Земјотрес со јачина од 5,4 степени ја погоди денеска западна Турција, соопшти Европско-медитеранскиот сеизмолошки центар (ЕМСЦ).

Земјотресот се случил во 12:59 часот по локално време и бил на длабочина од девет километри, според податоците објавени на веб-страницата на ЕМСЦ.

Според податоците од Турската дирекција за управување со катастрофи и вонредни состојби (АФАД), епицентарот на земјотресот бил во областа на градот Симав во округот Ќутахија.

Земјотресот, кој бил почувствуван и во соседните области, бил на длабочина од 8,4 километри, соопшти AФАД.

The post ТРЕСЕЊЕ ВО ЗАПАДНА ТУРЦИЈА Земјотрес од 5,4 степени предизвика страв кај жителите appeared first on plusinfo.mk.

Како што соопшти Европската комисија, во истражувањето спроведено во сите 27 земји членки на ЕУ, граѓаните биле прашани за мислење за нивната изложеност на ризици од непогоди, нивното ниво на знаење за реакција на нив, како и за изворите што ги користат за да дознаат за ризиците од непогоди.

Во дури 17 членки на ЕУ, граѓаните изјавиле дека најмногу стравуваат од ризици предизвикани од екстремните временски услови, како што се невремиња, суши или топлотни бранови.

За разлика од нив, најголем процент од жителите на Португалија, Кипар и Бугарија стравуваат од шумски пожари, а Швеѓаните, Данците и Чесите од кибер закани. Германците најмногу стравуваат од политички или геополитички тензии, Естонците од нанесување штети на критичната инфраструктура, а Финците од вонредни здравствени состојби.

Речиси две третини од испитаниците во анкетата изјавиле дека им се потребни повеќе информации за да бидат подготвени за реагирање при елементарни непогоди и вонредни ситуации, а над една третина дека имаат потешкотии во пронаоѓањето релевантни информации за овие прашања, објавени од властите и соодветните служби.

Речиси 40 отсто од испитаниците оцениле дека немаат доволно време или финансиски средства за да се подготват за евентуални непогоди или вонредни ситуации, но истовремено сметаат дека подобрата подготовка за реакција во вакви случаи ќе ја зголеми нивната индивидуална отпорност.

Мнозинството граѓани на ЕУ рекле дека веруваат оти службите за вонредни состојби се подготвени за адекватно справување со непогоди, како и за обезбедување информации и издавање предупредувања.

Но, од друга страна, анкетираните изјавиле дека при вонредни состојби повеќе се потпираат на членовите на семејството и пријателите, отколку на службите за итни случаи, невладините организации или локалните власти или државни агенции.

Речиси две третини од граѓаните на ЕУ рекле дека никогаш не учествувале во доброволна акција за поддршка на организациите за реакции при итни случаи или во иницијативи за зголемување на отпорноста при непогоди, додека само седум отсто од нив моментно се ангажирани во вакви активности.

Според еврокомесарот за справување со кризи Јанез Ленарчич, клучна компонента на отпорноста при катастрофи е населението да биде свесно за ризиците и подготвено за реакција.

– Треба да ги имаме предвид различните опасности, да бидеме соодветно подготвени и да изградиме отпорност во нашето општество. Ова ќе им помогне на луѓето да бидат подобро подготвени за ризиците со кои може да се соочат. Тоа ќе придонесе и за зајакнување на личната подготвеност, а луѓето ќе можат да продолжат да сметаат и на службите за итни случаи – додаде Ленарчич.

Тој нагласи дека ова истражување на Евробарометар дава вредни информации за нивото на свесност на Европејците за ризикот од непогоди и ќе придонесе за подобра подготвеност на европските општества за реакции во вонредни случаи.

ЕУ има на располагање неколку алатки за справување со вонредни состојби. На прво место е Механизмот за цивилна заштита на ЕУ, во кој покрај 27-те членките на Унијата се вклучени и пет земји од Западниот Балкан (Северна Македонија, Албанија, Босна и Херцеговина, Србија и Црна Гора), како и Исланд, Молдавија, Норвешка, Турција и Украина. Целта на овој Механизам е подобрување на превенцијата, подготвеноста и способноста за одговор на вонредни состојби.

