филипики малку да истражат и да се едуцираат. Да ги најдат авторите, контекстите, значењата. Да не би после пак да ги потсетуваат полицајците на што се заколнале, а тие самите да заборавиле колку се необразовани и неначитани.)

Ми ја бараат новинарската легитимација, цел ден ја барам и не можам да ја најдам!

Како и да е, во овој мој одговор на ова најново соопштение на СДСМ, ќе се обидам малку да бидам сериозен и да го подигнам нивото на расправата со СДСМ. Малку, малкуцка, не премногу, бидејќи не сакам да ризикувам повторно да не се разбереме. Ќе бидам малку пофин, не заради воспалените југенди од Штабот на будалите, туку заради илјадниците искрени и пристојни членови и симпатизери на оваа партија и особено заради многу видни личности од СДСМ, поранешни и сегашни, со кои јас никогаш не сум имал вакви кавги. И кои сега веројатно се чудат што е работава …

Уште во првата реченица на нивното најново соопштение, во кое повторно ме нарекуваат „Фрљо“ и „Фрфљо“ (плус ступидно лажат дека самиот сум се нарекувал така), Кланот Дубаи открива зошто неговата испостава на Бихаќка досега напиша четири (4) претставки против мене до Здружението на новинарите на Македонија, а после овој мој одговор сигурно ќе ја напишат и петтата по ред, јубилејната. Кланот тврди дека – пази ваму! – јас сум се криел зад новинарска легитимација и зад слободата на говорот.

Значи, јасна е целта на нивните претставки до ЗНМ – овие будали сакаат да ми биде одземена новинарската легитимација.

Откако го прочитав ова, дома направив паника. Жено, кај ми е легитимацијата? Она ладно: која легитимација? Како мори која, таа новинарската? Она дрско: најди си ја сам, таму кај што си ја оставил! Јас не знам сабајле што сум појадувал, а не па легитимацијата кај ми е! Она како откровение: а што ќе ти е таа легитимација?

Абе жена ако не те опамети, кој друг … Навистина, што ќе ми е таа легитимација? Членарина ионака плаќам од изборно до изборно собрание. Попусти за воз и за авиони не користам. Добро, не дека таа легитимација не ми значи и дека нема да ја најдам, еве до Божиќ ќе ја најдам, ветувам. Но, како не разбираат овие од СДСМ дека статусот новинар ни формално-правно, а ни репутациски, не се стекнува со новинарската легитимација од ЗНМ?

Со измените на Законот за медиуми, тоа прашање е регулирано од формално-правен аспект. И нема врска со никаква легитимација. Суштински, пак, репутацијата и професионалниот углед во нашата професија се стекнува со дела, со години и години практикување на слободата на говорот, а во мојот случај и со создавање новинарски производи коишто им овозможиле на стотици истакнати јавни личности во Македонија во овие три децении слободно да го изразуваат своето мислење.

„Дневник“, „Шпиц“, „Слободен печат“ и Плусинфо се мојата легитимација!

Ќе рече пак Зоќе дека сум суетен, ама морам да им го кажам на будалите она што паметните го знаат …

Јас сум еден од тројцата основачи на дневниот весник „Дневник“ и негов прв и долгогодишен главен уредник. Се надевам дека не треба да објаснувам што значеше првиот независен дневен весник за развојот на македонската демократија и за човековите слободи и права. Бев основач и на популарниот дневен весник „Шпиц“. Го основав и дневниот весник „Слободен печат“, чиј критички дискурс кон власта на Никола Груевски беше еден од важните фактори за поттикнување на граѓанските протести и за доаѓањето на Зоран Заев на власт (откако тој претходно ја киднапира Шарената револуција и граѓанскиот сектор го прогласи за „шуто и рогато“). Јас сум ко-основач и на влијателниот интернет портал Плусинфо.

Човек со таква легитимација – со кариера и со достигнувања како моите – навистина нема потреба да се крие зад каква било новинарска легитимација!

