Пазарот на недвижности во 2025 година е стабилен, активен и атрактивен за инвестирање, со јасна доминација на урбаните средини и позитивни економски трендови, покажува годишниот извештај на Агенцијата за катастар на недвижностите.

Становите остануваат најдоминантен сегмент на пазарот, со учество од 33% во вкупниот број купопродажби и дури 48% од вкупната вредност. Иако бројот на продадени станови е намален за 3,9%, нивната вредност пораснала за 10,8%.

Најактивни општини се Центар, Аеродром и Карпош, каде се забележани и највисоки просечни цени на становите – 1.692 евра/м², 1.558 евра/м² и 1.419 евра/м².

Најскапиот стан е продаден во Аеродром за 166.500 евра, додека најскапата куќа е продадена во Центар за 1.500.000 евра. Највредниот деловен простор, пак, достигнал цена од 6.800.000 евра, исто така во Центар.

Во текот на 2025 година се реализирани вкупно 33.381 трансакција, што претставува раст од 7,6% во однос на 2024 година. Од нив, 23.470 се купопродажби (раст од 4%), а 9.911 се договори за закуп (раст од 17%).

Вкупната вредност на пазарот достигнала 1,14 милијарда евра, што е зголемување од 12,9% споредено со претходната година. Најголем дел од оваа вредност е реализиран во четвртиот квартал – 314 милиони евра.

Земјоделското земјиште и шумите учествуваат со 31% во вкупниот број купопродажби, додека градежното земјиште, со учество од 14%, бележи раст на вредноста од 36%.

Куќите учествуваат со 13% во вкупниот број купопродажби, со раст на вредноста од 37% во однос на претходната година.

Анализата покажува дека пазарот е најразвиен во поголемите урбани центри, при што најмногу трансакции се реализирани во Центар (2.414), Аеродром (1.963) и Карпош (1.791).

Највисоката цена по квадратен метар за стан е постигната во Аеродром – 3.784 евра/м².

Пазарот на новоградби е најдинамичен во скопските општини, при што најголем раст на цените на станови од инвеститор е забележан во Центар – 31%, додека во Охрид е регистриран пад од 4%.

Пазарот на закупи бележи вкупна месечна вредност од околу 4 милиони евра. Во структурата на закупите доминираат становите со 35% учество и раст од 15%, додека деловните простори учествуваат со 34% и бележат раст од 24%.

Извештајот укажува на зголемена побарувачка за изнајмување и континуиран развој на пазарот на недвижности.

За 2026 година се прогнозира умерен раст, со зголемен интерес за инвестиции и дополнително зголемување на закупите.

The post КУЌА ЗА 1,5 МИЛИОНИ ЕВРА ВО ЦЕНТАР! Рекордни 1,14 милијарди евра во 2025 година, пазарот на недвижности во подем appeared first on plusinfo.mk.

Полицијата поднесе кривична пријава против седум физички и две правни лица од Гостивар поради сомневање за бесправно градење, фалсификување исправа, несовесно работење во службата и злоупотреба на службена положба и овластување.

Според информациите од Надворешната канцеларија за криминалистички работи Гостивар, меѓу пријавените се А.С. (27), А.С. (27) и нивната мајка А.С. (47), кои како инвеститори во текот на 2021 и 2022 година изведувале градежни работи на сопствена катастарска парцела во Гостивар. Наместо да градат според издаденото одобрение и основниот проект, тие направиле отстапувања од дозволеното.

Во случајот е опфатен и Б.А. (54), управител на фирма за геодетски работи од Гостивар. Тој изработил геодетски елаборат што не се совпаѓал со основниот проект и, според сомневањата, составил лажна исправа која ја употребил како да е валидна документација на правното лице за проектирање, инженеринг и консалтинг.

Кривична пријава е поднесена и против И.Б. (33), управител на градежна компанија од Гостивар, кој изготвил Завршен извештај за технички прием на објектот. Во извештајот било наведено дека градбата е реализирана согласно одобрението и проектот, иако, според истрагата, тоа не било точно.

Меѓу осомничените е и С.Е. (48), кој и покрај тоа што знаел дека овластен градежен инспектор констатирал надградба надвор од одобрението и дал рок за отстранување на неправилностите, на 3 октомври 2022 година ја проследил документацијата по електронски пат до Агенцијата за катастар на недвижности. Врз основа на таа документација, градбата била регистрирана и бил издаден имотен лист.

Пријавен е и градежниот инспектор В.Р. (42). Тој првично изготвил записник во кој навел дека објектот не е изграден според одобрението и наложил отстранување на недостатоците во определен рок. Сепак, подоцна не извршил контролен инспекциски надзор, со што, според наводите, му овозможил на инвеститорот да го стави објектот во употреба и покрај утврдените неправилности.

