Гасоводниот интерконектор кон Грција влегува во значително поинтензивна фаза на реализација. По интензивната координација меѓу Министерството за енергетика, рударство и минерални суровини, НОМАГАС и грчкиот оператор ДЕСФА, динамиката на изградбата е засилена, а проектот веќе бележи видлив напредок на терен.

Министерката за енергетика, рударство и минерални суровини, Сања Божиновска, заедно со претставници на Министерството, ДЕСФА и НОМАГАС изврши увид во градежните активности на трасата на гасоводниот интерконектор со Грција. при што беа информирани од изведувачот за текот на проектот, како и дека се создадени услови за значително забрзување на изградбата.

Досега се завршени 95% од експропријацијата, расчистени се околу 85% на трасата, а завршено е и производството на сите цевки предвидени за проектот. Исто така, се испорачани цевки во должина од 34 километри, од кои 21 километар се веќе распоредени долж трасата. Извршено е заварување на 13,7 километри цевковод, реализирани се повеќе од 800 успешни заварувања, а над 6300 метри цевка се веќе положени во земја. Паралелно, завршени се шест од седумте планирани премини под патишта, а обезбедени се и околу 65 % од придружните објекти – блок-станиците.

Изведувачот е дополнително технички доопремен со автоматски машини за заварување, што ќе овозможи значително забрзување на работите и исполнување на предвидената динамика.

-Овој проект претставува инвестиција во енергетската безбедност, економската стабилност и идниот развој на државата. Наш приоритет е проектот да се реализира квалитетно, навремено и со максимална динамика. Процесот е забрзан и сите институции работат координирано за успешно завршување на оваа стратешка инвестиција – истакна министерката Божиновска.

Гасоводниот интерконектор со Грција е еден од најзначајните енергетски инфраструктурни проекти. Со неговата изградба државата ќе обезбеди нов влез за природен гас, пристап до повеќе извори на снабдување, поголема диверзификација и повисоко ниво на енергетска сигурност, како и посилно поврзување со регионалната и европската енергетска инфраструктура.

The post ЗАБРЗАНО СЕ ГРАДИ ГАСНИОТ ИНТЕРКОНЕКТОР СО ГРЦИЈА Завршена е експропријацијата на 95% од трасата appeared first on plusinfo.mk.

Премиерот Христијан Мицкоски најави можност државата сама да ја гради хидроелектраната  Чебрен и Галиште.

Мицкоски рече дека оваа стратешка одлука ќе ја донесат по разговорите со раководството на ЕСМ.

Според него, се работи на физибилити студија за еден од најважните стратешки објекти од областа на енергетиката за државава бидејќи треба да обезбеди базна енергија.

Дополнително, како што рече во регионот недостигаат овие два резервоара за вода и заедно со постојната ХЕЦ Тиквеш, ќе обезбедат дополнителна количина вода за Тиквешко поле кое располага со околу 60.000 хектари земјоделско земјиште од прва класа и развиен систем за водоснабдување.

Се проценува дека реализацијата на овој проект ќе чини 1,5 милијарди евра со камати.

Минатата година, премиерот, изјави дека проектот би можел да се реализира и со пари од стратешкото партнерство со Велика Британија.

Проектот Чебрен и Галишта е еден од најдолгонајавуваните енергетски проекти во земјава. За неговата реализација беа распишани 14 неуспешни тендери.

Последниот неуспешен обид беше во 2023 година кога избраниот најдобар понудувач  „Архиродон“ од Грција, не ја продолжи банкарската гаранција што важеше до 31 декември истата година.

The post МОЖНО Е ДРЖАВАТА САМА ДА ГИ ГРАДИ ХИДРОЦЕНТРАЛИТЕ ЧЕБРЕН И ГАЛИШТЕ Инвестицијата би изнесувала 1,5 милијарди евра, заедно со каматите appeared first on plusinfo.mk.

