По остварена средба со претставници на дел од државите членки на шенген зоната, а преку Мисијата на Европска Унија со седиште во Белград, претставниците на превозниците од четирите држави на Западен Балкан (Македонија, Србија, Босна и Херцеговина и Црна Гора) се договорија да не го реализираат најавениот протест на 14 септември со затворање на граничните премини кон државите на Европска Унија (ЕУ) – објави денеска Асоцијацијата Макам-транс на својата Фејсбук страница.

-На овој начин покажавме добра волја и разбирање за проблемите кои би настанале со прекинување на синџирот на снабдување на стока меѓу Западен Балкан и ЕУ и искажавме доверба на ветувањето дека ќе се забрза процесот за изнаоѓање на соодветно решение за професионалните возачи и нивниот престој во Шенген Зоната подолг од 90/180 дена до изгласување на новата визна стратегија во втората половина на 2027 година. Сите подготовки за спроведување на протестот се ставени вон сила на одреден период – велат од Макам-транс. 

Превозниците од регионот на 1 септември одржаа предупредувачки протест барајќи решавање на проблемот со ограничениот престој на професионалните возачи во шенген-зоната.

The post ПРВОЗНИЦИТЕ ОД ЗАПАДЕН БАЛКАН НЕМА ДА ГИ БЛОКИРААТ ГРАНИЦИТЕ Ќе ѝ дадат уште една шанса на ЕУ да го реши проблемот со престојот во шенген зоната appeared first on plusinfo.mk.

Европската комисија сè уште не понудила решение за укинување на ограничувањето на престојот на професионалните возачи на камиони од Западен Балкан во земјите од Шенген-зоната, изјави претседателот на Здружението за меѓународен транспорт на Србија, Неѓо Мандиќ.

Тој за агенцијата Бета изјави дека состанокот со претставници на надлежниот директорат на Европската Унија, на кој треба да се разговара за изземање на возачите во меѓународниот транспорт од правилото 90/180, најверојатно ќе се одржи кон крајот на следната недела.

Според Мандиќ, здруженијата на превозници од Србија, Македонија, Босна и Херцеговина и Црна Гора испратиле писмо до Европската Унија со барање средбата да се одржи во Белград или Брисел, но најверојатно разговорите ќе бидат организирани онлајн, што, според него, не е најсоодветен формат за решавање на овој проблем.

Тој додаде дека тројца директори од Директоратот за мобилност и транспорт на Европската комисија се на годишен одмор до 12 август, поради што разговорите ќе бидат одложени.

– Возачите кои ќе бидат затекнати во Шенген-зоната и натаму се депортираат, а камионите се задржуваат, и покрај договорот од 10 април со кој беше предвидено да се избришат деновите поминати во Шенген до тој датум и да започне ново броење. Возачите кои веќе ја исполниле квотата од 90 дена во последните шест месеци и понатаму не можат да влезат во Хрватска, Унгарија или Романија – изјави Мандиќ.

Тој потсети дека правилото 90/180, кое почна да се применува во октомври 2025 година, практично ги изедначило професионалните возачи во меѓународниот транспорт со туристите, иако тие престојуваат во земјите од Шенген исклучиво поради работа.

На крајот на јануари годинава превозниците од Србија и Босна и Херцеговина четири дена ги блокираа товарните терминали на граничните премини, но и покрај протестите не беше пронајдено решение.

Превозниците од Западен Балкан побараа Европската комисија до 10 август годинава да предложи конкретно решение, но одговор не добија.

Поради тоа, превозниците од Македонија, Србија, Босна и Херцеговина и Црна Гора на 11 август ќе одржат регионален состанок во Македонија, на кој ќе ги разгледаат следните чекори и можните заеднички активности.

The post ВОЗАЧИТЕ СЕ ДЕПОРТИРААТ, КАМИОНИТЕ ОСТАНУВААТ НА ГРАНИЦА Шенген и понатаму ги блокира превозниците, нема решение за правилото 90/180 appeared first on plusinfo.mk.

Европскиот комесар за внатрешни работи и миграција, Магнус Брунер, денеска изјави дека Европската комисија, поради проблемите што ги имаат професионалните возачи од Западен Балкан со Системот за влез/излез (EES), им предложила на членовите на Унијата и на земјите од Западен Балкан да разговараат и да се договорат за долгорочни визи.