Кога некој вонреден настан ќе ги надмине можностите за одговор на една земја, таа може да побара помош преку овој Механизам. Од неговото основање во 2001 година, Механизмот за цивилна заштита на ЕУ досега е активиран за над 600 итни случаи.

Во февруари минатата година, Европската комисија усвои препораки за воспоставување заеднички цели за зајакнување на отпорноста при вонредни состојби до 2030 година, кои меѓу другото вклучуваат и значително зголемување на свесноста и подготвеноста на граѓаните за ризиците од непогоди и зајакнување на капацитетите на земјите вклучени во Механизмот за цивилна заштита за предвидување на големи елементарни непогоди и вонредни состојби и посоодветно справување со последиците од нив.

The post ШТО ГИ ПЛАШИ НАЈМНОГУ ЕВРОПЕЈЦИТЕ? Истражување открива загрижувачки податоци appeared first on plusinfo.mk.

Во САД се случиле 18 од тие несреќи. Најнов таков случај е уривањето на главниот мост во Балтимор чиј столб го удри товарен брод, по што 6 лица се прогласени за исчезнати.

Светските агенции, по тој повод, наведуваат список на катастрофи во кои се вклучени бродови или баржи кои удриле во мостови во САД, пренесува Гласот на Америка.

• Мост „Попс“, 20 март 2009 година: Брод што влечел 8 бродови удрил во мостот „Попс“ во Билокси, Мисисипи, што предизвикало уривање во заливот на дел од мостот висок 45 метри.
• „Мост на кралицата Изабела“ – 8 мртви, 15 септември 2001 година: Реморкер и товарен брод се судриле со мостот во Порт Изабел, Тексас, предизвикувајќи уривање во заливот на средниот дел од мостот со висина од 25 метри. Загинале 8 лица.
• Мост „Идс“ – 50 повредени, 14 април 1998 година: Шлепот „Ен Холи“ кој патувал низ пристаништето Сент Луис удрил во централниот дел на мостот „Идс“. Се откачиле 8 бродови, 3 бродови под мостот удриле во шлеп кој бил трајно поврзан со мостот и на кој се наоѓало казино. Со полесни повреди се здобиле 50 лица.
• Мост „Биг Бају Канот“, 47 мртви, 22 септември 1993 година: Баржите што ги турнал бродот во густата магла удриле и го поместиле железничкиот мост „Биг Бају Канут“ во близина на Мобилеа, во државата Алабама. Неколку минути подоцна, возот „Амтрак“ со 220 луѓе стигнал до оштетениот мост и излетал од шините, при што загинале 47 лица, а 103 биле повредени.
• Мост „Сибер“, еден загинат, 28 мај 1993 година: Бродот за влечење „Крис“, туркајќи ја празната баржа „DM3021“, удрил во потпорното ниво на мостот „Сибер“ во Њу Орлеанс. Два автомобила со 3 лица во нив паднале во каналот. Загинало 1 лице, а 2 лица биле тешко повредени.
• Мост „Саншајн скајвеј“, 35 мртви, 9 мај 1980 година: Товарниот брод „Самит Венчр“, долг 185 метри, пловел низ тесниот, кривулест бродски канал на заливот Тампа на Флорида, кога ненадејна и заслепувачка бура го урнала бродскиот радар. Бродот го откинал потпорот на мостот уривајќи дел од бетонскиот пат за време на утринскиот шпиц. Седум возила, вклучително и автобус со 26 патници, паднале 150 метри во водата. Загинале 35 лица.

The post НЕ Е ПРВПАТ ТОВАРЕН БРОД ДА СРУШИ МОСТ Ова се шесте најголеми хаварии во САД appeared first on plusinfo.mk.

Како што земјата се движи на евроинтеграцискиот пат, земјите-членки се тука да подадат рака за помош во време на криза, без разлика дали тоа ќе биде во форма на финансиска помош, ресурси или експертиза.

Солидарноста, кој е еден од главните столбови на ЕУ не е само декларативна заложба, туку и реалност што се докажува преку бројни активности од кои директни придобивки има и Македонија.

