Северна Македонија е цврст и ценет сојузник на НАТО кој значајно придонесува за колективната безбедност, истакна Командантот на Сојузничките сили на НАТО за Европа (SACEUR), генералот Алексус Г. Гринкевич, при денешната посета на касарната „Илинден“ во Скопје.

Тој посочи дека македонските војници учествуваат рамо до рамо со припадници од други сојузнички земји во рамки на Напредните копнени сили во Бугарија, Летонија и во Романија, нагласувајќи дека имаат клучна улога во обезбедување на источниот дел од Алијансата преку кредибилно одвраќање и одбрана.

– Имав чест да се сретнам со дел од нив денеска во касарната „Илинден“, каде што проследив и вешта демонстрација на нивните способности за време на динамична тактичка вежба – нагласи Гринкевич.

Тој ја истакна и улогата на земјава во зачувувањето на стабилноста на Западен Балкан, нагласувајќи дека станува збор за регион од стратешко значење за НАТО. Воедно, се заблагодари за повеќе од две и пол децении поддршка на мировната мисија КФОР во Косово, оценувајќи дека таа и натаму има фундаментална улога за безбедноста на сите заедници.

Гринкевич информираше дека по направена анализа на безбедносната состојба, НАТО ќе пристапи кон постепена оптимизација на големината и распоредот на силите во рамки на КФОР.

Во однос на одбранбените вложувања, Гринкевич истакна дека македонската држава веќе издвојува околу 4 проценти од БДП за одбрана и сродни трошоци, оценувајќи дека тоа е значаен придонес во насока на заедничката цел на Алијансата за достигнување 5 проценти до 2035 година.

Тој ја поздрави и поддршката што Македонија ја дава за Украина, вклучително и учеството во НАТО-командата за обука и помош во Висбаден, како и во иницијативите за обезбедување воена помош.

Гринкевич најави дека на претстојниот Самит на НАТО во Анкара сојузниците ќе демонстрираат напредок во зголемувањето на одбранбените вложувања и поддршката за Украина, со цел јакнење на Алијансата.

Командантот на Сојузничките сили на НАТО за Европа изрази уверување дека Северна Македонија ќе продолжи да ја игра својата улога во Алијансата, нагласувајќи дека земјата може да смета на поддршката од НАТО.

Според Началникот на Генералштабот на Армијата, генерал-мајор Сашко Лафчиски, посетата на Командантот на Сојузничките сили на НАТО за Европа, генералот Алексус Г. Гринкевич, претставува потврда за довербата и партнерството на Северна Македонија во рамки на Алијансата.

Тој нагласи дека членството во НАТО за државата не е само безбедносна гаранција, туку и обврска за активно придонесување кон колективната одбрана и стабилноста на евроатлантскиот простор.

– Оваа посета е уште една потврда за нашата јасна определба кон одбраната на заедничките вредности и довербата која ја градиме во рамките на Алијансата – истакна Лафчиски.

Во текот на средбата со генералот Гринкевич, како што посочи, биле разгледани актуелните безбедносни предизвици, како и процесите на модернизација и опремување на Армијата, со акцент на придонесот во регионалните планови за одбрана на НАТО.

Лафчиски истакна дека македонската Армија има важна улога како клучен фактор во регионот и на транспортните коридори, особено во однос на мобилноста, отпорноста и стратешката длабочина на Алијансата.

– Македонската Армија денес е модерна, добро опремена и високо обучена. Ова не е само наше видување, туку тоа претставува објективна и потврдена оцена, добиена преку серија на ригорозни проверки на персоналот, опремата и процедурите – истакна тој, посочувајќи на сертификацијата на лесната пешадиска баталјонска група во рамки на вежбата „Блесок 26“, како и оценувањето на борбените елементи за специјални операции.

Тој додаде дека продолжува процесот на модернизација, при што Армијата се зајакнува со нова опрема, меѓу која оклопни возила JLTV и „Страјкер“, артилериски системи „Боран“ и противвоздушни системи „Мистрал-3“, а во наредниот период се очекуваат и хеликоптери.

Според него, кохезијата и единството на НАТО остануваат клучна сила во справување со современите безбедносни предизвици.

