Здруженијата на енергетски интензивни индустрии на Грција, Бугарија и на Романија бараат ЕУ да создаде услови за рамноправна конкуренција на европскиот пазар на електрична енергија, со акцент на земјите од Југоисточна Европа.

Во писмо испратено до Европската комисија трите земји нагласуваат дека енергетски интензивните индустрии имаат потреба од прифатлива енергија за да останат конкурентни, како на локалните, така и на меѓународните пазари. Тие наведуваат дека ја поддржуваат целосната интеграција на европскиот пазар на електрична енергија, која – дури и со отстапувања од 1–5 €/MWh помеѓу зоните на снабдување – не штети на конкурентноста на индустријата.

Сепак, како што истакнуваат, моменталната ситуација во Југоисточна Европа значително отстапува од оваа цел, бидејќи земјите во регионот продолжуваат да ги бележат највисоките цени на електричната енергија во ЕУ.

Здруженијата го припишуваат нарушувањето, делумно, на режимот на отстапување имплементиран во Австрија што влијае на трговските текови на прекуграничните интерконекции.

Поточно, од 2020 година и 6 година по ред, Austrian Power Grid (APG) бара да биде ослободена од обврската да стави на располагање 70% од својот интерконекциски капацитет за прекугранични размени, како што е предвидено со Регулативата 2019/943. Одлука за 2025 година е одобрена од регулаторниот орган E-Control во декември 2024 година и се однесува на границите на Австрија со Германија, Чешка, Словенија и Унгарија.

Трите здруженија признаваат дека европските правила дозволуваат отстапувања во исклучителни околности и за ограничено времетраење, но истакнуваат дека повторената примена на мерката предизвикува системски нарушувања, што влијае на земјите лоцирани во Југоисточна Европа и целосно поврзани со остатокот од пазарот.

„Не гледаме никаква акција за подобрување на ситуацијата во Австрија на начин што не влијае на размената низ сите граници на електрична енергија. Се чини дека операторот на австрискиот преносен систем го злоупотребува своето право да бара отстапувања од причини поврзани со оперативната безбедност и управувањето со застојот“, се наведува во писмото и се додава дека во неколку случаи протоците од Австрија до Унгарија се ограничени на 0 MW во текот на шпиц часовите.

Здруженијата ја повикуваат Европската комисија: да создаде механизам за поддршка на енергетски интензивните индустрии во регионот сè додека не се отстранат физичките бариери што го изолираат Југоистокот од Централна Европа, да го промовира спроведувањето на нови 400 kV далноводи во Австрија и во нејзината интерконекција со Унгарија, и да соработува со организацијата ACER за да се стави крај на злоупотребата на механизмот за отстапување.

Тие предупредуваат дека без итна и решителна акција постои сериозен ризик од затворање на индустриските единици на регионално ниво.

The post ПОРАДИ АВСТРИСКА ЗЛОУПОТРЕБА НА ЕВРОПСКО ПРАВИЛО, СТРУЈАТА Е СКАПА ВО ЈУГОИСТОЧНА ЕВРОПА Грција, Бугарија и Романија бараат итна интервенција од Унијата appeared first on plusinfo.mk.

Здружението на приватни аптеки на Република Северна Македонија бара изземање на аптеките од новиот Правилник за објавување цени на стоки од 3 април годинава, изјави денеска Билјана Божиновска, член на Извршниот одбор на Здружението.

Божиновска рече дека аптеките не треба да се третираат како обични трговци.

– Сакаме да потенцираме дека аптеките не се класични малопродажни објекти, туку здравствени установи на ниво на примарна здравствена заштита, каде работи лиценциран здравствен кадар, магистри по фармација и фармацевтски техничари. Нашата основна улога е да обезбедиме здравствена услуга и фармацевтска грижа за пациентите, преку издавање и советување за употреба на лекови, следење на терапијата и едукација на граѓаните, а не да вршиме трговија во класична смисла – истакна Божиновска.

Нивното барање е аптеките да бидат изземени од обврската за јавно објавување на цените на сите производи на веб-страница, како што се бара во Правилникот.

