Министерката за образование и наука, Весна Јаневска, најави измени во Законот за основно образование со кои ќе се предвидат казни за родителите чии деца покажуваат насилно однесување во училиштата. Оваа реакција доаѓа по последниот инцидент во основното училиште „25 Мај“ во Ченто, каде 15-годишен ученик беше прободен со остар предмет.

Јаневска упати апел до родителите да посветат повеќе внимание на своите деца, нагласувајќи дека државните институции не можат сами да го решат проблемот.

– Ладното оружје децата не го наоѓаат во училиште, ладното оружје го наоѓаат надвор. Оттука, неопходна е соработка со сите сектори кои се засегнати, но ги повикувам и молам родителите да посветат внимание на своите деца. Целата држава што и да направи, ако не се вклучат родителите, не може да постигнеме успех – изјави денеска Јаневска.

Министерката потврди дека веќе се разговара со пратениците за да се формулираат законските измени во делот на одговорноста на родителите.

Покрај казните, Јаневска инсистира и на лиценцирање на училишните психолози, кои треба да формираат стручни тимови за препознавање на насилството.

– Веќе кажав дека ќе побарам да се лиценцираат и училишните психолози кои треба да направат стручни тимови и да работат со децата и со родителите и со наставниците во препознавање на тоа што се случува во училиштето – рече министерката.

Таа заклучи дека законски измени ќе се прават сè додека реалноста налага потреба од воспоставување посигурна средина за учениците.

The post ЌЕ ИМА ПОСТРОГИ КАЗНИ ЗА РОДИТЕЛИТЕ НА НАСИЛНИ УЧЕНИЦИ Ќе се менува Законот за основно образование appeared first on plusinfo.mk.

Пратеничката група на ЗНАМ, со поддршка на пратениците од мнозинството, поднесе Предлог на закон за дополнување на Законот за безбедност на сообраќајот на патиштата, по скратена постапка, со кој се предвидува возачот кој поседува возачка дозвола од Б категорија, да има право да управува мотоцикли со автоматски менувач од категоријата „А1“, чија зафатнина на моторот не е поголема од 125 м3 и чија сила на моторот не е поголема од 11 КW, a соодносот на јачината на моторот и масата на возилото не надминува 0.1 KW/кг.

– Со овој Предлог на закон се предвидува возачот кој поседува возачка дозвола од Б категорија, да има право да управува мотоцикл со автоматски менувач од категоријата А1 согласно ЕУ регулативата, откако ќе наполни 23 години, поседува минимум пет години возачка дозвола од категорија „Б“ и посетува 4-часовна теоретска обука за безбедност при управување на мотоцикли во авто школа и која важи само на територијата на државата, изјави на прес-конференција пратеникот Павле Арсовски.

Содржината на обуката, формата, содржината на потврдата и начинот на водење на евиденција за издадени потврди за посета на обуката ја пропишува министерот за внатрешни работи во рок од 15 дена во рок од влегување на сила на овој закон. Автошколата ќе треба да ја издаде дозволата за посета на четири часа обука сообраќајни правила и прописи и го известува МВР.

Арсовски потенцира дека овој закон има за цел да мотивира и да поттикне што поголем број на граѓани својот автомобил при вршењето на секојдневните обврски да го заменат со мотцикл.

На новинарско прашање, Арсовски рече дека пратеничката група на ЗНАМ е обединета и останува компактна.

The post СО „Б“ КАТЕГОРИЈА ДА МОЖЕ ДА СЕ ВОЗИ МОТОР ДО 125 КУБИЦИ Поднесен предлог закон во Собранието appeared first on plusinfo.mk.

Се предвидува да се воведат постпејд и припејд модели за наплата на патарина, како и можност за надополнување на електронските уреди М-карта и М-таг преку широка мрежа на малопродажни објекти низ целата земја.

– Целта е да се намалат гужвите на наплатните станици, да се зголеми ефикасноста и да се поттикне користење на електронски системи за плаќање – рече пратеничката од ВМРО-ДПМНЕ, Бети Стаменковска Трајковска, која соопшти дека се поднесени измени на Законот за јавни патишта.

Измените кои ги поднесе пратеничката група на ВМРО-ДПМНЕ се направени во консултација со министерот за транспорт Александар Николоски.

– Во предложениот закон се вклучува нова, појаснета дефиниција за експресен пат, што ќе овозможи подобро планирање и уредување на патната мрежа. Се проширува можноста за примена на мерки за забавување на сообраќајот на јавни патишта, во согласност со стандардите за сообраќајна безбедност сè со цел да се намалат ризиците и да се заштитат сите учесници во сообраќајот – рече Стаменковска Трајковска.

