Министерот за здравство Азир Алиу на денешната прес-конференција за решавање на проблемот со паркирање во Клиничкиот центар „Мајка Тереза“ најави дека во план е да има четири видови плаќање паркинг во иднина.

– Ќе има неколку видови на плаќање на паркинг местата. Онколошки пациенти и сега имаат бесплатно паркинг место, тоа ќе продолжи да биде така. Пациенти кои се лекуваат тука ќе плаќаат цена што ќе биде достапна за нив и нема да биде комерцијална. Вработените во Клиничкиот центар ќе имаат цена што е достапна за администрација. На крај, ќе имаме цена што ќе биде комерцијална, како на сите паркинг места што има комерцијални цени. Тоа ќе биде за граѓани кои се паркираат поради други причини или за да посетат некој близок, хоспитализиран во кампусот „Мајка Тереза“ во Скопје, појасни Алиу, одговарајќи на новинарско прашање за цените за паркирање.

Тој информираше дека во план е преку апликација од дома да се резервира паркинг место со број на упат или пред рампа да се скенира код од упатот. Според предвиденото, ќе можело да се плаќа онлајн на апликацијата или како досега – со кеш или картичка.

Според првичните анализи, до јуни треба да има и катни гаражи што ќе може да се користат. Бројот на катните гаражи, како што информираше министерот, максимум ќе биде три.

– Идејата е да имаме слободни паркинг места колку што ни се потребни. Направена е анализа според последните три години колку се користи. Пикот е некаде од 10 до 15 часот во Клиничкиот центар, додаде Алиу.

На прашање каде се планирани катните гаражи, министерот рече дека трите локации за кои досега се зборувало се една кај модуларната болница, втор простор за катна гаража до Гинекологија и трет простор за катна гаража кај што е хелиодромот.

– Од каде ќе се почне, зависи од Јавното претпријатие „Градски паркинг“, одговори тој на новинарско прашање.

Министерот рече дека просторот на Клинички ќе биде уреден со зеленило, пешачки патеки, со „брза патека“ за Брза помош, а во план било и да се отвори нов влез што ќе биде кај Кардиологија и Кардиохирургија за пациенти на кои секој миг им е важен за животот.

– По месеци интензивна работа и поминување на сите неопходни административни и правни процедури, конечно стигнавме до одлука со што го решаваме деценискиот проблем со паркирањето во кругот на клиничкиот комплекс. Ова прашање го најавивме како еден од првите приоритети, но, чие затворање беше условено од сложени постапки и усогласувања. Со последната одлука на Владата, донесена на седницата во вторникот, оваа работа добива јасна институционална рамка и се отвора патот кон трајно решение во интерес на пациентите и сите вработени во комплексот клиники, изјави Алиу на прес-конференцијата.

Тој додаде дека станува збор за одлука за давање под закуп на недвижни ствари со непосредна спогодба со Град Скопје, заради организирање, управување, уредување и одржување на паркиралиштата во просторот на комплексот клиники „Мајка Тереза“ во Скопје.

– Во следната фаза Град Скопје ќе започне со проектирање и изградба на катните гаражи. Договорот ќе биде склучен на 15 години, со закупнина во висина од 10 проценти од вкупно остварениот промет и со него овозможуваме модернизација и значително зголемување на капацитетите за паркирање за околу 50 отсто. Со оваа одлука се овозможува просторно доуредување и изградба на катни гаражи. Во рамки на нашите заложби за дигитализација, предвидуваме комплетен мониторинг на паркирањето, при што ќе бидат поставени информативни табли, а ќе има и посебен дигитален водич што ќе ги насочува граѓаните, додаде Алиу.

Тој најави дека предвидено е и урбано и хортикултурно уредување на просторот со зеленило, пешачки патеки и LED осветлување. Исто така, како што најави, ќе биде имплементиран и таканаречен „паметен паркинг систем“ со интегрирани сензори на секое паркинг-место за детекција на слободни места, камери со автоматска регистрација на возила, мобилна апликација за реално време резервации и уплати, како и поврзување со фискален систем и е-управување.