Имаме активен напредок во изградбата на повеќе од 50 километри од трасата на автопатите на коридорите 8 и 10 д – изјави денеска Џош Бејкер, главен проектен менаџер на „Бехтел и Енка“, изведувач на автопатските делници на коридорите 8 и 10 д, а кој пред премиерот Христијан Мицкоски и министерот за транспорт Александар Николоски ги претстави досегашните активности.

Бејкер посочи дека досега се завршени активности за повеќе од 6 милиони кубни метри ископ, 2 милиони кубни метри насип, како и 100.000 кубни метри бетон.

-Сè ова, посочи, го постигнавме со поддршка на повеќе од  340 локални подизведувачи, а оваа бројка ќе продолжи да се зголемува како што напредува работата. Спроведовме над 11.000 часа обука за безбедност и вештини, која им се нуди на сите што работат на проектот – рече Бејкер.

Според директорот на Јавното претпријатие за државни патишта, Коце Трајановски, активно се работи, особено на делницата од Гостивар кон Бокојчани.

– Оваа делница во најголемиот дел е планинска со многу мостови, многу вијадукти и многу косини што треба да се прават, меѓутоа има фронт за работа. Од вкупно 31 километар, на 11 километри има фронт за работа, а на другиот дел усвоен е урбанистчкиот план, направени се елаборатите за експропријација, веќе се дадени во соодветните подрачни единици на Министерството за финансии, односно во делот на имотноправните односи. Значи, активно почнуваме да ги решаваме преостанатите километри од тие 11 до 31 километар. Можам да кажам дека ние не го кочиме „Бехтел и Енка“, туку секогаш сме пред него по пет-шест километри за да може непречено да работат – изјави Трајановски.

The post „БЕХТЕЛ И ЕНКА“ ИМА НАПРЕДОК ОД 50 КИЛОМЕТРИ НА АВТОПАТИШТАТА ОД КОРИДОРИТЕ 8 И 10Д Завршен е ископ на 6 милиони кубни метри ископ и 2 кубни метри насип appeared first on plusinfo.mk.

Николоски посочува дека од ЕУ се заинтересирани и за  Коридор 10,  најдолгиот и највитален коридор, кој почнува во пристаништето Пиреја и завршува во Хелсинки. Така што многу се заинтересирани за двата коридора.

– Ние имаме среќа што двата паневропски коридори се сечат источно од Скопје, а третиот европски Коридор 4 поминува паралелно со нас во Бугарија, така што имаме уникатна положба и се обидуваме да ја искористиме. Оваа географска позиција сакаме да ја искористиме и да донесе економски бенефит за граѓаните и подобар живот на граѓаните вели Николоски во разговор во поткаст на порталот Курир.

The post МАКЕДОНИЈА ИМА УНИКАТНА ПОЛОЖБА НА ВКРСТУВАЊЕ НА ДВА КОРИДОРА Николоски вели дека Европската унија е заинтересирана за нивна изградба appeared first on plusinfo.mk.

Царинската управа со грант од ЕУ имплементира клучни реформски проекти  вредни 14 милиони евра, чија цел е забрзана интеграција во единствениот пазар на Унијата и зголемување на конкурентноста на македонската економија.

Како што соопштија од Царината, се работи за неколку проекти кои треба да го модернизираат работењето.

„Суштински чекор е воведувањето на единствен идентификациски EORI број за компаниите и за физичките лица, со кој се воспоставува унифициран систем за идентификација на економските оператори и физичките лица во царинските постапки. Системот овозможува поефикасно управување со царинските процеси и подобра идентификација во случај на потенцијални закани. По успешно спроведениот пилот-проект, следува тест фаза, по што ќе започне и официјална примена на системот, со што државата целосно се усогласува со европските царински стандарди во овој домен“, се наведува во соопштението.

Паралелно со овој проект се работи и на проектот за Автоматизација на царински терминали со кој, како што велат од Царината, се издигнува на ниво на модерна европска царинска служба, овозможувајќи целосна модернизација на процесите.