Со кривичната пријава се опфатени и двете компании од Гостивар поврзани со случајот. Истрагата треба да утврди колкава е одговорноста на секој од пријавените во постапката за изградба и легализација на спорниот објект.

The post ГРАДЕЛЕ БЕЗ ДОЗВОЛА И ФАЛИСИФИКУВАЛЕ ДОКУМЕНТИ Кривична пријава за седуммина и две фирми од Гостивар appeared first on plusinfo.mk.

The post ПРОДАДЕНА E НАЈСКАПАТА ГАРАЖА ВО СКОПЈЕ За 24 квадрати новиот сопственик платил 30.000 евра appeared first on plusinfo.mk.

Во Регистарот на цени и закупнини, во периодот од октомври до декември 2025 година, на целата територија на државава регистрирани се 1.004 новоизградени станови, односно станови од инвеститор, што е за 159 станови повеќе од третиот квартал во 2025 година. Исто така, во Агенцијата за катастар на недвижности досега се запишани 27.522 листови за предбележување градба што укажува дека овие објекти се во фаза на градба и наскоро ќе се најдат на пазарот на недвижности.

Според извештајот од Регистарот на цени и закупнини, што го објавува Агенцијата за катастар на недвижности во овој квартал најголема постигната цена на стан по метар квадратен е од 182.404 денари, односно во висина од 246.171 евра за вкупна површина од 83 квадратни метри кој се наоѓа во општина Центар.

Најголем број продадени станови евидентирани во Регистарот има во општина Аеродром, односно во овој квартал се продадени 304 станови, додека, пак, најголем број продадени куќи има на територијата на општина Битола, каде што во овој квартал се продадени 91 куќa.

Најмногу продажби на деловен простор се забележани на територијата на општина Центар каде што се продадени 31 деловнa просториja. Најмногу недвижности од типот на земјоделско земјиште и шуми се продадени во општина Куманово со 110 продажби, додека најмногу продадено градежно земјиште е регистрирано во општина Ѓорче Петров со 43 продажби.

Во овој квартал се регистрирани и продажби на 194 гаражи, и тоа во поголем број општини.

Од октомври до крајот на годината се регистрирани вкупно 9.283 трансакции, што е повеќе за 964 трансакции споредено со третиот квартал лани. Тоа  укажува на раст на пазарот на недвижности во однос на обемот на тргување.

Во овој период, во Регистарот на цени и закупнини се регистрирани 5.084 продажби, 1.094 продажби од инвеститор и 40 откупи од државата, како и 12 продажби на недвижности по пат на лицитација, односно вкупно 6.230 купопродажби на недвижности што претставува раст за 95 купопродажби во однос на третиот квартал од 2025 година.

Во послениот квартал од годината регистрирани се 3.053 закупи на целата територија на државава што претставува раст во однос на закупите од претходниот квартал и тоа за 869 закупи. Може да се забележи дека 55% од трансакциите со недвижностите се однесуваат на продажби, додека 33% од трансакциите се однесуваат на закупи на недвижен имот и заедно сочинуваат 88% од вкупниот пазар со недвижности.

По месеци најголем број трансакции има во декември кога во Регистарот на цени и закупнини се регистрирани 3.274 трансакции. Најмалку трансакции се регистрирани во ноември, и тоа 2.797, додека во октомври се регистрирани 3.212 трансакции.

Доколку се разгледа обемот на трансакции по месеци и по тип на трансакција, може да се заклучи дека најголем број продажби се регистрирани во декември, односно 1.863 продажби, а најмногу закупи – 1.106 се регистрирани во октомври. Најголем број продажби од инвеститор, односно продажба на новоградби (стан, деловен простор, гаража и др.) се регистрирани во октомври, и тоа 416 продажби.

Најголем број трансакции се случиле на територијата на општина Центар, 812, во Аеродром се регистрирани 645, во Штип 634 трансакции, во Карпош 472 , во Битола 415 трансакции и во Гази Баба 410 трансакции. Најмал број трансакции се регистрирани на териториите на општините: Македонска Каменица – 10, Конче, Лозово и Новаци по 9 , во Зрновци се регистрирани 8, Арачиново и Градско 7,  Вевчани и Центар Жупа 5 и во општината Пласница регистрирани се четири трансакции.

На територијата на 41 општина во нашата држава се регистрирани трансакции во обем од 0 до 50, што претставува мал број трансакции за дадениот временски период.

