Бугарската полиција открила голема нелегална плантажа со канабис сместена во повеќе од 20 подземни галерии во напуштен рудник за цинк, а тројца лица се обвинети, додека по едно лице сè уште се трага, објавија бугарските медиуми.

Според заменик-директорот на Генералната дирекција за борба против организираниот криминал, Емил Борисов, досега се запленети околу 70 килограми дрога, 600.000 евра во готово и 600 парчиња муниција.

– Поранешниот рудник бил опремен со високотехнолошка инфраструктура и најверојатно се користел за масовно производство на дрога наменета за шверц во странство – изјавил Борисов.

На брифингот, заменик-градскиот обвинител Вихар Михаилов соопштил дека во рудникот има повеќе од 20 тунели, а сопственикот на објектот засега не е меѓу обвинетите.

Објавените фотографии покажуваат дека дел од подземните галерии биле претворени во модерни оранжерии за одгледување канабис, додека други служеле како живеалишта за лицата кои престојувале таму.

Според заменик-директорот на Дирекцијата за рударство во Бугарија, Дарин Костов, местото функционирало како вистински подземен град со повеќе објекти и инфраструктура.

Истрагата продолжува, а бугарските власти најавуваат дека случајот е сложен и дека ќе бидат потребни месеци за целосно расчистување, со вклучување на експерти за рударство и други институции.

The post 🎥 НАПУШТЕН РУДНИК ПРЕТВОРЕН ВО ВИСТИНСКИ НАРКО-ГРАД!? Имал подземни оранжерии, станови, погони, инфраструктура… appeared first on plusinfo.mk.

Турски државјанин е приведен во Скопје, откако полицијата во неговиот дом пронашла дрога и опрема преку која организирал онлајн игри на среќа.

Како што информираат од Министерство за внатрешни работи, на територијата на Центар полициски службеници од Единицата за недозволена трговија при СВР Скопје го лишиле од слобода Б.Б. (29), турски државјанин со престојувалиште во главниот град.

При претрес во неговиот дом, извршен со судска наредба, биле пронајдени пет саксии со канабис, марихуана, дигитална вага и два лаптоп компјутери. Според полицијата, компјутерите биле користени за организирање онлајн игри на среќа.

Од МВР додаваат дека за случајот е известен јавен обвинител и дека по целосно документирање ќе биде поднесена соодветна кривична пријава.

The post ОРГАНИЗИРАЛ ОНЛАЈН ИГРИ НА СРЕЌА, МУ НАШЛЕ И ДРОГА Приведен турски државјанин во Скопје appeared first on plusinfo.mk.

По одземањето на лиценците за одгледување марихуана на шест компании, во наредниот период ќе им бидат одземени на уште три фирми, а четвртата се анализира, откри денеска министерот за здравството, Азир Алиу кој одговараше на прашање до каде се анализите и инспекциите во ваквите компании.

– Досега 23 компании се процесуирани, досега три се сигурни дека ќе се одземат лиценците. Четвртата се анализира – изјави Алиу.

Претходно на 24 февруари, министерот Алиу на прес-конференција информираше дека на шест компании се одземени лиценците, а од кои четири фирми се дел од скандалот со шверцот на марихуана.

– Недостатоци има од различни аспекти – од административна гледна точка, од инфраструктурна гледна точка, од технолошка гледна точка, од човечки капацитети. Во некои од нив, внатрешната инфраструктура за следење, камерите не работат. Во дел од нив нема човечки капацитети, а во дел нема обезбедување. Засилените вонредни контроли ќе се извршат кај сите правни субјекти, односно, вкупно ќе бидат опфатени 43 правни лица – изјави на 24 февруари Алиу.

Обвинителството за гонење на организиран криминал и корупција има отворено истрага за шест лица поврзани со петте тони марихуана, кои беа пронајдени во Коњух, а излегле од Македонија преку граничниот премин „Табановце“. Првоосомничен е ко-сопственикот на скопската фирма „Алфафарм“.

The post НА УШТЕ 3 ФИРМИ ЌЕ ИМ СЕ ОДЗЕМЕ ЛИЦЕНЦАТА ЗА КАНАБИС Се анализира состојбата во четврта фирма appeared first on plusinfo.mk.

