Од полноќ започна 20-дневната изборна кампања за локалните избори што ќе се одржат на 19 октомври, додека вториот круг е закажан за 2 ноември. Ова ќе бидат осми локални избори од независноста на државата, а четврти на кои истовремено ќе се избираат и градоначалници и советнички листи.

На изборите годинава вкупно 309 кандидати ќе се борат за градоначалнички функции во 80 општини и Градот Скопје, додека за општинските совети се пријавени 576 листи со вкупно 10.490 кандидати.

Претседателот на Државната изборна комисија, Борис Кондарко, информираше дека Избирачкиот список е заклучен со вкупно 1.832.415 граѓани со право на глас.

– Според евиденцијата, 112.000 избирачи се на привремена работа или престој во странство, 2.162 се во затвор или притвор, а 450 лица се во домовите за стари лица и тие исто така ќе можат да го остварат своето право на глас – истакна Кондарко.

Увидот во избирачкиот список траеше 20 дена, во кои граѓаните имаа можност да ги проверат своите податоци и да побараат корекции. За гласањето се обезбедени 3.480 избирачки места, при што во 132 од нив каде што се потпишани помалку од десет избирачи, гласањето ќе се спроведе на најблиското избирачко место.

Буџетот за организација на локалните избори изнесува 9 милиони и 760 илјади евра. Од нив, дури две третини се наменети за медиумите и за платеното политичко рекламирање, додека останатите средства се предвидени за надоместоци на избирачките одбори, транспорт и дистрибуција на материјалите.

Локалните избори во Македонија, според Изборниот законик, се одржуваат на секои четири години во втората половина на октомври. До сега вакви избори се спроведени во 1996, 2000, 2005, 2009, 2013, 2017 и 2021 година.

The post ОД ПОЛНОЌ СТАРТУВА ИЗБОРНАТА КАМПАЊА Во трка се 309 кандидати за градоначалници и над 10.000 за советници appeared first on plusinfo.mk.

Левица денеска соопшти дека со гордост ја претставува новата генерација кандидати за градоначалници на претстојните локални избори. Како што истакнуваат од партијата, станува збор за луѓе со интегритет, длабоки врски со своите заедници и визија за чесна, транспарентна и праведна локална самоуправа.

Како што споделија од Левица, во Гевгелија поддршката од граѓаните ќе ја бара професорот по македонски јазик Тони Аврамов. За Куманово партијата се одлучи за актерот и магистер по сценско-изведувачки уметности Мирослав Петковиќ, додека за Македонски Брод ќе настапи магистерот по фармација Марјан Ѓурчески. Во Крушево, довербата ќе ја бара дипломираниот сообраќаен инженер Зоран Јаневски, а во Кочани професорката по македонски јазик и литература Жаклина Филипова-Свеќаровска.

Во општина Илинден кандидатурата ја презема пензионерот и поранешен командир од Воената академија „Генерал Михајло Апостолски“ Мартин Маринковски, а во Пехчево кандидатурата ја води инженерот за животна средина Невенка Тренчевска. За Берово довербата на граѓаните ќе ја бара докторот по ветеринарна медицина Мирче Кировски, додека во Ранковце кандидатурата ја презема дипломираниот едукатор по семејни студии Иван Нешевски. Старо Нагоричане ќе биде претставено од ветеринарниот техничар и сопственик на сточарска фарма Андреј Димитријевски.

„Нашите кандидати се вистинските луѓе на вистинските места. Тие го познаваат секојдневниот живот на граѓаните, се дел од заедницата и се подготвени да работат чесно и одговорно. Левица останува доследна на својата борба против корупцијата, непотизмот и расипничкото трошење на јавните пари. Нашата цел е локалната самоуправа да се врати во рацете на граѓаните“, изјавија од партијата.

Партијата нагласува дека општините се темелот на вистинската промена и дека новите кандидати, со своето знаење и посветеност, ќе работат за подобрување на животот во локалните заедници.

The post ВИСТИНСКИ ЛУЃЕ НА ВИСТИНСКИТЕ МЕСТА Левица ја претстави новата генерација кандидати appeared first on plusinfo.mk.

Владејачката ВМРО-ДПМНЕ вечерва го претстави својот натпартиски кандидат за градоначалник на Кочани – доктор Влатко Грозданов. Од партијата порачаа дека со оваа одлука испраќаат јасна порака дека интересот на граѓаните е над партиските разлики.