Македонија доби над 240 милиони евра за борба против Ковид

Европската Унија активираше различни механизми за помош на Македонија за управувањето со кризата со коронавирусот како што се Механизмот за цивилна заштита, Системот на ЕУ за брзо предупредување за заразни болести што на земјава ѝ овозможи користење европски средства за одговор на пандемијата.

Средства во висина од над 240 милиони евра поддршка беа обезбедени уште во првиот месец од пандемијата. Покрај финансии, Европската Унија донираше и материјални средства како вентилатори, парчиња на медицинска опрема и друг медицински материјал, сето тоа заедно со испораката на вакцини.

Оваа сума вклучуваше и 64 милиони евра грантови и 160 милиони евра на поволни заеми за ублажување на социо-економските последици од пандемијата. Сето ова, додека Македонија сè уште е земја-кандидат. Но, на евроинтегративниот пат и со полноправното членство, работите дополнително ќе се променат.

Механизмите на ЕУ ја засилуваат ефективноста при катастрофи

Покрај за време на пандемијата, Европската Унија редовно ги активира механизмите за заштита и при природни катастрофи. Неодамна, за справување со пожарите што ја зафатија земјава во 2021 година, Европската Унија преку Фондот за итни случаи за помош при катастрофи на Меѓународната федерација на друштва на Црвениот крст и Црвената полумесечина обезбеди 140.000 евра во хуманитарни средства за да им помогне на најпогодените подрачја, а во екот на пожарите испрати и дополнителни противпожарни капацитети за поддршка на одговорот на локалните власти. Помошта дојде од Шведска, Франција, Австрија, Бугарија и од програмата Коперникус на ЕУ.

Како членка на ЕУ, Македонија би добила уште поголем пристап до низа финансиски инструменти дизајнирани за справување со кризи. Преку разните механизми како фондот за солидарност се обезбедува мобилизација на ресурси за брзо и ефективно закрепнување на државата и на економијата по некоја криза или природна катастрофа.

Но, придобивките од членството во ЕУ не лежат само во материјалните ресурси што ги обезбедува Унијата, туку и во нематеријалната сила што произлегува од механизмите за координирана реакција. Македонија, би станала дел од колектив каде споделените информации и заедничкото планирање ја засилуваат ефективноста на одговорот при катастрофи.

ЕУ нуди финансиска и материјална помош за справување со катастрофи!

Најдобар пример од соседството е Хрватска, каде по земјотресите, пред неколку години, државата доби огромна финансиска и материјална помош, а благодарение на европските механизми, тимови од земјите-членки беа веднаш испратени на терен. За време на неодамнешните поплави во Словенија пак, покрај помош материјалната помош, Европската комисија ѝ одобри 100 милиони евра за справување со последиците од поплавите.

ЕУ помага во справување со економските последици!

Но, не е сѐ во помошта за справување со природни катастрофи, за време на глобалната финансиска криза земјите како Грција, Португалија и Ирска, кои се соочија со сериозни економски предизвици, добија пакети финансиска помош за стабилизирање на економиите и спроведување на клучните реформи. Грција, на пример, доби голем број такви пакети, во вредност од стотици милијарди евра, сето тоа со цел да се спречи економскиот колапс и да се поттикне закрепнувањето на економијата.

ЕУ помага во безбедноста и соработката против тероризмот!

По терористичките напади во Брисел и во Париз пак, ЕУ спроведе мерки за зајакнување на безбедноста и соработката против тероризмот меѓу земјите-членки. Во рамки на Унијата воспоставените се и неколку иницијативи како што е Европскиот центар за борба против тероризмот, за да се олесни споделувањето на информации меѓу земјите, но и соодветно да се одговори на безбедносните закани.

Овие конкретни примери само го нагласуваат фактот дека членството во ЕУ им овозможува на земјите заеднички да се справат со кризите и природните катастрофи. Македонија со членството би имала посигурна иднина каде единството, соработката и колективната сила се столбови наспроти сите предизвици.

