Последниот медиумски настап на Љубомир Фрчкоски, највлијателниот стратег во опкружувањето на Венко Филипче, лидерот во обид, е многу важен, бидејќи тој целосно ја открива стратегијата на овој СДСМ како во догледно време да ја приграби власта.

Во куси црти, ќе ви го опишам и ќе го прокоментирам тој план, чиишто контури Фрчкоски Постариот јасно ги исцрта во интервјуто на Инфомакс. Не за друго, туку да остане запишано …

Бидејќи е јасно дека овој и ваков СДСМ (партија во распаѓање) нема капацитет и потенцијал да го победи ВМРО-ДПМНЕ, со волјата на народот, на регуларни парламентарни избори, главната задача на Бихаќка сега ќе биде да ги лови „криминалите‘ и „притисоците“ на партијата на власт, сето тоа да го „документира“ и таа „документација“ да ја доставува до Американската амбасада.

Америчката, му се извинувам на „граџанството“ за лапсусот.

Тој денунцијантски материјал треба да им послужи на Американците, кога ќе ги креираат своите нови „црни листи“ за регионот Западен Балкан, да не ја заборават Македонија. Бихаќка мора да се потруди на тие листи да се најдат првите луѓе на ВМРО-ДПМНЕ и нивните највлијателни поддржувачи од светот на бизнисот и од другите сфери на општествениот живот.

Можеби и целиот македонски народ – минус „граџанството“, јасно – ќе мора да се најде на некоја „црна листа“.

И така, ВМРО-ДПМНЕ ќе победува на избори, ама СДСМ ќе победува по странските амбасади.

Посебно во Америчката, нели.

Која, да потсетам, според пропагандистите на СДСМ, требаше целосно да го изгуби влијанието во Македонија, како последица на „повлекувањето“ на САД од нашиот регион, што тие го најавуваа. Некои пропагандисти на СДСМ дури предвидоа дека амбасадата на САД во Скопје ќе биде затворена.

Да бе, оваа истава амбасада во која сега ќе доставуваат „документи“. Што е, не ви се верува?

И после многубројните сеанси „документирање“, како што велеше онаа јасновитката што своевремено гаташе на телевизија на писма од обожавателите – нека документа ќе да се среде!

Кога сме веќе кај прашањето на пропагандата и на стратегијата на СДСМ, можеби не е лошо да се размисли идејата на Фрчкоски да ја прифати и ВМРО-ДПМНЕ. Ако ништо друго, треба да се испoштуе нашиот доскорешен амбасадор во ООН во Њујорк (за Вашингтон не доби агреман). Освен тоа, таа идеја со „документирањето“ и не е толку глупава како што изгледа, човече!

Можеби и ВМРО-ДПМНЕ треба да документира и сите, а најмногу Американската амбасада, документирано да ги потсети кој отворено навиваше за Џо Бајден и за неговата администрација пред и за време на изборите во САД, кој грубо го ругаше Доналд Трамп и кој беше „паметниот“ што предвиде дека Американците ќе се повлечат од Западен Балкан за командното место да им се препушти на земјите на ЕУ.

Да не беа тоа, случајно, баш првите пера и перодршки на пропагандата на СДСМ?

Па зошто сега прават планови да ја полнат со „материјали“ токму амбасадата на САД, а не амбасадите на земјите на ЕУ?

Зарем мислат дека на новите американски „црни листи“ нема да има место за луѓето од Кланот Дубаи?

Ако ме прашате мене, јас одамна не сум далдисан по шетање и озборување по амбасади. Сметам дека тоа не треба да биде примарна задача на нашите политичари, особено не на премиерот и на министрите. Можеби тоа треба да биде една од задачите (не најважната) на шефот на дипломатијата Тимчо Муцунски и евентуално на претседателката Гордана Сиљановска Давкова.

Згора, тврдам дека влијанието на „странците“ врз нашата домашна политика и особено врз расположението на избирачите не е ни приближно такво какво што си замислува нашето „граџанство“. Тоа се митови. Не урбани митови. Паланечки.

Но, од друга страна, потполно ги разбирам луѓето од привременото раководство на СДСМ и нивниот гуру Фрчкоски Постариот. Тие разбираат и јавно признаваат дека ова ВМРО-ДПМНЕ не може да биде поразено од овој СДСМ.

Да биде јасно, кога велам „овој СДСМ“, мислам на ова раководство од Тему, со овој советнички тим и со овие инфантилни пиарчии. Мислам на оваа екипа лузери кои не можат ни мене да ме совладаат онака мушки (без плачипичење), а не па некоја партија да совладаат на избори.

Еве, на пример, наместо тој скап мастраф со техничка влада 100 дена пред избори, предлагам да се воведе ваков модел – на секои парламентарни избори СДСМ да стартува со 10 однапред подарени пратенички мандати, а другите 110 нека се делат според добиените гласови. Фер?

Ама овој СДСМ ни со фора од 10 пратеници не може да победи на избори.