– Оваа обврска не е соодветна со нашата здравствена функција и создава дополнителен административен товар, што го одвлекува здравствениот кадар од основната дејност – грижата за пациентите и фармацевтската грижа – појасни Божиновска.

Се бара и да се врати шифрата на дејност 47.73 аптеки, што соодветно ја рефлектира спецификата на нивната работа како здравствени установи.

– Не се согласуваме со новата шифра 47.730 – трговија на мало со фармацевтски производи, што во најмала рака е деградирачка и го сведува фармацевтското работење на обична трговија. Истакнуваме дека нашата работа е регулирана и под надзор на Министерството за здравство, Агенцијата за лекови (МАЛМЕД) и други здравствени институции. Со ваквиот Правилник се нарушува интегритетот на фармацевтската професија и се создава конфузија околу улогата на аптеките во здравствениот систем – подвлече таа.

Од Здружението очекуваат сериозно да се разгледаат нивните барања, испратени до Министерството за економија и труд и до Кабинетот на претседателот на Владата.

– Нашите барања се доставени и преку Фармацевтската комора на Република Северна Македонија, која се грижи за фармацевтската фела и нејзината позиција во државата – додаде Божиновска.

Се бара состанок со надлежните со цел да се најде решение за настаните проблеми.

The post ПРИВАТНИТЕ АПТЕКИ БАРААТ ДА НЕ БИДАТ ТРЕТИРАНИ КАКО ТРГОВЦИ Не сакаат да имаат обврска да ги објавуваат сите цени на интернет appeared first on plusinfo.mk.

Една одлука на Вишотото јавно обвинителство од Штип се чини дека ги потврдува страхувањата дека постои спремност на октроираните штипски обвинители да ги прекршат сите законски норми и правила, за да ја остварат задачата да му се одмаздат на Мустафа Хајрулахи, суспендираниот шеф на скопското Вишо јавно обвинителство. Сега е појасно зошто државниот јавен обвинител Љупчо Коцевски ја испрати во Штип кривичната пријава против Хајрулахи за наводен мобинг, што потоа ја искористи да го одалечи Хајрулахи од работното место.

Во почетокот од март годинава, суспендираниот Хајрулахи поднесе кривична пријава против Јавниот обвинител на РСМ, Љупчо Коцевски, против Татјана Кацарова, Основен јавен обвинител од Штип, против Ристо Бојаџиски, Виш јавен обвинител од Штип, како и против Ермон Незири, член на Советот на јавни обвинители на РСМ, за кривично дело Злоупотреба на службена положба и овластување по членот 353 став 1 в.в член 22 од Кривичниот законик.
Со кривична пријава, Хајрулахи поднесе е и барање за иземање на Татјана Кацарова, јавниот обвинител кој постапува по предметот, како шеф на Основното јавно обвинителство.

После еден месец, денеска, на 1 април, Ристо Бојаџиски, виш јавен обвинител од Штип, донел одлука (РО бр. 28/25), со која го известува Хајрулахи дека барањето за изземање на обвинителката Татјана Кацарова од постапување по предметот се одбива како неоснована.
Наведените причини за ваквата одлука се неиздржани, смета Хајрулахи, односно не се образложени причините поради кои се одбива барањето како неосновано.

Дали експедитивноста на штипското обвинителство спласнува? За да се донесе наредба за отварање на истрага им беа потребни само два дена, а за да донесе одлуката со која се одбива мое барање за изземање му требало ни помалце ни повеќе туку месец дена – вели Хајрулахи.

Тој е зачуден првенствено од фактот што Бојаџиски воошто се впуштил во одлучувањето за барањето за изземање на Кацарова, бидејќи и тој е опфатен со кривичната пријава поднесена во почетокот од март 2025. Примерок од кривичната пријава му била доставена и нему лично, со цел да биде запознаен со наводите.

– Ако за овој јавен обвинител важат правилата, односно законски пропишаните норми, дека кога тој е директно засегнат со кривичната пријава поднесена против него, а токму за нестручно и несовесно работење, согласно со одредбите предвидени во Законот за кривична постапка како и во Законот за јавно обвинителство, тој требало да се изземе и да не одлучува за барањето за изземање – категоричен е Хајрулахи.