– Нашата визија е здравството да функционира не само во операционите сали, туку и во логистиката околу нив. Денес го правиме токму тоа. Паркингот можеби изгледа како мал чекор, но, редот започнува токму од вакви чекори, бидејќи со години, илјадници луѓе го започнуваат своето лекување со нервоза, неизвесност и хаос пред рампите на Клиничкиот центар. Тоа не е само проблем со паркингот – тоа е чувство дека системот не функционира, дециден беше министерот за здравство.

Алиу подвлече дека пациентите заслужуваат ред, достоинство и функционален систем.

– Решавањето на проблемот со паркингот е дел од поширока трансформација на здравствениот систем. Се движиме од хаос кон систем, од импровизација кон дигитализација, од застој кон одговорност. За крај ќе бидам јасен, времето на одложување заврши. Ова е нова култура на одговорност, заклучи Алиу на прес-конференцијата.

The post ЌЕ ИМА ЧЕТИРИ НАЧИНИ ЗА ПЛАЌАЊЕ ПАРКИНГ НА КЛИНИЧКИ За онколошките пациенти паркирањето ќе биде бесплатно appeared first on plusinfo.mk.

Недостигот на паркинг места и хаосот во сообраќајот наместо со нереални ветувања за катни гаражи кои бараат години за изградба и милионски буџети, ќе се реши со брзо и практично решение – еднонасочни улици со обележани ленти за паркирање, најави кандидатот на ВМРО-ДПМНЕ за градоначалник на Аеродром, Дејан Митески.

– Не можеме да изградиме катна гаража за 6 месеци, но можеме за 6 месеци да обезбедиме до 800 нови паркинг места. Ова решение се базира на користење на постојната инфраструктура, без дополнителни големи трошоци – вели Митески.

Оваа стратегија носи три големи придобивки за жителите на Аеродром, додава тој.

– Прво, значително се зголемува бројот на достапни паркинг места во густо населените зони, со рационално искористување на секој метар улица. Второ, се создава можност за воведување велосипедски патеки на делови каде што ширината тоа го дозволува, поттикнувајќи здрави и еколошки навики. И трето, самата организација на еднонасочните улици природно го намалува брзото движење на возилата, придонесувајќи кон побезбедно и покултурно сообраќајно однесување. Со новиот сообраќаен режим, улиците ќе станат поуредени, побезбедни и попрактични. Наместо да вложуваме време и средства во невозможни проекти, се фокусираме на решенија што граѓаните ќе ги почувствуваат веднаш – порача Митески.

Новиот режим на сообраќај ќе почне да се применува постепено во најоптоварените делови од општината, со цел да се обезбеди ред, безбедност и подобар квалитет на секојдневниот живот за сите жители.

The post НЕ КАТНИ ГАРАЖИ, ТУКУ ЕДНОНАСОЧНИ УЛИЦИ СО ОБЕЛЕЖАНИ ПАРКИНГ-МЕСТА Митески најавува брзо решение за паркирањето во Аеродром appeared first on plusinfo.mk.

Кандидатот за градоначалник на општина Карпош од ВМРО-ДПМНЕ, Сотир Лукровски, на народниот митинг во рамки на изборната кампања под мотото „Вистинскиот избор! Твојот човек! Твоето место! За твојата иднина!“, најави серија инфраструктурни и урбани проекти со кои, како што рече, „Карпош ќе стане уредена, зелена и безбедна општина“.

– Вечерва не ви се обраќам како политичар, туку како човек. Како татко, сопруг, пријател, кој исто како сите вас, го живее секојдневието на Карпош. И тогаш си велам, доста е. Ваквиот Карпош не е нашиот Карпош. Карпош заслужува повеќе. Заслужува ред, чистина, зеленило, безбедност и гордост – порача Лукровски.

Лукровски истакна дека во наредниот мандат општината ќе се фокусира на решавање на проблемот со паркирањето и урбаниот хаос.

– Во Карпош ќе има каде да се паркираме. Ќе изградиме нови паркинг-места и катни гаражи со соларни панели – паркинг и зелена енергија во едно. Ќе воведеме ред во сообраќајот, еднонасочни улици, јасна сигнализација и вистинска безбедност за сите – рече тој.

