Грчкиот министер за заштита на граѓаните, Михалис Хрисохоидис, упати јасно предупредување дека Владата повеќе нема да дозволи блокирање на царинските служби на граничните премини. Во изјава за грчките медиуми, тој нагласи дека блокадите на земјоделците предизвикуваат сериозни последици по државната економија.

Хрисохоидис истакна дека државата покажала голема толеранција во изминатите 40 дена, но дека ситуацијата со стотиците илјади тони производи кои не можат да поминат е неодржлива.

– Нема шанси повторно да се затвори царинска служба и тоа го нагласувам јасно. Тоа се влезовите на земјата, имаме огромни проблеми, нè пријавуваат другите земји во Европската Унија, но не е само тоа, главно е дека се попречува функционирањето на економијата, се попречува работењето на бизнисите кои бараат снабдување со производи, со суровини, гориво и слично. Ова не може да продолжи. Обесштетувањата што ќе се побараат ќе бидат огромни – изјави Хрисохоидис.

Протестите на земјоделците започнаа кон крајот на ноември и ги зафатија граничните премини кон Македонија, Бугарија и Турција. Иако тракторите остануваат на патиштата, земјоделците веќе формираа делегација која треба да се сретне со премиерот Киријакос Мицотакис за да се најде решение за нивните барања.

The post НЕМА ПОВЕЌЕ БЛОКАДИ НА ГРАНИЦИТЕ, ВЕЛИ ГРЧКИ МИНИСТЕР „Ги толериравме земјоделците во последните 40 дена“ appeared first on plusinfo.mk.

Премиерот Христијан Мицкоски изјави дека има помало државничко искуство од бугарскиот претседател Румен Радев и од грчкиот премиер Киријакос Мицотакис, но дека тие треба да се навикнат на новата политика овде која ги штити интересите на македонските граѓани. На двајцата им порача дека „ние сме малоброен и мирољубив народ подготвен да гради добрососедски односи со секого“, но дека „соработката ја гледаме како двонасочна, а не како еднонасочна улица“.

Неговата изјава, при денешната работна посета на Гевгелија, е коментар на изјавата на Радев за медиуми по средбата со Мицотакис во Атина дека „раководството на Република Северна Македонија не е подготвено“ и „на властите во Скопје им недостига познавање по уставно право“.

– Жалам што гледаат промена во политиката овде. Поминаа времињата кога ќе има кај нас, во македонската Влада, политичари со свиткана кичма, политичари кои се понижуваат, политичари кои се подготвени да потпишат сѐ само не да го заштитат интересот на македонските граѓани, а од друга страна, додека тоа го прават, мавтаат со македонското знаме и паралелно со тоа ги ограбуваат државата и граѓаните. Мора да се навикнат на политичари коишто се тука да ги штитат интересите на граѓаните, да работат за доброто на татковината, за иднината и подготвени сме со секого да градиме добрососедски односи. Мојата порака и до едниот и до другиот, сепак тие се поискусни од мене, подолго време се на своите позиции, едниот е претседател на држава, другиот е премиер, ние сме мирољубив, малоброен народ, еден од најмалобројните на Балканот, подготвени сме со секого да соработуваме и соработката ја гледаме како двонасочна улица. Не може да биде еднонасочна и со 8 мај завршија времињата кога ја гледаа соработката со македонските политичари како еднонасочна улица – изјави Мицкоски одговарајќи на новинарски прашања.

Премиерот ги повика Радев и Мицотакис да соработуваат за економски развој на државите и зближување на народите, а во однос на коментарот за неразбирање политика, смета дека добрососедска политика не се гради „со омаловажување и со навреди“.

– Јас сум навикнат на омаловажување и на навреди, целиот мој живот е така проследен, но некако, па, секогаш на крајот победувам. Ќе видиме како ќе биде во овој случај. Јас сакам ние како балкански држави да ги следиме примерите на друг тип држави, како што се балтичките, скандинавските, па сите заедно со изградени мостови, сложно, здружно, да настапуваме на трети пазари, пред официјалните лица во Европската Унија, насекаде во светот. Да градиме една добрососедска политика. Со омаловажување и со навреди, таа работа не ЈА бидува. Ако тие одлучиле така да тераат, јас мислев дека таквото однесување сме го оставиле во средниот век, мислев дека сега, во 21 век, треба да зборуваме како заеднички да ја развиваме нашата заедничка економија, образование, туризам, да ги вмрежуваме луѓето, да ги зближуваме. Јас сум подготвен за тоа да зборувам и мислам дека моите соговорници од таа страна треба да ги преиспитаат тие свои изјави и начин на однесување, но јас не сум тој, кој сум јас да им солам ним памет што да прават тие – рече Мицкоски при посетата на Гевгелија.

The post 📽 РАБОТИТЕ НЕ СЕ РЕШАВААТ СО НАВРЕДИ, ТОА Е ОДНЕСУВАЊЕ ОД СРЕДНИОТ ВЕК Мицкоски им одговори на Радев и на Мицотакис appeared first on plusinfo.mk.