– Македонската Армија останува сигурен и кредибилен сојузник, со над 180 припадници ангажирани долж источното крило на Алијансата – нагласи Лафчиски, додавајќи дека земјата придонесува и во мисиите КФОР во Косово и АЛТЕА во Босна и Херцеговина.

Во рамки на посетата на генералот Гринкевич, во касарната „Илинден“ во Скопје беше презентирана дел од современата опрема со која располага македонската Армија.

Пред високиот гостин беше организирана и демонстрација на способностите на армиските припадници, при што беа изведени две тактички вежби. Вежбите опфатија динамични сценарија со ангажман на различни единици и средства, со цел прикажување на нивото на обученост, координација и оперативна подготвеност.

The post МАКЕДОНИЈА ВЕЌЕ ИЗДВОЈУВА 4% ОД БДП ЗА АРМИЈАТА Генерал Гринкевич вели дека македонските војници се клучни за Источното крило на НАТО appeared first on plusinfo.mk.

Косовското министерство за одбрана ги демантираше информациите дека е планирано повлекување на американската војска од Косово.

„Оваа вест, која ја делат некои веб-страници и телевизиски канали е дезинформација, која ја шират надворешни актери, со цел да се дестабилизира земјата и на Западен Балкан“, се наведува во соопштението од косовското Министерство за одбрана.

Во соопштението се истакнува дека повлекувањето на американските трупи од НАТО силите во Косово (КФОР) „не доаѓа предвид“, бидејќи таквите одлуки за распоредување или за повлекување не се носат случајно.

Косовското Министерство за одбрана наведе дека е во постојана координација со САД за секоја одлука и во редовна неделна комуникација со КФОР.

Во КФОР има над 600 американски војници.

Западните земји стравуваат дека евентуалниот договор помеѓу Вашингтон и Москва за Украина и промената на приоритетите на администрацијата на американскиот претседател Доналд Трамп може да доведе до повлекување на американските војници од делови од Европа.

The post ЛАГА Е ДЕКА АМЕРИКАНСКАТА ВОЈСКА ЌЕ СИ ОДИ ОД КОСОВО Дезинформациите се обид за дестабилизација на Западен Балкан, соопшти косовското министерство за одбрана appeared first on plusinfo.mk.

Одредени индикатори, по доаѓањето на Доналд Трамп на власт во САД, укажуваат на заострени односи помеѓу Вашингтон и Приштина, а според воениот аналитичар Александар Радиќ, САД веќе подолго време ја разгледуваат можноста за повлекување на своите сили од КФОР, а поголемата вклученост на Турција треба да се толкува преку желбата Косово да стане стратешка точка на Западен Балкан, објави Косово онлајн.

– Американците многу одамна, дури и пред првата деценија на 21 век, покажаа дека немаат желба да останат во Косово. Српскиот национален мит е приказна за Бондстил, околу 100 години американска контрола, за тајните интереси… Впрочем, одамна во Вашингтон веќе беше отворена тема дека може да го напуштат Косово бидејќи тоа не е нивен проблем. Тие останаа поради турбулентната ситуација, но за тоа како тие го доживуваат проблемот во Косово доволно говори фактот што Американците ја испраќаат само Националната гарда во таа мисија. За нив е важно нивното знаме да биде таму. Да, присутна е и американската армија, но тие не се единици на првата линија и се таму само за да покажат моќ, политички авторитет – изјави Радиќ.

„Европејците нека си се справат со своите проблеми“

Радиќ е убеден дека Трамп би можел да ја реализира таа идеја (повлекувањето на американските сили од Косово), со својот прагматичен став.

– Поради својот прагматичен став, Трамп лесно може да каже: „Зошто чуваме баталјон во Бондстил и што всушност прават тие таму? Дали тоа е европски проблем? Да. Дали Европа се плаши од проблеми на Балканот? Да. Па, нека се справат Европејците со тој проблем“ – смета Радиќ.

Според неговите зборови, досега е евидентно дека најголем интерес за учество во мисијата на КФОР искажуваат земјите кои географски се блиску до Косово.

