Андриј Јермак, шефот на кабинетот на украинскиот претседател Володимир Зеленски, поднел оставка неколку часа по драматичната рација што ја спровеле истражителите од Националното биро за борба против корупцијата во неговата резиденција. Според изјавата на Зеленски, објавена во видео-порака на Телеграм, заминувањето на Јермак е дел од поширок процес на „реконструкција на претседателската функција“.

– Украина во овие околности не смее да прави грешки – истакнал Зеленски, додавајќи дека „Русија навистина сака ние да грешиме, но од нашата страна нема да има грешки“.

Националното биро за борба против корупција (НАБУ) потврдило дека акцијата во домот на Јермак е дел од рана фаза на истрага за потенцијални злоупотреби во највисоките ешалони на власта. Иако деталите за предметот засега се држат во тајност, извори од истрагата наведуваат дека се проверува имотот и евентуалните неовластени договори со странски посредници.

Меѓутоа, во украинската јавност ваквиот потег предизвикал бран реакции, бидејќи Јермак со години важел за „сива еминенција“ и доверлив стратег на Зеленски, човекот кој го обликувал неговиот меѓународен имиџ и линијата на комуникација со Западот.

Сепак, според локалните аналитичари, оставката на Јермак може да биде обид на Зеленски да покаже решителност пред западните партнери и да ги одржи антикорупциските стандарди во момент кога земјата сè уште зависи од нивната поддршка.

The post ПАЃА „СИВАТА ЕМИНЕНЦИЈА“ ВО УКРАИНА Јермак даде оставка, Зеленски најави реконструкција appeared first on plusinfo.mk.

Портпаролката на Владата, Марија Митева, денеска во рамки на трибината „Кочани е нашиот приоритет“, посочи дека лица од Кабинетот на премиерот Христијан Мицкоски се во континуирана комуникација со семејствата на оние кои загубија најблиски во трагедијата во Кочани.

Прашана дали има најава кога премиерот ќе оди во Кочани, Митева, рече дека од тоа што го знае тој веќе имал средба со дел на семејствата и има некоја договорена динамика за средби.

– Верувам и дека при интерес за средба таму, се надевам дека ќе бидеме и достапни и ќе биде информирана јавноста веднаш кога тоа ќе се случи. Меѓутоа мора да потенцирам дека има динамика на средби со семејствата, која се остварува, но поради нивно барање тоа не е јавно објавено – изјави Митева.

The post  КАБИНЕТОТ НА МИЦКОСКИ Е ВО КОНТАКТ СО СЕМЕЈСТВАТА НА ЖРТВИТЕ ОД КОЧАНИ Митева вели дека премиерот веќе се сретнал со дел од нив appeared first on plusinfo.mk.

Собранието на Република Македонија во среда, на 28 мај, ќе одржи седница на која прва точка на дневен ред е изборот на нов гувернер на Народната банка. Седницата е закажана за 11 часот, а за наследник на досегашната гувернерка Анита Ангеловска-Бежоска е предложен универзитетскиот професор Трајко Славески.

Славески, кој доаѓа од Економскиот факултет, е предложен од страна на претседателката Гордана Сиљановска-Давкова. Доколку биде избран, ќе има мандат од седум години.

Од Кабинетот на претседателката велат дека изборот бил тежок и направен врз основа на стручноста, компетентноста и интегритетот на кандидатите.

„Би сакале да потенцираме дека изборот беше тежок, со оглед на докажаниот квалитет на сите кандидати,“ соопштија од Кабинетот на Сиљановска.

Владејачката ВМРО-ДПМНЕ најави дека ќе го поддржи предлогот на претседателката.

Опозициските партии, пак, изјавија дека нема да гласаат „за“, обвинувајќи дека Славески е партиски кадар, а не независен експерт, какви што досега традиционално биле гувернерите.

The post СЛАВЕСКИ НА ЧЕКОР ДО ГУВЕРНЕРСКАТА ФУНКЦИЈА Седницата за избор во Собранието е закажана за 28 мај appeared first on plusinfo.mk.