Дали тоа што Бојаџиски одлучувал за барањето за изземање на Кацарова е доволна причина да се фрли сомнеж за страв од можно постапување на друго обвинителство за кривичната постапка која се води против Хајруклахи, за наводно кривично дело Малтретирање во вршење на служба?

– Јас се сомневам дека на штипските обвинители им е наложено да го задржат тој предмет за лажниот мобинг кај себе и да не го даваат на друго обвинителство. Бидејќи така би се отвориле многу прашања за начинот на кој се води кривичната постапка и ќе се разоткрие целиот криминал поврзан со наредбата за отварање на истрага, со која Коцевски ме оддалечи од вршењето на функцијата виш јавен обвинител. Евентуалното распоредување на предметот во друго, не толку окторирано обвинителство и јавен обвинител, можеби ќе резултира со поинаков исход на целата постапка. Од тоа се плашат. Од страв да не падне предметот кај друг објективен и стручен обвинител, Ристо Бојаџиски се впуштил во ваков чин, а одлучува за самиот себе, знаејќи дека со тоа прави ново кривично дело – категоричен е Хајрулахи.

The post НЕКОИ ОБВИНИТЕЛИ ИЗГЛЕДА ИМААТ НАЛОГ ДА ГО „ЗАКОЛАТ“ ХАЈРУЛАХИ Во Штип нема изземање, има само земање! appeared first on plusinfo.mk.

До Советот на јавни обвинители сѐ уште не е пристигнато произнесувањето на републичкиот јавен обвинител Љупчо Коцевски во однос на предлогот на Владата за негово разрешување што е препратен до него, информира претседателката на Советот на јавни обвинители Душица Димитриеска.

Димитриеска, денеска во изјава за медиумите, посочи дека Советот има рок од 15 дена да се произнесе по предлогот на Владата за разрешување на Републичкиот јавен обвинител.

– Веднаш, штом ќе го добиеме одговорот од јавниот обвинител, неговото произнесување, ќе постапиме кон одлучување – изјави Димитриеска.

Мислењето Советот потоа го доставува до Владата.

Владата на седница на 25 февруари годинава го усвои предлогот за разрешување на јавниот обвинител Љупчо Коцевски.

Министерството за правда, постапувајќи по заклучокот од  50-та седница на Владата, го изготви Предлог-мислењето за разрешување на државниот јавен обвинител.

Коцевски, како што велат од Министерството за правда, постапувал во предмети во кои согласно законските одредби постоеле околности кои предизвикуваат сомневање во неговата непристрасност, како и судир на интереси, а за кои околности тој требало да знае и требало да се изземе.

Републичкиот обвинител Коцевски го демантира тврдењето дека незаконски постапил посочувајќи дека го следел законот и роковите во него.

Тој изјави дека ќе се произнесе по предлогот за негово разрешување откако Владата ќе го достави до Советот на јавни обвинители.

Во однос на барањето на премиерот Христијан Мицкоски да ја напушти функцијата, Коцевски рече дека ќе одговори откако ќе ги види основите предвидени во Законот за јавно обвинителство. Доколку се утврди дека навистина има тешка дисциплинска повреда, тој рече дека сам ќе се повлече од функцијата.

Мандатот на фржавниот јавен обвинител трае шест години. Коцевски на функцијата стапи во февруари минатата година.

The post ШТО ЧЕКА ЉУПЧО КОЦЕВСКИ? До Советот на јавни обвинители сѐ уште не е пристигнато произнесувањето на републичкиот јавен обвинител appeared first on plusinfo.mk.

Потврдените информации до кои стигна Радио Лидер покажуваат дека семејството на судијката Даниела Алексовска Стојановска имало конекции со семејството на Васил Јованов Васо.

Порталот тврди дека мајката на Васил, А. Јованова, цели 5 години и 2 месеца работела во иста компанија со сопругот на судијката, Е. Стојановски.

Радио Лидер не може да ги потврди информациите дека двајцата колеги биле и куќни пријатели.