Брунер го кажа ова во интервју за Европскиот весник(European Newsroom – ENR), и притоа ја наведе Хрватска како пример, која веќе го стори тоа и склучи договори со земјите од Западен Балкан за долгорочни визи.

Тој додаде дека ќе им предложи на земјите од Западен Балкан да разговараат и да склучат вакви договори со другите членки на Унијата.

– Тоа е моментално излезот. Земјите-членки можат да издаваат дозволи за престој, долгорочни визи, тоа е на земјите-членки да го сторат. И на долг рок, се обидуваме да најдеме решенија во новата визна политика. Затоа разговараме и со земјите-членки – рече Брунер.

Тој исто така рече дека ова е важно и поради европските компании кои  исто така се  погодени од воведувањето на новиот систем.

-Правилото дека можете да останете во Европската Унија 90 дена во рок од 180 дена не е променето. Но, секако сега со системот EES знаеме кои се оние што го пречекоруваат дозволениот престој. И тоа е разликата. Сега системот покажува дали некој ќе остане повеќе од 90 дена. Европските компании се исто така засегнати, но се обидуваме да најдеме долгорочно решение. Потребно е време бидејќи земјите-членки мора да се договорат за правната основа за тоа, па затоа не можеме да го направиме тоа во следните недели или месеци – рече Брунер.

Тој, исто така, рече дека знае дека сегашната ситуација врши притисок врз економиите на земјите, кои мора да бидат поддржани.

– Мораме да ги поддржиме и да се обидеме да најдеме решенија, но ни треба правна основа за тоа – рече Брунер.

Зборувајќи за системот EES, тој рече дека во првите осум месеци од неговата имплементација имало 110 милиони регистрации, од кои 45.000 биле одбиени поради лажни документи, како и 1.100 лица на кои им бил одбиен влез поради безбедносни проблеми, што претставува безбедносна закана за Европската Унија.

The post ЕВРОПСКАТА КОМИСИЈА ПРЕДЛОЖИ ДОЛГОРОЧНИ ВИЗИ ЗА ПРОФЕСИОНАЛНИТЕ ВОЗАЧИ ОД ЗАПАДЕН БАЛКАН Следат поединечни преговори со секоја земја членка appeared first on plusinfo.mk.

Превозниците од Македонија, Србија, Црна Гора и Босна и Херцеговина денеска официјално ќе испратат писмо до Европската комисија во кое бараат до 10 август да понуди прифатливо решение за проблемот со ограничувањата за престој на професионални возачи во Шенген зоната.

Ова е одлучено на вчерашната средба на претставниците на превозниците од четирите земји.
Писмото ќе биде испратено и до владите на четирите земји, извозните компании и стопанските комори со цел да се забрза процесот на решавање на проблемот.

– Се согласивме дека во овој момент нема да преземеме никакви конкретни активности, но дека од денешниот состанок ќе испратиме писмо до Европската комисија со рок до 10 август за да се најде прифатливо, ако не конечно, тогаш барем привремено решение за нашите возачи и транспортни компании да можат да работат без пречки – изјави претседателот на Меѓународната асоцијација за транспортен бизнис, Неџо Мандиќ по средбата во Белград.

Тој потсети дека проблемот стана уште поизразен по проширувањето на Шенген зоната кон Хрватска, Романија и Бугарија, поради што земјите од регионот се практично целосно опкружени со земји-членки на Шенген, па возачите голем дел од своето работно време го поминуваат во таа зона.

– Со оглед на тоа што сега има 33 земји во Шенген, тоа значи дека на никаков начин не можеме да прифатиме дека транзитот значи престој. Ако возиме кон земја или дури и кон земја што не е членка на ЕУ, имено Обединетото Кралство, ние сме во Шенген цело време и не престојуваме во ниту еден момент, бидејќи сме или во камионот или на паркингот додека правиме пауза, но тие денови брзо се трошат до моментот кога ќе пристигнеме и ќе се вратиме, па практично се покажува дека престојуваме 90 дена. Сосема е неточно дека професионалец не може да си ја заврши работата – заклучи Мандиќ.

Тој додаде дека превозниците на ваков начин сакаат да одбегнат протести и најави нова средба пред 10 август, ако дотогаш нема решение.

– Во тој случај, ќе објавиме нови конкретни мерки за забрзување на решавањето на овој проблем – рече Мандиќ, без да прецизира кои мерки би можеле да се преземат.