-Во моментов во тек е евалуација на понудите од распишаниот меѓународен јавен повик за набавка на опрема чија имплементација значително ќе го забрза транспортот, особено на најфреквентните гранични царински терминали – велат од Царинската управа.

Дел од проектите се финансираа и преку  ИПА програмата „ЕУ против организиран криминал и поддршка на трговијата”, со грант средства од два милиони евра.

„Со нив ги зајакнуваме капацитетите на Секторот за контрола и истраги со нови специјализирани возила, опрема, како и нов ИТ систем за поефикасно менаџирање на кривичните предмети“, се наведува во соопштението.

Со ЕУ- поддршка се работи и реконструкција и модернизацја на царинските премини.

– Се работи на возобновување на граничниот премин Маркова нога со Грција, воспоставување нов граничен премин Клепало и реконструкција и модернизација на граничниот премин Делчево со Бугарија.

Во рамки на реформите за побрза интеграција во Европската унија и Планот за раст, Царинската управа активно работи на надградба на транзитниот систем преку воведување на фаза 6 од Новиот компјутеризиран транзитен систем, за кој се обезбедени средства од државниот буџет. Со неговата имплементација дополнително ќе се забрза протокот на движење на стоките, овозможувајќи сите безбедносни податоци да се проверат уште пред стоката да пристигне на граница, со што значително се скратуваат процедурите на самите премини.

The post ЦАРИНАТА ВОВЕДУВА ЕДИНСТВЕН ИДЕНТИФИКАЦИСКИ БРОЈ „EORI“ Со грант од 14 милиони евра од ЕУ реализира и други реформски проекти appeared first on plusinfo.mk.

Премиерот Христијан Мицкоски денеска изврши увид во градежните активности на нова училишна зграда во ООУ „Гоце Делчев“ во  скопската општина Илинден.

Мицкоски оцени дека зголемувањето на капацитетот на овој наставно образовен објект ќе значи многу за Општина Илинден.

– Општина Илинден се трансформира, се гради и тоа е добро, одлично бидејќи како што кажа и градоначалникот, најголемите комплименти доаѓаат од поддршката којашто ја добива неговата работа и работата на неговиот тим од страна на граѓаните.

Тој подвлече дека очекува уште многу вакви успешни проектите да се реализираат во претстојниот период.

-Кога ќе се изанализира се, тогаш доаѓаме до резултат којшто е успех и јас би сакал уште многу вакви успеси во периодот којшто следи да ни се случуваат.  Благодарност и за граѓаните на Општина Илинден што ја поддржуваат во континуитет работата на Владата, а ние како Влада ќе продолжиме да реализираме проекти на целата територија на Македонија – рече Мицкоски.

Со изградбата на новиот објект ќе се овозможи повеќе од 1.000 ученици да ја следат наставата во една смена, што претставува значаен чекор кон подобрување на условите за учење и создавање инклузивна и современа образовна средина.

Објектот ќе зафаќа површина од над 900 м² на два ката, со 10 училници, 6 тоалети, од кои 2 се наменети за лицата со посебни потреби, лифт за нивна непречена мобилност, 2 простории за складирање и наставничка канцеларија.

The post ВЛАДАТА ПРОДОЛЖУВА ДА ИНВЕСТИРА ВО ОБРАЗОВНИЕТО Се гради нова зграда на ООУ „Гоцe Делчев“ во Илинден appeared first on plusinfo.mk.

Проектот продолжува да постигнува добар напредок и потврдуваме дека сите фактури до овој датум се целосно платени од страна на Владата, се наведува во одговорот на градежната компанија Бехтел и Енка по повод отпуштањето на педесетина работници од гостиварско-тетовскиот регион кои работат на автопатските делници од Коридорот 8.