Ако ова се покаже точно, тоа би значело дека судијката морала да се изземе од предметот во кој судела и му пресудила на Васил Јованов, момчето кое на 29 јануари на пешачки премин во Скопје, со возило ја прегази и ја усмрти Фросина Кулакова, студентка од Неготино.

Илустрација: Радио Лидер

The post СУДИЈКАТА АЛЕКСОВСКА СТОЈАНОВСКА ФАТЕНА ВО ТЕЖОК ФАУЛ Нејзиниот сопруг работел заедно со мајката на Васо?! appeared first on plusinfo.mk.

Љупчо Палевски Палчо, првообвинетиот за убиството на 14-годишната Вања Ѓорчевска и Панче Жежовски, на денешното судско рочиште побара изземање на обвинителката Жаклина Крстевска Јосифосвска , но и на целото скопско обвинителство.

Тој во судницата прочита писмо упатено до јавниот обвинител Љупчо Коцевски.

– Се обраќам до обвинителот Љупчо Коцевски со барање за изземање на обвинителката Жаклина Крстевска Јосифосвска и на целото Јавно обвинителство Скопје во судскиот процес со кој претседава судијата Ивица Стефановски. Не сум оптимист за вашата правична одлука, но нека остане пишан документ каква криминална истрага спровеле вашите вработени. Предложени се докази, лажна изјава на сведок, приложено е вештачење на телефон, со нецелосна и фалсификувана телефонска комуникација. Сите овие докази се изработени по јавнообвинителска наредба на Јосифовска, која, иако ги знаела фактите, без да го вештачи телефонот на нејзиниот сведок, а со намера да ги негира моите искази кои сум ги дал како осомничен, донесе сведок кој со докази сведочеше лажно. Но, криењетото на оружје, со или без дозвола, е најсериозно кривично дело, кое еден јавен обвинител може да го направи. На петмина членови на Десна, сведоци, јавната обивинителка им постави прашања дали виделе пиштол во мојата канцеларија, а во 9 искази на ниту еден од обвинетите не им поставила ниту еднаш прашање дали поседуваат оружје – рече Палевски.

Тој додаде дека обвинетиот Боре Видевски поседува пиштол со калибар 9 мм, со дозвола издадена во 1990 година, а поседува и ловна пушка со калибар 12 мм.

– Криминалистичката пракса покажува дека вакви злосторства се извршуваат со оружје купено на црниот пазар, но таа околност требало да ја расчисти обвинителката. При претресот на неговиот дом, на Видевски, пиштолот не е евидентиран, не постои. Тоа е доказ за намара и свесност за креирање на обвинителни акти без ниту еден доказ. Приложувам принтскрин од монитор на МВР, со податоци, оти во МВР постојат добри, правдољубиви луѓе, кои овој факт, доказ, го доставија на одбраната. На мониторот се гледаат податоците. Јавната обвинителка Јосифовска заборавила во доказите да ја стави и чаурата најдена во местото Рудник, уредно евидентирана од јавната обвинителка Славица Темелков. Јас како обвинет ја приложив чаурата како доказ на одбраната. Криминална истрага, сторено е кривилно дело од Јосифовска, која знае дека секоја издадена дозвола за оружје поседува отисок за испалување, па со вештачење, брзо може да се утврди дали со тоа оружје, кое намерно не го барала, е сторено или не е сторено ова кривично дело – рече Палевски.

Тој ѝ постави неколку прашања на обвинителката Јосифовска:

– Прашања на кои Јосифовска мора да одгвори се следните: Каде е пиштолот, зброевка 75в, сопственост на еден од обвинетите? Зошто Јосфифовска не го расчистила овој факт? Зошто чаурата не е во листата на докази? Грдата слика за целиот правоуден систем е последица на вакви извршувања на политички наредби од страна на јавни обвинители, затоа што никој нормален не може да најде разбирање за непостапување. Нека стане трага дека е докажано кривично дело на јавен обвинител во истрага – рече Палевски.

Обврската на ЈО е за барањето за изземање е да се произнесе во рок од 3 дена, па судијата Стефановски ја одложи главната расправа за следниот,понеделник, 3 февруари во 10 часот.

Денеска не сведочеше сведокот на Обвинителството, Гоце Трајковски.

