ЗНАМ се залага да се воведе една изборна единица со изборен праг од 2 до 3 проценти, со што ќе се овозможи правична застапеност и на помалите политички субјекти и на независните пратенички листи, рече потпретседателката на движењете ЗНАМ, Весна Бендевска, на првата конститутивна седница на работната група за реформи во изборното законодавство.

Таа ја потврди заложбата на ЗНАМ за суштински и системски измени на изборниот модел во Македонија.

– Една изборна единица, всушност, беше и барање во одлуката на Уставниот суд – истакна Бендевска.

Таа нагласи дека цврст став на ЗНАМ е да се намали бројот на пратеници во законодавниот дом на 90, бројка што, како што посочи, ќе соодветствува на реалната големина на популацијата во државата.

– Го афирмирам односно реафирмирам ставот на Движење ЗНАМ за намалување на бројот на пратеници на 90 со што ќе се придонесе за рационализација на трошоците, материјални, финансиски и човечки, и ќе значи значителна придобивка за Буџетот на државата. Воедно, ќе се добие пофункционално, поефикасно и поконсолидирано законодавно тело, кое ќе биде во служба на побрз, поквалитетен и посериозен законодавен процес – потенцираше Бендвска.

Во врска со гласањето на дијаспората, таа потсети дека воведувањето на ваквиот модел беше проследено со зголемување на бројот на пратеници на 123, што, како што нагласи, отвори низа прашања за финансиската оправданост и за ефикасноста на изборниот процес во странство.

– Сведоци сме колку чини изборната постапка која подразбира испраќање избирачки одбори во дијаспората, при што бројот на гласачи во повеќе случаи не соодветствуваше со првичната намера и очекувањата – вели Бендевска.

ЗНАМ ќе продолжи да се залага за изборен модел што гарантира еднаква вредност на секој глас и институции што работат ефикасно, транспарентно и во интерес на граѓаните на Република Македонија, соопшти паријата.

The post ЗНАМ ПРЕДЛАГА ЕДНА ИЗБОРНА ЕДИНИЦА СО ИЗБОРЕН ПРАГ ДО 3 ОТСТО Да се намали бројот на пратениците на 90 appeared first on plusinfo.mk.

Навременото и соодветно менување на Изборниот законик ќе придонесе за организирање на подобри избори, смета амбасадорката на Швајцарија, Вероник Хулман. Таа денеска присуствуваше на конференцијата за финансиска отчетност на изборите, организирана од Државниот завод за ревизија, Мисијата на ОБСЕ и ИФЕС.

– Швајцарија долги години го поддржува доброто владеење во Северна Македонија. Организирањето слободни, правични и демократски избори е од голема важност. Се надеваме дека препораките од Венецијанската комисија и заклучоците од Државниот завод за ревизија ќе бидат земени предвид при измените и дополнувањата на Изборниот законик. Соодветното и навременото менување на Изборниот законик ќе придонесе за организирање на подобри избори. Се надеваме дека тоа ќе се случи навреме – изјави амбасадорката Хулман.

Според Државниот завод за ревизија, остануваат системските слабости во делот на уредувањето на начинот на уплата на донациите, каде е оставена можноста донациите да бидат уплатени кај победникот на изборите, а не кај сите подеднакво.

– Нема поголеми прекршувања во претседателските и парламентарните избори. Клучната констатација на ДЗР е дека 77 проценти од платеното политичко рекламирање за претседателсите избори се финансира од Буџетот на државата преку ДИК, додека за парламнетарните избори е околу 67 проценти. Остануваат и понатаму состојбите кои треба да се надминат во делот на системските слабости, како што е уредувањето на начинот на уплата на донации по објавување на конечните резултати. Нашето законодавство дозволува по објавување на конечните резултати, одредени правни и физички лица да плаќаат донации, а секако кога веќе ќе се знаат резултатите, останува можноста секој кој е заинтересиран, да уплати на победникот –  изјави главниот државен ревизор Максим Ацевски.

Ацевски е задоволен од отчетноста на политичките партии, Рече дека од повеќе од 60 партии, само 4 не ги испочитувале законските рокови за поднесување на финансиските извештаи и на извештаите за донации.

– Од повеќе од 60 партии, само 4 се блокирани за средствата што ги добиваат од буџетот што е огромен успех. Само неколку партии останаа блокирани со одлука на министерот за правда затоа што не ги испочитуваа законските рокови, иако беа навреме известени од страна на ДЗР дека треба да ги почитуваат законските рокови – рече Ацевски.

Во Македонија во октомври треба да се одржат редовни локални избори.

The post НАВРЕМЕНИТЕ ИЗМЕНИ НА ИЗБОРНИОТ ЗАКОНИК ЌЕ ПРИДОНЕСАТ ЗА ПОДОБРИ ИЗБОРИ Останува проблемот со уплатата на донации по објавата на изборните резултати appeared first on plusinfo.mk.