Пожарот на планината Китка повторно е активен откако претходно бил изгаснат. Директорот на Дирекцијата за заштита и спасување, Стојанче Ангелов, тврди дека огнот повторно бил намерно подметнат.

– За жал, некои злобници од користољубие или осветнички мотиви упорно го палат пожарот. Со ваквото поведение тие директно го ризикуваат животот на жителите од околните села под Китка – изјави Ангелов.

Според него, потпалувачите запалиле долга линија, по што пожарот брзо се проширил. Ангелов побара поголема будност од жителите и рече дека службите работат на откривање на сторителите.

Борбата со пожарот траеше и во текот на ноќта. Екипите го бранеа селото Палиград, кое беше загрозено од огнот. Гасењето продолжува наутро со „Ер тракторите“.

Ова е продолжение на серијата пожари и сомнежи за намерно потпалување во скопскиот регион. Претходно пожар избувна и кај Жеден над тетовско Бојане, каде што надлежните исто така се сомневаа дека огнот бил подметнат.

– Од извршеното хеликоптерско извидување можевме да забележиме дека дел од чадот на кој се жалат жителите на градот Скопје во некои населби доаѓа од пожарот кој се одвива во атарот на село Бојане на планината Жеден – изјави Ангелов кој имаше средба со тетовските пожарникари кои успеале да го стават под контрола овој пожар.

Случувањата на Китка претходно ги коментираше и заменик-директорот на ЈП „Национални шуми“, Кире Михаилов. Тој тврдеше дека на линијата меѓу пожарите се појавувале нови жаришта и случувањата ги окарактеризира како тероризам.

Според Михаилов, во петокот од 21 до 22 часот избувнале 3 нови пожари кај Маларека, Бабин Дол и Грнчарица. Во гаснењето учествувале пожарникари, шумски работници, воздухоплови и локалните служби.

The post ПРОДОЛЖУВА ГАСНЕЊЕТО НА ПОЖАРОТ НА КИТКА „Злобниците повторно го палат“ appeared first on plusinfo.mk.

Заменик-директорот на ЈП „Национални шуми“, Кире Михаилов во објава на социјалните мрежи ги окарактеризира како тероризам случувањата на планината Китка, каде веќе десетина дена има пожар.

„Почитувани, јавноста мора да знае одредени факти за пожарот кој веќе десетина дена беснее на планината Китка. Тоа е пожарот кој најпрво започна на територијата на општина Студеничани од каде за неколку дена се префрли и на територија на општина Зелениково и се разви во голем сериозен пожар ширејќи се на места кои буквално се недостапни за човечка нога. Тоа се места кои посебно во вакви вонредни ситуации многу лесно можат човечките животи да ги донесат во сериозна животна опасност. Од друга страна, пожарот кој надојде од велешко Сл’п се движеше во правец на токму на овој пожар. Во изминативе денови, сведоци сме на повеќе нови потпалувања на линијата помеѓу двата пожара, а како што може да видите на картата, очигледно да се направи една огромна фронтална линија. Пред неколку дена кога со вложени максимални натчовечки напори и целосно се изгасна пожарот во велешко, наредниот ден имаше обид за негово повторно воскреснување, но, добрата координација на сите служби го спречи тоа“, напиша тој.

Како што нагласува Михаилов, шестиот ден, доцна во ноќта имало појава на нов пожар во правец над Градовци во близина на веќе постоечкииот пожар, но, екипите од ЈП „Македонски Шуми” повторно иако ноќе, го средиле.

„Неколку дена после тоа, или поточно во четвртокот на 20 август во раните утрински часови повторно на неколку нови точки сериозно ни го проширија овој пожар на планината Китка, ШСЕ Китка, поточно во оддел 17 во место викано Попово Гумно, на непристапен терен сакајќи да предизвикаат опасност да премине према селото Тисовица каде теренот е уште погуст, див и непрооден. Но, со натчовечки напори, се реши и оваа состојба и во текот на ноќта беше решена и оваа сериозно нова лоша ситуација. И тука не застана приказната луѓе. Во петок, завчера, затоа што видоа или виде дека има доста присуство на терен, воздухоплови и дронови, не запалија ноќта, некаде после 21 часот. Во рок од еден час, во петокот од 21 до 22 часот се појавија три нови пожари и тоа првиот на патот од село Добрино, место викано Маларека. Вториот пожар се појави на патот помеѓу селото Страхојадица и селото Тисовица кај место викано Бабин дол, повторно запален на истиот патен правец на работ на самиот пат. Третиот последователен пожар таа ноќ ни го запалија повторно на патот помеѓу селата Страхојадица и селото Тисовица, на место викано Грнчарица, повторно во атарот на село Градовци, општина Зелениково како пред неколку дена“, дополнува Михаилов.

Михаилов посочува дека на сите три нови запалени точки, до доцна во ноќта делувале  вработените од подрачното шумско стопанство Караџица, градоначалникот на Зелениково со неколку луѓе и противпожарното возило на општина Зелениково како и ТППЕ Драчево.

„И така, тие постојано си палат, а ние постојано и сè уште си гасиме. Дефинитивно некој таму сака или да ни изгоре некое село или да отиде што поголема шумска површина, не знам што им е целта. И покрај тоа што секојдневно таму делуваат авионите и хеликоптерите од воздух и пешадијата каде што може на терен, со ваков интензитет на често ново разгорување на линијата не може лесно да го решиме овој пожар и наизменично повеќе населени места ни се во опасност, па ги браниме. Опасноста покрај Рамни Габер помина, но, вчера и денеска ни е во сериозна опасност населеното место Палиград. И никако херметички во вистинска смисла не може да го затвориме овој предел затоа што има доста ридски планински населени места кои се живи, а има и доста граѓани кои имаат најразлични други имоти таму и не можеме целосно да им го ограничиме движењето. Но, мораме дефинитивно да најдеме начин овие будали некако да ги застанеме“, вели Михаилов во објавата на Фејсбук.

The post КОЈ ЈА „ТЕРОРИЗИРА“ ПЛАНИНАТА КИТКА СО ПОЖАРИ? Заменик-директорот на Национални шуми вели дека жариштата постојано „воскреснуваат“ appeared first on plusinfo.mk.