Тажно е тоа. Многу тажно. Љубомир Фрчкоски, ете, има сила тоа да го признае онака ноншалантно. Но, кај Венко Филипче нервозата веднаш се препознава во неговиот пискав глас, кој неартикулирано преминува од отсечно стакато во некаков чуден интимен фалсет и сè така во бескрајни спирали без поенти.

Но, клучната поента се препознава во планот што јасно го исцрта токму Фрчкоски. И го нарече „Пржино 2“. Со што, патем речено, доцни, бидејќи Васко Ефтов, на пример (со кого не сум координиран – ова за пишувачите на глупавите соопштенија на СДСМ, да не му направам беља и на Васе), во анализите веќе стаса до Пржино 4 или 5, не се сеќавам точно.

Да не ми избега поентата. Значи …

Овој СДСМ нема политичка, туку пучистичка стратегија – тоа е стратегија за преврат, за преземање на власта без избори, за пуч!

Кому ова не му е јасно, тој нема поим од политика!

На пучот треба да му претходат агресија и политикантски провокации, обид на таа основа да се создаде некаков нов опозициски „чадор“ – со сите опозициски пајтон партии, плус она што останало од „граџанското“ шуто и рогато (Заева дефиниција) – потоа акција за целосна деструкција на политичкиот процес, денунцирање и компромитација на институциите, а во погодно време ескалација на политички неартикулирани протести и сеопшт хаос.

Така некако македонската почва треба да се култивира, за да се засее семето на превратот, кое потоа ќе никне брзо, па ќе се пржи во лонецот „Пржино 2“ со сите зачини и запршки, за на крајот „странците“ да го притиснат капакот одозгора, додека зајрето не се задуши и не замириса на нова македонска Пуч чорба.

Ете, само така овој СДСМ може да ја приграби власта.

Тоа е планот.

Планот е македонската демократија и волјата на народот да бидат задушени, за Кланот Дубаи, Венко Филипче и неговата екипа да дојдат на власт. Поточно, да се вратат на власт.

Ќе повторам: тој што ова не го разбира, нема поим од политика!

И тука запирам. Совети не делам никому.

Драги политичари, големи сте, си знаете. Само едно ќе ви кажам: не сакам да ми се случи еден ден јас да ве прашам вас – кај ви е сега кубурот што го чувавте за зломака?

The post Стратегијата на СДСМ во три чекори – деструкција, хаос и пуч! appeared first on plusinfo.mk.

Секогаш кога лидер на моќна опозициска партија ќе побара средба со лидер на владејачка партија, барањето треба да се прифати. Мора да се разговара, мора да се води политички дијалог. Ова е принципиелен став за кој се залагам постојано.

Но, да бев јас на местото на Христијан Мицкоски, верувајте, немаше и јас да одолеам да го одбијам најновото барање на Венко Филипче за лидерска средба.

Принципи си се принципи, ама ова лигавење веќе навистина не се трпи…

Не сфаќам како е можно Венко Филипче, неговиот спонзор Зоран Заев и од нив киднапираниот СДСМ, повторно, по кој знае пат, да се обидуваат да се факторизираат како субјект што ја води надворешната политика на оваа земја. Згора на тоа, поддржувајќи ги непринципиелните притисоци врз Македонците да го жртвуваат својот национален идентитет и на тој начин да го фателе „возот за Европа“.

Венко бе… На што личи ова?!

Во образложението на неговото барање за лидерска средба заради постигнување некаков „национален консензус“ за „евроинтегративниот пат“ на нашата земја, Филипче зборува ноторни глупости, враќајќи ги на политичката сцена тезите и реториката на неговиот претходник и сегашен спонзор од кланот Дубаи, Зоран Заев.

Тоа дека протоколот број 2, што го потпиша Историска комисија на Заев, не бил услов за нашиот напредок кон ЕУ, сепак е ноторна лага. Има дваесеттина изјави од официјална Софија, во кои недвосмислено и грубо се тврди токму спротивното.

Венко бе… Зошто ја шириш таа лага?

Од каде сега идејата Историската комисија да се проширела со странски експерти?

СДСМ имаше шанса да ја прошири својата Историска комисија – таа што беспоговорно ги прифати првите два спорни протокола – со странски, ама и со домашни ескерти, со такви кои не ги прифаќаат здраво за готово бугарските толкувања на македонската историја.

Венко бе… Зошто ти, како потпретседател на СДСМ и како близок соработник на Заев, не бараше тоа да се стори тогаш кога твојата партија беше на власт и ја водеше надворешната политика?

Точно е дека пораките на претседателот на Европскот совет Антонио Кошта и на еврокомесарката Каја Калас се јасни, ама точно е и тоа дека тие за македонскиот народ се неприфатливи. Влада избрана од народот не смее да го прифати ставот „она што е договорено е договорено и нема веќе за што да се разговара“. Бидејќи владите на СДСМ на Зоран Заев и на Димитар Ковачевски со Софија и со Брисел се договорија да се прифати бугарското негирање на самобитноста на македонската нација пред 1945 година и да се доведе под сомнеж постоењето македонски национален идентитет.