Според, превозниците 10 август е значаен бидејќи тогаш завршуваат 90 дена за престој на возачите во Шенген зоната по ресетирањето на деновите на 10 април по одлука на Комисијата. На 10 април на сите возачи на превозните компании кои возат во Шенген зоната деновите на престој им се вратија на нула.

-Тоа значи дека по овој датум повторно ќе се се јават проблемите со престојот на возачите во Шенген зоната, односно ќе почне надминувањето на границата од 90 дена за престој. Ќе се вратат повторно истите проблеми со опомени, депортации и слично – вели Билјана Муратовска од Макам-транс.

Муратовска додава дека напоредно со ова нашето Министерство за транспорт води билатерални преговори со повеќе земји за да им овозможи на нашите возачи да можат да се движат непречено.

-Хрватска веќе прифати да помогне, доднсе измени на законот за странци с кој се опфатени и нашите возачи, но се уште не се донесени некои подзаконски акти. Значи не е во функција. Има преговори и со Романија, Австрија и други земји. Но нас ни треба трајно решение кое ќе ги опфати сите 33 земји вод Шенген зоната. Решението е во рацете на Европската комисија, а ние сега се трудиме да ги обновиме разговорите тоа да се донесе побрзо – вели Муратовска.

Затоа вели таа треба во периодот до 10 август да се лобира во ЕК да добиеме трајно решение.

-Тоа ќе го постигнеме со заедничко дејствување на сите влади од регионот, компаниите извознички, странските инвеститори и стопанските здруженија, зашто овој проблем не е само на превозниците, туку на економиите на овие земји – вели таа.

Превозниците велат дека сегашното правило според кое државјаните на трети земји можат да останат во Шенген зоната максимум 90 дена во период од 180 дена не е прилагодено за професионалните возачи.
Според анализата која ја направиле нивните здруженија на возачите им се потребни околу 130 дена работа во период од 180 дена за непречено извршување на меѓународен транспорт.

The post КАМИОНЏИИТЕ СО УЛТИМАТУМ ДО БРИСЕЛ Бараат решение на проблемот со престој во Шенген зоната до 10 август appeared first on plusinfo.mk.

Камионџиите од Босна и Херцеговина денеска со делумна блокада на граничните премини кон Хрватска повторно предупредија на тешкотиите во работењето и проблемите што ги имаат нивните возачи на територијата на Европската Унија.

На дел од граничните премини, како што  информираа од конзорциумот „Логистика БиХ“ превозниците се соочиле со забрани на протестот воведени од полицијата на Република Српска и Унско-Санските и Западнохерцеговските окрузи во Федерацијата БиХ кои се повикаа на одлука на владата донесена синоќа.

„Нема да дозволиме најавената блокада на границите и протестот на превозниците на моторни возила што ги најави конзорциумот „Логистика“ да го загрозат нормалниот тек на сообраќајот, како и непречениот транспорт на стоки и услуги“, се вели во полициското соопштение.

Велибор Пеулиќ, главен координатор на конзорциумот „Логистика БиХ“ изјави дека возачите утрото имале проблеми со полицијата.

– Успеавме да блокираме некои гранични премини, како што е Свилај, додека други не можеме да блокираме поради полицијата – изјави тој..

Со блокадите, превозниците на камиони сакаа да потсетат дека со месеци безуспешно чекаат да се реши статусот на возачите на камиони кои, при превоз на товар низ земјите-членки на ЕУ, се третираат исто како и сите други носители на пасоши од трети земји.

Истовремено тие бараат од властите на БиХ да вратат дел од акцизата за гориво, да го вратат ДДВ за меѓународен транспорт со цел фискално олеснување, а од Управата за индиректно оданочување на БиХ (ОНО) да обезбеди забрзување на царинските процедури и скратување на времето на чекање на границите.

Министерството за транспорт и врски на БиХ соопшти дека го разбира незадоволството и загриженоста на транспортниот сектор и ги споделува нивните загрижености, особено затоа што станува збор за здрав економски сектор кој се соочува со сериозни предизвици.

Сепак, тие истакнаа дека значаен дел од барањата на здруженијата на транспортери кои се моментално во фокусот не можат да се решат од една институција или од едно ниво на власт, бидејќи станува збор за прашања што ги вклучуваат овластувањата на Советот на министри, ентитетите и владите на ентитетите, Управата за индиректно оданочување и Европската Унија.