Со 153 гласа „за“ и 46 „против“ српскиот Парламент денеска ја избра новата влада што ќе ја предводи Ѓуро Мацут. На гласањето не беа присутни 51 пратеник.

За новата Влада на Србија гласаа членовите на владејачката коалиција од листата „Александар Вучиќ – Србија не смее да застане“, Социјалистичката партија на Србија, Обединета Србија, ПУПС, Социјалдемократската партија на Србија и Сојузот на војводинските Унгарци. Против беа пратениците на опозициските партии кои присуствуваа на седницата.

На седниците на Собранието не присуствуваа членовите на коалицијата НАДА и Демократската партија.

Економската политика на Србија нема да се промени. Така барем најави Ѓуро Мацут во експозето пред пратениците во Собранието. Политиката на одржување на макроекономската стабилност, каква што ја имавме досега, продолжува, вели тој.

Новата Влада на Србија ќе ја сочинуваат 30 министри, од кои има и од кабинетот на претходниот премиер Милош Вучевиќ, кој поднесе оставка.

Пратениците од владејачкото мнозинство во расправата порачаа дека ќе поддржат избор на нова влада, а пратениците од опозицијата го критикуваа предлогот за мандатар.

Кандидатот за премиер Ѓуро Мацут вчера ја претстави програмата и составот на неговиот кабинет.

Ова се новите министерски имиња:

– Синиша Мали, за прв вицепремиер и министер за финансии;

– Ивица Дачиќ, за вицепремиер и министер за внатрешни работи;

– Адријана Месаровиќ, за вицепремиер и министер за економија;

– проф. д-р Драган Гламочиќ, министер за земјоделство, шумарство и водостопанство;

– Сара Павков, за министер за заштита на животната средина;

– Александра Софронијевиќ, министер за градежништво, транспорт и инфраструктура;

– Дубравка Ѓедовиќ Хандановиќ, министер за рударство и енергетика;

– Јагода Лазаревиќ, министер за внатрешна и надворешна трговија;

– Ненад Вујиќ, за министер за правда;

– Снежана Пауновиќ, министер за државна администрација и локална самоуправа;

– Демо Бериша, за министер за човекови и малцински права и социјален дијалог;

– Братислав Гашиќ за министер за одбрана;

– Марко Ѓуриќ за министер за надворешни работи;

– Немања Старовиќ за министер за евроинтеграции;

– Дејан Вук Станковиќ за министер за образование;

– Златибор Лончар, за министер за здравство;

– Милица Ѓурѓевиќ Стаменковски, министер за труд, вработување, бранители и социјала;

– Јелена Жариќ Ковачевиќ, министер за семејна грижа и демографија;

– Зоран Гајиќ, за министер за спорт;

– Никола Селаковиќ, за министер за култура;

– Милан Кркобабиќ, за министер за рурална грижа;

– Бела Балинт, за министер за наука, технолошки развој и иновации;

– Хусеин Мемиќ, за министер за туризам и млади;

– Борис Братина, за министер за информации и телекомуникации;

– Дарко Глишиќ, за министер за јавни инвестиции;

– Новица Тончев, за министер без ресор;

– Ѓорѓе Милиќевиќ, министер без ресор;

– Усаме Зукорлиќ, за министер без ресор;

– Ненад Поповиќ, за министер без ресор;

– Татјана Мацура, за министер без ресор.

The post СРБИЈА ДОБИ НОВА ВЛАДА Ѓуро Мацут е идниот премиер, познати се и 30-те министри appeared first on plusinfo.mk.

Според првичните информации, Де Лука, кој е поранешен федерален обвинител на САД и член на тимот на претседателот Доналд Трамп, се фокусира на трошењето на 402 милиони долари доделени на БиХ преку различни програми, од кои 250 милиони се без јасно оправдување. Дали ова значи дека и Македонија би можела да биде предмет на слична истрага, особено имајќи предвид дека USAID и други меѓународни фондови имаат значително влијание во земјата?

