Дваесет и пет основни училишта од следната учебна година ќе имаат можност да го воведат францускиот јазик како изборен предмет во петто одделение, доколку кај учениците постои интерес за негово изучување. Ова е предвидено во анексот на меморандумот за соработка помеѓу Министерството за образование и наука и Француската амбасада, што денеска го потпишаа министерката Весна Јаневска и амбасадорот Кристоф Ле Риголер.

За министерката Јаневска продлабочувањето на соработката за поголема промоција на изучувањето на францускиот јазик и унапредување на наставата по француски во македонскиот образовен систем е потврда на пријателството помеѓу двете земји, кое продолжува да се развива.

– Го поддржуваме изучувањето на францускиот јазик, имајќи предвид дека тој е меѓу најкористените јазици во глобалниот свет, како и тоа дека сме Влада која поттикнува јазична различност. Придобивките од познавање на јазици различни од мајчиниот, се повеќекратни. Тоа овозможува да се градат мостови помеѓу народи и култури, а јазичните вештини во денешно време се и суштински фактор за успешен настап на пазарот на трудот, како што се и дигиталните вештини – рече Јаневска.

За квалитетна и интересна наставата по француски јазик во петто одделение, Бирото за развој на образованието подготвува наставна програма за овој изборен предмет.

The post ФРАНЦУСКИОТ ЈАЗИК ЌЕ СЕ ИЗУЧУВА КАКО ИЗБОРЕН ПРЕДМЕТ Ако има интерес ќе се учи од петто одделение appeared first on plusinfo.mk.

Во 2019 година, 59 отсто од средношколците студирале два или повеќе странски јазици во ЕУ. Во земјите на ЕУ, сите средношколци учеле два или повеќе странски јазици во Луксембург и Франција.

Естонија, Романија, Чешка и Финска, исто така, имаат голем дел од учениците кои учат два или повеќе јазици (99 отсто), потоа Словачка (98 отсто), Хрватска (95 отсто) и Словенија (92 отсто).

Во Грција, само еден отсто од средношколците учеле два или повеќе странски јазици во 2019 година.

Низок процент на изучени јазици е регистриран и во Португалија (шест отсто), Ирска (12 отсто), Италија (25 отсто) и Шпанија (27 отсто). Во 2019 година, англискиот јазик е најчесто изучуваниот странски јазик во средните училишта во ЕУ – 96 отсто.

Шпанскиот е на второ место (26 отсто), потоа францускиот (22 отсто), германскиот (20 отсто) и италијанскиот јазик (три отсто).

Покрај тоа, рускиот, кој е јазик надвор од ЕУ, се изучува и во земјите од Унијата (три отсто), особено во Естонија (68 отсто) и Летонија (57 отсто), потоа Литванија (30 отсто) и Бугарија (24 отсто).

The post АНГЛИСКИОТ Е НАЈЧЕСТО ИЗУЧУВАН ЈАЗИК ВО ЕВРОПА Еве за кои други јазици има интерес appeared first on plusinfo.mk.

Последните четири години расте бројот на запишани девојчиња и на струката електромонтер на електроенергетски мрежи која главно се смета за машка и е една од потешките. Така во стручното училиште „Михајло Пупин“ од вкупно 39 девојчиња кои се запишани во неколкуте струки шест ја избрале струката електромонтер, која влегува во програмата на ЕВН Македонија 20/20/20.

– Од 50 ученици кои се образуваат од прва до трета година во оваа струка, шест се девојчиња. Во прва година има две девојчиња, а во втора се 4. Тие не заостануваат зад машките ученици ни за време на практичната настава – вели Наташа Божиновска, помошничка на директорот на училиштето.

Од првата генерација ученици во дуалното образование која го заврши школувањето осум деца веќе се вработени во ЕВН. Од нив две се девојчиња.

– По завршувањето на тригодишното училиште дел од децата можат да се вработат во ЕВН, а имаат можност и да го продолжат школувањето и во четврта година во другите насоки. Некои од нив по завршување на четиригодишното средно образование се определуваат да го продолжат школувањето на факултет со што целосно се остручуваат и имаме еден целосен профил кој има познавање од сите процеси на работа – вели Божиновска.