Засега, тоа министерство побара итен состанок со претставници на хрватската влада со цел да се обезбеди потолерантен третман на возачите од Босна и Херцеговина на шенгенската граница преку издавање визи што ќе им овозможат непречено да работат.

The post ХАОС НА БЛОКАДАТА НА БОСАНСКИТЕ КАМИОНЏИИ Полицијата не дозволи камионите да се постават на граничните премини appeared first on plusinfo.mk.

Камионџиите од цел регион настапија ЗДРУЖЕНО и изнудија решение од европската бирократија. Како еснаф прво ги натераа своите балкански влади, инаку закарани по илјада прашања, да застанат зад нив и СИТЕ ЗАЕДНО да се побунат против дискриминирачките правила што го ништеа бизнисот и пазарот. Зошто нашите политичари од Македонија не можат да настапат здружено за теми од животна важност за македонските граѓани?

Ова беше школски пример како заедништвото во мака ти ја јакне позицијата и пред високиот бирократски бедем на ЕУ. Како ти го јакне гласот и ти се мултиплицира аргументацијата, па ги поплавува темелите на бедемот и оние одозгора мора да погледнат надолу, да ги видат проблемите на „третите земји“ и да одлучат да направат компромис. Треба да се практикува и за други заеднички прашања за сите нас пред портите на ЕУ. Но, истовремено, МОЖЕ и МОРА да се примени и за само македонските државни интереси, кога се работи за нас. Што е пологично и поприродно од ова!?

Успехот на камионџиите е убава вест што не израдува, но не е доволна да ја надгласа меѓупартиската бучава од кавги во Собрание, на пресови, дебати, на секој канал, поткаст и социјална мрежа. Вознемирува секојдневното бомбардирање, оцрнување и надплукување која влада или градоначалник повеќе НЕ направил, згрешил, украл, злоупотребил. Докажано или не, од сите страни претекува од говор на омраза со по некоја клевета, се провоцираат судски спорови, се зајадува. Одамна веќе не се избираат зборови, тон, нема навреда што не е употребена за да омаловажи и повреди некој човек или негово семејство. Пизма се разлева по Македонија и ги прави луѓето несреќни, а земјата, нашата прекрасна земја, ја прави непожелна, па некои бегаат, продолжувајќи ги кавгите преку социјалните мрежи, отаде граници. Ужасно тажно.

Во основа, најголем дел од граѓаните сакаат нормалност. Економска сигурност, спокоен, безбеден, квалитетен живот. Добро образование и наука, здравство, социјална заштита, култура. Здрав воздух, води и почва, здрава храна, уредени рекреативни и туристички места, љубезни и културни луѓе. Можности за кариерен развој според способностите, мериторност, правичност и правда во институциите. Тоа се елементите според кои се мери чуството на среќа меѓу државите. Кај што најгоре избива една Финска, убава и ладна северна земја, која до пред десетина години беше лидер по број на самоубиства поради климатските непогодности и недостигот на сончеви денови. Зарем Македонија со своите сончевини, планински реки и врвови, раскошни културни слоеви, ги нема сите услови за земја на среќата?

Тонот во една држава го дава политиката и сите актери во неа. За кавги се потребни најмалку две групи од секоја страна на плотот. А Македонија има природно покомплексна структура, па има групи и групички, со различни интереси, темпераменти и суети. На последните парламентарни победи опозиционата ВМРО-ДПМНЕ со огромно и неоспорно мнозинство, што не беше изненадување. Изненадија потоа како влада, дојдоа подготвени со готови програми и финансиски аранжмани.

Но изненади и опозицијата. Наместо да земе здив, да се консолидира, зашто и треба на државата, па да се бори за типични социјалдемократски теми кои секогаш и недостигаат на една центар-десна влада, да го подига својот рејтинг со конструктивни предлози, опозицијата тргна во фронтален напад на сѐ, неселективно! Со негирања на очигледни добри потези и проекти, оставајќи ги вчудоневидени дури и дел од своите членови и поддржувачи. И така до денес, 1,5 година по изборите, негирајќи се по ред: инфраструктурни проекти за рамномерен развој на општините, повеќе од потребен; проекти за поддршка на бизнисите, кои се темел на економијата и задржување на луѓето дома; интензивната градба на недовршени стратешки автопати и регионални патишта на коридорите 8 и 10; успешната политичка и стручно-техничка битка за НОВ ДОГОВОР со Бугарија и ЕУ за граничниот тунел на коридорот 8; обнова на железничкиот сообраќај низ цела земја, скопски воз, брза железница (читам неверојатни анализи дека не се исплаќало, не ни требала!?)… Нафрлив само некои најголеми и неспорни проекти што напредуваат пред наши очи, а се мета на просто гротескни напади и критики.