Тој најави и формирање на ново јавно претпријатие „Карпош План“ кое ќе воведе ред во урбанизмот и ќе ги реши илјадниците постапки за легализација.

– Ќе ставиме крај на дивата урбанизација. Доста е со мафијашки зделки и бетонски пустини. Јас нема да бидам ничиј партнер во инвестициите. Сè ќе биде транспарентно и чесно, заедно со вас, граѓаните – додаде Лукровски.

Лукровски најави реконструкција на парковите, нови рекреативни зони, безбедни тротоари и обновени клупи и улици.

– Ќе се гордееме со новиот парк 1020 и ќе спортуваме во новата рекреативна зона Карпош хајкинг делта. Карпош ќе живее со спорт и култура. Ќе поддржиме спортски клубови, ќе изградиме нови патеки, сали и забавен парк со картинг. Нашите маала ќе оживеат со концерти, улични настани и уметност на секој ќоше – рече кандидатот.

Тој посочи дека општината ќе отвори нови места во градинките, ќе ги реновира училиштата и ќе воведе редари за безбедност на учениците.

– Ќе воведеме униформи со печат на општината, симбол на нашето заедништво и гордост – додаде тој.

Лукровски порача дека ќе биде достапен за секој граѓанин.

– Ќе ја вратиме општината во рацете на граѓаните. Нема повеќе затворени врати. Секој ден ќе сум на терен меѓу луѓето. Ќе обезбедиме поддршка за пензионерите, лицата со попреченост и сите карпошанци. Ќе ги обновиме фасадите, лифтовите и јавните простори – истакна тој.

Во завршниот дел од обраќањето, Лукровски најави дека општината ќе соработува со централната власт за реализација на големи капитални инвестиции.

– Локалната самоуправа нема да биде сама во реализацијата на визијата за современ Карпош. Ќе ја имаме поддршката од централната власт и од премиерот проф. д-р Христијан Мицкоски. Заеднички ќе реализираме значајни инвестиции и капитални проекти – заклучи Лукровски.

The post КРАЈ ЗА ДИВАТА УРБАНИЗАЦИЈА И НОВ ЖИВОТ ЗА КАРПОШ Лукровски со визија за чиста, безбедна и уредна општина appeared first on plusinfo.mk.

Аеродром се соочува со сериозни инфраструктурни предизвици – метеж, недостиг од паркинг-простор и небезбедни пешачки и велосипедски патеки. Решенијата ги понуди кандидатот за градоначалник од редовите на СДСМ, Александар Трајановски, кој на денешната прес-конференција истакна дека неговата програма нуди конкретни мерки, а не празни зборови.

– Во соработка со Град Скопје ќе ја завршиме изградбата на булевар АСНОМ и ќе обезбедиме нови коридори за поврзување со соседните општини. Ќе изградиме нова сообраќајница меѓу Аеродром и Кисела Вода и ќе ја реконструираме улицата Фрањо Клуз и нејзините краци – изјави Трајановски.

Тој додаде дека во секој дел од Аеродром ќе има локални реконструкции и проширувања.

– Ќе ја направиме целосната реконструкција на споредни улици во Горно и Долно Лисиче, ќе уредиме нови паркинг-простори зад ТЦ Скопјанка, ТЦ Бисер и во Ново Лисиче. Со тоа ќе го решиме проблемот со паркирањето кој со години ги мачи жителите – нагласи кандидатот на СДСМ.

Според него, посебен акцент ќе се стави на безбедноста на пешаците и велосипедистите.

– Ќе воведеме „зона 30“ во сите сервисни улици, ќе изградиме нови велосипедски патеки и ќе воспоставиме нулта толеранција за паркирање на тротоари и пешачки патеки. Кај сите училишта ќе бидат поставени нови семафори за максимална заштита на децата – рече Трајановски.

Тој најави дека проблемот со паркирањето ќе се решава со паметни паркиралишта и катни гаражи, со почитување на принципите на одржлива урбана мобилност.