Пратеничката најави ослободување од патарина за специфични категории граѓани и тоа за лицата кои имаат извршена трансплантација на орган или ткиво, како и за донори на органи или ткива.

The post ЌЕ СЕ ВОВЕДАТ ПОСТПЕЈД И ПРИПЕЈД МОДЕЛИ ЗА ПАТАРИНА Лицата со пресадени органи се предлага да се ослободат од овој трошок appeared first on plusinfo.mk.

Пратениците денеска ја завршија општата расправа за измените и дополнувањата на Изборниот законик, а гласањето, како што соопшти потпретседателот на Собранието Антонио Милошоски, дополнително ќе се изврши. Измените се носат на пет месеци пред следните локални избори.

Предлогот, кој се носи по скратена постапка, го поднесоа координаторите на пратеничките групи од владејачкото мнозинство и опозициската СДСМ Беким Ќоку, Бобан Карапејовски, Бојан Стојаноски, Ѓорѓија Сајкоски, Никола Мицевски и Оливер Спасовски, додека Европскиот фронт и Левица се изјаснија дека нема да го поддржат.

Амар Мециновиќ од Левица рече дека политичките процеси не се еднострани, додека Блерим Беџети од Европскиот форнт смета дека измените се правеле скриено. Забелешки имаше и за неприфаќањето на предлозите сега да се стави предлогот за една изборна единица, додека Беџети критикуваше дека не се прифатени сите забелешки на ОБСЕ/ОДИХР.

Координаторот на пратеничката група на ВМРО-ДПМНЕ Никола Мицевски рече дека измените им биле дадени и на Еропскиот фронт и на Левица пред тие да бидат поднесени, но дека од нив немало одговор.

– Ако сега не ги донесеме овие измени на закон таа правна празнина ќе остане, и вие очигледно не сакате незвисни листи да се кандидираат на овие избори. И сега повикувате да има вклученост на сите заинтересирани во изборите. Повикувате сите да се кандидираат, ама не дозволувате таа правна празнина да се покрие – рече Мицевски.

Координаторот на пратеничката група на ВМРО-ДПМНЕ рече дека сите измените се во согласност со забелешките на ОБСЕ/ОДИХР, додека во однос на предлогот за една изборна единица и нов изборен законик, рече дека има формирано работна група во Министерството за правда, како и дека ВМРО-ДПМНЕ е за една изборна единица и за гласање на дијаспората.

Како што се наведува во предлог измените, законското решение е во насока на подобрување на изборниот процес и обезбедување на еднакво, демократско и слободно избирачко право, како и постапување по препораките на Мисија за набљудување на избори за претседателските избори на 24 април, како и за парламентарните избори на 8 мај 2024 година и истовремениот втор круг од претседателските избори на ОДИХР. Преку предложените законски измени се имплементираат дел препораките од Конечниот извештај на Мисијата на ОДИХР за набљудување на избори.

Овие законски измени и дополнувања предвидуваат усогласување со одредбите од Законот за медиуми во однос на интернет порталите.

Исто така со овие предлог измени и дополнувања на Изборниот законик се постапува по решението на Уставниот суд со кое беа укинати одредбите со кои се регулираше бројот на потребни потписи за поднесување на листа за кандидати од страна на група избирачи и се предлагаат два нови членови кои ја уредуваат оваа проблематика.

Со овие измени и дополнувања се олеснува функционирањето на изборните органи и се предвидуваат формирање на нови избирачки места во оние избирачки места кои го надминуваат законскиот максимум од илјада избирачи. Се врши и усогласување со Законот за организација и работа на органите на државната управа.

The post ЗАВРШИ ПАРЛАМЕНТАРНАТА РАСПРАВА ЗА ИЗМЕНИТЕ НА ИЗБОРНИОТ ЗАКОНИК Левица и Европскиот фронт нема да ги гласаат appeared first on plusinfo.mk.

Со новите измени и дополнувања на Законот за царински тарифи, Собранието ќе даде зелено светло на планот на Владата, да се намалат царински давачки на голем број суровини и репроматеријали што се користат во домашната индустрија и енергетика, рече денеска на прес-конференција пратеничката од ВМРО-ДПМНЕ Дафина Стојановска.

Таа соопшти дека списокот со околу 70 производи е составен на транспарентен и инклузивен начин, во соработка со Стопанската комора, а вклучува намалување до 50% на царинските стапки кои важат во ЕУ, како и укинување на царините за увоз од САД.