Последниве недели, пак, врие на социјалните мрежи од напади на два, за мене, есенцијално важни закона што треба да спасуваат животи: законите за сејф-сити и за забрана на пушење во затворен простор. Не разбирам како може да се негира ПОТРЕБАТА и ПОЛЕЗНОСТА од добро функционирање на вакви живото-спасувачки закони!? Па да се организираат цели кампањи против типично европски закони, одамна применувани и со докажани резултати!? А ваму, се бориме за ЕУ, за стандарди, безбедност и квалитет на живот…

Посебно болно прашање е македонскиот од по маките – нашата толку посакувана, со толку бесмислени жртви и отстапки платена евроинтеграција. Зошто опозицијата ОДБИВА да и помогне на својата држава во оваа праведна борба? И на лаик веќе му е јасно дека бугарските барања вградени во Вториот протокол се самоубиствени за македонскиот народ, јазик, држава, за сите граѓани? Тие се скроени така, што интеграциската рамка ја направија ЈАМКА низ која не можеме да се провреме! Затоа е нужно отфрлање на овој антиуставен квазидокумент, на кој се повикува официјалната европска рамка. И неопходен е ЗАЕДНИЧКИ настап пред ЕУ, за да успееме.

Ниедна влада не е совршена, не е ни оваа. Многу се труди, голем број функционери работат посветено, но со различен капацитет и успех. Најголемите забелешки ми се со животната средина. Не ја издвои како сериозен приоритет и не вложи доволно средства за енергично и брзо намалување на загадувањето на воздухот, кој не труе сите, без пардон и без исклучок! Мерките се знаат, не се атомска физика, ги повторуваме како екологисти со години. Тргни од загадувачите и спречи ги да загадуваат. Забрана за одредени најтоксични горива и за дома и за индустрија, со поддршка на енергетската сиромаштија и индустриското прилагодување; за големи, средни и мали индустриски капацитети, сериозни техничко-технолошки ревизии на еколошките дозволи, ги има со стари надминати правила, некои со лажни податоци, некои во несоодветна категорија; проверка на спроведувањето на оперативните планови, посебно на РОКОВИТЕ за исполнување, сето тоа скрати го, нека забрзаат; забрана за прастари возила по улиците и помош за транзиција на професионалните превозници; редуцирање на истовремена градежна експанзија на мал простор поради енормни количества прашина; ОТПАДИТЕ конечно да се решат, со селекција, реупотреба, рециклирање, нови бизниси. Паралелно исчисти го историското загадување на 16-те жешки еколошки точки од стари рудници и тешка индустрја во Велес, Лојане, Пробиштип, Хром и др.; само ОХИС се чисти континуирано, ама во многу мал обем. Има фондови за чистење, може да се искористат, со строга еколошка контрола, итн. итн.

Но, со сите маани и пропусти, длабоко сум уверена дека на Македонија и треба стабилна влада еден пристоен период, без предвремени избори, за да заврши сериозни процеси и проекти, а ние сите од страна, како граѓани, ќе набљудуваме, ќе критикуваме, ќе советуваме… сакајќи си ја земјата. И сакајќи се меѓусебно, или ако е ова преидеалистички, барем почитувајќи се како луѓе и сограѓани.

Убав ден Ви посакувам!

The post Камионџиите како школски пример за политичарите appeared first on plusinfo.mk.

Од утре напладне камионџиите организирани преку здружението „Макам-транс“ излегуваат на протест, со целосна блокада на граничните премини за товарен сообраќај.

Како што најавуваат организаторите, ќе бидат блокирани терминалите и сообраќајните ленти за камиони на граничните премини Деве Баир, Делчево, Ново Село, Дојран, Богородица, Меџитлија, Ќафасан, Блаце и Блато. Протестот е планиран да трае до седум дена, но може да заврши и порано доколку се најде решение за проблемот.