– Во Кочани, ВМРО-ДПМНЕ ќе застане зад натпартискиот кандидат д-р. Влатко Грозданов – изјави Марија Митева, член на Извршниот комитет на партијата, нагласувајќи дека тој претставува личност со интегритет и доверба кај жителите на градот.

Покрај оваа одлука, ВМРО-ДПМНЕ ги објави и останатите кандидати: Бети Стаменкоска Трајкоска за Кисела Вода, Мирослав Славковски за Старо Нагоричане, Илија Тентов за Дојран, Сашко Велјановски за Долнени и Даниел Павловски за Ранковци.

Од партијата велат дека се убедени оти со оваа кадровска структура ќе понудат квалитет и решенија за локалните заедници.

– Кандидатите за градоначалници убедливо водеа на сите внатрепартиски анкети и анализи. Сите кандидати на ВМРО-ДПМНЕ се посветени личности, подготвени да ги застапуваат интересите на секој жител, во секое населено место. Тие се луѓе кои имаат енергија и решителност да работат за подобро утре на граѓаните, сите се посветени и дополнително ќе бидат ангажирани за развој на општините и државата воопшто – рече Митева.

Сите тие ќе работат во насока на стабилни и силни општини, а воедно и за стабилна и силна држава.

– ВМРО-ДПМНЕ секој ден покажува дека работи за доброто на секој граѓанин, на секое населено место и на државата воопшто. Ги повикуваме граѓаните да ја поддржат визијата на ВМРО-ДПМНЕ, да изградиме подобра и поквалитетна иднина за сите – додаде Митева.

The post ВМРО-ДПМНЕ СО НАТПАРТИСКИ КАНДИДАТ ВО КОЧАНИ Соопштени имињата и за Кисела Вода, Дојран, Старо Нагоричане, Долнени и за Ранковци appeared first on plusinfo.mk.

Извршниот комитет на ВМРО-ДПМНЕ вечерва утврди уште 16 кандидати за градоначалници за претстојните локални избори на 19 октомври.

– На редовната седница се дискутираше за состојбата во државата и за растот на економијата која се случува како плод на силната посветеност на Владата. Се разгледаа и избраа неколку кандидати за градоначалници. Промените кои се случуваат на централно ниво и силната работа која е очигледна мора да продолжи и на локално ниво, до секое едно маало – изјави генералниот секретар на ВМРО-ДПМНЕ, Ѓорѓија Сајкоски.

Вечерва ИК на ВМРО-ДПМНЕ ги избра следните кандидати за градоначалници:

Сопиште – Јане Мицевски

Кичево – Александар Јовановски

Крива Паланка – Оливер Алексовски

Маврово Ростуше – Онер Јакуповски

Кривогаштани – Сашо Граорковски

Шуто Оризари – Ерџан Демир

Крушево – Нико Чонески

Валандово – Ѓоко Камчев

Виница – Митко Костадиновски

Демир Хисар – Никола Најдовски

Чешиново-Облешево – Јордан Костадинов

Радовиш – Љупчо Почивалец

Чашка – Дејан Андоновски

Прилеп – Дејан Проданоски

Струмица -Петар Јанков

Неготино – Марија Нацева

Во Куманово и во Центар ќе бидат поддржани кандидатите кои ќе бидат предложни од коалициската партија ЗНАМ.

– Убедени сме во способноста на секој еден избран кандидат. Тоа се луѓе кои се докажани во своите области и сектори на работа. Секој еден кандидат е почитуван како индивидуа во населеното место од кое доаѓа и сите важат за искрени, чесни и работливи луѓе. Луѓе кои си го одржуваат дадениот збор и кои ќе бидат вистински татковци на градот – рече Сајкоски.

Изминатава година граѓаните ги почувствуваа придобивките од новиот пристап на работата, додаде тој.

– Се помогнаа општините со 250 милиони евра, со кои се решија децениски проблеми со кои се соочуваа нашите граѓани. И тука не запираме, продолжуваме и повторно со нови проекти. Кандидатите за градоначалници имаат навистина одлична можност, да го продолжат вистинскиот пат кој ние го започнавме и го водиме овие 4 години како локална и 1 година како централна власт. ИК на ВМРО-ДПМНЕ врз база на внатрепартиски анализи и сондажи заклучи дека партијата оди на уште една историска победа на претстојните локални избори. На претстојните избори нè очекува голема победа, а потоа многу работа и посветеност за секое место – рече Сајкоски.