Кланот Дубаи врши јавен притисок врз ЗНМ и врз полицијата

Во секоја претставка до ЗНМ, Кланот Дубаи, преку својата испостава на Бихаќка, врши јавен притисок, повикувајќи ги членовите на Советот на честа и раководните луѓе на ЗНМ по секоја цена најстрого да го осудат моето поведение. Сега ја повикуваат и „целата јавност“ да го стори тоа. Тој тон јасно покажува дека луѓето од Штабот на будалите ги сметаат ЗНМ и „целата јавност“ за свој суд, а себеси за прокуратори чии обвиненија не смеат да бидат отфрлени.

(Пак нужна дигресија: за да нема претставка до не знам кого, ова „прокуратор“ нема врска со секс, зборот значи обвинител, а го спомнувам како асоцијација со една историска приказна, која будалите не ја знаат, а јас немам волја сега да им ја раскажувам.)

За разлика од нив, јас, откако од ЗНМ бев формално известен за две претставки од СДСМ против мене, среде празници седнав и ја напишав мојата писмена одбрана, изложувајќи сериозни аргументи, повикувајќи се на ценети извори и на релевантни толкувања на прашањето на балансот меѓу принципот на неприкосновеност на слободата на говорот, потребата да се заштитат некои други важни општествени вредности и императивот да се заштити јавната дебата како врвна вредност во цивилизираните демократски општества.

За разлика од начинот на кој будалите пак ја повикуваат полицијата да преземе мерки на силна полициска репресија против мене – замислете, ги потсетуваат полицајците на што се заколнале! – јас одлучно и пријателски ги известив најодговорните луѓе во МВР дека слободно можат да ме уапсат и да ме приведат на тој нивен „службен разговор“ и ги поканив да дојдат во мојот дом и да извршат преглед (не можам да им дозволам да извршат претрес без налог, бидејќи така сите заеднички ќе го прекршиме законот).

Пилето им пее рано насабајле …

И после сè, СДСМ тврди дека јас сум бил „фрустриран губитник“.

Молам?!

Губитник знаеме кој е – оваа екипа на Бихаќка ги губи сите можни избори. Таа победува само во СДСМ, бидејќи има целосна контрола над електронските картички за гласање. Тоа е дигитализирана партија, не е заебанција, како што изгледа.

Но, ве молам, проценете сами, кој овде навистина ви личи „фрустриран“?

Ако сум јас таков каков што ме опишува Штабот на будалите – цитирам: фрустриран губитник, плукач на отрови, платеник, кукавица, кловн итн. – тоа би значело дека она што го работам не вреди ништо, дека мојот збор нема тежина и дека моето влијание во јавноста е минорно.

Ако е така, зошто тогаш СДСМ кукурика како засипнато петле рано насабајле?

Чуму тие ежедневни филипики против еден новинар кој бил „срам за својата професија“?

Од каде таа опседнатост со мојата маленкост и со моето, како што велат гомнарите, фрфљање?

Би помогнало ли ако јас им стегнам една претставка до Бардовци?

Абе другарчиња, фрфљал јас или не, ве растурам ко бугарска скупштина!

Парче ве правам!

Ѕрцките ви ги вадам!

Мир немате од мене и кога молчам, а не па кога уста ќе отворам!

Не можете да се соземете ни за празник ни за делник!

Дежурате ко ненормални, бдеете над секој мој збор, над секоја запирка!

Плачете – земете му ја легитимацијата, викнете го во полиција, осудете го!

Разоткриени сте? Не бе, одамна сте разоткриени. Сега сте само разочарани и збунети.

Сега шетате со соблечени гаќи и морализирате ко баби седнати на троношци.

И дури сега сте опасни, човече! Опасни по себе! Опасни по СДСМ!

Не знам што да правам со вас … А би помогнало ли јас да ви стегнам една претставка до Бардовци?

The post Фрфљам и го двојам плевелот од житото во СДСМ, го тресам Кланот Дубаи, ја ништам баграта на Бихаќка! appeared first on plusinfo.mk.

По нападите врз истакнати поранешни членови на СДСМ, кои критички се изразија кон раководството на партијата и кон нејзините актуелни политики, па дури некои од нив, како ексградоначалникот Петре Шилегов, побараа оставка од лидерот Филипче, сега Центарот за информации на СДСМ се нафрли со обвинувања и кон Јован Деспотовски, истакнат партиски кадар и поранешен претендент за претседателската функција во СДСМ. Освен врз Деспотовски, прес центарот на СДСМ се нафрла со критики и врз порталот Дојче Веле, и развива теории на конспирација за наводен заговор против СДСМ, инспириран од Србија!?