The post И ВО КРИЗИ И ВО КАТАСТРОФИ ЕУ ПОДАВА РАКА Македонија може да се потпре на европските механизми за заштита со финансиска помош  appeared first on plusinfo.mk.

Во продолжение преглед на најразорните земјотреси и поплави во светот оваа година.

Иако годинава немаше земјотреси со јачина поголема од осум, имаше 18 земјотреси со јачина поголема од седум и 123 земјотреси со јачина поголема од шест.

Најголемиот земјотрес беше во Турција

Најсилниот и најсмртоносниот земјотрес во 2023 година е регистриран во Турција.

На 6 февруари Турција беше погодена од земјотрес со јачина од 7,7 степени според Рихтеровата скала, чиј епицентар беше областа Пазарџик Кахраманмарас.

Според АФАД, земјотресот, кој се случи на длабочина од 8,6 километри, предизвика уништување во 11 провинции во Турција и големи разурнувања и загуби на човечки животи во Сирија. Земјотресот беше почувствуван низ цела Турција и многу делови од Блискиот Исток и Европа.

Меѓу најсмртоносните земјотреси беше оној во Мароко

Вториот земјотрес, кој предизвика најмногу жртви во 2023 година, се случи во Мароко ноќта на 8 септември.

Речиси 3.000 луѓе загинаа, а повеќе од 6.000 беа повредени во земјотресот со јачина од седум степени, чиј епицентар беше во регионот Ал-Хуз во Маракеш.

Во изјави на официјалните власти се наведува дека земјотресот биле погодени 2,8 милиони луѓе, што одговара на две третини од населението во регионот, а околу 60.000 куќи биле делумно или целосно уништени.

Насер Џабур, претседател на Националниот геофизички институт на Мароко, го опиша земјотресот како „најголемиот земјотрес во минатиот век во историјата на земјата“.

Земјотреси во Авганистан

Третиот овогодишен земјотрес, кој предизвика најмногу жртви, се случи на 7 октомври во Херат, Авганистан, на границата со Иран.

По овој земјотрес следеа четири последователни земјотреси, од кои најголемиот беше со магнитуда од 6,3 степени, а беа забележани и многу последователни земјотреси над пет степени.

Привремената влада на Талибанците објави дека во земјотресите загинале околу 2.500 луѓе, а илјадници се повредени.

А на 21 март, земјотрес со јачина од 6,5 степени според Рихтеровата скала се случи во регионот Хиндукус во Авганистан. Во земјотресот, кој беше почувствуван и во Пакистан, загинаа 21 лице. Овој земјотрес е забележан како „петти најсмртоносен земјотрес во 2023 година“.

Четвртиот најсмртоносен земјотрес во 2023 година беше во Непал 

На почетокот на ноември Непал беше погоден од земјотрес со јачина од 5,6 степени според Рихтер.

Епицентарот на земјотресот бил на 42 километри јужно од непалската област Џумла.

Во катастрофата, која беше регистрирана како „четврт најсмртоносен земјотрес оваа година“, загинаа 157 луѓе, а многумина беа повредени.

Земјотреси во Еквадор и Филипини

Други земјотреси со голем број жртви во 2023 година се евидентирани во Еквадор и Филипините.

Осумнаесет лица загинаа во земјотресот со јачина од 6,7 степени што се случи во Еквадор на 18 март.

На Филипините 11 лица загинаа во земјотрес со јачина од 6,7 степени според Рихтеровата скала што се случи во регионот Буриас на југот на земјата на 17 ноември.

Поплави во светот

Поплавите, кои се меѓу најголемите природни катастрофи со кои се соочува човештвото, однесоа илјадници животи во 2023 година.

Променливиот режим на врнежи поради климатските промени, емисиите на јаглерод и различните фактори на животната средина доведе до тоа многу земји на глобално ниво да се соочат со овие природни катастрофи.

Најголеми штети во поплавите претрпеа населените места и земјоделските површини кои резултираа со големи штети и човечки загуби.

Најголемата поплава годинава се случи во Либија

„Бурата Даниел“, која беше ефективна во централниот дел на Медитеранот и ја погоди источна Либија на 10 септември, предизвика поплави во градовите Бенгази, Бејда, Мерџ, Суза и Дерна.