– Овие измени ќе значат пониски трошоци за домашното производство, а со тоа, зголемена конкурентност на странските пазари, нови инвестиции и повеќе вработувања. Ќе значат и дополнителна усогласеност со европското законодавство, а со тоа и клучен чекор напред кон интеграција во Европската Унија. Укинувањето на царини за стоките со потекло од САД, пак, не е само трговска одлука, туку и дипломатски чекор, со којшто испраќаме сигнал за зголемена подготвеност за соработка со нашите стратешки партнери и поддршка за слободната трговија – рече Стојановска.

Како што дополни, со оваа законска измена македонските компании ќе станат поконкурентни, ќе се намалат цените за производство и ќе се зголеми и извозот со што директно ќе влијае на раст на економијата.

– Ова е само еден чекор од поширокиот План за економски раст. Клучна измена со која се посветуваме на економијата во практика, а не само на хартија. Дел од стратегијата кој нуди издржани и применливи решенија, за подинамична економија и поефикасно домашно производство – наведе пратеничката Стојановска.

Предлог законот за изменување и дополнување на Законот за Царинската тарифна, во второ читање завчера беше разгледан во собраниската Комисија за финансирање и буџет. Со него се  предвидува да се изврши намалување на царинските стапки до 50% од нивото на царинските стапки кои важат во Европската Унија, со што, според Владата, ќе се придонесе и за поголема усогласеност со Царинската тарифа на Европската Унија и во делот на царинските стапки, а притоа имајќи ги предвид и правилата на Светската Трговска Организација.

Со него треба да се намалат царинските стапки за поголем број на стоки, кои како суровини или репроматеријали се користат во домашните производствени капацитети, односно одделни производи (компоненти) потребни за производство на високо финални производи со цел да се зголеми извозната конкурентност на домашната индустрија. Исто така, со намалувањето на царинските стапки се очекува директно да се помогне во секторите на автомобилската, метало-преработувачката индустрија, металургијата и енергетиката.

„Со Предлогот закон ќе се изврши намалување на царинската стапка и за литиум јонски батерии за складирање на електрична енергија во секторот енергетика. Батериите стануваат клучен елемент во балансирањето на енергијата, системските услуги, како и во планирањето на предавањето во мрежа на енергијата од обновливи извори на енергија со цел одржување на стабилноста на системот, но и осигурување на физибилноста на обновливите проекти. Намалувањето на царинската стапка за литиум јонските батерии за складирање електрична енергија во секторот енергетика е од големо значење и важност и директно ќе помогне на компаниите во енергетскиот сектор, во насока на зголемување на своите капацитети, зголемување на извозната конкурентност, и се очекува зголемување на инвестициите и бројот на вработувањата“, се наведува во образложението на Предлог законот.

The post СЕ НАМАЛУВААТ ЦАРИНИТЕ ЗА СУРОВИНИ И ЗА РЕПРОМАТЕРИЈАЛИ ВО ИНДУСТРИЈАТА Законот го минува вториот собраниски филтер appeared first on plusinfo.mk.

Пратеничката група на Левица најави предлог измени на Законот за минимална плата со кои се бара зголемување на минималната месечна плата на 30.000 денари, почнувајќи од јули 2025 година.

Предлогот, како што истакна пратеникот Амар Мециновиќ, е изготвен во согласност со барањата на синдикатите и е одговор на тешката економска состојба во која се наоѓаат граѓаните.

– Ова го предлагаме веднаш по најголемото задолжување во историјата на Република Македонија – шест милијарди евра. За да се избегнат штетните ефекти од евентуални мерки на штедење, потребно е веднаш да се зголеми минималната плата – рече Мециновиќ.

Според него, сегашната минимална плата од 24.000 денари не е доволна за основна егзистенција и дека „граѓаните бројат денари и денови како да преживеат во услови на инфлација”.

– Од енергетската и корона кризата, па наваму, видовме како профитот на најголемите компании расте. Затоа товарот од економската криза мора конечно да го сноси бизнис-елитата, а не обичниот работник. Овој закон не ги ни исполнува потребите на нашите граѓани, но е чекор напред кон подобрување на нивната куповна моќ и егзистенцијална сигурност. Време е да се прифати ова решение – рече Мециновиќ.

Тој ја критикуваше Владата за, како што рече, системско разбивање на синдикалното организирање и притисоци врз работниците.