Тука, нагласува, не треба да се вклучи Турција, која, како што тврди, има сосема поинаква „математика“.

– Турскиот фактор е нешто друго. Турција сака да ја проектира својата моќ на Балканот. Тие сакаат политичко влијание и за тоа имаат програми за соработка пред сѐ со Косовските безбедносни сили. Ги имаат и вооружените сили на Босна и Херцеговина, кои се составени од 3 конститутивни нации, но редовно се покажува дека на тоа се гледа поинаку од перспектива на Анкара – потенцира воениот аналитичар.

Во однос на БиХ, во Турција се измешани прагматичните интереси: обид да се продаде оружје и воена опрема и да се заработат пари, како и желба да се постигне политичко влијание.

– Но, односот кон Приштина е поинаков. Таму, освен што постигна комерцијални договори, Турција навистина се обиде да подари некои видови оружје што, на пример, другите членки на НАТО не сакаат косовските безбедносни сили (КБС) да ги поседуваат. Имено, ставот на КФОР е дека што се однесува до нив, на сила е стариот, прв закон за КБС, а не оној од 2018 година, и тие можат да имаат само лесно оружје и не можат да поседуваат офанзивни средства. Но, таа зона, меѓу дефиницијата за лесно оружје и нешто што би можело да биде посериозна техника во рацете на војниците кои ги извршуваат наредбите на Приштина, се пополнува со турска техника – појаснува Радиќ.

Тој смета и дека не е во ред најавите на Трамп да се поврзуваат со овие турски цели.

– Минофрлачите од 120 милиметри пристигнаа во Косово во време кога беше целосно неизвесно кој ќе биде следниот американски претседател по Бајден. Ова е сега замена на тезите бидејќи и Западот се грижи за Трамп, па после да поврземе сѐ со тие сценарија. Мислам дека Турција има јасно дефинирана стратешка политика на присуство на Балканот, со фокус на Косово, и дека испраќањето оружје е дел од таа политика – заклучува овој воен аналитичар.

САД и Турција не ги собира на исто место

– КФОР треба да може да ги продолжи своите операции во случај на повлекување на САД, главно бидејќи Косово се подготви за ова потенцијално сценарио со зајакнување на врските со Турција во последните години – појаснува американскиот експерт за безбедност, Џорџо Кафиеро за Форин полиси.

Неговиот аргумент, објавен во Форин полиси, се заснова на изјавата на новоизбраниот американски претседател, Доналд Трамп, дека може да ги повлече воените сили од различни делови на светот.

Многу поживописен во својата проценка е новинарот Батон Хаџиу.

Повлекувањето на САД од Косово би било „стратешка промена во пејзажот на регионот“, нагласува тој.

– Што ќе се случи ако Трамп продолжи со својата визија за повлекување од „надворешните војни“? Дали може да се замисли Косово без САД како негов постојан заштитник? Таквото сценарио, без разлика колку некому му изгледа малку веројатно, суштински би го променило политичкиот и стратегискиот пејзаж на регионот – тврди Хаџиу во авторски текст за Албаниан пост, се вели во анализата на Косово онлајн.

Ако им се верува на бројките, овој „пејсаж“ веќе е значително променет бидејќи САД одамна престанаа да имаат најголемо воено присуство во Косово.

САД му се наострија на Курти

Показател за промената на односите помеѓу САД и Косово е и изјавата на претставникот на американскиот претседател Доналд Трамп за специјални мисии, Ричард Гренел, кој пред неколку дена упати остри критики кон косовската влада на Албин Курти, нарекувајќи го премиерот недоверлив и додавајќи дека Курти со своите активности го дестабилизра регионот.

„Реториката што сега ја користи Курти, тврдејќи дека е близок со САД, е апсолутно лажна. Не залажувајте се“, напиша Гренел на социјалната мрежа Икс.

ГРЕНЕЛ ГО НАПАДНА КУРТИ „Апсолутна лага е дека е близок со САД“

Гренел во објавата вели дека администрацијата на Трамп и во претходниот мандат работела за мир за сите на Балканот и оти така ќе продолжи и сега.