Додека повеќе од 4.300 луѓе загинаа во поплавите што го погодија источниот дел на земјата, 40.000 луѓе, вклучително и најмалку 17.000 деца, беа внатрешно раселени.

Во подрачјата погодени од поплавите на истокот од државата оштетена е 70 отсто од инфраструктурата.

Оштетени се 95 проценти од образовните институции, а образованието во земјата беше во прекин на десет дена. Прогласена беше тридневна жалост за загинатите во поплавите.

Меѓународната организација за миграција при Обединетите нации (ИОМ) објави дека околу 40.000 луѓе се раселени во градовите погодени од поплавите во Либија.

Портпаролот на либиската влада на национално единство, Мохамед Хамуде, рече дека врнежите се најобилни во повеќе од 40 години.

Поплави во Демократска Република Конго

Во провинцијата Јужен Киву на истокот на Демократска Република Конго (ДРК), 438 лица загинаа во поплавите предизвикани од обилните дождови во мај.

По поплавите во земјата е прогласена национална жалост.

И Грција беше сведок на обилни дождови –

Седумнаесет лица загинаа во поплавите што се случија во Грција поради врнежите што почнаа на 5 септември.

Образованието во основните и средните училишта беше прекинато поради поплавите во грчкиот регион Тесалија.

Урагани и бури 

Околу 1,2 милиони луѓе беа евакуирани поради поплавите предизвикани од тајфунот Доксури во северната кинеска провинција Хебеј во август.

Во септември, обилните дождови предизвикаа поплави во провинцијата Гуангдонг на југот на земјата.

Повеќе од илјада луѓе загинаа во Малави поради ураганот „Фреди“  кој во април кој го погоди југоисточниот брег на Африка.

Како резултат на пустошот предизвикан од климатските промени, уништени се куќи, мостови, училишта и работни места, а оштетени се патишта, далноводи и земјоделско земјиште.

Повеќе од половина милион луѓе во земјата мораа да ги напуштат своите домови.

Во јужноамериканската земја Перу 2.500 семејства останаа без покрив над главата поради поплавите предизвикани од тропскиот ураган „Јаку“ во март.

Во Јапонија, која беше погодена од тропскиот тајфун Мавар, кој се појави во источна Азија, во јуни загина едно лице, а беше извршена привремена евакуација на два милиони луѓе.

Монсунски дождови

Приближно 60.000 луѓе беа раселени поради поплавите предизвикани од монсунските дождови во Мјанмар во август.

Во истиот период, околу 700.000 луѓе беа блокирани во Бангладеш поради поплави и лизгање на земјиштето.

Најмалку 1,2 милиони луѓе беа погодени од поплавите во регионите на земјата, вклучувајќи ги Кокс Базар, Чатограм, Бандарбан и Рангамати.

Најмалку 215 луѓе загинаа во катастрофи и несреќи предизвикани од монсунските дождови што започнаа кон крајот на јуни во Пакистан.

Поплавите што во април се случија во јужна Сомалија негативно погодија 460.000 луѓе.

Обединетите нации (ОН) упатија итен апел за помош по загриженоста поради порастот на епидемиските болести како колера и маларија во регионот погоден од поплавите.

Во Сомалија половина милион луѓе мораа да ги напуштат своите домови поради поплавите предизвикани од обилните дождови во ноември.

Поплавата, која се случи поради обилните дождови во индиската држава Асам во јуни, поплави 108 села и раселени повеќе од 115.000 луѓе кои живеат во селата.

Во Јемен, обилните дождови и поплавите раселиа повеќе од 9.000 семејства во централниот град Мариб во март. ссм/

фото: архива МИА

The post НАЈСМРТОНОСНИ ЗЕМЈОТРЕСИ И ПОПЛАВИ ВО ПОНОВАТА ИСТОРИЈА Низ што поминуваше светот во 2023 appeared first on plusinfo.mk.