Од 3.053 закупи во четвртиот квартал минатата година, најголем број, 1.369, припаѓаат на станови по што следуваат 911 закупи на деловни простори,  399 закупи на куќи, 257 закупи на земјоделско земјиште и шуми. Во однос на третиот квартал 2025 има зголемување за 869 закупи.

Во последниот квартал лани најголем број закупи се регистрирани во октомври, 1.106, во декември имало 988, а во ноември  959.

Како што објави претходно Народната банка, во четвртиот квартал од минатата година недвижностите поскапеле за 25% на годишно ниво. Во претходниот, третиот квартал од минатата година, цените на недвижностите забележаа раст на годишно ниво од 25,1% во третиот квартал, по растот од 19, 5% во првиот и од 19,9 %во вториот квартал.

Последните податоци од Државниот завод за статистика се за ноември лани, кога биле издадени 304 одобренија за градење за 16,9% повеќе во однос на истиот месец од претходната година.  Со нив предвидена е изградба на 761 станови, од кои 427 во Скопскиот Регион, 113 во Источниот, 82 во Југозападниот, 79 во Пелагонискиот, 38 во Полошкиот, 15 во Вардарскиот, 4 во Југоисточниот и 3 во Североисточниот Регион.

The post 2.965 ЕВРА ЧИНЕЛ КВАДРАТОТ НА НАЈСКАПО ПРОДАДЕНИОТ СТАН ВО ПОСЛЕДНИОТ КВАРТАЛ ЛАНИ Најмногу станови се продадени во општина Аеродром appeared first on plusinfo.mk.

Во четвртиот квартал кани недвижностите поскапеле за 25% на годишно ниво, а за 3,2% на месечно, покажуваат денеска објавените податоци на Народната банка.

Во претходниот квартал, пак, цените на недвижностите забележаа раст на годишно ниво од 25,1% по растот од 19,5% во првиот и од 19,9% во вториот квартал.

Народната банка го објавува индексот на цени на недвижности врз основа на податоци кои се однесуваат на огласени станови за продажба на територија на Скопје.

Андреа Серафимовски од Здружението на градежништвото, индустријата на градежни материјали и неметалите при Стопанската комора на Северна Македонија за МИА изјави дека во 2025 година се  стабилизираа цените на градежните материјали годинава  и оти годинава очекува стабилизација на продажните цени на становите.

– Очекуваме поголема понуда и се надеваме дека 2026 година ќе биде година која ќе биде запаметена како година во која понудата ќе се израмни со побарувачката. Нашите очекувања се дека ќе се гради не помалку од 2025 година во регионите во кои имаше голема трансакциска активност во годината која измина, тука пред се би ги издвоил полошкиот, пелагонискиот но и скопскиот регион – рече Серафимовски.

Последните податоци од Државниот завод за статистика  објавени за октомври лани,  покажуваат дека  од 446  одобренија за градење, 289 (64,8%) се наменети за објекти од високоградба, како и дека е  предвидена изградба на 1.177  станови.

Податоците од  Регистарот на цени и закупнини на Агенцијата за катастар на недвижности  за третиот квартал од 2025 година, покажуваат дека најголема постигната цена на стан по квадратен метар е 189.231 денари, односно 280.000 евра за вкупна површина од 91 квадратен метар. Станот е на територијата на општина Центар, а за него се дадени 3.000 евра по квадратен метар.

The post ЦЕНИТЕ НА СТАНОВИТЕ ПОРАСНАЛЕ ЗА 25% ВО ПОСЛЕДНИТЕ ТРИ МЕСЕЦИ ЛАНИ Квадратот во најскапиот стан чинел 3.000 евра appeared first on plusinfo.mk.

Агенцијата за катастар на недвижности во 2025 година решила вкупно 1.040.137 предмети што претставува јасен показател за зголемена ефикасност и континуирана посветеност во обезбедувањето квалитетна и навремена услуга, соопшти Агенцијата. Паралелно со тоа, од Катастарот велат дека целосно се расчистени заостанатите предмети, а сите тековни барања се решаваат навремено, без застој и во законските рокови.

До Секторот за контрола и надзор при Агенцијата за катастар биле поднесени 577 претставки, од кои 556, односно 96,4 проценти, се целосно обработени и затворени.

Во делот на графичкиот регистар на градежно земјиште, примени се 3.878 предмети, од кои 3.863, односно 99,6 проценти, се успешно решени, што укажува на високо ниво на ефикасност и ажурност.

Во 2025 година преку електронскиот систем е-Влада до Агенцијата за катастар се доставени вкупно 416 барања за мислења и се одговорени во целост, со што процентот на реализација на овој вид на барања е 100 проценти.

