Министерката за образование и наука на Федерацијата Босна и Херцеговина, Јасна Дураковиќ, привлече големо внимание на социјалните мрежи откако објави дека до 14 ноември планира да ги намали деловните активности поради ретроградниот Меркур.

Во видео објавено на „TikTok“, Дураковиќ објаснува дека последниве денови имала низа непријатни искуства во комуникацијата со луѓето, поради што почнала да верува дека положбата на планетите може да влијае врз човечкото расположение и однесување.

„Во изминатите денови имав навистина безброј многу лоши комуникациски искуства, така што навистина почнувам да верувам дека положбата на планетите во голема мера влијае врз нашето расположение, нашето однесување и нашата комуникација“, изјавила министерката.

Таа посочила дека ретроградниот Меркур започнал на 30 октомври и ќе трае до 14 ноември. Според нејзиното објаснување, ваквиот период особено ѝ влијае бидејќи е родена во знакот Близнаци, со кој, според астрологијата, владее токму Меркур.

Како дополнителна причина за чувствителноста на комуникациските проблеми ја навела и својата професија – комуниколог.

Поради тоа, Дураковиќ најавила дека во следните денови ќе се повлече од поинтензивните деловни активности. На своите следбеници им препорачала да ги одложат важните договори, преговори и потпишувањето документи за втората половина на ноември.

Нејзината објава брзо предизвика реакции, а најмногу коментари имаше поради фактот што вакви ставови јавно изнесува функционерка задолжена за образованието и науката.

На социјалната мрежа „X“ се појавија бројни иронични реакции. Дел од корисниците се пошегуваа дека хороскопот наскоро би можел да стане задолжителен предмет во училиштата, додека други предложија сите испити да бидат одложени до 14 ноември.

Имаше и такви кои се сомневаа дали видеото навистина го објавила министерката или станува збор за содржина создадена со помош на вештачка интелигенција.

Реакциите добија и политичка димензија, со оглед на тоа што Дураковиќ е членка на Социјалдемократската партија на Босна и Херцеговина.

Случајот отвори прашања за границата меѓу личните верувања и одговорноста на јавните функционери, особено кога станува збор за претставници на институции чија надлежност е образованието и науката.

Ретроградниот Меркур е астрономска појава при која, гледано од Земјата, се создава привид дека планетата се движи наназад. Меркур, всушност, не го менува правецот на своето движење, туку станува збор за ефект предизвикан од релативното движење на Земјата и планетата.

Во астрологијата, овој период често се поврзува со недоразбирања, проблеми во комуникацијата и одложување на важни одлуки. Сепак, не постојат научни докази дека ретроградното движење на Меркур влијае врз човечкото расположение, однесување или комуникација.

The post РЕТРОГРАДЕН МЕРКУР ЈА „ЗАПРЕ“ МИНИСТЕРКАТА Функционерка од БиХ најави повлекување од деловните активности appeared first on plusinfo.mk.