Шефот на кинеската дипломатија, Ванг Ји, на денешната Минхенска безбедносна конференција предупреди дека повиците од САД за дистанцирање од Кина се „импулсивни“ и можат да имаат сериозни последици врз глобалната економија.

Според Ванг, најдобар исход за односите меѓу Пекинг и Вашингтон е соработката, а не конфронтацијата. Тој го повика Вашингтон да води „позитивна и прагматична“ политика кон Кина.

– Другата опција е да се обидат да се дистанцираат од Кина, да ги нарушат синџирите на снабдување и да ѝ се спротивставуваат по сите прашања на чисто емотивен и импулсивен начин – посочи Ванг.

На маргините на конференцијата, кинескиот министер оствари средби со германскиот и францускиот колега, при што порача дека развојот на Кина претставува можност, а не закана за Европа.

Тој нагласи дека предизвиците со кои се соочува Европа не доаѓаат од Пекинг и повика на балансиран пристап во односите меѓу Европска Унија и Кина.

– Кина и Европската Унија треба правилно да управуваат со разликите и конфликтите, да ја продлабочат практичната соработка и заеднички да работат на справување со глобалните предизвици – истакна Ванг Ји.

Изјавите доаѓаат во период на засилени геополитички тензии и редефинирање на економските односи меѓу големите сили.

The post НЕ НОСЕТЕ ИМПУЛСИВНИ ОДЛУКИ ПРОТИВ КИНА Ванг Ји со остра порака до САД appeared first on plusinfo.mk.

Тајван е најважното и најчувствителното прашање во односите меѓу Кина и Соединетите Американски Држави, му рекол кинескиот лидер Си Џинпинг на американскиот претседател Доналд Трамп за време на телефонскиот разговор во средата.

– САД мора да се справат со прашањето за продажба на оружје на Тајван со претпазливост – предупредил Си, според кинеската државна новинска агенција Синхуа.

Тој му предочил на американскиот колега дека исто како што САД имаат свои загрижености, Кина исто така има загрижености.

– Ако двете страни работат во иста насока, во духот на еднаквост, почитување и взаемна корист, сигурно можеме да најдеме начини да се справиме со меѓусебните загрижености.

Си во разговорот нагласил дека самоуправниот остров е територија на Кина и дека Пекинг мора да го заштити својот суверенитет и територијален интегритет. Истовремено, според државните медиуми, тој истакнал дека придава големо значење на односите со Вашингтон и дека се надева оти двете земји ќе најдат пат за надминување на разликите.

11 милијарди за Тајван и црвената линија

Кина со години ветува дека ќе се обедини со Тајван и не ја исклучува употребата на сила. САД, иако имаат формални дипломатски односи со Пекинг, а не со Тајпеј, остануваат најмоќниот сојузник на островот и негов најголем снабдувач со оружје, движејќи се по тенка дипломатска линија.

Во декември администрацијата на Трамп одобри продажба на оружје на Тајван вредна околу 11 милијарди долари, што вклучуваше напредни ракетни лансери, самоодни хаубици и различни типови ракети.

Пекинг тогаш оцени дека ваквиот потег е обид за поддршка на независноста на Тајван и дека само ќе ја забрза ескалацијата кон опасна и насилна ситуација во Тајванскиот теснец.

„Одличен, темелен разговор“

Од друга страна, шефот на САД разговорот го оцени како одличен, долг и темелен. Во објава на „Truth Social“ Трамп напиша дека односот со Кина и неговиот личен однос со претседателот Си се исклучително добри и дека двајцата ја разбираат важноста од нивно одржување.

Телефонскиот разговор доаѓа по серија посети на западни лидери на Кина, меѓу кои и британскиот премиер Кир Стармер, со цел обновување на односите со втората најглема економија во светот. Трамп најави и сопствена посета на Кина во април, патување кое, како што рече, го очекува со нетрпение.