The post ВМРО-ДПМНЕ УТВРДИ УШТЕ 16 КАНДИДАТИ ЗА ГРАДОНАЧАЛНИЦИ Партијата оди на голема историска победа appeared first on plusinfo.mk.

ВМРО-ДПМНЕ од денеска продолжува со мерењата на рејтинзите за кандидатурите за престојните локални избори, а кандидатите за градоначалници за преостанатите општини каде што досега не се номинирани ќе бидат познати во првата недела од септември, рече денеска премиерот Христијан Мицкоски.

Тој рече дека крајниот рок за доставување на кандидатирите е 13 септември.

Одговарајќи на новинарско прашање за соработката со коалицискиот партнер ЗНАМ за општините Центар и Куманово, Мицкоски истакна дека се мошне блиску до договор.

– Не би можел да кажам дека имаме конечен договор, но многу блиску сме до договор. Во таа насока мериме уште неколку општини, да видиме дали во тие општини кандидатот од ЗНАМ или кандидатите од ВМРО-ДПМНЕ имаат подобри перформанси кај граѓаните. Уште две-три општини се отприлика во фокусот на тие разговори. И убеден сум дека на крај ќе постигнеме договор за заедничка поддршка на кандидатите за градоначалници. Што се однесува до советничките листи, коалицијата што ќе ја предводи ВМРО-ДПМНЕ ќе си има свои листи, а политичката партија ЗНАМ ќе си има свои листи – додаде Мицкоски.

The post ВО ПРВАТА НЕДЕЛА ОД СЕПТЕМВРИ ЌЕ СЕ ЗНААТ СИТЕ КАНДИДАТИ ЗА ГРАДОНАЧАЛНИЦИ Партнерите ВМРО-ДПМНЕ и ЗНАМ се блиску до договор за Куманово и за Центар appeared first on plusinfo.mk.

ДУИ по денешната седница на Централното претседателство објави уште неколку имиња на кандидати за градоначалници во општините во кои ќе учествува на претстојните локални избори што треба да се одржат во октомври.

Потпретседателот на партијата, Арбер Адеми, соопшти дека ќе го кандидираат Фатмир Дехари за уште еден градоначалнички мандат во Кичево. Еркан Арифи, пак, ќе бара доверба од граѓаните на Липково, исто така, за уште еден мандат. Кандидат за градоначалник на Општина Чашка е Суат Шаќири, а за Општина Студеничани – Ејуп Абази.

Централното претседателство на ДУИ одлучило да ја поддржи и независната кандидатура на Енвер Пајазити за градоначалник на Општина Брвеница.

Адеми најави дека Централното претседателство на партијата допрва ќе одлучува кои ќе бидат кандидатите за градоначалник на Град Скопје, Општина Боговиње, Општина Долнени, како и на Општина Пласница.

Претходно, ДУИ објави дека кандидат за градоначалник на Општина Чаир ќе им биде Бујар Османи, за Општина Тетово – Бајрам Реџепи, а во Општина Желино – Емир Сулејмани.

The post ДУИ ОБЈАВИ УШТЕ НЕКОЛКУ КАНДИДАТИ ЗА ГРАДОНАЧАЛНИЦИ Фатмир Дехари ќе бара уште еден мандат appeared first on plusinfo.mk.

СДСМ нуди кадри кои веќе еднаш претходно се одбиени од граѓаните на избори или не живеат во општините за кои се кандидирани за градоначалници. Не постои друга партија која е толку упорна како СДСМ да ги награди најнеспособните кадри, соопшти ВМРО-ДПМНЕ.

„Наместо нови кадри со некаква визија или интегритет, СДС повторно кандидира лица кои веќе еднаш се одбиени од граѓаните. Кандидати за градоначалници како Дарко Блажевски, кој е поранешен градоначалник на општина Јегуновце. Блажевски е повторно во игра, иако е единствениот човек кој некогаш затворил јавно претпријатие. Блажевски на граѓаните на општина Јегуновце им ветуваше културен дом, проект од 50.000 евра, за на крај самиот да си го откупи тој културен дом. Човекот кој приватизира простор што припаѓал на граѓаните, СДСМ сега го нагрдува со кандидатура“, соопшти ВМРО-ДПМНЕ.

Вакви се стандардите на СДСМ и јасно е зошто ја имаат изгубено довербата од граѓаните, се додава во соопштението.