Имено, во авторска анализа на Дојче Веле, под наслов „Како речникот на СДСМ го убива имиџот на партијата“, авторката, долгогодишната новинарска и колумнистка Катерина Блажевска, објавува и изјава на Деспотовски, во која тој јасно и отворено го критикува агресивниот и чуден начин со кој партијата комуницира со јавноста и новинарите во последно време, оценувајќи дека тој јазик што се користи не доликува на сериозна партија како СДСМ.

– Во право сте кога забележувате промени во последно време. За жал, не се само новинарите, односно медиумите, тие што генерално го забележуваат тоа, туку и поширок круг на наши сограѓани. Нема да коментирам одделни случаи, изнесени политички ставови, ниту „цели“ на овие соопштенија. Но, отворено ќе кажам дека јазикот што сега се користи, помалку личи на оној СДСМ, кој сите искрени членови и поддржувачи, па и пошироката јавност сака да го види повторно – вели Деспотовски.

Тој јасно вели дека ова не е вистинскиот пристап кон јавноста за враќање на довербата кај граѓаните во СДСМ.

По овие изјави Деспотоски се најде на удар и на лидерот Венко Филипче, кој на денешниот брифинг со новинарите пред седницата за пратенички прашања, се пожали дека „во момент кога СДСМ ги открива криминалните зделки на власта, ВМРО-ДПМНЕ спроведува организирана акција со обиди за уривање на Социјалдемократскиот сојуз на Македонија одвнатре.“

Фрчат обвинувања кон сите страни 

Не спомнувајќи го Деспотоски по име, Филипче рече:

– Наши поранешни функционери, еден поранешен функционер, други двајца, претходно едниот којшто не се појавил во јавноста со години, некои луѓе коишто не се веќе во партијата, туку заминале во предавничката ЗНАМ, сега наеднаш во овој момент излегуваат и се активираат и се гласни на јавните мрежи – рече Филипче.

Лидерот на СДСМ изнесе обвинувања дека зад сето тоа стои ВМРО-ДПМНЕ, па дури и посочи „можни финансиери“, инволвирајќи по име и презиме правен субјект – банка.

– Тоа што во меѓувреме го дознавме е дека сето ова е организирано од ВМРО-ДПМНЕ и дека целиот проект го води ВМРО-ДПМНЕ. Тие се налогодавачи, финансиери. Во позадина, еден од можните финансиери на целиот овој проект е Алта банка – банката која дојде од Србија со сомнителен капитал, на која нашите власти ѝ ги отворија ширум вратите, а во европските земји не ѝ дозволуваат влез поради сомнително потекло на капитал – рече Филипче.

СДСМ верува дека е жртва на заговор за уривање од внатре

Истата теза – дека постои некаква конспирација за уривање на „СДСМ одвнатре“, до крајни граници го разви подоцна со соопштение и Центарот за комуникации на СДСМ, токму изворот на тој „новоговор“ во односите на СДСМ со јавноста, кој ги буни и новинарите и читателите, а сѐ повеќе ги загрижува и новинарските здруженија.

Во соопштението на СДСМ се пука „наголемо“ па се вели дека „се води кампања за обид за дестабилизација на СДСМ одвнатре, од страна на ВМРО, а координирана од центарот на СНС (Српска напредна странка, владејачката партија во Србија).

„Денес имаме и посебен пример: еден наш член, по неуспешното вчерашно медиумско обраќање, ја продолжува кампањата во еден значаен и релевантен медиум со тврдења дека СДСМ го сменил начинот на комуникација и дека тоа не му прилега. Неполни две минути по овој текст, веќе излегува однапред подготвен текст на истата тема (сега целосно видливо) на еден од познатите портали, на Геро. Значи или овој наш член одговорите ги пратил и кај Геро или во координација со него се пишувани неговите одговори. На овој начин тие самите го нарушија и угледот на релевантниот медиум каде што излезе авторскиот текст. Да не побрзаа и да почекаа барем малку, еден час по објавата на првиот текст, некој можеби и ќе поверуваше дека такво нешто е можно. Вака, сè е кристално јасно. Невозможно е да се напише толку обемен текст за толку кратко време, а уште помалку да се уреди и објави на портал. Сами се разоткрија – со сопствена грешка во чекорите“, заклучува Центарот на СДСМ.