Соја, енергенси и геополитика

Покрај Тајван, двајцата лидери разговарале и за трговијата. Трамп изјави дека Пекинг размислува да купи 20 милиони тони американска соја, наспроти сегашните 12 милиони. На маса биле и купувањето нафта и гас од САД, војната на Русија во Украина, како и моменталната состојба во Иран.

Последниот телефонски разговор меѓу Си и Трамп пред овој бил во ноември, кога дискутирале за трговијата, руската инвазија врз Украина, фентанилот и Тајван, според американската и кинеската страна.

Часови пред повикот со Трамп, Си одржа виртуелна средба со рускиот претседател Владимир Путин, при што двајцата го поздравија продлабочувањето на врските меѓу Пекинг и Москва, сигнализирајќи дека Кина паралелно ја гради својата глобална позиција на повеќе фронтови.

Tajван го поздрави телефонскиот повик?

Тајван го поздрави телефонскиот разговор меѓу Трамп и Џинпинг, велејќи дека тоа ќе помогне во стабилизирањето на регионот.

– Не сме премногу загрижени за овој телефонски повик. Всушност, мислиме дека тоа ќе помогне во стабилизирањето на ситуацијата, особено со оглед на тоа што Кина продолжува да ги ескалира тензиите во Тајванскиот теснец и целиот регион – рече заменик-министерот за надворешни работи на Тајван, Чен Мингчи.

The post ВНИМАТЕЛНО СО ОРУЖЈЕТО ЗА ТАЈВАН Си Џинпинг телефонски го предупреди Трамп appeared first on plusinfo.mk.

Американскиот претседател Доналд Трамп денес изјави дека пронашол купувач за апликацијата Тик-Ток, објави Форбс.

– Мислам дека ќе ми треба одобрување од Кина и мислам дека претседателот Си (Џипинг) веројатно ќе го дозволи тоа – изјави Доналд Трамп за водителката на Фокс њуз, Марија Бартиромо, во нејзината емисија „Сандеј морнинг фјучрс“, но не откри дополнителни детали за договорот.

Трамп не откри детали за потенцијалниот купувач, наведувајќи:

– Ќе ви кажам за 2 недели.

Тик-Ток не одговори веднаш на барањето за коментар од Форбс.

Конгресот во март 2024 година го усвои Законот за заштита на Американците од апликации, контролирани од странски противници, со кој се бара од Бајтденс да ја продаде апликацијата Тик-Ток на американски сопственик, инаку ќе се соочи со забрана за работа во САД. Законот беше усвоен со поддршка од двете партии и беше потпишан од тогашниот претседател Џо Бајден во април 2024 година, но „Бајтденс“ веднаш ја оспори неговата законитост. Апликацијата веќе беше забранета на уредите на федералната влада и во неколку држави поради безбедносни причини.

Трамп, кој првично се обиде да го забрани Тик-Ток со извршна наредба во својот прв мандат, ја смени позицијата откако неговата кампања во 2024 година почна да ја користи апликацијата за да се доближи до младите гласачи. Забраната беше потврдена од Врховниот суд во јануари, но администрацијата на Трамп трипати ја одложи нејзината примена, последно на 17 јуни.

Колку вреди Тик-Ток?

Сè уште не е јасно по која цена „Бајтденс“ би ја продала апликацијата Тик-Ток. Проценките за вредноста на оваа исклучително популарна апликација – која, според компанијата, има 170 милиони корисници во САД – се движат од 30 до над 300 милијарди долари. Меѓу шпекулираните потенцијални купувачи се технолошки гиганти како Мајкрософт и Оракл, но и милијардери како поранешниот сопственик на ЛА Доџерс, Френк МекКорт, и поранешниот извршен директор на „Активижн Близард“, Боби Котик. Поранешниот министер за финансии на Трамп, Стив Мнучин, исто така, предложи да ја купи апликацијата со група инвеститори.

The post ТРАМП НАШОЛ КУПЕЦ ЗА ТИК-ТОК, СЕ ЧЕКА „ДА“ ОД ПРЕТСЕДАТЕЛОТ НА КИНА Цената на апликацијата може да надмине 300 милијарди долари appeared first on plusinfo.mk.