Билјана Муратовска, генерален секретар на Асоцијацијата на здруженијата на работодавачите на превозните трговски друштва на Република Македонија, „Макам-транс“, изјави дека се свесни за последиците од блокадата, но истакнува дека ако се реализираат нивните барања, придобивките ќе бидат огромни во однос на раст и развој на економијата во државата и во Западен Балкан.

Муратовска вели дека засега нема никакви сигнали од Европската комисија за какви било преговори во однос на решавање на проблемот со евиденција на престој во шенген-зоната во согласност со правилото 90/180 дена за професионалните возачи.

– Доколку до понеделник не се добие каква било информација од ЕУ, протестот во сите четири држави ќе почне точно во 12 часот за сите возила што излегуваат од државата, а за сите возила што ќе влегуваат во државата граничните премини се затвораат во 00.00 часот со цел сите што се враќаат дома да може да влезат и да му се приклучат на протестот – изјави Муратовска.

Главното барање на превозниците е да се најде решение за престојот на возачите во шенген-зоната, како што појаснува Муратовска, да не се евидентираат денови или да ни издаваат некој вид визи што не се лимитирани со број на денови.

– Новите правила ќе значат целосен колапс на економијата во државата, односно во целиот регион на Западен Балкан, вклучувајќи ја и Турција (држави што не се членки на ЕУ и на шенген-зоната), поради прекин на синџирот на снабдување. А транспортната индустрија во која има вложен огромен капитал и обезбедува прилив на ефективни странски пари во буџетот ќе биде целосно разнишана – укажува Муратовска.

Протестот, истакнува, почнува на 26 јануари, а според реакцијата на ЕУ, ќе зависи дали ќе почне или ќе трае кратко, но сепак максимално траење на блокадите ќе биде 7 дена, што е синоним за еден просечен циклус на превоз на стока.

– Во земјава се затвораат за товарен сообраќај граничните премини: Деве Баир, Делчево, Ново Село, Дојран, Богородица, Меџитлија, Ќафасан, Блато и Блаце, а Табановце – Прешево ќе биде затворен од српската страна. Со оваа блокада свесни сме дека ќе има одредени минимални финансиски загуби за сите, но сепак придобивките од ова, ако се реализираат нашите барања, ќе бидат огромни во однос на раст и развој на економијата во државата и во Западен Балкан – вели Муратовска.

Причина за протестот е новиот систем за влез и излез што го воведе Европската Унија, според кој возачите на камиони се евидентираат како туристи. Иако тие само транзитираат низ земјите од Шенген-зоната за да достават стока, честите преминувања на границите значат брзо трошење на дозволените 90 дена престој, по што им се оневозможува да продолжат со работа.

Протестот се одржува во координација со транспортерите од Србија, Босна и Херцеговина и Црна Гора, кои исто така најавија блокади на граничните премини кон Шенген-зоната.

Од Владата за Сител велат дека се во постојана комуникација со Брисел и дека активно се работи на изнаоѓање решение што ќе овозможи нормално функционирање на транспортот и непречен проток на стоки.

– Преку дијалог со Европската Унија, партнерските земји и превозниците се бара итно решение за надминување на проблемот – велат од Владата.

Во однос на економските последици, од Владата предупредуваат дека најпогодени ќе бидат извозно ориентираните компании, како и фирмите што работат во Технолошко-индустриските развојни зони, кои остваруваат целосен девизен прилив.

– Секое блокирање на транспортот значи директен удар врз економската активност. Прекините во испораките можат да предизвикаат сериозни штети и за домашните компании и за странските инвеститори – посочуваат од Владата.

Сепак, како што информираат од Министерството за внатрешни работи, додека трае протестот нема да има прекин, односно блокада на движењето на патничките возила, автобусите и возилата кои превезуваат лекови, жива стока, опасни материи и други приоритетни пратки.

– Протестот е предвидено да трае седум дена, со можност да биде прекинат и порано, доколко во меѓувреме дојде до надминување на причините поради кои е организиран. Министерството за внатрешни работи во согласност со своите законски надлежности, ќе преземе соодветни мерки и активности за одржрување на јавниот ред и мир, како и за обезбедување безбеден и непречен сообраќај, со посебен акцент на движењето на патничките возила, автобусите и возилата кои превезуваат лекови, жива стока, опасни метрии и други приоритетни партки – велат од МВР за ТВ Сител.