– Една од клучните заложби на раководството беше и системското намалување на заостанатите предмети, како и навремено постапување по новопристигнатите барања. Во таа насока, бројот на нерешени тековни предмети е намален за 47,4 проценти, додека бројот на тековно примени предмети во 2025 година е зголемен за 8 проценти, во споредба со 2024 година – информира Агенцијата за катастар на недвижности.

Според директорот на АКН, Иван Живковски, поставените цели за 2025 година се реализирани, а бројките се најдобар доказ за тоа. Во објава на социјалните мрежи тој најави дека и во наредниот период Агенцијата ќе продолжи со интензивна дигитализација, унапредување на услугите и зголемување на транспарентноста.

– Овие резултати се јасен показател за подобрената организација, засилената контрола и зголемената ефикасност во работењето на Агенцијата за катастар на недвижности, со јасна цел – побрзи, поквалитетни и транспарентни услуги за граѓаните – истакна Живковски.

The post КАТАСТАРОТ ЛАНИ РЕШИЛ ПОВЕЌЕ ОД 1 МИЛИОН ПРЕДМЕТИ Целосно се расчистени заостанатите предмети appeared first on plusinfo.mk.

Општина Кисела Вода денес изврши рушење на дивоградба во населбата 11 Октомври. Се работи за поранешен деловен објект во сопственост на ГП „Пелагонија 5 – Градилиште механизација“ кој е во стечај и за кој не постои потребна техничка документација. Објектот никогаш не бил евидентиран во Агенцијата за катастар.

Градоначалничката Стаменкоска Трајкоска истакна дека институцијата ќе постапува исклучиво според закон и правда.

– Општина Кисела Вода ќе работи законски, почитувајќи ги сите закони и правила. Нема да има двојни стандарди за никого и нема да дозволиме прекршување на било каков закон – рече таа.

Трајкоска нагласи дека за секој објект каде ќе се утврдат неправилности ќе биде издадено решение за отстранување.

– Тоа е единствениот начин да воспоставиме ред и правичност и да го заштитиме јавниот интерес – посочи градоначалничката.

Оваа акција доаѓа како дел од континуираните напори на општината да ги елиминира нерегуларните објекти и да ја зајакне контролната улога на институцијата врз просторот на територијата на општината.

The post ЗАИГРА БУЛДОЖЕРОТ ВО 11 ОКТОМВРИ Општината срамни дивоградба до темел appeared first on plusinfo.mk.

„Освен тоа што покажаа дека Данела Арсовска работи за СДСМ и за ДУИ, покажаа и колку се правно неписмени во обидот да направат политика и да ја оправдаат елементарната непогода, Данела Арсовска. Агенцијата за катастар не донесува или брише конкретни акти по сопствена одлука туку врз основа на барање на корисниците на услугите на Агенцијата“.

Вака реагира ВМРО-ДПМНЕ за тврдењата на градоначалничката на Скопје за бесправно градење во општина Чаир.

„Агенцијата за катастар на недвижнини постапила согласно Закон и за тоа била обврзана, во спротивно би го прекршила законот. Имено согласно Законот за катастар Агенцијата врши упис и брише упис по правен основ. Во конкретниот случај, тоа е решение за легализација кое го има доставено општината Чаир. Агенцијата за катастар согласно законските надлежности само гледа дали решението е доставено од надлежен орган, дали има печат за правосилност и потпис од овластеното лице. Катастарот врз основа на овие параметри врши упис, а за веродостојноста на решението за легализација одговара општината.

Општината Чаир има доставено во Агенцијата за катастар решение за поништување на легализацијата. Од Управата им било побарано да достават платена административна такса и потоа легализацијата е избришана.

Повторуваме Агенцијата за катастар не носи решенија за бришење, туку постапува по конкретни акти на корисници во случајот општина Чаир.

Да се остават на страна драмите на СДСМ, за некакви инсајдери, доушници, свиркачи. Љубица Јанчева не ја откри Америка, туку потребно е да ги научи правните прописи по кои работат институциите“.

The post „АРСОВСКА ОДРАБОТУВА ЗА СДСМ И ЗА ДУИ“ Од ВМРО-ДПМНЕ велат дека Катастарот не носи или брише акти по своја волја appeared first on plusinfo.mk.

Агенцијата за катастар на недвижности има амбициозна цел – да прерасне во модерна, целосно дигитализирана институција која ќе овозможи брзи, достапни и квалитетни услуги за сите граѓани. Во интервју за веб-порталот Скопје Инфо, директорот Иван Живковски посочува дека катастарот треба да биде гаранција на сопственоста, поддршка на урбанистичкото планирање и алатка за развој на инфраструктурата и на општеството во целина.