Ако американската администрација реши да го прошири фокусот и кон Македонија, кои прашања би се отвориле? Дали странските грантови биле распределени и искористени на транспарентен начин? Дали ќе се откријат нерегуларности, и ако да, кои организации и поединци би можеле да се најдат под истрага?

Актуелната администрација во САД, предводена од Трамп, веќе покажува зголемен интерес за финансиските текови поврзани со меѓународната помош. Доколку истражителите се насочат кон Македонија, кои можни импликации би произлегле за политичките структури, медиумите и невладините организации во земјата? Останува да се види дали американската истрага ќе продолжи на Балканот – и дали вратите во Скопје наскоро ќе бидат отворени за нивните прашања.

The post НА БАЛКАНОТ СЕ ЧЕШЛААТ ГРАНТОВИТЕ НА УСАИД По БиХ, дали Македонија е следната дестинација на истражителите од САД? appeared first on plusinfo.mk.

Кабинетот на претседателката Гордана Сиљановска-Давкова категорично ги демантираше наводите во соопштението на политичката партија Демократската унија за интеграција објавено на 18 февруари 2025 година, според кои Претседателката на државата не упатила честитка по повод Денот на независноста на Република Косово.

„Согласно дипломатската пракса, претседателката Сиљановска-Давкова на 17 февруари 2025 година, преку Министерството за надворешни работи и надворешна трговија, упати писмо-честитка до нејзиниот хомолог, претседателката на Република Косово, Вјоса Османи-Садриу“, велат од Кабинетот.

Во соопштението се вели дека „за кабинетот е неприфатливо што ДУИ преку пласирањето на лажни и непроверени информации и извлекување на неосновани констатации, се обидува да го наруши угледот и кредибилитетот на претседателката Сиљановска-Давкова“.

Претседателскиот кабинет соопшти и дека претседателката Сиљановска-Давкова ја прифатила поканата за присуство на свечениот прием по повод одбележувањето на Денот на независноста на Република Косово, што вечерва го приредува косовската Амбасада, што според Кабинетот е уште една потврда дека не станува збор за дипломатски превид или за поткопување на добрососедството.

Кабинетот го достави и интегралниот текст од честитката на претседателката упатена до нејзината колешка во Косово, Вјоса Османи.

„Во интерес на објективното јавно информирање, а со цел да не дозволиме граѓаните да бидат манипулирани, во прилог го доставуваме интегралниот текст на писмото-честитка упатено по повод Денот на независноста на Република Косово“, се вели во написот.

The post ДУИ ДА НЕ ПЛАСИРА ЛАГИ, ЧЕСТИТКА ЗА КОСОВО БЕШЕ ИСПРАТЕНА Кабинетот на претседателката реагираше на наводите на партијата appeared first on plusinfo.mk.

– Во овие напади имаше и бомбашки закани. Како одговор на тоа, властите реагираа бргу за да ја обезбедат безбедноста на оние кои беа мета. Претседателот Трамп и целиот транзиционен тим се благодарни за нивната брза акција – изјави Левит.

Американската претставничка од Њујорк и избор на Трамп за амбасадор на САД во Обединетите нации, Елис Стефаник, во средата изјави дека нејзината семејна куќа била цел на закана за бомба.

Стефаник рече дека таа, нејзиниот сопруг и нивниот 3-годишен син се возеле од Вашингтон до округот Саратога во државата Њујорк кога биле информирани за заканата.

– Државата Њујорк, окружните органи за спроведување на законот и полицијата на Капитол на САД веднаш реагираа со највисоко ниво на професионализам – рече Стефаник.

Подоцна во средата, поранешниот претставник на САД од Њујорк и избор на Трамп да раководи со Агенцијата за заштита на животната средина, Ли Зелдин, рече дека и тој и неговото семејство биле мета.