„Слична е ситуацијата со Ѕвонко Васев. Човек кој со години не живее во општина Сопиште, не знае што се случува таму, не се среќава со граѓаните на таа општина. Васев нема никаква претстава за потребите на граѓаните во општина Сопиште и нема контакт со нивното секојдневие. Очигледно е дека во СДСМ нема буквално никакви критериуми. Според ова, СДСМ смета дека локалната власт е прибежиште за неуспешни поединци. СДСМ не само што нема кадри, туку веќе нема ни срам“, се вели во соопштението на ВМРО-ДПМНЕ.

The post СДСМ НУДИ КАНДИДАТИ ЗА ГРАДОНАЧАЛНИЦИ КОИ ВЕЌЕ ИЗГУБИЛЕ НА ИЗБОРИ Не постои друга партија што толку форсира губитници appeared first on plusinfo.mk.

Лидерот на СДСМ Венко Филипче, на денешната прес-конференција, ја соопшти одлуката на Извршниот одбор на партијата која се однесува на давање согласност за кандидатура на градоначалници за претстојните локални избори.

Одлуката, како што истакна, се однесува на првите 19 кандидати за градоначалници.

– Дозволете да информирам за донесената одлука на Извршниот одбор да се даде согласност за кандидатура за градоначалници на неколку општини од страна на СДСМ. Имено, во тие општини завршија внатрепартиските постапки, роковите се завршени во однос на кандидирањето. Во тие општини завршија внатрепартиските постапки, роковите се завршени во однос на кандидирањето и оваа согласност понатаму на крајна одлука ќе ја доставиме до Централниот одбор на партијата тогаш кога ќе комплетираме сите општини. Сега станува збор за 19 општини – рече Филипче.

Ова е листата на кандидати за градоначалници:

За Општина Центар, актуелниот градоначалник Горан Герасимовски.

За Општина Аеродром, д-р Александар Трајановски.

За Општина Ѓорче Петров – претседателот на општинската организација, Костадин Ацески.

За Општина Чучер Сандево, актуелниот градоначалник Сашо Комненовиќ.

За Општина Берово, актуелниот претседател на општинската организација Илија Рунтевски.

За Општина Крива Паланка, актуелниот градоначалник Сашо Митовски.

За Општина Лозово, Ацо Велковски.

За Општина Чешиново-Облешево, Горанчо Крстев.

Општина Богданци, Блаже Шопов.

Општина Дојран, Ристо Џинев.

Општина Могила – Зоран Ристевски.

Општина Неготино, Петар Мантев.

Општина Новаци, Љубе Кузманоски.

Општина Росоман, Стојанче Николов, актуелниот градоначалник.

Општина Вевчани, претседателот на општинската организација Стефан Радиноски.

Во Крушево, актуелниот градоначалник Томе Христовски.

Во Ресен, претседателот на општинската организација Александар Бузлевски.

Во Штип, исто така, претседателот на општинската организација Павел Иванов.

И претседателот на општинската организација во Општина Гази Баба, Влатко Митовски.

Овие кандидати, порача Филипче, се избрани врз основа на принципите коишто ги наведовме дека ќе важат за кандидирањето на овие луѓе.

– Избрани се со прилично широк консензус во општинските организации, луѓе кои што имаат и  кредибилитет и легитимитет да ја побараат довербата, некои за првпат, некои повторно од граѓаните. Актуелните градоначалници коишто навистина направија вистинска промена во општините: во Центар, во Крушево, во Крива Паланка – општини и градови коишто станаа целосно нови во времето на нивните мандати, и сметам дека се луѓе кои што можат да излезат пред граѓаните и може слободно да кажеме дека сè што ќе ветат ќе биде исполнето согласно нашата програмска заложба, која што ќе биде градена врз основа на вредносните принципи – рече Филипче.

The post ГЕРАСИМОВСКИ ЗА ЦЕНТАР, ТРАЈАНОВСКИ ЗА АЕРОДРОМ, АЦЕСКИ ЗА ЃОРЧЕ ПЕТРОВ Филипче ги објави првите 19 кандидати за градоначалници appeared first on plusinfo.mk.

Премиерот Христијан Мицкоски  денеска соопшти дека на седницата на ИК на ВМРО-ДПМНЕ синоќа  е донесеа одлука за 8 нови кандидати за градоначалници, како што рече, според негово убедување и идни градоначалници. ВМРО ДПМНЕ, посочи Мицкоски, досега објави 33 кандидати за градоначалници, а во моментов се прават мерења за уште 17 општини. Очекува бројката за кандидатите за градоначалници за претстојните  локални избори да биде заокружена до средината на јули.