За паралелката на ЕВН додава таа, е значајно и тоа што практичната настава се одвива на полигонот во училиштето и во компанијата, а за децата се обезбедени и заштитни средства.

– Практичната обука ја изведуваат ментори од компанијата што им дава сигурност на децата дека она што го вежбаат тука ќе може директно да го практикуваат за време на работењето во ЕВН или во друга компанија – додава таа.

Фиона Мандарова која е сега во втора година во насоката електромонтер на електроенергетски мрежи заедно со уште три други девојки вели дека се одлучила за оваа насока бидејќи има сигурно вработување.

– За овој смер дознав од татко ми. Ги погледнав условите и сфатив дека се добри. По завршувањето на средно има сигурно вработување. Погледнав дека имаме добри услови да учиме и за другите смерови во школото – вели Мандарова.

За неа е добро и тоа што она што го учи и ако се определи да го работи по завршувањето на средното училиште, веќе го вежба и низ практична работа.

Според податоците на Државниот завод за статистика во учебната 2019/20 година од вкупно 69.980 запишани ученици во средно образование 33.683 се девојчиња.

Кога се има предвид средното стручно образование струките кои најмногу ги запишуваат девојчињата се: здравствена, хемиско технолошка, економско-правна и трговска, земјоделско-ветеринарна, прехранбена, геолошко-рударско металуршка, електротехничка, текстилна и графичка струка. Помалку се запишуваат на дрвопреработувачка, земјоделска и кожарска струка. Меѓутоа, ретко или никогаш девојчињата не се запишуваат на градежната струка.

The post Шест девојчиња ја освоија струката електромонтер appeared first on plusinfo.mk.

Седумнаесет земји – членки на Советот на Европа, меѓу кои и Северна Македонија одлучија да создадат Опсерваторија за настава по историја во Европа, како дел од проширениот парцијален договор, јави дописникот на МИА.

Претставниците во Комитетот на министри на Албанија, Андора, Ерменија, Кипар, Франција, Грузија, Грција, Ирска, Луксембург, Малта, Северна Македонија, Португалија, Руската Федерација, Србија, Словенија, Шпанија и Турција, имајќи ја предвид Декларацијата усвоена од министрите за образование на 23 земји во Париз на 26 ноември 2019 година, со која се изразува нивната подготвеност да работат за создавање на Опсерваторија за настава по историја („опсерваторија“) во рамката на новиот проширен парцијален договор на Советот на Европа, денес официјално го означија создавањето на оваа Опсерваторија.

Главната цел на Опсерваторијата е да собира и да ги става на располагање, преку редовни и тематски извештаи, фактички информации за начините на кои се учи историјата во сите земји учеснички, со што се олеснува размената на добри практики и меѓусебно учење. Исто така, ќе послужи како платформа за професионален развој и вмрежување на европските професионални асоцијации и институти активни во областа на наставата по историја.

„Во контекст на подемот на популизмот, наставата по историја што промовира мултиперспективност и критичко размислување е од суштинско значење за развојот на културата на демократијата. Со истакнување практики што ја поттикнуваат наставата по историја во согласност со вредностите на Советот на Европа, Опсерваторијата ќе помогне да се изгради отпор против манипулацијата и изобличувањето на историјата и да помогне во промовирање на мирот и дијалогот“, се вели во соопштението издадено во Стразбур.

Опсерваторијата се базира на децениското искуство на Советот на Европа во наставата по историја и има за цел да ја надополни и зајакне својата меѓувладина програма.

Оваа иницијатива беше покрената под француско претседателство со Комитетот на министри и денес претставува едно од водечките достигнувања на грчкото претседателство со Организацијата.

Создавање на опсерваторијата за настава по историја во Европа , се совпадна со се поголемите притисоци од страна на една друга земја членка на Советот на Европа – Бугарија, врз Северна Македонија, да ги прифати само нејзините погледи и толкувања на историјата, при што ја условува со вето за почетокот на преговорите за членство со ЕУ. Бугарија засега е единствената од директното соседство на Северна Македонија, која не е дел од Опсеравторијата.

The post Земјава е дел од европската Опсерваторија за настава по историја appeared first on plusinfo.mk.