Акцијата за преиспитување на концесиите за канабис се спроведува подолг период и правдата ќе си дојде на свое место, а опозицијата ја мачи тоа што доаѓа време за одговорност за сите вклучени лица – рече претседателот на Владата Христијан Мицкоски на денешната собраниска седница за пратенички прашања.

– Оваа влада веќе шест лиценци има одземено. Од информациите со кои располагам, уште неколку ќе бидат одземени во периодот кој следи. Контролите продолжуваат, очекувам голем број лиценци да бидат одземени. Но, исто така за мене е поважно, што е правено изминатите години откако главната економска политика на претходната влада се темелеше на давање на лиценци и одгледување на цвет од канабис. Тоа беше главната економска политика на претходната влада и, нормално, ширење на хистерија кога сега од опозиција ја прават без да понудат било какво решение – рече Мицкоски, одговарајќи на прашање од пратеникот Љупчо Пренџов.

Премиерот Мицкоски рече дека фирмата во којашто се запленија повеќе од 30 тона цвет од канабис има роднинска поврзаност со висок функционер на опозицијата од минатото, односно претседател на локална организација во СДСМ во Ново Село.

– Не еден килограм, не еден тон, туку 30 тони. Факт е дека овие испораки завршуваат до луѓе блиски од претходната влада, но тоа не можам јавно да го зборувам бидејќи е дел од истрагата. Тишината нив ги оптеретува, тие се навикнати на парада, камери, лисици, понижувања, омаловажувања, тие не се навикнати на соопштенија за јавност или кратка изјава и тоа ги мачи затоа што конечно доаѓа времето на наплата на она кое што во назад во времето било погрешено. Ги мачи што гледаат дека нема назад, кога гледаат како камионите се полнат со запленет канабис, се одземаат лиценци. Работи меморијата, секој се преиспитува што направил што потпишал, кој документ, што згрешил, тоа е цело време потсвест која ќе продолжи да ги јаде. Сега тие се молат да заврши истрагата побргу за да видат кои се тие, дали се тие или не, дали ќе се покрене постапка овде за одземање имунитет можеби, тоа ги мачи – изјави премиерот Мицкоски.

Премиерот Мицкоски рече дека има чувство оти голем дел од нив ќе се изненадат, дека правдата ќе биде исполнета, и голем дел од нив ќе одговараат.

– Замислете држава во која главната економска политика се темели на канабис? Отидоа чекор понапред, сакаа да формираат слободни канабис туристички зони каде ќе биде дозволено користење марихуана. Не им беше доволно што тони канабис ќе порасне и генерации ќе бидат потенцијални зависници. Беа свесни за тоа и решија да направат слободни зони за консумирање канабис, па спомнуваа Дојран, Охрид и не случајно во тие региони има најмногу плантажи за да нема трошоци за транспорт. На тоа дојде крај и сега следи одговорноста и гарантирам дека одговорност ќе има – рече премиерот Мицкоски.

The post ИМ РАБОТИ МЕМОРИЈАТА, СЕ ПРАШУВААТ ШТО ПОТПИШУВАЛЕ Мицкоски им порача на опозиционерите дека „доаѓа времето за наплата“ appeared first on plusinfo.mk.

Софистициран канал за шверц на марихуана од Македонија кон Србија функционирал под маска на легална трговија со текстилна стока. Дрогата била пакувана во пратки декларирани како „квалитетни лесни перници“, со што се избегнувале детални проверки на граничните премини. На документацијата стоката изгледала како обичен производ со ниска вредност и безбедносен ризик, што им овозможувало на организаторите непречено да ја транспортираат, објави емисијата „Код“ на ТВ Телма.

Обвинителството за гонење на организиран криминал и корупција отвори истрага против шест лица поврзани со околу петте тони марихуана пронајдени во Коњух, Србија, кои од земјава излегле преку граничниот премин „Табановце“.

Имено, според „Код“, марихуаната влегла во Србија во камион декларирана како „квалитетни лесни македонски перници од Прилеп“ кои „требало“ да патуваат за Манчестер, Англија. Перниците биле извадени од камионот и претоварени во друг, а првиот камион бил натоварен со кутиите марихуана. Возач на камионот бил Александар Ивановски, кој сега е притворен.

Според соопштението на Обвинителството, првоосомничен е сопственикот на скопската фирма „Алфафарм“, Предраг Брковиќ, кој заедно со други засега неидентификувани лица организирал набавка на марихуана и нејзино повеќекратно транспортирање од Македонија до Србија со товарни возила, со цел натамошна продажба.