„Закана за бомба, насочена кон мене и кон моето семејство, во нашиот дом, денеска беше испратена со порака на пропалестинска тема. Јас и моето семејство во тоа време не бевме дома и сме безбедни. Работиме со органите за спроведување на законот за да дознаваме повеќе како што ќе се развива оваа ситуација“, рече Зелдин во објава на Икс.

Левит не кажа кој друг бил цел на нападот и не ја објасни природата на очигледните закани.

Портпаролот на ФБИ рече дека бирото е свесно за многубројните закани со бомби и инциденти, насочени кон личности кои се номинирани и именувани за членови на администрацијата, а и дека работи со своите партнери за спроведување на законот.

– Ние сериозно ги сфаќаме сите потенцијални закани и како и секогаш, ги охрабруваме членовите на јавноста веднаш да им пријават сè што сметаат дека е сомнително на органите за спроведување на законот. Со претседателот Трамп, како наш пример, опасните акти на заплашување и насилство нема да нѐ одвратат – рече портпаролот.

Одделот за правда не одговори веднаш на барањата за коментар.

Трамп најавуваше дека личности од неговиот кабинет се мети по неговата победа на изборите на 5 ноември. Тој сѐ уште не ги коментираше очигледните закани.

Заканите се случуваат неколку месеци откако Трамп беше ранет во обид за атентат во Пенсилванија во јули. Во одделен инцидент, еден маж беше обвинет за обид за атентат во септември, откако наводно се позиционирал со пушка пред еден од терените за голф на Трамп во Флорида.

The post ЧЛЕНОВИ НА КАБИНЕТОТ НА ТРАМП СЕ МЕТА НА ЗАКАНИ СО БОМБИ Едно од писмата било со пропалестинска тема appeared first on plusinfo.mk.

Членовите на Комисијата за помилување денеска ја информираа претседателката Гордана Сиљановска Давкова дека колективно се повлекуваат од своите позиции. Одлуката за колективна оставка е донесена согласно личните и професионални принципи на членовите на комисијата, соопштија од Кабинетот на претседателката.

Претседателката Сиљановска Давкова ја прифати оставката на проф. д-р Методија Каневчев, проф. д-р Гордан Калајџиев, проф. д-р Арлинда Кадри Шахиновиќ, д-р Зора Митиќ, м-р Ана Ѓорѓиева Ивановска и Ајтен Шаќири.

Според најавите од Кабинетот, претседателката во наредниот период ќе спроведе консултации за избор на нов состав на Комисијата за помилување. Притоа, ќе бидат разгледани и можните институционални и законски слабости во системот на помилување.

The post ПРЕТСЕДАТЕЛКАТА ЈА ПРИФАТИ ОСТАВКАТА Сиљановска Давкова наскоро ќе формира нова Комисија за помилување appeared first on plusinfo.mk.

„За жал, господинот Филков е само потписник во таа институција, а Министерството го раководи г-ѓа Радица Лазареска Геровска, со која целото министерство нема добра комуникација. Во време кога беше избрана новата власт, јас бев на испланиран семеен одмор, за кој се добива решение од Владата. Се вратив два дена по неговиот избор, на 26-ти, и неколку пати го барав Филков на телефон и преку СМС пораки, а потоа и преку Kабинетот. Бев информиран дека тој ќе ме побара, но, за негова несреќа, сè уште е затворен во својот Kабинет од својата шефица на кабинетот, која не му дозволува да комуницира. За трагикомедијата да биде поголема, тој сè уште продолжува да молчи. За сите тие важни теми тој нема став, повторува една бамална реченица ‘и премиерот е право и меѓународните сојузници се во право’, се крие од јавноста и чека писмен одговор од г-ѓа Радица“, соопшти Лога.

Писмото од Оценската мисија е добиено по електронски пат, исто како што го добија и вицепремиерот Бојан Маричиќ, претседателот на судски совет Сашко Георгиев и други, додаде тој.