На првото одржано рочиште обвинетите Љупчо Палевски, Боре Видевски, Велибор Манев и Влатко Кешишов, како и таткото на девојчето, Александар Ѓорчевски се произнесоа дека не се чувствуваат виновни.

Според обвинението, тие заедно испланирале грабнување на 14-годишното девојче со цел да присилат член на нејзиното потесно семејство да даде парични средства за откуп. Додека, грабнувањето на оштетениот Панче Жежовски во Велес било со намера да го присилат да им го даде сопственото возило „Цитроен“ за да го користат за грабнување на детето во Скопје.

Малолетната Вања и велешанецот Панче, кои беа пријавени за исчезнати на 27 и 24 ноември, беа пронајдени мртви во близина на Скопје и Велес на 3 декември 2023 година.

The post БОРЕ ВИДЕВСКИ ИМА ПИШТОЛ, А НИКОЈ НЕ МУ ГО ПОБАРАЛ Љупчо Палевски бара изземање на обвинителката и на целото скопско Јавно обвинителство appeared first on plusinfo.mk.

Гајдова е избрана за судијка во Апелацискиот суд со глас и од Весна Дамева, а сега треба да одлучува за случај во кој управител на оштетениот е токму сопругот на Дамева и е во позиција да се „реваншира” на Дамева за силната поддршка при нејзиниот избор. Многумина очекуваа Гајдова да биде изземена од овој случај, но тоа не се случи.

Откако лани во јавноста се објавија информации дека кај Дамева има конфликт на интереси поради тоа што дел од судиите за кои таа треба да гласа за нивно унапредување постапуваат во предмети каде нејзиниот сопруг е странка или оштетен, во јуни 2023 година таа се иззема од гласањето.

Нема никаква информација и од претседателот на Апелацискиот суд во Скопје за можно некакво постапување во овој случај.

The post СЛУЧАЈ „СКОПСКИ ПАЗАР“ Никој не зборува за можно изземање на судијката Гајдова appeared first on plusinfo.mk.

„Сите овие месеци откако ја презедов одговорноста да бидам носител на функцијата министер за правда, од нив имам побарано само да го почитуваат законот и ништо друго. Во јавноста се силат дека се конструктивни, а во позадина чуваат предмети за да застарат.

Не може одговорен орган да има двојни аршини, за некој морков а за друг стап за доделување моќ!

Одредени членови на Судски совет се свесни дека е време да си заминат дома, а исто така е дојдено време и да одговораат за сите преземени дејствија во минатото што ќе биде санкционирано со новите измени на законот. Одговорност мора да има и ќе има. Законот над сè и пред сè.

Имаат храброст да му се спротистават на министерот, а немаат грам храброст кога истите ставови се кажуваат и од меѓународните претставници. Пoчитувани, одредени членови на Судски совет: Лицемерие не е вредност!“ – напиша министерот Лога.

Лога реплицираше на соопштение на Судскиот совет, во кое Советот „изразува искрено уверување дека на министерот му се добро познати одредбите од Законот за Судски совет, особено членовите 33 и 61“. Советот вака одговори на барањето на Лога, поради конфликт на интереси Судскиот совет да го изземе членот Лорета Ѓорѓиева од Комисијата на известители, откако за неа било поднесено барање за утврдување на одговорност за судија.

КАКО ЛОРЕТА ЃОРГИЕВА ЌЕ ОДЛУЧУВА ТАЈНО ЗА ОДГОВОРНОСТ НА СУДИЈАТА НАНЕВ, КОГА ПРЕТХОДНО ЈАВНО ЗАСТАНА НА НЕГОВА СТРАНА? Министерот Лога во „војна“ со Судскиот совет

The post ЛИЦЕМЕРИ, СВЕСНИ СЕ ДЕКА ЌЕ СИ ОДАТ ДОМА И ЌЕ ОДГОВАРААТ! Министерот Лога „ифрит“ му се налути на Судскиот совет appeared first on plusinfo.mk.

На изминатата расправа во Апелација обвинетиот Стаменковски, побара изземање на обвинителот Рајчев, бидејќи, според него, тој соработувал со него на дел од предметите за кои што му се суди.