Според податоците на албанските медиуми Белери е на третото место по гласови во партијата на грчкиот премиер Киријакос Мицотакис. Според Еуроњуз Албанија, тој треба да биде меѓу седумте европратеници кои ќе ја претставуваат „Нова демократија“ во Европскиот парламент.

Фреди Белери, кој е етнички Грк, беше уапсен два дена пред локалните избори во Албанија на 14 мај 2023 година, под обвинение за купување гласови. Во март годинава беше осуден на две години затвор. Од грчка страна ја доведоа во прашање правичноста на судскиот процес против него и јасно ставија до знаење дека тоа може да ја загрози европската интеграција на Албанија.

По изборот за европратеник, Белери им се заблагодари на Грците кои „го почестија со својот глас“ и ја опиша веста како „победа на светлината над темнината“.

Белери додава дека војната е добиена благодарение на гордоста и патриотизмот на Грците.

Во пораката до поддржувачите, тој подвлекува дека гласот на грчкото малцинството во Албанија сега ќе биде уште посилен.

The post УАПСЕН АЛБАНСКИ ГРАДОНАЧАЛНИК СТАНА ГРЧКИ ЕВРОПРАТЕНИК Фреди Белери кој издржува 2-годишна казна затвор, ќе ја застапува владејачката Нова Демократија на Мицотакис appeared first on plusinfo.mk.

Преку видео објавено на Тик Ток, Мицотакис детално и практично објаснува што предвидува и што не предвидува новиот закон што веќе доби зелено светло од Парламентот.

– За она што го гледавме, одиш на организирана плажа и е преполна со лежалки, сега обезбедуваме дека 70% од површината на плажата треба да биде слободна и ќе треба да постои минимално растојание од 4 метри од морето до првиот ред лежалки, за да го немаме повеќе она кога лежалките всушност се во вода – рече Мицотакис.

Грчкиот премиер објасни дека за плажите што се во заштитените области Натура, наместо 70, ќе треба да биде слободна 85% од површината, односно лежалки и чадори ќе биде дозволено да бидат поставени на само 15% од плажата.

Дополнително, како што рече, за првпат се воведуваат и т.н. „негазени плажи“ со посебна еколошка вредност каде не се дозволени лежалки или воопшто каква било експлоатација.

За да се добие лиценца за користење на плажа, задолжително ќе биде учеството на електронска лицитација, а по добивањето, концесионерот ќе биде обврзан да ја чисти плажата, да обезбеди пристап за лица со инвалидитети и да постои спасувач.

– Изгласавме нов закон кој става ред на нашите плажи и во суштина прави три работи: обезбедуваме слободен пристап на сите плажи за сите, користиме нови технологии како за тендерите за плажите, така и за контролите и воведуваме построи казни за оние кои го прекршуваат законот – рече грчкиот премиер.

Во однос на спроведувањето на законот, истакна дека ќе има многу поинтензивни контроли и построги казни за прекршувачите.

– Прво, многу повеќе контроли и употреба на технологијата. Ако видите некој дрон да лета над плажа може да е во рамките на контролите што ќе ги спроведуваме. Второ, вие самите ќе ни помогнете да го спроведеме законот. Како? Преку специјална апликација на која јасно ќе се гледа на кое место од плажата и на колкав дел ќе може да се постават чадори и лежалки. А ако концесионерот, на кој било начин го прекршил законот, да ни го пријавите тоа. Да ни кажете и ние ќе спроведеме контроли. И на крај, зголемување на казните. Доста високо за да знаат сите дека ќе постојат, не само строги екномски последици, туку дури и затворање на бизнисот што ќе го прекрши законот – порача грчкиот премиер.

Посочи дека законот не се однесува на урбанистичко планирање и условите за градба, а задолжителното растојанието од 50 метри од крајбрежјето за градење не се менува.

– Засега толку и чекаме да дојде летото за да уживаме во многу послободните наши плажи -рече Мицотакис на крајот од видеото на Тик Ток, кое како и секогаш кога објавува на конкретната социјална мрежа е во поопуштена атмосфера и со поопуштен тон.

Лани, во текот на летото, поголема група граѓани, жители на грчкиот остров Парос, Грци, но и странци, го кренаа својот глас против нелегално „окупираните“ плажи со лежалки и чадори од баровите, надвор од законски одредениот простор со концесиите, одржаа низа протести на плажите, нешто што веројатно се случи прв пат во земјата, а еден од членовите на Движењето за слободни плажи, тогаш, за МИА рече дека нивното барање е едноставно: да се спроведе законот.

Движењето на граѓани за слободни плажи од Парос, поттикна граѓани низ цела Грција да организираат идентични активности за да побараат спроведување на законот што се однесува на доделените концесии за бич баровите на плажите.

The post ЗАКОН ЗА ЛЕЖАЛКИ НА ПЛАЖА? Еве како Грција ќе се справува со дивите чадори appeared first on plusinfo.mk.

„Потсетуваме дека господинот Мицотакис е единствениот европски премиер кој од една страна ја повикува ЕУ да продолжи со интеграцијата на Северна Македонија (и сите земји од Западен Балкан) за помалку од десет години, додека од друга страна одбива да ги ратификува трите технички договори со соседната земја. Тој е премиерот кој од една страна не го кани премиерот на Албанија поради случајот Белери, но од друга страна пред неколку месеци со него одржуваше фиести во малцинските села во Албанија разменувајќи предизборни комплименти“, пишува Сириза.