Брковиќ, како што наведуваат од ОЈО ГОКК, им дал насоки на своите вработени за пакување на сув цвет од канабис во вкупна количина од 8.832 килограми, претходно набавен од фирмата „ЦБД Медплант“ од струмичкиот регион.

Во период од околу две недели биле спакувани над 200 кутии, по што првоосомничениот им одобрил колективен одмор на вработените. На 13 јануари 2026 година, во пладневните часови, двајца ортаци, од кои едниот осомничен во Република Северна Македонија, а другиот во Република Србија, организирале пренесување на поголема количина сув цвет од канабис со товарни и патнички возила од објектот на правното лице во Скопје до локација во атарот на Свети Николе.

Од Обвинителството информираат дека првоосомничениот, заедно со други неидентификувани лица, организирал кутиите да бидат натоварени во возилата и во два наврата пренесени до наведената локација.

Клучниот момент, според истрагата, е што товарното возило, кое првично било наменето за превоз на лесни перници, било испразнето и наместо перници во него биле натоварени кутиите со сув цвет од канабис. Од Свети Николе возилото се упатило кон граничниот премин „Табановце“ и ја напуштило државата, носејќи ја пратката кон Србија.

Истрагата е во тек, а Обвинителството најавува натамошни активности за целосно расчистување на случајот и утврдување на одговорноста на сите инволвирани лица.

The post БАЛИЊАТА КАНАБИС КАМУФЛИРАНИ КАКО „КВАЛИТЕТНИ ЛЕСНИ ПЕРНИЦИ“ Се открива софистицираната мрежа за шверцот со марихуана appeared first on plusinfo.mk.

Најмалку 6 од 10 лиценцирани компании за производство на канабис во медицински цели, по извршените контроли, се во постапка да ги изгубат лиценците, изјави министерот за здравство Азир Алиу за ТВ Телма.

– Од досега процесираните компании, од 10 најмалку 6, сега се во постапка на одземање на лиценците, затоа што не ги исполнуваат условите за лиценцирање предвидени во законот – рече Алиу.

Тој рече дека не може да даде повеќе детали кои ја довеле до заклучок стручната комисија ан министерството да покрене постапка за одземање на лиценците, затоа што постапката е сѐ уште е во тек.

На прашање дали може да ги соопшти имињата на тие компании, министерот Алиу рече дека не сака тоа да го направи во оваа рана фаза, и дека процесот ќе заврши во вторник кога ќе бидат соопштени причините и имињата на компаниите за кои Комисијата на министерството за здравство утврдила дека не ги исполнуваат условите.

The post 6 ОД 10 ФИРМИ ПРОИЗВОДИТЕЛИ НА КАНАБИС ЌЕ ГИ ИЗГУБАТ ЛИЦЕНЦИТЕ Министерот Алиу ги соопшти првичните наоди на стручната контрола appeared first on plusinfo.mk.

Правилникот за одгледување канабис за медицински цели, донесен во времето на власт на СДСМ, е во колизија со законот, затоа што се дозволува да се произведува цвет од канабис кој не ги задоволува ГМП-нормите – рече на денешната прес конференција пратеникот на ВМРО-ДПМНЕ Бране Петрушевски.

– Познанството со Зоран Заев и Венко Филипче, како и блискоста со СДС биле најважен критериум за апликантите за добивање на лиценца за медицински канабис. Не можел кој било да извади таква лиценца, затоа што тоа било резервирано за луѓето блиски до кланот Заеви и до Филипче, затоа и во струмичкиот регион во Македонија има најмногу фабрики за марихуана за медицински цели. За да им тече бизнисот и да ги вртат милионите, Заев и Филипче во 2020 година планираа целосно легализирање на марихуаната и со тоа сакаа Македонија да ја прават светска туристичка атракција. За среќа на граѓаните, овој обид не им успеа, а сега гледаме и која им била целта – рече Петрушевски.

Според него, дека ова било планирано од Заев и Филипче се гледа во подзаконскиот акт, односно Правилникот за одгледување на канабис за медицински цели.

