Во Клиничката болница „Аџибадем Систина“ првпат во регионот успешно е изведена ендоскопска комбинирана интраренална хирургија (ECIRS), една од најсовремените и најкомплексни уролошки процедури за третман на коралиформна и мултипла бубрежна калкулоза. Интервенцијата е направена кај 58-годишна пациентка со единствен функционален бубрег и повеќебројни камења лоцирани на тешко достапни места. Интервенцијата ја изведоа уролозите: д-р Александар Мицковски и д-р Владимир Лозановски, со поддршка од два комплетни оперативни тимa.

ECIRS претставува високоспецијализирана хируршка техника што се изведува во мал број современо опремени центри и бара исклучителна координација, искуство и тимска работа.

– ECIRS е напредна хибридна техника, која ги комбинира перкутаната нефролитотомија (PCNL) и ретроградната интраренална хирургија (RIRS/FURS), со цел да се постигне максимална ефикасност кај комплексни бубрежни камења и значително подобра stone-free стапка – објаснува д-р Александар Мицковски, специјалист по урологија.

Пациентката била примена во болницата по повеќекратни воспаленија на бубрегот и неколку хоспитализации во други установи, каде што била третирана конзервативно. Со почетокот на оваа година состојбата значително се влошила, а нападите станале почести и поинтензивни.

– Кај пациентката имаше повеќе од 12 камења распространети во различни делови од бубрегот, на тешко достапни локации. Дополнителен предизвик беше фактот што станува збор за нејзиниот единствен бубрег, бидејќи другиот претходно бил отстранет поради сличен проблем со бубрежна калкулоза. Со примена на оваа современа техника успеавме целосно да го решиме проблемот – додава д-р Мицковски.

Д-р Владимир Лозановски истакнува дека двојниот пристап до пиелокаликсниот систем овозможува подобра визуализација, попрецизна пункција и намалена потреба од повеќекратни тракти, како и третман на поголеми и потешко достапни камења во бубрегот, што ја прави процедурата побезбедна и поефикасна за пациентот.

– Најчесто се користи Galdakao-модифицирана супинирана Valdivia позиција, која овозможува симултан пристап без потреба од репозиционирање на пациентот. Процедурата вклучува ретрограден пристап, ендоскопски водена перкутана пункција на бубрегот, дилатација, симултана литотрипсија и финална инспекција – вели д-р Лозановски.

ECIRS денес се смета за еден од најсовремените и најефикасни пристапи во третманот на комплексна нефролитијаза, особено кај корални камења, мултипни каликсни камења, камења поголеми од 2 сантиметри, неповолна анатомија на бубрегот, неуспешни претходни третмани и бубрежни аномалии.

Со оваа интервенција, Клиничката болница „Аџибадем Систина“ уште еднаш го потврдува своето лидерство во примената на најсовремени медицински практики.

The post ПРВПАТ ВО РЕГИОНОТ НАПРАВЕН СЛОЖЕН ЗАФАТ КАЈ ПАЦИЕНТКА СО МНОГУ КАМЕЊА ВО ЕДИНСТВЕНИОТ БУБРЕГ Во „Аџибадем Систина“ изведена процедурата ECIRS appeared first on plusinfo.mk.

Бразилски уролог останал во шок по операција во која извадил вкупно 35 камења од бубрезите и мочниот меур на пациент кој секојдневно консумирал огромни количини газирани пијалаци.

Операцијата, која ја извршил познатиот д-р Талас Андраде, била документирана и објавена на Инстаграм, каде видеото брзо достигнало над 8,5 милиони прегледи. Во видеото, лекарот ги прикажува жолтите камења – со големина од зрно грав до речиси орев – кои биле извадени додека пациентот сè уште бил на операционата маса.

„Причината? Прекумерна консумација на газирани пијалаци – до три литри дневно“, предупредува Андраде во видеото на португалски јазик.

Според неговите зборови, засладените пијалаци со висока содржина на шеќер и киселини доведуваат до акумулација на калциум во телото, што создава идеални услови за формирање на камења во уринарниот тракт.

Симптомите кои најчесто се јавуваат кај овие пациенти се интензивна болка во пределот на грбот, гадење, повраќање, печење при мокрење, крв во урината и постојани уринарни инфекции.

„Во некои случаи, ако камењата не се отстранат навреме, може да дојде до блокада на бубрезите, отказ на органите или дури и до сепса – состојба опасна по живот“, истакнува докторот.

 

View this post on Instagram

 

A post shared by Dr. Thales Franco de Andrade – Urologista (@drthalesandrade)

Колку се чести камењата во бубрези и кои се причините?

Камењата во бубрезите – познати и како нефролитијаза – се тврди наслаги формирани од минерали и соли кои се таложат во уринарниот тракт. Најчесто се состојат од калциум оксалат или калциум фосфат, а нивното формирање може да биде поттикнато од дехидрација, прекумерен внес на шеќер, прекумерен внес на сол, ниска физичка активност и генетски предиспозиции.

Според Светската здравствена организација (СЗО), приближно 1 од 10 луѓе ќе развие бубрежен камен во некој момент од животот, а мажите имаат двојно поголема веројатност од жените. Ризикот значително се зголемува кај лица кои често пијат газирани пијалаци, посебно оние со фруктозен сируп, кофеин и фосфорна киселина.

Како да се заштитите?

– Пијте доволно вода (најмалку 2 литра дневно)

– Ограничете ги засладените и газирани пијалаци

– Намалете внес на сол и месо

– Зголемете внес на овошје и зеленчук.

The post 📽️ МУ ИЗВАДИЛЕ 35 КАМЕЊА ОД БУБРЕГОТ Лекарите во шок што може да направи пијалакот што сите го обожаваме appeared first on plusinfo.mk.