Во Македонија има околу 2.700 превозници за меѓународен транспорт, а најголемиот дел од увозот и извозот се одвива по копнен пат, што дополнително ја зголемува сериозноста на најавените блокади.

The post МАКЕДОНИЈА ПРЕД ТРАНСПОРТЕН ХАОС Камионџиите од утре ќе блокираат 9 гранични премини, бараат итно решение од Брисел appeared first on plusinfo.mk.

Превозниците од Босна и Херцеговина и од Србија објавија дека на 26 јануари ќе ги блокираат сите гранични премини за товар кон земјите од Шенген зоната поради проблемите предизвикани од новиот систем за влез и излез (EES), кој го евидентира влезот и излезот на превозниците.

Овие мерки доаѓаат откако, како што наведуваат, Брисел не ги зел предвид барањата и предлозите на превозниците за олеснување на процедурите на границите.

Претседателот на Здружението за меѓународен транспорт од Србија, Неѓо Мандиќ, објаснува дека протестите не се однесуваат на патничките премини, туку исклучиво на товарните терминали, каде што ќе бидат паркирани камиони, така што во ниту еден момент нема да може да се влезе или излезе со стока.

– Увозот и извозот буквално ќе запрат, а синџирите на снабдување практично не функционираат без нашите превозници – рече Мандиќ за Euronews Srbija.

Тој објасни дека последните две години биле посветени на обиди за решавање на проблемот преку дипломатски канали.

– Во овој период ништо не се случи. Оставивме рок од месеци и пол за решавање на проблемот, но без резултати. Затоа се одлучивме за подрастични протестни мерки – рече Мандиќ.

Според него, системот за влез и излез ја загрозува работата на превозниците бидејќи го ограничува бројот на работни денови во рамките на Шенген, а постојните билатерални квоти за транспорт меѓу земјите од Западен Балкан и ЕУ не функционираат како што е предвидено.

– Речиси ниедна земја не извршува ниту 3-5% од својот транспорт според договорите, што значи дека практично сè го транспортираат нашите возачи – истакнува Мандиќ.

Очекуваните протести ќе започнат на 26 јануари и нема да имаат однапред одредено времетраење, сè додека не се исполнат барањата на превозниците или додека Брисел не се согласи на разговори и евентуална ревизија на Шенгенскиот систем и ЕЕС.

Превозниците ги покануваат другите релевантни институции и стопански комори да се вклучат во формирањето стратегија и наоѓањето решенија, пренесува Euronews.

Мандиќ нагласи дека протестот не го загрозува патничкиот сообраќај, но дека товарниот транспорт може да биде целосно парализиран додека не се најде компромис. Тој исто така истакнува дека постои можност за решавање на проблемот со едноставно толкување на постојниот систем за прекугранични работници, но дека соседните земји не покажале волја за разговор.

– Ако чекаме сè да се реши онака како што сакаме, тоа би траело со месеци. Затоа сме принудени да преземеме оваа акција за да го ставиме проблемот на маса и да го принудиме Брисел да се изјасни. Ние возиме стока купена од европски купувач и возиме стока продадена од европски продавач. Возиме за нив и практично работиме за нив. Ние сме прекугранични работници и тоа е еден вид начин да се седне и да се најде прифатливо толкување и сè да биде завршено – рече Мандиќ.

The post КАМИОНЏИИТЕ ОД РЕГИОНОТ ЌЕ ГИ БЛОКИРААТ ГРАНИЧНИТЕ ПРЕМИНИ КОН ЕВРОПСКАТА УНИЈА Тие бараат Брисел да го ревидира системот за влез и излез во Шенген зоната appeared first on plusinfo.mk.

Во Кина, по улиците и автопатите сè почесто може да се забележат камиони-приколки кои пренесуваат стоки, но немаат возачи зад воланот. Расте бројот на ваквите автономни возила, а експертите предупредуваат дека во блиска иднина голем број камионџии би можеле да останат без работа. На TikTok веќе кружат видеа кои прикажуваат овие возила во акција, тивко и прецизно управувани од вештачка интелигенција.