Портпаролот на Бехтел и Енка, Даниела Милошевска, на барање на МИА во врска со отказите кои беа врачени на педесетина вработени, одговори:

– Горди сме на нашето наследство низ Централна и Источна Европа, испорачувајќи стотици километри големи автопатишта, давајќи приоритет на локалните работници и поддржувајќи ги локалните заедници и бизниси.

Таа потврди дека проектот продолжува да постигнува добар напредок и дека остануваат посветени на партнерство со Владата за да се испорача автопатска инфраструктура што ја зајакнува поврзаноста, ја поддржува локалната вработеност и придонесува за економски раст. Од меѓународната компанија беа децидни и потврдија дека сите фактури до овој датум се целосно платени од страна на Владата.

– Тесно соработуваме со Владата на Северна Македонија за да ги усогласиме градежните активности со тековните национални приоритети. Ова вклучува усогласување на нивоата на работна сила во различни фази од проектот за да се задоволат оперативните потреби – рече Даниела Милошевска.

Од компанијата додаваат:

„Свесни сме дека ова е тежок период за засегнатите, но, поради природата на индустријата во која работиме, честопати постои потреба да го намалиме нашиот персонал за да ги задоволиме оперативните потреби. Категорично, нема разлика во третманот врз основа на националноста. Демобилизацијата се однесува на мешавина од меѓународни и локални работници со процеси утврдени според видот на договорот.“

The post ВЛАДАТА ГИ ИМА ПЛАТЕНО СИТЕ ФАКТУРИ Отпуштањата во Бехтел и Енка се дел од оперативните потреби appeared first on plusinfo.mk.

Двата недовршени објекта кај Ректоратот на УКИМ, чија изградба е стопирана повеќе од десет години, ќе се доградуваат кога ќе биде избран проектант, а потоа и изведувач на градежните работи.

Од Министерството за образование и наука велат дека во петокот (30 јанаури) завршил рокот за аплицирање на тендерот за нови проекти за градба, кој МОН го објави на крајот од 2025 врз основа на стручната анализа за состојбата во која се сега недоградените објекти и согласно со потребите на нивните идни корисници.

Некои од тие потреби, како и стандардите за градење во меѓувреме, односно од 2013 кога почна изградбата, се сменети и затоа е одлучено, и наведено во тендерот, двата објекта да ги користи само Факултетот за информатички технологии и компјутерско инженерство (ФИНКИ) бидејќи само една зграда не ги задоволува потребите ниту на овој факултет ниту на Факултетот за физичко образование, спорт и здравје, за кој беше наменет другиот објект.

Од МОН за МИА соопштиле дека и за овој факултет се планира нова зграда на местото каде што тој се наоѓа.

Повикот за понуди за репроектирање на објектите беше објавен откога МОН ја доби анализата направена од стручно тело координирано од проф. д-р Горан Марковски од Градежниот факултет. Во работната група беа вклучени и други факултети на УКИМ: ФЕИТ, Машинскиот и Архитектонскиот факултет, како и Институтот за земјотресно инженерство и инженерска сеизмологија (ИЗИИС).

Во разговор за МИА професорот Марковски рече дека двата објекта, кои се простираат на вкупно 22.753 квадратни метри, ќе го задржат постојниот габарит и ќе немаат барокна фасада. Во нивната внатрешност ќе има прераспоредување на просториите, ќе има промени во инсталациите за греење, компјутерската инсталација итн.

– Двата објекта се подземно поврзани со паркиралиште, а ќе има и топла врска помеѓу нив бидејќи ќе бидат за еден факултет, откако се заклучи дека ќе добиеме две згради, но ниту едната ниту другата нема да ги задоволи потребите ни на двата факултета. Сега треба да се најде проектант, потоа да се најде изведувач и да ги доврши работите. Проектната задача е доста обемна од сите аспекти. Дадени им се одредени насоки на идните проектанти каде треба да се движат и во однос на архитектонскиот облик, но, се разбира, не премногу детаљно затоа што на проектантот треба да му се даде слобода – изјави профeсорот Марковски.