И покрај современата технологија за надгледување на сеизмичките активности на тектонските плочи, како и на технолошките можности за асеизмичката градба, земјотресите и натаму се едни од најсмртоносните природни катастрофи. Според статистиките на ООН, од 1998 до 2017 година вкупниот број на жртви на сите земјотреси во светот изнесувал 750.000, што е половина од сите вкупни случаи предизвикани од природни катастрофи.

Како главна причина за тоа може да се посочи преголемата и несоодветна урбанизација, како и непочитувањето на стандардите за градење. Токму затоа се случува земјотреси со речиси иста јачина да предизвикаат многу различен број на жртви. Според јачината овој земјотрес во Туркије може да се спореди со земјотресот во Непал од 2015 година, во кој загинаа дури 8.800 луѓе.

Еве некои од најсмртоносните земјотреси во светот од 2000 година досега:

22 јуни 2022 година:

Во земјотрес со јачина од 6,1 степени според Рихтер загинаа повеќе од 1.100 луѓе во Авганистан.

14 август 2021 година:

Во земјотрес со јачина од 7,2 степени според Рихтер загинаа повеќе од 2.200 луѓе на Хаити.

28 септември 2018:

Земјотрес со јачина од 7,5 степени во Индонезија – 4.300 жртви.

25 април 2015 година:

Во Непал, повеќе од 8.800 луѓе загинаа во земјотрес со јачина од 7,8 степени.

11 март 2011 година:

Земјотрес со јачина од 9 степени во близина на северниот брег на Јапонија предизвика цунами во кое загинаа речиси 20.000 луѓе.

12 јануари 2010:

Во земјотрес со јачина од 7 степени според Рихтеровата скала на Хаити загинаа околу 316.000 луѓе, според владините проценки.

12 мај 2008:

Земјотрес со јачина од 7,9 степени ја погоди централната кинеска провинција Сечуан, при што загинаа повеќе од 87.500 луѓе.

26 мај 2006 година:

Повеќе од 5.700 луѓе загинаа по земјотрес со јачина од 6,3 степени според Рихтеровата скала што го погоди индонезискиот остров Јава.

8 октомври 2005 година:

Земјотрес со јачина од 7,6 степени според Рихтеровата скала уби повеќе од 80.000 луѓе во пакистанскиот дел на Кашмир.

28 март 2005 година:

Земјотрес со јачина од 8,6 степени во Северна Суматра, Индонезија – околу 1.300 жртви.

26 декември 2004:

Цунами бранови во Индискиот Океан предизвикани од земјотрес со јачина од 9,1 степени во Индонезија убиле 230.000 луѓе во десетици земји.

26 декември 2003 година:

Земјотрес со јачина од 6,6 степени во југоисточен Иран уби 50.000 луѓе.

21 мај 2003 година:

Повеќе од 2.200 луѓе загинаа во земјотрес со јачина од 6,8 степени во Алжир.

26 јануари 2001 година:

Земјотрес со јачина од 7,7 степени ја погоди индиската држава Гуџарат, при што загинаа 20.000 луѓе.

The post НАЈСМРТОНОСНИТЕ ЗЕМЈОТРЕСИ ВО СВЕТОТ ВО 21. ВЕК Најсилните немаат секогаш најмногу жртви appeared first on plusinfo.mk.

Во услови на светска економска и енергетска криза, регионалното поврзување со цел поголема енергетска стабилност е најголемиот фокус на Владата на Северна Македонија, а истата цел ја делиме и со нашите партнери и пријатели од регионот. Наш заеднички приоритет е регионално енергетско поврзување, зголемување на енергетските капацитети како и безбедно и стабилно снабдување со енергенси кои се достапни за нашите граѓани.

Трите држави се согласија дека обезбедувањето храна во услови на светска криза претставува предизвик и приоритет поради што Македонија, Србија и Албанија создаваат механизми за меѓусебно помагање.

Дополнително во организација на министерката за земјоделство на Албанија Фрида Крифца, денеска во Тирана ќе се одржи средба на претставниците на трите држави со албанските откупувачи и дистрибутери со цел да се разгледаат нови можности за увоз и извоз на шеќер, масло, брашно и сол во регионот по услови кои се поволни за македонската, српската и албанската економија.