@miodrag.ristic3♬ original sound – Miodrag Ristic

Но, новата технологија не е без свои проблеми. Во еден неодамнешен инцидент, снимен од улични надзорни камери, камион за испорака со самостојно управување беше фатен како ги игнорира блокадите на патот и продолжува право низ затворена градежна зона. На снимката се гледа како автономното возило ги заобиколува безбедносните конуси и сигнализацијата, што отвори сериозни прашања за безбедноста и свесноста на ваквиот транспорт.

 

View this post on Instagram

 

A post shared by TechsInLast24hrs (@techsinlast24hrs)

Иако Кина е меѓу светските лидери во автономните системи за испорака, инцидентот јасно покажува дека технологијата сè уште не е подготвена целосно да ги замени луѓето. Инженерите и регулаторите се соочуваат со предизвикот да развијат подобро донесување одлуки во реално време, особено во непредвидливите услови на урбаните средини.

The post 📽️ КАМИОНЏИИТЕ ВО КИНА ПРЕД ИЗУМИРАЊЕ Полни патишта со камиони без возачи appeared first on plusinfo.mk.

Покрај директниот трошок (од 20 евра по возило), посочува асоцијацијата, оваа мерка, на сите превозници, кои минуваат тука им носи и многу поголема индиректна финансиска штета со зголеменото време на чекање и на минување на границите, што се одразува на вкупното времетраење на нивните транспорти на стоки.

Тоа, посочуваат, редовно се пролонгира токму поради хаосот што се создава со воведувањето на мерката, што според некои најави ќе следи и на сите други бугарски гранични премини. Ова, пак, се заканува да резултира со реципрочни мерки од соседите на Бугарија, при што Турција, но и Грција веќе бараат начини и како нивните транспортери да ја заобиколат.

– Оваа неприфатлива мерка и нова обврска, која неодамна ја воведе Бугарија за дезинфекција на возилата на граничните премини, која засега се применува само на граничниот премин Бугарија-Турција, Капитан Андреево – Капикуле, не само што предизвикува значителни дополнителни трошоци за нашите превозници, туку и го зголемува времето на чекање на границите, што е неприфатливо за нашиот транспортен сектор – изјави Оливера Миовска, претседателка на транспортна асоцијација БЕСТ Мобилити – НТА.

Информирајќи ги македонските надлежни органи за овој проблем, Миовска посочува дека постои официјална информација дека оваа мерка наскоро ќе се применува на сите бугарски гранични  премини.

– Со оглед на тоа дека оваа практика беше прекината по долгогодишна борба на превозниците пред 15 години, а сега повторно се воведува, евидентно е дека е потребна брза и одлучна реакција од сите нас. Претставниците на турските и грчките превозници веќе размислуваат за алтернативни транспортни коридори, што само укажува на сериозноста на ситуацијата и потенцијалот за економски и логистички последици при регионалната размена. Македонските превозници, кои често ја користат оваа рута, се соочуваат со истите последици и се подложни на новите оптоварувања наметнати од Бугарија. Како претставник на македонските транспортери на национално и меѓународно ниво, а и како потпретседател на БСЕЦ-УРТА, сме согласни дека оваа неправедна и оптоварувачка мерка треба да биде укината што е можно поскоро – вели Миовска.

Миовска потенцира дека е неопходна брза реакција и интервенција и на нашите надлежни органи за да се реши и коригира оваа ситуација, за која, како одговор Турција веќе воведе реципрочни мерки, само за тој граничен премин и само за бугарските возила.

Според БЕСТ Мобилити – НТА, дека состојбата може да ескалира дополнително поради повторното воведување на оваа мерка од бугарска страна зборува и фактот дека пристигнуваат жестоки реакции и од меѓународните фактори, како Меѓународната унија за патен транспорт – ИРУ, најстарата и најголемата транспортна асоцијација на патните превозници во светот, со седиште во Женева, а неодамна и од БСЕЦ-УРТА, Унијата на патни транспортни асоцијации во регионот на економска соработка на Црното Море.

БЕСТ Мобилити –НТА е нова македонска национална транспортна асоцијација која e  единствен член во Меѓународната унија за патен транспорт – ИРУ од државава, а со тоа и национален гарант за ТИР.

The post НОВИ ГЛАВОБОЛКИ ЗА МАКЕДОНСКИТЕ КАМИОНЏИИ Бугарија ја врати таксата за дезинфекција на границата со Турција appeared first on plusinfo.mk.