Полицијата во изминатите два дена изрекла 1.026 казни за сообраќајни прекршоци низ државата, а 34 лица биле лишени од слобода поради безобѕирно управување со возило. Најголем дел од санкциите се однесуваат на пречекорување на дозволената брзина.

Според информациите од Министерството за внатрешни работи, дури 316 возачи биле фатени како возат побрзо од дозволеното. Во истиот период, полицијата уапсила девет возачи кои управувале под дејство на алкохол, 24 лица без возачка дозвола и едно лице кое возело и покрај претходно изречена забрана.

Во акциските контроли биле одземени и 23 возила согласно член 300-б од Кривичниот законик.

Покрај брзото возење, полицијата регистрирала и 164 прекршоци за непрописно паркирање, како и 29 санкции за возење под дејство на алкохол.

Казни добиле и 107 мотоциклисти кои не носеле заштитен шлем, додека 99 учесници во сообраќајот биле санкционирани поради некористење сигурносен појас. Полицијата казнила и пет пешаци.

Од сообраќај биле исклучени 15 нерегистрирани возила, како и четири возила поради техничка неисправност. Санкционирани биле и двајца возачи поради незаконско затемнување на стаклата на возилата.

Од МВР најавуваат дека сообраќајните контроли ќе продолжат и во наредните денови и апелираат граѓаните да ги почитуваат правилата за да се зголеми безбедноста на патиштата.

The post НАД 1.000 КАЗНИ ЗА САМО ДВА ДЕНА Полицијата одзеде 23 возила и уапси 34 лица appeared first on plusinfo.mk.

Нашата сообраќајна некултура, која произлегува од општата некултура во државата, мора да се регулира, вели професорката по казнено право Гордана Лажетиќ. Таа нагласува дека измените во повеќе закони и воведувањето на системот „Безбеден град“ се голем чекор кон создавање поредок на улиците и дека веќе имаат превентивно влијание врз возачите.

– Иако системот сè уште не е имплементиран, самата најавa и измените во законите делуваат превентивно во делот на управувањето со моторни возила. Тоа е силна порака дека безобѕирното возење нема да се толерира – истакна Лажетиќ.

Според Лажетиќ, постои заблуда дека автомобилот ќе се одзема на првиот прекршок. Но, тоа ќе важи за повторниците и за оние кои возат со брзина над 120 километри над дозволената.

– Во тие случаи возилото веќе се претвора во опасно орудие и мора да биде одземено. Ова е неопходно за да се спречи загрозување на јавната безбедност – потенцира таа.

Лажетиќ додава дека е важно редот да важи за сите учесници во сообраќајот – пешаци, велосипедисти, возачи на електрични тротинети и моторни возила.

– Оној кој не сака да се придржува на основните правила не треба да биде учесник во сообраќајот. Без разлика дали е пешак, велосипедист или возач – мора да има одговорност – вели Лажетиќ.

Прашана дали судовите ќе можат да издржат зголемен број на прекршоци што ќе ги бележи системот „Безбеден град“, Лажетиќ вели дека најголемиот акцент ќе биде токму на санкциите.

– На самиот почеток ќе има зголемен број на барања за поведување прекршочна постапка. Тоа може да значи малку поголем товар за судовите, но постојат механизми за тоа да не стигнува секогаш до суд. Ако граѓаните ја прифатат глобата и ја платат, нема потреба од дополнителна постапка – објаснува таа.

The post ВОЗАЧИТЕ ПОД ЛУПА, СУДОВИТЕ ПОД ПРИТИСОК „Безбеден град“ носи голем бран прекршочни постапки appeared first on plusinfo.mk.