The post ЛЕВИЦА ВО ИСПОМОШ НА СИДИКАТИТЕ Поднесува законски измени за минимална плата од 500 евра appeared first on plusinfo.mk.

Според медиумот, Советот на народите на Република Српска ќе биде избришан од Уставот на Републиката, а главен град наместо Сараево треба да стане Бања Лука.

Сараево е главен град според член 9 од уставот, но Бања Лука во голема мера е административен центар.

– Сите норми кои се производ на наметнување од високи претставници ќе бидат отстранети од новиот највисок правен акт – изјави за РТРС премиерот на Република Српска, Радован Вишковиќ.

На средбата присуствуваат и претседателот на парламентот Ненад Стевандиќ, повеќе министри и лидери на партии. Стевандиќ рече дека од средбата ќе биде испратена јавна иницијатива која може да ја испратат претседателот на Република Српска(РС), премиерот или 30 пратеници.

Претседателот на РС Милорад Додик претходно изјави дека новиот Устав ќе ја пропише точната уставна позиција на Република Српска, наведувајќи дека се што е наметнато повеќе нема да биде можно.

The post САРАЕВО НЕМА ДА БИДЕ ГЛАВЕН ГРАД НА РЕПУБЛИКА СРПСКА? Додик спрема уставни измени appeared first on plusinfo.mk.

-Трговците се должни во рок од 45 дена од објавувањето на законските измени во Службен весник да се прилагодат на измените на Законот за потрошувачи и да ги објават на веб-страниците цените на сите производи. Во период од 10 дена од донесување на измените ќе се донесат подзаконските акти со кои се регулира прашањето – информира Дурмиши.

Тој појасни дека оваа обврска нема да ја имаат маалските, односно малите трговски објекти.

Со ова, рече Дурмиши очекуваме поголема транспарентност на цените во маркетите, подобрена конкурнетност и намалување на цените.

-Граѓаните сега ќе можат да одберат каде ќе ги трошат нивните пари, ќе знаат за секој производ во кој маркет по која цена се продава еден ист производ – рече тој.

Дурмиши потсети дека овие измени доаѓаат по донесените мерки од страна на владата за ограничување на маржите на 102 групи на основни прехранбени производи и средства за хигиена и ограничување на цените на 8 групи на најосновни прехранбени производи.

-Како што и претходно информиравме овие две мерки се веќе на сила и ќе траат заклучно со 30 април, односно ќе бидат опфатени и двата празника, Рамазан и Велигден –рече Дурмиши.

Тој информира и дека Државниот пазарен инспекторат е на терен и инспекторите постапуваат по одлуката дали маркетите ги усогласиле своите цени на полиците.

До крајот на оваа недела е предвидено да се направи надзор на повеќе од 1.000 трговски објекти низ државата по што Државниот пазарен инспекторат ќе излезе со податоци за евентуално непочитување на истата од страна на одредени маркети.

-Казните се движат од 500 до 10.000 евра па и до затварање на маркетите во траење од 15 дена. Очекувањата се дека цените ќе се намалат во просек околу 10%, со што ќе влијаеме на стабилизирање на инфлацијата и заштита на стандардот на граѓаните – рече Дурмиши.

The post ГРАЃАНИТЕ НАСКОРО НА ИНТЕРНЕТ ЌЕ МОЖАТ ДА ГИ ПРОВЕРАТ ЦЕНИТЕ ВО МАРКЕТИТЕ Дурмиши најави засилени инспекциски контроли appeared first on plusinfo.mk.

Пензионерите ќе го добијат и второто ветено линеарно зголемување на пензијата од 2.500 денари со мартовската пензија која ќе се исплати во април, по што зголемувањето на пензиите се враќа на старата методологија за пресметка на растот на пензиите. Притоа зголемувањето на пензиите од 5.000 денари направено лани и годинава ќе влезе во месечниот износ на пензијата за која ќе се пресметува наредното усогласување на пензијата – септемвриското.

Министерството за социјална политика, демографија и млади предложи измени на вонредните измени на законот направени лани, а кои важат за периодот 1 септември 2024 година до 31 август 2025 година. Измените кои се веќе во Собрание ќе се носат во скратена постапка, а ќе важат по објавувањето во службениот весник.

Според новите измени, усогласувањето на старосната пензија која се исплаќа во земјава ќе се врши по старата методологија, односно според движењето на индексот на трошоците на животот во висина од 50% и порастот на просечно исплатената плата на сите вработени во висина од 50%.

