Легендарниот американски музичар Боб Дилан се сретна со папата Лав XIV во Ватикан, во приватна аудиенција што траела само неколку минути, но привлече големо внимание во светските медиуми. Двајцата разменија и подароци – папата му подари бројаница, а Дилан му подари примерок од својата автобиографија „Chronicles: Volume One“.

Средбата се одржала во средата, 4 ноември, во Апостолската палата. Осумдесет и петгодишниот музичар пристигнал во црна дуксерка со качулка, останувајќи верен на својот ненаметлив стил. Го придружувале језуитскиот свештеник Антонио Спадаро и Андреа Монда, главен уредник на ватиканскиот весник „L’Osservatore Romano“.

Спадаро, кој помогнал во организацијата на средбата, на социјалните мрежи објави фотографии и ја опиша како емотивно и историско искуство. Иако разговорот бил краток, средбата имала посебна симболика поради врската меѓу музичкото творештво на Дилан и пораките на папата за мирот и опасноста од нуклеарно вооружување.

Имено, во јули годинава папата Лав XIV цитирал стихови од песната „Go Away You Bomb“ во предговорот на книгата „Disarmed and Disarming: Peace Is a Gift“, објавена од ватиканската издавачка куќа. Песната е напишана во 1963 година, во екот на Студената војна, но никогаш официјално не била објавена ниту снимена за некој од албумите на Дилан. Оригиналниот ракопис бил откриен дури во 2013 година.

Папата ги искористил стиховите како предупредување за опасностите од новата трка во вооружување и нуклеарната закана. Дилан, кој во 2016 година ја доби Нобеловата награда за литература, уште од шеесеттите години е познат по песните поврзани со антивоените протести и борбата за граѓански права, меѓу кои се „Blowin’ in the Wind“ и „Masters of War“.

Ова не е прва средба на Дилан со поглавар на Католичката црква. Во 1997 година настапи пред папата Јован Павле Втори на голем верски собир во Болоња, на кој присуствуваа околу 300.000 млади луѓе. Тогаш ја изведе и „Knockin’ on Heaven’s Door“, а по настапот му пријде на папата и се поздрави со него. Јован Павле Втори подоцна во своето обраќање ги цитираше стиховите од „Blowin’ in the Wind“ и ги искористи како вовед во порака за верата и животниот пат на човекот.

Дилан моментално е на италијанскиот дел од турнејата „Rough and Rowdy Ways“, а по средбата со папата требаше да настапи во Рим.

The post БОБ ДИЛАН СЕ СРЕТНА СО ПАПАТА Легендарниот музичар доби бројаница од Лав XIV, а му подари автобиографија appeared first on plusinfo.mk.