„Имам многу пријатели во Косово и во Албанија… и многу пријатели во Србија и во целиот регион. Но, ни требаат доверливи партнери“, потенцираше тој.

Тој напиша дека и републиканците и демократите постојано го критикуваа Курти за преземање унилатерални активности кои го дестабилизираат регионот.

„Меѓународната заедница е обединета против Курти “, додаде Гренел

Според официјалните податоци на КФОР, мисијата моментално вклучува 4.302 војници од 29 земји. Најголемиот контингент доаѓа од Италија, со 855 војници, додека, пак, САД се рангирани на второто место, со 598 војници.

Меѓу земјите со над 300 војници на теренот, Турција е „насреде“ со 325 војници. Пред Турција е Унгарија со 365 војници, а по неа е Германија со точно 300 војници.

The post БОНДСТИЛ СИ ЗАМИНУВА, ТУРСКИ АСКЕР СЕ ВРАЌА НА КОСОВО?! Се оладува односот на Вашингтон со Приштина appeared first on plusinfo.mk.

Џексон беше првиот командант на КФОР и потписник на Кумановскиот договор.

Во 1999 година, генералот Мајкл Џексон го потпиша Кумановскиот договор, со кој по 78 дена заврши бомбардирањето на Сојузна Република Југославија (СРЈ) и го означи почетокот на операцијата за формирање на мисијата КФОР во АП Косово и Метохија, која ја водеше како прв командант, јави Би-Би-Си.

Во 1999 година, генералот Џексон се судри со американскиот врховен командант на силите на НАТО во Европа, генералот Весли Кларк, кој му нареди да испрати сили до АП КиМ со цел да го спречи ненадејното напредување на руските сили упатени кон аеродромот во Приштина.

Џексон потоа му рекол на Кларк: „Нема да ја започнам Третата светска војна наместо вас“.

Џексон беше началник на Генералштабот на британската армија од 2003 до 2006 година, тој беше присутен во два значајни инцидента во Северна Ирска, а ја предводеше армијата и за време на војната во Ирак.

The post ПОЧИНА МАЈКЛ ЏЕКСОН Беше прв командант на КФОР и потписник на Кумановскиот договор appeared first on plusinfo.mk.

– Војската на Србија секојдневно е во контакт со командата на КФОР, дури имаме и заеднички патроли. На Албин Курти постојано му се привидуваат активности на Војската на Србија, со што се обидува дополнително да ја подигне тензијата и од страна да го прикрие она што го прави, што доведува до огорченост. Војската на Србија ги извршува своите редовни задачи. Нема дополнителни активности, ништо не подготвуваме, не правиме ништо што може да доведе до влошување на состојбата на терен. Напротив, многу сме мирни и трпеливи, страдаме повеќе од кој било, затоа што сакаме да го зачуваме мирот. А што ќе подготви Курти, ќе видиме утре.

Изминатите денови Курти го презентираше барањето обвинувајќи ги властите во Белград дека во последните две години дури четири пати ја донеле армијата близу границата.

Во одговорот на КФОР до приштинските медиуми се наведува дека копнената и воздушната безбедносна зона била целосно релаксирана во 2015 година, дека КФОР постапува согласно резолуцијата 1244, дека нема простор за промени и дека внимателно се следи ситуацијата на терен.

The post НА КУРТИ МУ СЕ ПРИВИДУВА СРПСКА ВОЈСКА НА КОСОВО Вучевиќ ја коментира идејата за безбедносна зона долж границата appeared first on plusinfo.mk.

Заменик-командантот на мисијата на НАТО во Косово, КФОР, бригадниот генерал Федерико Бернака денеска разговараше со делегацијата на најголемата партија на косовските Срби, Српска листа (СЛ), предводена од нејзиниот претседател, Златан Елек, при што посочи дека мисијата е „добро подготвена да реагира на сите важни безбедносни случувања“, јави дописникот на МИА од Приштина.

Бернака ја прими СЛ во седиштето на Мисијата во Приштина, а како што се наведува во соопштението на КФОР, на средбата се разменети мислења за најновите безбедносни случувања, вклучително и за ситуацијата на север и загриженоста на Србите по последната акција на косовската полиција, во која беа затворени паралелните структури на Србија во општините со српско мнозинство во северно Косово.

