Камерите на системот „Безбеден град“ сè почесто ги фаќаат возачите кои ги прекршуваат сообраќајните правила, а казните не се ни малку симболични. Од Министерството за внатрешни работи потсетуваат дека секое пречекорување на брзината, поминување на црвено или непрописно паркирање автоматски се евидентира и санкционира.

Најчест прекршок е возење побрзо од дозволеното во населени места. За надминување до 10 километри на час, казната изнесува 15 евра, додека за брзина поголема за 30 до 50 километри на час следува глоба од 300 евра и забрана за управување возило од три до 12 месеци. Слични санкции важат и за возачите кои пречекоруваат брзина надвор од населени места, особено на автопатите и магистралните патишта.

Строго се казнува и поминувањето на црвено светло. Овој прекршок чини 250 евра, а возачите остануваат без дозвола од три до 12 месеци, без разлика дали има сообраќајна незгода или не.

Под лупа на камерите е и непрописното запирање и паркирање – на пешачки премини, крстосници, велосипедски патеки, тротоари, автобуски постојки и места наменети за лица со попреченост. Казните се движат од 25 до 180 евра, во зависност од тежината на прекршокот.

Посебно високи се санкциите за учество во сообраќај со нерегистрирано возило. Возачите кои управуваат автомобил без важечка сообраќајна дозвола или без регистарски таблички ќе платат 500 евра, додека ако регистрацијата е истечена до 30 дена, казната е 100 евра.

Од МВР потсетуваат дека казните може да се преполоват доколку се платат во рок од осум дена. Истото важи и за забраните за управување – рокот се скратува на половина ако глобата се плати навреме.

Целта на системот „Безбеден град“, како што велат од полицијата, не е казнување, туку намалување на сообраќајните незгоди и зголемување на безбедноста за сите учесници во сообраќајот.

The post 📷 КАМЕРИТЕ НЕ ПРОСТУВААТ Брзање, црвено и погрешно паркирање, еве колку ќе ве чини секоја грешка appeared first on plusinfo.mk.

Возењето во главниот град е значително смирено по тест‑периодот на системот „Безбеден град“, вели началникот на СВР Скопје, Сашо Топаловски. Тој истакна дека граѓаните веднаш го намалиле бројот на прекршоците со воведувањето на опомените, а новиот систем ќе регистрира четири клучни прекршоци кои најмногу ја загрозуваат безбедноста во сообраќајот: брзо возење, поминување на црвено светло, нерегистрирани возила и неправилно паркирање.

– Преку опомените народот многу брзо изреагира во тест-периодот. Беше известен, знаеше што претстои и веднаш го смири своето возење, го смири начинот на возење. Со тоа покажавме дека можеме да бидеме исто како Германците, Австријците, како сите други земји што го имаат тоа инкорпорирано во својот систем, и ние да го почитуваме – изјави Топаловски во поткастот „Радар“ со Сотир Костов.

Тој нагласи дека реакцијата била толку брза што бројот на прекршоци се намалил за повеќе од три пати.

– На почеток имавме преку 110.000 прекршоци. Нема систем и институција што може да го обработи тоа. Но народот за два дена го спушти бројот на 30.000. Толку е паметен нашиот народ. На самата опомена, на самиот тест, го намали нивото на брзо возење – додаде тој.

Топаловски објасни дека реформата е насочена кон четири прекршоци кои најмногу влијаат врз редот и безбедноста во сообраќајот: брзо возење, поминување на црвено светло, нерегистрирани возила и неправилно паркирање. Тоа се прекршоците што ќе ги детектира системот „Безбеден град“.

– Луѓето велат: „Две-три минути ќе застанам“, а тоа создава огромни проблеми. Ако само на една точка на Партизанска застанат два автомобила, се прават колони што два часа не можете да ги расчистите. Најлошо е што на тој начин се загрозуваат човечки животи. Не гледаш пешак, не гледаш кој поминува – предупреди Топаловски.

Тој додаде дека остануваат и другите сообраќајни прекршоци за кои и досега се казнувало, како неносење сигурносен појас или користење мобилен телефон при возење.

The post ЗА САМО 2 ДЕНА ГРАЃАНИТЕ ГО СМИРИЛЕ СВОЕТО ВОЗЕЊЕ Топаловски задоволен од тест-периодот на „Безбеден град“ appeared first on plusinfo.mk.