Европската комисија денеска потврди дека го примила писмото од грчкиот премиер Киријакос Мицотакис во врска со проблемот со многу повисоките цени на електричната енергијата во регионот на Југоисточна Европа во споредба со оние во земјите од Западна Европа.

– Треба да го проучиме писмото кое што туку го примивме и да видиме што содржи тоа, по што секако ќе следи одговор. Засега не би сакал ништо да прејудицирам – изјави портпаролот на Европската комисија за климатска акција и енергија Тим Мекфи.

Во однос на забелешката дека на високите цени на струјата во Југоисточна Европа влијание има руската инвазија врз Украина, Мекфи истакна дека секако оти овој конфликт и нападите на Русија врз украинскиот енергетска систем влијаат врз цените, бидејќи дел од произведената струја се насочува кон Украина како дел од мерките за поддршка на земјата. Тој оцени дека ова покажува и оти Москва ја користи енергијата како алатка за уцена на Европа.

– Многу внимателно ја следиме состојбата и во контакт сме со сите земји членки за тоа како да се надмине овој проблем. Изминативе две години презедовме многу вонредни, но и структурни мерки за одржување на контролата врз енергетскиот пазар – додаде Мекфи.

Според него, сега струјата е многу поевтина во споредба со пред две години, но и натаму има уште многу да се работи за намалување на цените на електричната енергија.

The post ЕК ЌЕ УТВРДУВА ЗОШТО СТРУЈАТА ВО РЕГИОНОТ Е ПОСКАПА ОД ОНАА ВО ЕВРОПА Меѓу причините е и делот на струја што се пренасочува кон Украина appeared first on plusinfo.mk.

Институтот „Лазаро Спаланчани“, болница специјализирана за заразни болести, ќе спроведе клиничко испитување на 90 волонтери во текот на следните неколку недели. Од Институтот изразуваат надеж дека вакцината би можела да биде достапна до пролет следната година.

Директорот на Институтот, Франческо Ваја изјави дека првиот волонтер што ќе ја прими вакцината ќе биде под медицински надзор четири часа пред да биде пуштен дома, по што неговата состојба ќе се следи во текот на наредните 12 недели.

Во овој период, лекарите треба да утврдат дали вакцината е безбедна, дали предизвикува несакани ефекти и дали тоа доведува до создавање неутрализирачки антитела.

– Втората фаза на клиничко испитување на вакцината ќе се спроведе во земји со повисоки стапки на зараза, како што се Мексико и Бразил –  рече Ваја, додавајќи дека првите вакцини би можеле да се појават на пазарот следната година.

Потенцијалната вакцина ГРАд-Ков2 е развиена од страна на компанијата „Реј Тера“ во Рим. Како што пренесуваат странските агенции, претходните испитувања на оваа вакцина, спроведени врз животни, дадоа позитивни резултати.

Италијанскиот министер за здравство Роберто Сперанца го објави на Фејсбук почетокот на клиничките испитувања на вакцината и истакна дека земјата е во служба на глобалните напори за борба против ковид-19.

Италија е една од европските земји најтешко погодена од пандемијата на коронавирусот. Досега се потврдени околу 260.000 случаи на ковид-19 во земјата, а починаа повеќе од 35.000 луѓе.

Клинички испитувања за потенцијални вакцини против ковид-19 се спроведуваат низ целиот свет, како во Индија, Велика Британија, Русија, Кина.

The post И Италија се вброи во земјите кои клинички испитуваат вакцина против ковид-19 appeared first on plusinfo.mk.