Италијанскиот генерал порача дека КФОР има „видливо и флексибилно присуство низ Косово“ и дека е добро подготвен да реагира на сите релевантни безбедносни настани.

Вториот човек на КФОР ја повтори посветеноста на мисијата да придонесе за безбедноста и стабилноста „за сите луѓе кои живеат во Косово, во сите околности и непристрасно, во согласност со долгогодишниот мандат на ОН“.

„Во таа смисла, КФОР продолжува целосно да го поддржува дијалогот меѓу Белград и Приштина, кој се води со посредство на ЕУ. КФОР продолжува да го спроведува својот мандат, врз основа на резолуцијата 1244 на Советот за безбедност на ОН од 1999 година – да обезбеди сигурна и безбедна средина за сите луѓе кои живеат во Косово и слобода на движење, во сите околности и непристрасно“, се наведува во соопштението на мисијата на НАТО во Косово.

Косовската полиција во петокот ги затвори српските паралелни структури во четирите општини на север – Северна Митровица, Лепосавиќ, Звечан и Зубин Поток.

Постапката на Приштина ја осудија мисијата на ЕУ во Приштина, како и амбасадите на Соединетите Американски Држави, Германија, Велика Британија и Франција.

The post КФОР Е ПОДГОТВЕН ДА ОДГОВОРИ НА СЕКОЈА СИТУАЦИЈА Заменик командантот на НАТО во Косово на средба со претставници на Српска листа appeared first on plusinfo.mk.

Тој рече дека од правец на Ѓаковица на 5 и на 20 јуни било забележано кревање на албански дронови „Бајрактари“ на височина од 5.800 метри со намера за извидување на позиција на српската војска.

– Исто така, шведско-германски авиони правеа фотографии, не од територијата под контрола на војската на Србија, туку од други територии кои не се под контрола на Србија, но прават многу прецизни слики поради присуството на безбедносните и воените сили на територијата на централна Србија – изјави Вучиќ.

Како што кажа пред новинарите, Србија ќе продолжи да работи забрзано, да работи повеќе и подобро и ќе биде многу појасна во пораката за одвраќање на потенцијален агресор.

Тој посочи дека и наменските фабрики ќе мора да работат повеќе, а не да се занимаваат со политика.

– Ќе треба да го зголемиме човечкиот потенцијал во војската на позициите на оние кои можат да носат пушка и да ѝ помогнат на земјата во нејзината одбрана – додаде српскиот претседател.

Тој изјави дека има многу предизвици и дека големи сили се собрани во регионот.

– Имаме многу предизвици, големи сили се собрани во регионот од различни причини, од значајните сили на соседните земји до огромниот број членки на НАТО на Косово и Метохија во моментов, односно 4534. Сметаме на добра соработка со КФОР и со трупите на НАТО и веруваме дека тоа ќе придонесе во стабилизирање на ситуацијата на Косово и Метохија. Во моментов, имате 1.500 војници на НАТО во Босна и Херцеговина како дел од мисијата ЛТА (LTA), кои се засилени со нешто што е ново, стратешки резерви формирани од Европската Унија, и тие не се наоѓаат на таа територија, туку на територија на соседните земји Романија, Унгарија и Бугарија. Уверени сме дека во никој случај нема да бидат употребени ниту против српскиот народ ниту против Република Србија – рече Вучиќ.

The post АЛБАНСКИ ДРОНОВИ „БАЈРАКТАРИ“ ЈА НАБЉУДУВАА ПОЗИЦИЈАТА НА СРПСКАТА ВОЈСКА Зголемени дејствија на летала со извидувачки намери кон Србија appeared first on plusinfo.mk.

„Одлуката е донесена врз основа на препораките на високите воени претставници во НАТО и заклучоците донесени на состанокот на началниците на генералштабовите на земјите членки на иницијативата за соработка во одбраната, а со цел зајакнување на безбедноста и сигурноста на Република Косово. За учество во НАТО операцијата се испраќаат 70 припадници на Армијата за период од шест месеци, сметано од ноември 2023 до мај 2024 година“, информираат од Владата по одлуката донесена на денешната седница.