– Практично сите општини да ги добијат имињата на кандидатите. Исто така дел од кандидатите што ќе ги поддржиме уште во првиот круг се кандидати од коалициските партнери, коишто доаѓаат како од ВМРО ДПМНЕ. Но и во рамки на внатрешната коалиција за да видиме како ќе се покажат мерењата на јавно мислење, така што и доколку и таму имаме одредени потенцијали, коишто се над капацитети на ВМРО ДПМНЕ, ние немаме проблем како политичка партија да ги поддржиме. Така што очекувам целокупниот овој процес да се комплетира некаде крајот на првата половина на јули  – изјави Мицкоски.

Синоќа во Штип на седница на Извршниот комитет на ВМРО ДПМНЕ  донесе одлука да му предложи на Централниот комитет на ВМРО ДПМНЕ за Македонски Брод кандидат за градоначалник да биде Жарко Ристески, кој е и актуелен градоначалник на оваа општина и во Општина Могила да биде актуелниот градоначалник, Драганчо Саботковски, потоа за Општина Пробиштип кандидат за градоначалник е Тони Тоневски, за Богданци ВМРО ДПМНЕ го предлага Марјан Пеев, за Општина Демир Капија ја предлага Наталија Димитриева, за Општина Росоман предлог за кандидат за градоначалник е Ѓорги Крстевски, за Општина Новаци е Стевче Стевановски и за Општина Дебарца е Златко Силјановски.

Извршниот комитет на ВМРО ДПМНЕ синоќа одлучи и генералниот секретар на ВМРО ДПМНЕ, Ѓорѓија Сајкоски да биде претседател на Републичкиот изборен штаб, којшто ќе ја води кампањата за локалните избори.

The post ВМРО-ДПМНЕ ЌЕ ЈА КОМПЛЕТИРА ЛИСТАТА НА КАНДИДАТИ ЗА ГРАДОНАЧАЛНИЦИ ВО ЈУЛИ Отворена е вратата и за добрите кандидати од коалицијата appeared first on plusinfo.mk.

Врз основа на бројките што ги добивам очекувам убедлива победа на ВМРО-ДПМЕ на претстојните локални избори, а можно е СДСМ да не освои ниту една општина, рече денеска премиерот Христијан Мицкоски при посета на Центарот за обука во затворот во Идризово.

– Можеби онаку кадешто е конкурентен СДСМ се можни 2, 3, максимум до 4 општини, но, да бидам искрен, ако продолжат вака недоговорно да се однесуваат, може и да немаат освоено општина на локалните избори. Тие и малкумината кои ги поддржуваат играат на картата на кратко помнење и нихилистичка политика дека сè што прави оваа Влада не чини. Па не може сè да не чине, белким и нешто е добро што прави оваа Влада. Не може баш сè да се критикува, вклучително и оваа незрела критика кон договорот за стратешко партнерство со Обединетото Кралство – рече премиерот Мицкоски.

Тој додаде дека на 28 мај на седница на Извршниот комитет на ВМРО-ДПМНЕ ќе предложи десетици имиња за кандидати за градоначалници, врз основа на досегшните анкети.

– Ако добијат зелено светло, потоа на седница на Централниот комитет ќе се одобри кандидатирата на идните градоначалници –  рече премиерот.

Тој додаде дека по следниот конгрес, што ќе се одржи кон крајот на ноември или на почетокот на декември, да се случат голем број проемни во структирата на партијата и во општинските комитети.

– Во периодот што е пред нас, треба да дадеме уште еден дополмнителен мотив за сите нас, да дадеме енергија. Гаѓаните го очекуваат тоа. Има многу проблеми да се решаваат, а за жал, наследството од претходната власт е големо, но, многу работи решивме. Имам целосно разбирање за граѓаните. Логично е кај дел од граѓаните да има незадоволство, помалку трпение, затоа што се лажени децени наназад. Но, ние мора да сме трпеливи и да испорачаме. Стигнуваат резултати, индикаторите се добри – вели премиерот Мицкоски.

The post СДСМ МОЖЕ ДА НЕ ОСВОИ НИЕДНА ОПШТИНА НА ЛОКАЛНИТЕ ИЗБОРИ Мицкоски очекува убедлива победа на ВМРО-ДПМНЕ appeared first on plusinfo.mk.