The post БРЗА РЕАКЦИЈА ЗА КАТАСТРОФИ И ЗА НЕСРЕЌИ Со Отворен Балкан ќе се надмине енергетската криза appeared first on plusinfo.mk.

На Фејсбук страницата на Противпожарната служба на Долна Австрија беа споделени информации и фотографии од примопредавањето на должноста на пожарникарите. Брзата замена на преморените пожарникари кои влегоа во речиси деноноќна борба со пожарите во Малешевијата ја овозможиле првите луѓе на аеродромот во Виена и на австриската национална авиокомпанија „Аустриан ерлајнс“, кои ги пренеле пожарникарите од и до Скопје со авион „Ербас“.

– Во итни случаи брзата поддршка е многу важна. За доброволните противпожарни бригади на Долна Австрија, ова е една од најголемите прекугранични операции против катастрофи и ние сме среќни што го даваме својот придонес – изјави директорот на аеродромот во Виена Гинтер Офнер.

Првата група австриски пожарникари во Македонија пристигна во петокот, а според информациите од теренот, нивната помош била непроценлива во битката со пожарите, како и онаа на пожарникарите од Словенија. Тие се сместени на стадионот во Пехчево со целата опрема која ја донесоа со себе.

„Ви благодариме многу“, „Респект и благодариме Австрија за вашата помош и поддршка“, „Да сте живи и здрави“, ова се само дел од стотиците коментари кои Македонци, заедно со по некој гиф ги објавуваат на објавите на Фејсбук страницата од австриската доброволна противпожарна организација „Ное“.

Најмногу коментари, односно нешто над 400 има на објавата каде тие соопштуваат дека во земјава се очекува да пристигнат нови 114 волонтери, додека претходните 96 се враќаат дома.

Инаку во регионот на Долна Австрија, околу 1.700 пожарникари-доброволци ја обезбедуваат безбедноста на околу два милиони жители. Во регионот на Долна Австрија нема ниту еден професионален пожарникар, а целата служба функционира врз основа на доброволен и волонтерски ангажман.

The post ИЗМОРЕНИТЕ АВСТРИЈЦИ СЕ ВРАТИЈА ДОМА, ПРИСТИГНАА НОВИ Македонците им благодарат за нивната пожртвуваност appeared first on plusinfo.mk.

Во тие 10 катастрофи загинаа најмалку 3.500 луѓе и раселија повеќе од 13,5 милиони луѓе.

Во оваа 2020 година светот го погодија пожари што останаа долго надвор од контрола на Австралија во јануари, па се до рекордниот број урагани над Атлантикот до ноември. Сумата е многу поголема бидејќи голем дел од загубите не беа осигурани.

Не е изненадувачки, но товарот падна непропорционално врз сиромашните нации, според годишниот извештај на глобалната невладина организација Christian Aid, под наслов „Трошоците за 2020 година: Година на распаѓање на климата“.

Само четири проценти од економските загуби од екстремните настани предизвикани поради климата во земјите со ниски примања се осигурани, во споредба со 60 проценти во економиите со високи примања, се вели во извештајот.

– Без разлика дали се поплави во Азија, скакулци во Африка или невреме во Европа и Америка, климатските промени продолжуваат да беснеат и во 2020 година – нагласи Кет Крамер од Christian Aid.

Екстремните временски непогоди го мачат човештвото многу пред глобалноto затоплување да почне да се меша со климатскиот систем на планетаvа.

Но, повеќе од еден век податоци за температурата и врнежите, заедно со децениските сателитски податоци за ураганите и зголемувањето на нивото на морето, не оставија сомнеж дека се повисоката температура на површината на Земјата го засилува нивното влијание.

Интензивните тропски бури – познати како урагани, тајфуни и циклони – сега се со поголема веројатност, на пример, да бидат посилни, да траат подолго, да носат повеќе вода и да се појават подалеку од нивниот историски опсег.

Рекордни 30-на именувани урагани од Атлантикот во 2020 година – со најмалку 400 жртви и 41 милијарди долари штета – сугерираат дека светот може да види и повеќе такви бури. Светската метеоролошка организација (СМО) мораше да користи грчки симболи откако ги искористија сите букви од латиницата.