Меѓу најголемите тековни предизвици, Живковски ги посочува застарената технолошка инфраструктура и дефицитот од стручен кадар – резултат на седумгодишен занемарен кадровски развој. Во таа насока, веќе се спроведуваат мерки – од внатрешна реорганизација и регрутирање на млади професионалци до редовни обуки и нови соработки со правосудните и стручни комори.

– Со моето доаѓање затекнавме над 5.600 заостанати предмети. Со внатрешни реформи ги расчистивме сите, а денес постапуваме навремено и ефикасно – изјави Живковски.

Во фокусот е и дигиталната трансформација. Повеќе од 100 услуги се достапни онлајн преку порталот e-uslugi.katastar.gov.mk, а до крајот на 2025 година бројот ќе надмине 130. Надграден е системот за проверка на сопственост и статус на предмети, како и мобилната апликација I-Kat, која сега е достапна и за iOS. Во тек е и целосна интеграција со државниот портал uslugi.gov.mk, со цел граѓаните да ги користат сите услуги без потреба од физичко присуство.

– Целосната дигитализација е наш врвен приоритет. Ќе овозможиме сите барања и постапки да се поднесуваат онлајн. За повозрасните граѓани, шалтерите остануваат активни – додаде директорот.

Генерално, Живковски заклучува дека и покрај зголемениот наплив на предмети, Агенцијата за катастар навремено постапува и брзо и ефикасно ги обезбедува услугите за граѓаните.

– Драстичното намалување на цените за одредени катастарски услуги и до 83%, е нешто кое верувам дека значително ќе влијае на социјалниот стандард на граѓаните, но и услугите на катастарот ќе ги направи подостапни за сите – нагласува тој.

Паралелно, Агенцијата активно работи на борба против корупцијата со кампањата „Не биди соучесник – пријави обид за корупција“, отвора нови канцеларии во Драчево и во Автокоманда, а и ја враќа во функција канцеларијата во Чашка.

– Продолжуваме со дигитализација, нови веб-услуги и реформи кои ќе нè доближат до целта – катастарот да стане пример за ефикасна, дигитална и транспарентна институција – истакна Живковски.

Целото интервју прочитајте го тука: Интервју со Иван Живковски – директор на Катастарот

The post КАТАСТАРОТ РАСЧИСТИЛ 5.600 ПРЕДМЕТИ, ЦЕНИТЕ СЕ НАМАЛУВААТ ДО 83% Повеќе од 100 катастарски услуги се достапни онлајн appeared first on plusinfo.mk.

Имотен лист од 1 јануари ќе може да се добие електронски за најмногу една минута по нарачката во Катастарот. Ова, како што најави денеска директорот на Агенцијата за катастар на недвижности Иван Живковски се овозможува преку новиот портал е-услуги.

До крајот на годинава ќе функционира стариот систем за е-услуги на Катастарот кој е многу побавен и помалку функционален од новиот.

– Преку новиот портал е-услуги граѓаните ќе можат да нарачаат 94 продукти кои ги изготвува Катастарот. Непосредно по нарачката, тие ќе им бидат испорачани на граѓаните. До крајот на годината бројот на продукти кои ќе ги испорачуваме електронски ќе се зголеми за 10, а во текот на наредната година за уште 10 нови продукти – рече Живковски.

Тој појасни дека граѓаните кои ќе нарачаат електронски некој од документите ќе можат да го добијат директно на нивната електронска адреса како електронски документ или преку пошта како печатен документ доколку ја изберат таа опција.

– Електронскиот документ е верификуван и може да се користи секаде каде што е потребно да се поднесе – рече Живковски.

Покрај електронското добивање на документите од Катастарот, додаде Живковски, шалтерите ќе продолжат да функционираат. Граѓаните ќе можат да ги нарачаат и земат потребните документи и на шалтерите во Катастарот. Документ од Катастарот може да се добие и преку геодетските и нотарските канцеларии.

Според Живковски, во системот е-услуги на Катастарот се влезени сите најбарани продукти од граѓаните, освен оние кои се посложени, а кои ги користат геодетските канцеларии.

Живковски информира и дека досега се решени сите заостанати предмети во Катастарот, а новите се решаваат во реално време.

Тој потсети дека неодамна се намалени цените на катастарските услуги до 70%, но дека не е променет тарифникот за геодетските услуги, бидејќи комората на геодети треба да предложи нов тарифник.

The post ИМОТЕН ЛИСТ ЌЕ СЕ ВАДИ ЗА ЕДНА МИНУТА Катастарот ќе издава електронски 94 документи appeared first on plusinfo.mk.