– Овој Правилник, донесен во времето на власт на СДСМ, е во колизија со законот, затоа што се дозволува да се произведува цвет од канабис кој не ги задоволува ГМП-нормите. Со ова, логично е дека со неговото користење или во процесот на екстракција, маслото кое се произведува не може да биде лиценцирано, а најмалку да се најде во промет.

Ги прашуваме Заев и Филипче кој бил мотивот за ова?

Зошто е направен подзаконски акт кој е во колизија со законот и со самото тоа овој процес е незаконски?

Дали на Заев и Филипче целта им била продавање на канабис на црниот пазар?

Затоа ли Заев и Филипче овие денови се толку испаничени?

Затоа ли Заев излезе да го брани неодбранливото, додека во тоа време Филипче се упати кон Грција да се види со него?

И дали Заев и Филипче стојат позади промената на Правилникот.

Сите сомнежи и индиции за криминалот со дрогата водат кон Заев и Филипче. Јавното обвинителство ова да го истражи до крај, еднаш правда и одговорност за ова криминално дуо, мора да има – рече Петрушевски.

The post ЛЕГАЛНИОТ КАНАБИС Е ВСУШНОСТ НЕЛЕГАЛЕН Петрушевски тврди дека Правилникот за негово одгледување е противзаконски appeared first on plusinfo.mk.

Бране Петрушевски, пратеник од ВМРО-ДПМНЕ денеска на прес конференција обвини дека во случајот со околу 40 тони запленета марихуана вплеткани се Зоран Заев и Венко Филипче.

– Вклученоста си ја потврди самиот Заев, се јави бранејќи се, наместо да им се извини на граѓаните за сиот криминал што го има направено. На Заев веќе никој не му верува, ама со жалопојките на Фејсбук, тој самиот покажа дека е погоден и фатен жив на дело. Нешто што е јасно во јавноста е несомнениот факт дека неговата влада се прослави со актуелизирање на бизнисот со марихуана, продаден како грижа за здравјето на граѓаните или канабис за медицински цели. Како и да е, факт е дека околу 70 проценти од запленетата дрога деновиве е на фирма во сопственост на луѓе на Заев – рече Петрушевски.

Пратеникот посочи дека станува збор за фирма на лице кое било претседател на општинскиот одбор на СДСМ во Ново село, Тони Котев познат како М’гчев, кој е близок со Вице Заев.

– Секако, основоположникот на бизнисот со марихуана – владата на СДС(М) предводена од Заев кога министер за здравство беше Филипче, креирала правила по своја мерка и доделувала бизниси по своја мерка, или на свои луѓе. Сега следи целосно расчистување на криминалот во оваа област. Секој еден кој се занимава со одгледување, до производство на готови производи од марихуана ќе биде проверен.

А за поврзаноста на Заев и Филипче еве за почеток тие лично нека дадат одговори на јавноста на следниве прашања: Каде се се јавувал Заев при запленета на петте тони дрога во Србија? Зошто набрзина Филипче се упатил кон југ?

Случајот ќе биде комплетен само ако јавното обвинителство ги истражи сите аспекти, меѓу кои и поврзаноста на Заев и Филипче – рече Петрушевски на прес конференцијата.

The post КАДЕ СЕ ЈАВУВАЛ ЗАЕВ ВО СРБИЈА, КАДЕ ПАТУВАЛ ФИЛИПЧЕ НА ЈУГ? Петрушевски постави јавни прашања до сегашниот и до поранешниот лидер на СДСМ appeared first on plusinfo.mk.

„Заев, основачот на марихуана бизнисот во Македонија, не спие мирно. Немирната совест го натера Заев на панични реакции уште во неделата рано изутрина. Нервозната реакција е јасен знак дека Заев се чувствува директно погоден и разоткриен, откако вистината почна да излегува на виделина“, се вели во соопштение од Центарот за комуникации на ВМРО-ДПМНЕ.

„Факт е дека токму владата предводена од Заев го постави темелот на бизнисот со марихуана во Македонија. Околу 70% од запленетата дрога е поврзана со фирма блиска до СДСМ, „ЦБД Медплант”, чиј основач е Тони Котев (Мгчев), поранешен претседател на општинскиот одбор во Ново Село, човек поврзан со Вице Заев. Фирмата, формално во сопственост на неговиот син, за помалку од шест месеци испорачала 19 тони марихуана.