– Ова се решенија што директно ќе влијаат врз секојдневието на нашите граѓани – побезбеден сообраќај, поуредени улици и поголема мобилност за сите. Заедно ќе ставиме крај на сообраќајниот хаос и ќе изградиме модерна, европска општина Аеродром – општина по мерка на граѓаните. Се бориме за нашиот дом! – порача Трајановски.

The post КАТНИ ГАРАЖИ, НОВИ УЛИЦИ И ВЕЛОСИПЕДСКИ ПАТЕКИ Александар Трајановски најави голема реконструкција на Аеродром appeared first on plusinfo.mk.

Министерот посочи дека тендерот е спроведен во согласност со сите прописи, нагласувајќи дека нема никакви неправилности во постапката.

– Тендерот ги помина сите постапки како што треба. Нема нешто што е нерегуларно. Не знам зошто толку паника. Договорот сè уште не е потпишан, бидејќи мора да помине на Влада, каде што ќе бидат проверени сите потребни документи – рече Таравари, додавајќи дека катните гаражи се неопходни за Клиничкиот центар.

Според него, цената за паркирање од 50 денари по час не е висока, бидејќи слични цени важат и во други градови.

– Некои велат дека 50 денари се многу, но мислам дека тоа е стандардна цена во повеќето градови. Ако го оставиме паркингот со многу ниска цена, ќе се случува луѓе да го користат како евтин паркинг за приватни прошетки низ градот – истакна министерот.

Таравари напомена дека доколку тендерот биде поништен, ќе биде потребна барем една година за повторно распишување и завршување на нова тендерска постапка.

– Ако го поништиме тендерот, повторната постапка ќе трае барем шест месеци до една година, бидејќи станува збор за меѓународен тендер. Сепак, голем број граѓани се жалат дека им е неопходно што поскоро да има нови паркинг места во Клинички центар – додаде тој.

Воедно, министерот потенцираше дека Владата ќе донесе конечна одлука дали постапката ќе продолжи или ќе се распише нов тендер.

The post ТЕНДЕРОТ ЧЕКА АМИН ОД ВЛАДАТА Катните гаражи во Клинички сè уште неизвесни, Таравари со нови детали appeared first on plusinfo.mk.

Како што информираат од владината прес-служба, Владата усвои информација за формирање Комисија за спроведување на постапката за доделување на договор за воспоставување на Јавно приватно партнерство за изградба на катни монтажни гаражи во Универзитетски Клинички центар – Комплекс клиники „Мајка Тереза“ Скопје.

The post ЌЕ СЕ РЕШАВА СООБРАЌАЈНИОТ ХАОС НА КЛИНИЧКИ Владата бара партнер за изградба на катни монтажни гаражи appeared first on plusinfo.mk.

– Во Битола се регистрирани 28.000 возила, а има околу 2.500 паркинг места, поради што итна е потребата за поставување и изградба на монтажни и тврди катни гаражи, што ќе доведе и до ослободување на тротоарите и зелените површини во центарот на градот. Уште еден од проблемите на сообраќајниот хаос е пристапот до образовните и воспитните установи. Со почетокот на учебната година секојдневно сме сведоци на сообраќаен хаос во близина на училиштата, а речиси сите училишта и градинки во Битола излегуваат на фреквентни улици, со што децата се изложени на огромен ризик и нивната безбедност е доведена во прашање. За секојдневен безбеден пат на децата, неопходно е поставување на специјална светлосна и звучна сигнализација (хоризонтална и вертикална) пред сите средни, основни училишта и градинки – велат од „Поинаку“.

Од таму додаваат дека граѓаните треба да се мотивираат помалку да ги користат автомобилите, а само како еден мал чекор кон тоа би била организацијата на Ден без автомобили со што би се испратила порака да се користат алтернативни начини на превоз, како јавен транспорт, велосипед или пешачење.

The post КАТНИ ГАРАЖИ И БЕЗБЕДЕНИ ПАТИШТА ДО УЧИЛИШТАТА „Поинаку“ бара Ден без автомобили appeared first on plusinfo.mk.