По поднесеното барање одлучуваше Јавното обвинителство на Република Северна Македонија, бидејќи, вишиот јавен обвинител од Вишото јавно обвинителство Скопје Мустафа Хајрулахи, исто така, беше споменат во барањето.

На Марјан Стаменковски, сопственик на порталот „Доказ М“ Основниот кривичен суд Скопје му изрече единствена затворска казна во траење од три години и еден месец. Стаменковски се товареше за пет кривични дела, односно за две дела ширење расистички и ксенофобичен материјал по пат на компјутерски систем, уцена, пиратерија на аудиовизуелно дело и за злоупотреба на лични податоци.
Освен затворската на Стаменковски му беше изречена и парична казна од 5 000 евра заради злоупотреба на лични податоци, како и забрана за вршење професија или дејност поврзана со кривичните дела, односно му се забранува регистрација на домен за портал за период од 10 години, а му престанува регистрацијата на домените кои што тој ги регистрирал.

При претрес на домот на сега осудениот полицијата запленила документација, електронски уреди и 90.000 евра. За оваа сума пари Обвинителството се сомнева дека потекнуваат од други кривични дела и за нив е отворена нова истражна постапка.

The post ОДБИЕНО БАРАЊЕТО НА МАРЈАН ДОКАЗ Обвинителот Сашо Рајчев нема да биде изземен од случајот на Стеменковски appeared first on plusinfo.mk.

Според обвинетиот, јавниот обвинител Рајчев соработувал со него на дел од предметите за коишто му се суди.

– Барам да се изземе почитуваниот обвинител поради судир на интереси, бидејќи, според мои сигурни информации, лицето Сашо Рајчев има праќано информации коишто се дел од предметите за што ме судите, но и за предмети за кои претседателот на Вишото јавно обвинителство, Мустафа Хајрулахи, има барано извинување од мене, но и за други предмети – рече обвинетиот.

Јавниот обвинител Рајчев ги негираше овие трврдења како невистина.

– Во поглед на искажаното барање, со оглед дека претставува законски основ за поднесување тужба за клевета, ќе наведам дека обвинетиот ниту го знам, ниту го познавам, ниту некогаш сме комуницирале со него на кој било начин и денеска искажаните наводи во целост се невистина. Воедно ќе кажам и тоа дека ниту сум го читал порталот преку кој објавувал текстови, за кои денеска е обвинет, со оглед да немам профили на социјалните мрежи, ниту сум го следел на друг начин – изјави Рајчев.

Тој дополни дека согласно Законот за кривична постапка, по поднесено барање за изземање на јавен обвинител од определено обвинителство, одлучува претпоставениот, односно раководителот на тоа обвинителство.

– По денеска изнесеното барање за изземање да постапувам по овој предмет ќе биде одлучено согласно законот – рече обвинителот.

Јавната седница е прекината до 13:30 часот за да се одлучи по барањето за изземање на јавниот обвинител Рајчев.

На Марјан Стаменковски, сопственик на порталот ДоказМ, Основниот кривичен суд Скопје му изрече затворска казна во траење од 3 години и еден месец.

Стаменковски се товари за пет кривични дела, односно за две дела ширење на расистички и ксенофобичен материјал по пат на компјутерски систем, уцена, пиратерија на аудиовизуелно дело и за злоупотреба на лични податоци.

Освен затворската, на Стаменковски му беше изречена и парична казна од 5 000 евра заради злоупотреба на лични податоци како и забрана за вршење професија или дејност поврзана со кривичните дела, односно му се забранува регистрација на домен за портал за период од 10 години, а му престанува регистрацијата на домените коишто ги регистрирал.

При претрес на домот на сега осудениот, полицијата заплени документација, електронски уреди и 90.000 евра. За овие пари, Обвинителството се сомнева дека потекнуваат од други кривични дела и за нив е отворена нова истражна постапка.

The post ИМАМЕ СОРАБОТУВАНО ВО МИНАТОТО Марјан Доказ бара изземање на обвинителот Рајчев поради судир на интереси appeared first on plusinfo.mk.