Фирмата на Мгчев добива одобрение за работа во време кога владата ја предводеше Заев, а Филипче беше министер за здравство, поточно во 2020 година.

ВМРО-ДПМНЕ уште тогаш укажуваше дека лиценците за одгледување марихуана за медицински цели се доделувале исклучиво на фирми блиски до власта, а не според законски услови. Медицинската марихуана била параван за организиран криминал во огромни размери.

Јавноста има право да знае и зошто Заев лично се интересирал за случајот со петте тони марихуана запленети во Србија. Апелираме до Јавното обвинителство да ја истражи вмешаноста на Заев и Филипче во овој случај и да ги објави сите сознанија. Борбата против криминалот е јасна, а на наркокартелот на Заеви му доаѓа крајот“ – се вели во соопштението на ВМРО-ДПМНЕ.

The post ЗАЕВ ЗАСТАНА ВО ОДБРАНА НА КАРТЕЛОТ ЗАШТО Е НЕГОВА ТВОРБА Медицинската марихуана е само параван за организираниот криминал, обвинува ВМРО-ДПМНЕ appeared first on plusinfo.mk.

Пратеникот на ВМРО-ДПМНЕ, Бране Петрушевски, на прес-конференција објави дека нема ниту намера ниту потреба да му се извини на екс-лидерот на СДСМ Зоран Заев, во врска со наводите за заплена на канабис во Струмичко, туку дека напротив очекува Заев да ѝ се извини на македонската јавност, за сите милионски криминали што ги има правено и да се извини за сите национални предавства и понижувања.

– Апсолутно немам намера, ниту чувствувам потреба да му се извинам на Зоран Заев. Напротив, очекувам Зоран Заев да ѝ се извини на целокупната македонска јавност за сите милионски криминали коишто ги има правено и да се извини за сите национални предавства и понижувања. Она што е индикативно во неговото излегување во јавноста е тоа што, иако демонтира и вели дека немал никаква врска со овој случај со марихуана, сепак во тоа негово писание, кажува дека ова било режирана драма и дека запленетата марихуана била наводно запленета заради несоодветно чување и складирање, со што директно се става во одбрана на оние коишто се осомничени во овој случај – рече тој.

Дополнително, посочи пратеникот, Зоран Заев треба да одговори на македонската јавност, затоа што имаше јавни сведоштва за тоа како гради зграда 40 Катница во Дубаи и она коешто треба да го каже, е дали и тој како, актуелниот лидер на СДСМ Венко Филипче ќе оперира, па затоа добил златна виза за Дубаи.

– Оваа нервоза на Зоран Заев е само доказ дека клопчето се размотува, дека обрачот околу Заеви се стега и дека наскоро ќе има правда во Република Македонија. ВМРО-ДПМНЕ продолжува со борбата против криминалот и корупцијата во Македонија – вели Петрушевски.

Во изминатите денови во обмена полициска акција беа запленети над 40 тони марихуана. МВР објави дека од фирмата „ЦБД Медплант“ од Босилово, Ново Село, се запленети 21 тон марихуана.

Како формален сопственик на компанијата во документацијата се јавува Христијан Котев, но според информации до кои дојде редакцијата, реалната контрола над фирмата ја има неговиот татко, Тони Коцев, со прекар М`гчев. Тони Коцев е поранешен председател на огранокот на СДСМ во Ново Село и има многу бизнис релации со Вице Заев, брат на поранешниот премиер, Зоран Заев.

Претходно eкс-лидерот на СДСМ објави дека доколку не добие извинување ќе ги тужи ВМРО-ДПМНЕ и Бране Петрушевски, кои, како што вели 5 години изнесува клевети против него во врска со заплената на канабис, во врска со наводите дека се јавувал во царина, во врска со наводните 40-катници во Дубаи и во врска со болницата на д-р Жан Митрев.

ЗАЕВ СЕ ЈАВИ ВО ОДБРАНА, ДАЛИ СТАНУВА КЛАУСТРОФОБИЧЕН? Од ВМРО-ДПМНЕ му одговорија на екс-лидерот на СДСМ

The post НЕМА ДА МУ СЕ ИЗВИНАМ НА ЗАЕВ, ТОЈ ДА Ѝ СЕ ИЗВИНИ НА МАКЕДОНИЈА Петрушевски вели дека се одмотува клопчето за заплената на канабис appeared first on plusinfo.mk.