• ФИЛКОВ НАСЛЕДИЛ КАБИНЕТ ПОЛН СО ЧАДОРИ, ЧАШИ И ТОРБИ Лога си ja зел со себе целата документација, ги нема ни препораките на Европската комисија

„Еден дел од писмото беше наменет за јавноста, додека другиот беше класифициран само за министерот. Тоа писмо е архивирано од службено лице во Министерството кое ракува со доверливи материјали, но, нормално, Радица не може да го добие затоа што нема безбедносен сертификат. Истото писмо, со дозвола на мисијата, е споделено и со работната група, односно со претседателот академик Владо Камбовски“, истакна Лога.

Тој исто така додаде дека возниот парк е ист со оној што го користеле и претходните министри.

„Министерството за правда во соработка со Советот на Европа презема активности за подобрување на системот на БПП. Во Секторската развојна стратегија за правосудство и Акцискиот план се предвидени низа активности за подобрување на пристапот до правда кои се предвидени во Посебната цел 1.7.  (Стр.38-42 од Акцискиот план). Вработените во подрачните одделенија/канцеларии за бесплатна правна помош се исти повеќе години, а со истиот кадар веќе отворивме и повеќе канцеларии. Отворениот оглас, каде што требаше да се пополнат некои работни места, беше поништен од ваша страна за да вработите ‘ваши луѓе’. Министерството нема долгови, бидејќи навреме беа подмирени сите фактури. Наместо да бидете среќни што го имате материјалот со кој јас не располагав, вие неосновано критикувате зошто сите тие материјали се двојазични односно и на албански јазик. Двесте чадори се наменети за кампањата за бесплатна правна помош, заедно со Советот на Европа. Лаптопот е во ПР канцеларијата, другиот е кај преведувачите, тротинетот е во едно од одделенијата за бесплатна правна помош, а телефоните, добиени преку субвенција, се распределени на оние кои најмногу работат и се евидентирани на телефонските броеви“, објасни Лога.

За сите овие тврдења, додаде поранешниот министер, но и за 100-дневниот период на министерот Филков, ќе имам јавно обраќање и брифинг со новинари.

„Го предизвикувам министерот Филков на јавна дебата, било еден на еден или со учество на госпоѓа Радица од негова страна“, порача Лога.

ФИЛКОВ НАСЛЕДИЛ КАБИНЕТ ПОЛН СО ЧАДОРИ, ЧАШИ И ТОРБИ Лога си ja зел со себе целата документација, ги нема ни препораките на Европската комисија

The post ЛАПТОПОТ Е КАЈ ПРЕВЕДУВАЧИТЕ, ТРОТИНЕТОТ Е ВО КАНЦЕЛАРИЈА, ДОКУМЕНТИТЕ СЕ ДОБИЕНИ ПО ЕЛЕКТРОНСКИ ПАТ Лога му ѕвонел на Филков, ама тој не кревал appeared first on plusinfo.mk.

Израелскиот премиер Бенјамин Нетанјаху денеска ќе одржи состанок на владата. Ова го изјави неименуван израелски функционер за американската телевизија Си-Ен-Ен.

Состанокот на владата доаѓа во време кога израелските лидери размислуваат каков одговор треба да испратат по иранскиот ракетен напад врз нивната земја на 1 октомври.

Проширените воени операции на Израел во Газа и Либан и претстојниот одговор на ракетниот напад на Иран се доказ за потребата на премиерот Бенјамин Нетанјаху за политички опстанок, изјави поранешен израелски дипломат за Си-Ен-Ен.

– Нетанјаху не сака да ѝ стави крај на војната – изјави поранешниот генерален конзул на Израел во Њујорк, Алон Пинкас.

Според Пинкас Нетанјаху ја продолжи војната за да создаде атмосфера слична на војна, која е политички важна за него и политички му одговара.

The post ИТНО СВИКАН КАБИНЕТОТ НА НЕТАНЈАХУ Ќе се одлучува дали ќе има одмазда врз Иран appeared first on plusinfo.mk.