Венко бе… Што мака имаш па ја браниш таа кауза?

Ако СДСМ навистина сака сериозно да разговара за национален консензус за овие прашања, треба да стори најмалку три нешта.

Прво и најважно, Венко Филипче мора одлучно и недвосмислено да ги отфрли ставовите на Зоран Заев од она негово „славно“ интервју за бугарската агенција БГНЕС, во кое скандалозно застана на позицијата дека Македонците и Бугарите се ист народ, дека говорат ист јазик и дека имаат заедничка историја.

Венко бе… За да се квалификуваш за сериозни разговори и за национален консензус за ова прашање, мора да се охрабриш и да ги изговориш следните реченици:

– Македонија и Бугарија немаат заедничка, туку споделена историја.

– Гоце Делчев е македонски револуционер, кој се борел за слободата на Македонија. Тој не е „македонски и бугарски револуционер“, како што тврдеше другар ми Заев.

– Во текот на Втората светска војна, фашистичка Бугарија, до капитулацијата, не е „администратор“, туку окупатор во Македонија, сила на страната на Хитлерова Германија.

– Македонија нема претензии кон Бугарија, но има барања за македонското малцинство во таа земја. Треба да се почитуваат европските стандарди и пресудите на Судот за човекови права од Стразбур.

– Луѓето од Петрич и од Струмица не зборуваат на ист јазик, како што тврди Заев. Ако го зборуваат стандардниот македонски јазик, тогаш тој и во Струмица и во било кој друг град во Македонија е посебен јазик, кој се разликува од бугарскиот. Македонскиот јазик не е дијалект на бугарскиот јазик.

– Македонците и Бугарите не се ист народ и не зборуваат на ист јазик. Ние сме и ќе бидеме пријатели, можеби дури и како браќа, како и со другите словенски народи, ама не сме исти.

Второ, СДСМ мора да ја прифати новата реалност во Европската унија. Самите Европејци се погласно зборуваат за тоа дека со моделот на консензуално одлучување во Брисел веќе не може да се донесе ниту една позначајна политичка одлука, вклучувајќи ја тука и политиката на проширување. Во европски кругови се заговара и идејата билатераните спорови меѓу земјите претенденти, а посебно споровите за историски прашања кои немаат ама баш никаков актуелен импакт, да престанат да бидат услов за напредокот кон ЕУ.

Има ли намера СДСМ да ги следи и да ги поддржи овие трендови, или уште ќе не плаши со тоа дека Албанија и Црна Гора ќе влезат во ЕУ пред нас и и потоа овде ќе избиел меѓуентички конфликт?

И трето, без оглед во која насока ќе се движи процесот во иднина, Венко Филипче и кланот Дубаи веќе не смеат да го држат СДСМ на позиции кои се директна или идирекната одбрана на бугарската казуа и на политиката на вето кон Македонија. Не сакам да употребувам тешки думи, но мора да е јасно дека таа позиција народот ја доживува како предавничка.

Сосема на крајот, би сакал на Венкота Филипче да му овозможам јавно да ги ревидира ставовите на својот претходник, кои се директно спротивни на македонските национални интереси. Ако сака, нека повели тоа да го стори и во Плусинфо, на начин што тој го смета за погоден за јасна експликација на неговите лични ставови за овие прашања. По негов избор, може да дебатираме во поткастот на Плусинфо, може да напише колумна, може да избере било како „оружје“ по принципот „со книга на книга“.

А и не мора тоа да биде ова место, да се разбереме. Не патам јас од тоа да разговарам со Филипче. Само искажувам спремност да му помогнам да каже што мисли. Бидејќи, со ова што го прави сега, тој буквално го уништува она малку што преостанало од рејтингот на СДСМ и од довербата на членовите и симпатизерите на оваа партија.

Јас навистина веќе не знам дали воопшто имаат некоја друга политичка идеја Венко Филипче и кланот Дубаи, освен да ја бранат бугарската кауза и сервилно да се лепат на уценувачката реторика на бриселските бирократи.

Не разбирам, како мислат луѓето од СДСМ со вакви ставови да излезат на избори? Пак ли на народот ќе му кажат дека ние сме биле ист народ со Бугарите, дека сме зборувале ист јазик и дека сме имале заедничка историја?

А да бидам искрен, не знам и до кога оваа суицидна политика на Венко Филипче ќе ја толерираат другите луѓе од врвот на СДСМ. До кога ќе ги трпат овие глупости? На што ли се надеваат? До кога ќе молчат? Или сите во џебот имаат златни визи од Дубаи?

The post Има ли овој СДСМ на Филипче и на Заев друга идеја освен да ја брани бугарската кауза? appeared first on plusinfo.mk.