Кој и да дојде на власт во Бугарија се држи до утврден концепт за Македонија, односно до студијата која е специјално изработен документ уште во 2008 година, со потпис од дваесетина научници, меѓу нив и актуелниот претседател на Бугарската комисија за историја, Ангел Димитров, вели претседателката Гордана Сиљановска Давкова. Таа во интервју за Македонското радио, нагласува дека постфестум реакциите не помагаат во однос на тоа како Македонија треба да се позиционира пред конкретните политички искушенија диктирани од официјална Софија, туку е потребна превенција и да се направи симулација што ќе се случи ако сакаме да одиме напред.

– Документот е од 2008 година и на неговите корици пишува „Односот на Бугарија кон Македонија“. И уставните измени и пасошите во Албанија и пасошите во Канада, сè е тоа запишано. Ако на тоа ги додадете актите на Собранието, декларација, резолуција, ќе видите дека тоа е еден концепт до кој сите се држат, без оглед кој е на власт – истакнува Сиљановска Давкова.

Претседателката вели дека иако има срдечни и коректни колегијални релации со поранешниот претседател, а сега премиер на Бугарија, Румен Радев, не може да предвиди дали тој ќе ретерира од својот проект за промена на македонскиот Устав.

– Замислете некој да побара од вас да го смените Уставот. Немам проблем да отвориме утре постапка за промена на Уставот, за да внесеме глава што ќе се однесува на односот меѓу европското право и македонското национално право. Зашто тоа е на линијата на Копенхашките критериуми. Ама да отворите Устав за област што не е дел од европското законодавство… ЕУ нема заедничка малцинска политика. Две држави, Франција и Грција, дури не ги потпишале клучните документи, тоа е Рамковната конвенција за заштита на правата на малцинствата и Конвенцијата за регионалните и малцинските јазици, не ги потпишуваат. Понатаму во Источна Европа и скандинавските држави немаат одредби кои што конкретно се однесуваат на малцинствата. Кај нас, прво, од преамбулата не може да се црпат конкретни права, оти тоа е филозофијата на Уставот, ние го имаме членот 48, го имаме амандманот 8, каде што прецизно се наброени сите права, без оглед дали некој е споменат во преамбулата или не е. Значи условот од копенхашките критериуми, почитувањето на човековите права, вклучувајќи ги и малцинските, ние го исполнуваме. Отворите го бугарскиот устав, ќе најдете одредба дека се забранети партии врз етничка и верска основа – вели претседателката.

Нагласува дека ќе се „кипаризираме“ со евентуалното внесување на неколкуте заедници во Уставот, меѓу кои и бугарската.

– Никој не кажува што ќе се случи еве и по евентуалното внесување на неколкуте заедници во Уставот. Се сеќавам на предлогот што дојде од Министерството за правда. Комитетот за односи меѓу заедниците во најблагата варијанта ќе брои 42 члена. Во Законот за комитетот пишува дека може да заседава доколку има двотретинско мнозинство. Пресметајте колку е. Дека одлуките се донесуваат со апсолутно мнозинство. Фрлете поглед на листата на закони што се носат со ова мнозинство. Ние ќе се кипаризираме. И тоа пазете кога, од каде ќе доаѓа блокадата. Имаме едно решение кое вака вели, ако во комитетот некои заедници немаат свои пратеници, тогаш нив ќе ги одреди, со една смешна формулација, лаичка, да не употребам друг збор, по претходни консултации со релевантните фактори, народниот правобранител. И пазете сега, избраните пратеници со изборен легитимитет и овие кој ќе ги именува народниот правобранител, ќе имаат ист легитимитет да одлучуваат во Комитетот за односи мегу заедниците. Тоа е разликата што им ја кажувам јас на моите колеги во Хрватска. Различна е велам ситуацијата. Да, вие ги набројавте прво автохтоните, а потоа и сите што биле во Бивша Југославија заради заедничкиот живот. Ама кај вас нема комитет кој одлучува на ваков начин. Зошто се појави кипарскиот проблем? Бидејќи се парализираше процесот на донесувањето на одлуките. А тоа нема врска со малцински права. Малцинските права се загарантирани. И тие се во Уставот и важат за сите. Само го кажувам ова, за да ги потсетам граѓаните, дека посфестум реакциите не помагаат. Ние мораме однапред да превенираме и да направиме симулација што ќе се случи, ако сакаме да одиме напред. – рече Сиљановска Давкова.

Претседателката е свесна дека Балканот отсекогаш бил лакмус за новите концепти, затоа билатерализацијата на наметнатиот спор со Бугарија, вели, би имала домино-ефект и врз глобалната европска слика.

– Овој преседан, феноменот на билатерализација што не е врзан за Копенхашките критериуми, ќе се реплицира и може да го загрози процесот на проширување, кој веќе не е само прашање на Европската Унија, туку и на безбедноста – додаде таа.

The post СО УСТАВНИТЕ ИЗМЕНИ МОЖЕ ДА НИ СЕ СЛУЧИ КИПАРИЗАЦИЈА Кој и да дојде на власт во Бугарија се држи до истиот концепт за Македонија appeared first on plusinfo.mk.