Оттаму обвинија оти грчката влада има недостиг од стратегија во надворешната политика, а особено недостиг на кохерентна стратегија за Балканот во корист на интересите на Грција.

„На денешната неформална средба во Атина грчките власти треба да претстават конкретни иницијативи за пристапната перспектива на Западен Балкан во ЕУ, наместо средбата да биде можност за уште еден пи-ар“ – порача Сириза.

На неформалната вечера на лидерите од регионот во Атина најавено е присуство и на украинскиот претседател Володимир Зеленски.

The post КАДЕ МУ СЕ ТЕХНИЧКИТЕ ДОГОВОРИ СО СЕВЕРНА МАКЕДОНИЈА? Сириза го обвини Мицотакис за лицемерие appeared first on plusinfo.mk.

Не можеме да си дозволиме да седиме и да гледаме како Русија ги користи нашите пазарни институции против нас, чин на здрав разум и суверенитет е да се вклучиме и да испланираме правила кои ќе одговорат на невидениот предизвик со кој се соочуваме. Воведувањето ограничување на цените на природниот гас е неизбежен чекор во тој процес, пишува грчкиот премиер Кирјакос Мицотакис во неговата колумна за „Блумберг”, јави дописничката на МИА од Атина.

Мицотакис го повторува и го објаснува неговиот предлог за воведување плафон на цените на природниот гас и вели дека време е Европа да го стори тоа, „треба да ја врати контролата врз својот пазар на гас”, а 15 земји- членки веќе ја поддржаа идејата.

Тој посочува дека Русија ја користи енергијата како оружје, а „нејзината јасна цел е да ги дестабилизира нашите општества”.

„Во нормални времиња, владите мора да дозволат пазарите да работат. Но, ова не се нормални времиња. Русија ги крши договорите и намерно го ограничува снабдувањето. Кога еден играч може да ги поместува цените, нема смисла „да ги оставиме пазарите да функционираат”. Владите би требало да ги структурираат и контролираат пазарите. Соочени со јасна пазарна манипулација, владината интервенција не е само оправдана, туку и потребна“, пишува Мицотакис.

Тој појаснува дека во првиот квартал од 2022 година, според официјалните проценки, Европската унија платила дополнителни 62 милијарди евра за увоз на гас во однос на претходната година, а крајната пресметка за годинава „ќе биде стотици милијарди, трилиони, ако се вклучат негативните ефекти на пазарот на електрична енергија и економијата во целина” и додава дека во меѓувреме, суфицитот на Русија тројно се зголеми на над 180 милијарди долари до август 2022 година.

За предлогот за воведување плафон посочува дека треба да се однесува на целиот гас, „а не само на малите количини што сè уште доаѓаат од Русија”.

„Плафонот треба да биде доволно висок за да делува како автоматски прекинувач, но и да дозволи продолжување на пазарната активност на разумни нивоа. На ум имам конкретен плафон, но таа бројка е предмет на доверливи преговори со земјите- членки, кои сакам да ги почитувам и затоа нема да ја откријам овде. Сепак, со доволно високи цени, добавувачите сè уште ќе го испраќаат својот гас во Европа, а потрошувачите сè уште ќе имаат причина да ја намалат нивната побарувачка. Плафонот треба да биде нагорна граница за тоа колку високо може да стигнат цените, а не вештачки ниска бројка што ќе ги дестабилизира пазарите“, објасни грчкиот премиер во неговата колумна.

The post МИЦОТАКИС ЈА ЗНАЕ ВИСИНАТА НА ПЛАФОНОТ ЗА ЦЕНАТА НА ГАСОТ Со неа ЕУ ќе ја врати контролата врз својот пазар на гас appeared first on plusinfo.mk.

Ваквите заложби ги потврдија денеска премиерите Димитар Ковачевски и Киријакос Мицотакис на средба во Атина, Грција, соопшти македонската влада.

Премиерите разговарале за последиците од енергетската криза во светски рамки и за енормниот раст на цените на електричната енергија. Тие заклучиле дека стратешките проекти се од голема важност за долгорочната енергетска независност за стабилно и постојано снабдување со течен гас во едно исклучително кризно време.

„Двајцата премиери констатираа дека регионалната соработка е од големо значење со особен акцент на важноста од соработката во енергетскиот сектор, за која се согласија дека има голем потенцијал, ако се земат предвид заедничките проекти за изградба на терминалот за течен нафтен гас (ЛНГ) во Александруполи, како и гасното поврзување помеѓу двете земји. Интерконекторот со Грција заедно со терминалот за течен гас (ЛНГ) во Александруполи не се само економски, туку и проекти од стратешко значење“, соопшти Владата.

The post ГРЧКИОТ ГАС Е ДВЕ ГОДИНИ ДАЛЕКУ Во средината на 2024 година ќе станеме независни од рускиот гас? appeared first on plusinfo.mk.