Со оваа измена на Одлуката, вкупниот број со кој Македонија ќе учествува во операцијата „КФОР“ во Република Косово ќе изнесува 101 припадник на Армијата.

The post УШТЕ 35 МАКЕДОНСКИ ВОЈНИЦИ ОДАТ ВО КОСОВО Владата го зголеми бројот на припадници на АРМ кои ќе учествуваат во НАТО операцијата „КФОР“ appeared first on plusinfo.mk.

Албанскиот премиер Еди Рама вчера изјави дека КФОР треба да ја преземе контролата врз северот на Косово. Тој смета дека „не само што мора под итно да се подигне нивото на застапеност на евроатлантската заедница во дијалогот, туку мора да се земе предвид дека тоа е направено заедно со залихите на сите тие договори, некои потпишани, некои усно прифатени, но генерално неприменети“.

Според него, одложувањето на преземањето на овој чекор „може да донесе дури и голем број жртви на вооружен конфликт и затоа КФОР треба да ја преземе контролата врз северот на Косово“.

Косовскиот премиер Албин Курти, коментирајќи ги изјавите на албанскиот премиер Рама дека мировните сили на НАТО (КФОР) треба да ја преземат контролата врз северно Косово, рече дека всушност потребни се заеднички патроли на КФОР и косовската полиција долж границата со Србија.

– Ни требаат заеднички патроли на нашата (косовска) полиција и КФОР долж границата меѓу Косово и Србија. Насекаде во Косово, прва реагираше нашата полиција, потоа (мисијата на ЕУ за владеење на правото на Косово) ЕУЛЕКС, а дури потоа и КФОР. И мислам дека оваа формула не треба да се менува – изјави Курти за „Истрага“, пренесува Клан Косова.

Ситуацијата на северот на Косово е крајно тензична од 24 септември, кога група вооружени Срби ја нападнаа косовската полиција во селото Бањска. Во нападот загина косовскиот полицаец Африм Буњаку, а во размената на оган што следеше загинаа и тројца Срби.

Косовската полиција утринава изврши претреси во северниот дел на Косовска Митровица, Звечан и Зубин Поток.

The post НАТО ОДОБРИ ДОПОЛНИТЕЛНИ СИЛИ ЗА КОСОВО Се бара КФОР да ја преземе контролата на северот appeared first on plusinfo.mk.

На видеото од безбедносната камера може да се види како специјалци со четири џипа го опкружуваат Ненад О. кој тогаш бил без маица.

Според соопштението на косовската полиција, причина за апсењето е наводниот напад врз КФОР на крајот на мај.

– Неговото апсење и придружување во полициска станица е извршено по прибавен доказ дека е вклучен во нападот на КФОР на 29 јуни 2023 година, каде како резултат на нападот и употребеното насилство десетици припадници на КФОР се здобија со физички повреди. Сите понатамошни дејствија ќе бидат преземени во соработка и координација со правосудните органи – се наведува во соопштението на косовската полиција.

Од Канцеларијата за Косово и Метохија велат дека ова апсење не е случајно темпирана утрото по дијалогот во Брисел и дека јасно покажува дека Албин Курти нема да ги смири тензиите на северот на Косово и Метохија.

– Ненад е осмиот Србин кој е уапсен од избувнувањето на кризата на северот на Косово и Метохија, со која Курти и неговите одреди на насилство сакаат да го скршат отпорот на мирниот српски народ на Косово и Метохија и да ги прогласат за криминалци, затоа што пружаат мирен и ненасилен отпор на теророт на Приштина. Очигледно е дека Курти не сака дијалог или мир, туку сака да ги уапси сите Срби и да предизвика конфликти и да го запали не само подрачјето на Косово и Метохија, туку и целиот регион – се наведува во соопштението.

The post (ВИДЕО) УШТЕ ЕДЕН СРБИН ЗАВРШИ ЗАД РЕШЕТКИ Косовската полиција со вооружена до заби приведе жител на Митровица appeared first on plusinfo.mk.