Кошаркарската федерација на Македонија (КФМ) изрече санкции за судии, делегати и клубови поради пропусти во трето и четврто коло од МТЕЛ Супер лигата – мажи, за да се обезбеди регуларноста на натпреварите.

Судиите на натпреварот КК „Кожув“ – КК „Гостивар“ добија забрана за вршење должност на 4, односно 2 натпревари. Делегатите на натпреварите КК „Куманово“ – КК „Феникс“ и КК „Пелистер“ – КК „Маџари“ се суспендирани за по 4 натпревари.

Во случајот со КК „МЗТ Скопје“ и натпреварот против КК „Ангели“, играч кој не бил наведен на образецот NAT-1 влегол во игра. Делегатот е санкциониран, а натпреварот службено регистриран 20:0 во корист на противникот, при што МЗТ Скопје не добива бод.

Санкциите се преземени согласно член 43 од Статутот на КФМ, Правилникот за натпреварување, Пропозициите за натпреварување и Дисциплинскиот правилник, со цел доследна примена на актите и одговорност за сите субјекти.

КФМ истакнува дека мерките испраќаат јасна порака – регуларноста нема компромис и никој не е над правилата, ниту судиите, ниту делегатите, ниту клубовите. Спроведувањето на актите и правилата е темел на кредибилитетот и угледот на македонската кошарка, која мора да се развива во фер и еднакви услови за сите учесници, без разлика на нивниот ранг, историја или традиција.

Федерацијата ги повикува сите учесници да ги почитуваат актите, одлуките и процедурите, бидејќи тоа е основа за фер средина и доверба во институциите. Интегритетот на кошарката е највисок спортски интерес, заснован на чесност, фер-плеј и почитување на правилата. КФМ ќе продолжи да ги спроведува своите акти доследно и транспарентно, без селективност, со цел заштита на угледот на спортот и испраќање порака дека интегритетот не се преговара, нагласува Федерацијата.

The post КАЗНИ ЗА СУДИИ, ДЕЛЕГАТИ И КЛУБОВИ ЗА ПРОПУСТИ ВО НАТПРЕВАРИТЕ Кошаркашката Федерација изрече санкции во МТЕЛ супер лига  appeared first on plusinfo.mk.

Томица Главчев, бизнисмен од Гевгелија и долгогодишен кошаркарски работник, е избран за нов претседател на Кошаркарската федерација на Македонија на денешната вонредна седница на Собранието на КФСМ.

Како единствен кандидат, со максимална поддршка од клубовите, Главчев доаѓа на чело на Федерацијата како наследник на Перо Антиќ, кој ја извршуваше функцијата претседател од 2019 година.

– Ова е иницијатива која е отпочната одамна, а јас не бев вклучен од стартот. Луѓето кои ја истуркаа ќе бидат дел од мојот тим. Посебно сакам да го поздравам Младен Ѓуроски кој ги презеде сите работи за доведување на ова Собрание и до оваа точка. Во изминатите денови имавме повеќе состаноци со членови од присутните делегати, со поголем дел од нив. Имавме отворени разговори, практични за моите идеи и размислувања. Мојот општ впечаток е дека наидовме на разбирање и размислување во кој правец ќе треба да ги тераме. Се договоривме дека ако оваа работа успее, да се концентрираме прво шампионатот да заврши, а потоа да делуваме – изјави новоизбраниот прв човек на македонската кошарка.

Главчев посочи дека негов главен приоритет ќе биде да ги посети сите градови во кои ќе се игра кошарка.

– Не би сакал да се изненадите ако инсистирам на тие состаноци да бидат луѓето од локалната самоуправа, затоа што во сите клубови се и шефовите на градовите. Мора да ги чуеме и нив, дали ќе одиме заедно во некоја насока, или ќе имаме различни правци, што не би било убаво – истакна Главчев пред делегатите.

The post ТОМИЦА ГЛАВЧЕВ НА МЕСТОТО НА АНТИЌ ВО КФМ Новиот прв човек на македонската кошарка ги претстави своите приоритети appeared first on plusinfo.mk.

На 30 април, во салата за прес-конференции при Спортскиот центар „Борис Трајковски“, ќе се одржи вонредно Собрание на Кошаркарската федерација на Македонија (КФМ), на кое, според најавите, ќе дојде до промена на досегашниот претседател Перо Антиќ.

Негов наследник треба да биде Младен Ѓуроски – поранешен репрезентативец и играч на неколку македонски клубови – кој веќе ја има обезбедено поддршката од огромното мнозинство на клубовите низ земјава. Според податоците, зад неговата кандидатура официјално застанале 36 клубови, а тој денеска лично ја доставил одлуката за свикување на собрание до Куќата на кошарката.

„Иницијативниот одбор врз основа на членот 36 од Статутот на Кошаркарска Федерациа на Северна Македонија свикува вонредно собрание на 30 април со почеток во 16 часот во салата за прес-конференции при СЦ Борис Трајковски“, стои во официјалното соопштение испратено до федерацијата.

Промената на врвот на КФМ не доаѓа сама – Ѓуроски најавува вистинска кошаркарска офанзива со нов тим кој ги обединува некои од најголемите имиња во историјата на македонскиот спорт. Негови најблиски соработници ќе бидат тројца од четворицата најдобри македонски кошаркари на сите времиња: Петар Наумоски, Врбица Стефанов и Владо Илиевски. Тројцата прифатиле да му се придружат и активно да учествуваат во реформите за враќање на македонската кошарка на мапата на европскиот спорт.

Посебно внимание привлекува и вклучувањето на Томе Главчев – човекот зад кошаркарското чудо Блокотехна, клубот кој освои трофеј во БИБЛ лигата и стана втор македонски тим со меѓународен успех. Главчев долги години е активен во спортот како спонзор на Кожув, помагател на МЗТ Скопје и Куманово, и член на Управниот одбор на КФМ во неколку наврати.

Оваа силна екипа, позната и како „дрим-тим“, најавува нова ера за македонската кошарка. Според последните информации, Ѓуроски и неговиот тим се целосно подготвени да се соочат со сите предизвици кои ги носи преземањето на федерацијата и да започнат сериозна работа за подигање на спортот на повисоко ниво.

„Ние сме тука да ја вратиме македонската кошарка таму каде што ѝ е местото – на европската сцена. Имаме план, имаме енергија и најважно од сè – имаме поддршка од целата кошаркарска заедница,“ велат луѓе блиски до Ѓуроски.

The post ПРОМЕНИ НА ВРВОТ НА МАКЕДОНСКАТА КОШАРКА Ѓуроски го менува Антиќ, во КФМ влегува со легендарен „дрим-тим“ appeared first on plusinfo.mk.