Ова за центарот е големо „разоткривање“, не помислувајќи дека она што го пишуваше Плусинфо, а сега и Дојче Веле не мора да е резултат на никаков договор, или конспирација, туку на простиот факт дека секој нормален новинар, па и читател, денеска не може да се изначуди на комплетното бунило и манијакалност што излегува од соопштенијата на СДСМ, па смета дека тоа е вредно за новинарско тематизирање и анализа.

„Српскиот свет“ – секојдневна инспирација на македонската опозициска партија

Уште еден елемент од новата пиар стратегија на СДСМ, која комплетно ја буни јавноста е тоа постојано кокетирање со Србија, српски свет и вовлекување на српскиот претседател Вучиќ во приказната.

Еве што рече Филипче на денешниот брифинг со новинарите:

„Очигледна е соработката на оваа власт со српската власт на Александар Вучиќ и на СНС, односно лично со него. На граѓаните веќе им паѓа во очи како премиерот Мицкоски сака да го имитира претседателот Вучиќ, во движењата, во стоењето, во начинот на давање изјави и во концептите на политиката. Прекарот веќе го доби, малиот Вучиќ. Тоа што го прави Вучиќ во Србија, премиерот Мицкоски се обидува да го направи кај нас – еден човек да ја претставува целата политика и целата партија, а сите други да ги извршуваат неговите наредби.“

Опсесијата со Србија и со СНС кај СДСМ можеше да се забележи и кај последните напади врз нивниот поранешен истапкнат член Саша Богдановиќ. СДСМ со партиско соопштение распука по поранешниот градоначалник на Центар, кој во последно време го критикува раководството на СДСМ, нарекуваќи го „Координатор на СНС за Македонија“ кој „ја продал партијата за пари“.

Забележувајќи дека нешто не е во ред со партиската пропагандна машина, Богдановиќ возврати:

„Очигледно некој треба да му го одземе пристапот од Фејсбук страницата и веб страната на СДСМ и на тој што ги пишува соопштенијата затоа што ако има лични фрустрации од некого не треба да ја користи партијата за свои пресметки.“

Овие избрзани и непромислени напади на СДСМ врз медиуми, и свои поранешни членови, познавачите на приликите во опозициската партија ги врзуваат со нервозата што владее во врвот на партијата, во пресрет на партискиот конгрес најавен за 24 јануари.

Поранешен истакнат член на раководството на СДСМ вака за Плусинфо ја коментира актуелната кампања на СДСМ:

– Духовниот отец на Венко, Заев Џонг Ил, пред пет години, по повод годишнината од „црниот понеделник“ беседеше дека слободата и демократијата немаат цена. Се разбира, неговите лаги, лицемерни изјави, до ден денес не можеме да ги изброиме. Сега Венко Јонг Ун, во својство на стечаен управник делегиран од „ростерот“ на Муртино, во стилот на Никола Груевски, кој говореше за ножиња во грбот и црташе мети на новинарите и политичките неистомисленици, го започна ловот на вештерки. Демек, по налог на Мицкоски и со пари на Вучиќ, му се спремал пуч во партијата, затоа што почнал да ги разоткрива криминалите на актуелната власт. Пфффф, стомачните ме болат од смеење. Венко откривал криминал на власта?!!! Како велеше онаа народната – најчесто лоповот е најгласен и вика држете го лоповот. Како тргнал, ќе заврши како последниот Мохиканец кој последен ќе разбере дека и тој и неговиот духовен отец неповратно стануваат за искрените и чесни партиски членови најомразените ликови, кои криејќи се зад симболите на СДСМ, единствено се борат за заштита не нелегално стекнатото богатство бескрупулозно жртвувајќи ги дури и нивните лојалисти.

Како речникот на СДСМ го убива имиџот на партијата

The post СДСМ ВО ПАНИКА ПРЕТКОНГРЕСНО СЕ ПРЕСМЕТУВА СО СВОИ ЧЛЕНОВИ По Шиповиќ и Богдановиќ, на тапет дојде и Деспотовски appeared first on plusinfo.mk.