Интензивните летни поплави во Кина и Индија, каде што сезоната на монсуните донесе ненормални количини на врнежи од дожд веќе втора година, исто така се во согласност со проекциите за тоа како климата ќе влијае на врнежите.

Пет од најскапите екстремни временски прилики во 2020 година беа поврзани со необично дождливиот монсунски период во Азија.

– Во 2020 година Бангладеш, повеќе од една четвртина од земјата беше под вода, и тоа беше една од најлошите во историјата – изјави Шахјахан Мондал, директор на Институтот за справување со поплави на Универзитетот за инженерство и технологија во Бангладеш.

Шумските пожари што уништија рекордна плоштина области во Калифорнија, Австралија, па дури и руски Сибир, голем дел од нив во рамките на Арктичкиот круг, исто така се во согласност со се потоплиот свет и предвидувањата се дека ќе се влошат приликите со зголемувањето на температурите.

Просечната температура на површината на планетата порасна најмалку 1,1 степен Целзиусов во просек во споредба со крајот на 19 век, при што голем дел од тоа затоплување се случи во последниот половина век. Парискиот договор од 2015 година ги охрабрува светските нации колективно да го ограничат глобалното затоплување на „далеку под“ 2 степена Целзиусови, па дури и на 1,5 степен ако е изводливо.

Во извештај од 2018 година од советодавниот панел на ОН за клима се наведува дека 1,5 степени Целзиусови е побезбеден праг, но веројатноста да остане под него пораснаа многу, според многу експерти.

– На крајот на краиштата, влијанието на климатските промени ќе се почувствува преку крајностите, а не просечните промени – вели Сара Перкинс-Килпатрик, виш предавач на Центарот за истражување климатски промени на Универзитетот во Нов Јужен Велс.

Ако растечката фреквенција и интензитет на природни временски непогоди е во согласност со проекциите за моделирање, новото поле на наука сега е во состојба да постави број за тоа колку е поверојатно таквиот настан да се должи на глобалното затоплување.

Во невидените пожари досега уништија 20 проценти од австралиските шуми и убија десетици милиони диви животни на крајот на 2019 година и на почетокот на 2020 година. Во Европа, во меѓувреме, според неодамнешни истражувања, шансата да се појават смртоносни горештини се зголеми за речиси 100 пати во споредба со пред еден век.

– Топлотните бранови и поплавите што порано беа настани „еднаш во векот“ сега стануваат се поредовни појави – нагласи генералниот секретар на СМО, Петери Талас.

The post Десетте најскапи временски непогоди го чинеа светот 150 милијарди долари appeared first on plusinfo.mk.

Директорот на Дирекцијата, Аднан Џаферовски по тој повод оцени дека институцијата се движи во вистински правец и оти преземените активности во изминатите две и пол години ја покажале оправданоста и улогата што ја имаат припадниците на ДЗС за општеството.

– Со отпочнување на реорганизацијата, формирање на тимови за брз одговор, набавка на нови униформи со највискоки стандарди на заштита, набавка на најсовремена опрема за тимовите, меѓународни обуки и вежби, нови правилници за функционалните ознаки, правилник за стандардизација на униформите на припадниците на Дирекцијата за заштита и спасување, правилник за стандардизација и унифицирање на униформите на пожарникарите, ни дава за право да заклучиме дека Дирекцијата за заштита и спасување се движи во вистински правец – истакна Џаферовски.

Тој додаде дека активно се работело и на меѓуинституционалната соработка со одржување на големи вежби, на кои е покажана координираноста и подготвеноста на институциите во случај на несреќи и природни катастрофи.

ДЗС во изминатиот период активно беше вклучена и во некои клучни настани како што се пречекот на папата Франциск во делот на изработката на планот за евакуација, учеството во справување со полседиците од катастрофалниот земојотрес во Албанија и вклученоста во спречувањето на ширењето на коронавирусот.

The post Дирекцијата за заштита и спасување прославува 15 години од постоењето appeared first on plusinfo.mk.