Пензиите ќе се усогласуваат како и досега на 1 март и на 1 септември секоја година и тоа според процентот кој се добива како збир на порастот на индексот на трошоците на живот во претходното полугодие и процентот на порастот на просечно исплатената плата на сите вработени во државата во претходното полугодие во однос на полугодието кое му претходи, објавени од Државниот завод за статистика. Во случај кога порастот на трошоците на живот се намалени, односно се со негативен предзнак, нема да се врши усогласување на пензиите.

За усогласувањето на пензијата остварена во тековната година претходно се сведува во месечен износ според порастот на нето платите од декември претходната година во однос на просечната нето-плата истата година.

Доколку брутодомашниот производ во претходната година има реален пораст повеќе од 4%, покрај редовното усогласување, пензиите се усогласуваат од 1 април тековната година во процент кој претставува разлика помеѓу реалната стапка на пораст на бруто домашниот пораст во претходната година и стапката од 4%.

Министерството за социјална политика, демографија и млади предлага и измени во однос на изборот на директор и заменик на директор во Пензискиот фонд. Со нив се предвидува директорот и неговиот заменик да поседуваат уверение или потврда со кои се докажува активно познавање на англискиот јазик не постари од 5 години.

Не се знае кога овој предлог-закон ќе биде ставен на дневен ред во собраниските комисии и на пленарна седница.

The post МАРТОВСКАТА ПЕНЗИЈА ЌЕ СЕ ЗГОЛЕМИ ЗА 2.500 ДЕНАРИ Од септември ќе важи старата методологија за усогласување на пензиите appeared first on plusinfo.mk.

– Тоа сигурно ќе придонесе за зголемување на квалитетот на образованието. За Националниот совет сметаме дека и натаму треба да постои и ги договараме неговите ингеренции и на другите институции, како што се Министерството за образование и наука (МОН), Одборот за акредитација и сите други – рече Јаневска во одговор на новинарско прашање пред почетокот на денешната работна средба со претседателот на Самостојниот синдикат за образование, наука и култура (СОНК).

Министерката прецизира дека во подготовката на новиот закон покрај експертите од МОН се вклучени и претставници од сите државни и приватни универзитети.

– Формиравме ад хок времено тело кое треба да работи на подобрување на квалитетот во високото образование. Таму побаравме да делегираат претставници сите приватни и државни универзитети. Во телото има професори, декани, ректори и самите тие без учество на МОН формираа работни групи кои ќе работат на законот за високо образование и работеа на поединечни глави. Таму секако дека мора да има и има и претставници на МОН. Сега се при крај со решенијата за да излезе новиот закон, кој кога ќе биде дефинитивно готов ќе оди на подолготрајна јавна расправа и нема да биде само 20 дена на ЕНЕР. Ќе го доставиме до сите универзитети и ќе го оставиме подолго на електронска јавна расправа, а ќе организираме и јавна расправа со физичко присуство по што ќе ги анализираме и сублимираме препораките од вработените во високото образование и тогаш ќе излеземе со конечна верзија – рече Јаневска.

Прашана колку од студентите што имаат земено стипендија за студирање на престижните универзитети во странство, што не се вратиле во државата по завршувањето на студиите, ја вратиле стипендијата, рече дека ни еден не го направил тоа поради лошите услови во потпишаниот договор за стипендија со државата.

– Ниту еден нема вратено затоа што договорот беше таков што не овозможуваше негова дефинитивна имплементација. Ако треба да вратите десеткратно од она што ви го дала државата и до крајот на животот ако исплаќате една третина од платата каде и да сте вработени и колкава и да ви е платата не можете тоа да го постигнете. Затоа ги направивме промените во договорот да бидат реални, она што е вложено да биде вратено, но и обврска подолго да бидат во земјата и да пренесуваат знаења дури ди да се во странство – прецизира Јаневска.

Во меѓувреме, министерката оствари работна средба со претседателот на Самостојниот синдикат за образование, наука и култура каде што се разговараше за новиот колективен договор за вработените во основните и во средните училиште. Јаневска изјави дека за голем број од точките ставовите се усогласени, додека останува да се доусоглат точки како што се покачувања за дел од класното раководство, плаќање надоместок за пат на одредени наставници кои работат подалеку од училиштето, како и за некои други погодности кои ќе ги имаат членовите на СОНК.

The post ЗАКОНОТ ЗА ВИСОКО ОБРАЗОВАНИЕ ЌЕ ПРЕТРПИ ГОЛЕМИ ИЗМЕНИ Наместо Агенција за квалитет ќе се формира одбор кој ќе евалуира на база на поинакви принципи appeared first on plusinfo.mk.