При истражувањето на состојбата на недоградените објекти, вели, се изненадиле од силна карбонизација во бетонот што потврдува дека има енормно загадување во тој дел од Скопје. Марковски појаснува дека карбонизација на бетонот на толку зачудувачки високо ниво е утврдена на некои места на објектите како последица на комбинацијата од влага и големо присуство на јаглерод диоксид и дека тој процес може да доведе до корозија на арматурата. Со новиот проект треба да се заштитат загрозените делови, а останатиот дел од конструкацијата, како што рече, е солиден и нема показатели на деградација.

– Бетонот е во принцип базна средина, со висок pH-фактор и затоа арматурата во него е заштитена од корозија. Но, овој процес ја намалува базичноста и арматурата може да биде изложена на забрзана корозија. Објектите стојат отворени и оставени на атмосферските влијанија – дожд, мраз, снег, внатре влегувала вода и стоела додека не испари итн. Тоа траело со години. Во арматурата засега не е почната корозијата, но добро е што ќе се преземаат активности за завршување на овие објекти. Ако така остане уште некое време, дополнително ќе треба да поскапи целата алтернатива. Сега има мерки кои се релативно евтини и лесно применливи за да може да се стопира тој процес. Од една страна, имаме недовршени работи, тоа се фрлени пари, што е и најголемата штета, а второто што го откривме во анализата е дека токму тој дел, крстосницата кај Ректоратот, е еден од најзагадените во Скопје. Ова е доказ дека таму навистина имаме енормно загадување со јаглерод диоксид бидејќи во толку кус период од десетина години имаме толку голема карбонизација навлезена во длабочината на бетонските елементи. Има и на мостовските конструкции, кои се изложени на надворешни влијанија, но тоа е процес кој треба да трае стотина години. А овде имаме за само десет години. И од научна гледна точка за нас тоа е интересен податок и потврда за тоа колку во Скопје е загаден воздухот – рече Марковски.

Динамиката со која ќе продолжи изградбата на објектите ќе зависи од расположивите средства во буџетот. Кога МОН, УКИМ, Градежниот факултет и Службата за општи и заеднички работи при Владата (СОЗР) лани во мај го потпишаа меморандумот за формирање на работната група за увид во физичката состојба на објектите, беше соопштено дека според договорите за реализација на проектите од пред десетина години, изградбата на ФИНКИ требало да чини 784 милиони денари, а градењето на Факултетот за физичко образование, спорт и здравје, требало да чини 432 милиони денари.

– Скапите работи допрва доаѓаат. Кога се почнуваат објекти и од која било причина остануваат недовршени, потоа секогаш има проблем од различни аспекти. Покрај тоа што фирмата изведувач заврши неславно, главната причина за многу години статус-кво беше политичка, за жал, како што и најчесто бива. На тие објекти и не им беше таму местото, надвор се од кампусот на УКИМ, таа локација е за парк. Почнаа да се градат без урбанистичка и архитектонска логика. Но, сега двете можности се или да се доградат или да се урнат. Тешко оди уривањето на вакви започнати објекти од повеќе причини. Веднаш ќе има реакции во јавноста дека се урива нешто што е изградено. Најдобро урбанистичко решение е нив да ги нема, меѓутоа кога веќе ги има треба да ги направиме така што ќе извлечеме максимум од нив. Заинтересираност и ангажман да се спаси она што е веќе направено и да се обезбеди квалитетен простор за ФИНКИ гледам и во Министерството за образование и наука, почнувајќи од министерката. Сакам да нагласам и дека од МОН немавме никакви ограничувања, услови или барања како тие би требало да изгледаат. Сè беше оставено на струката, имавме одврзани раце во поглед на тоа колку може максимално тие објекти да се усогласат со постојните во кампусот на УКИМ – посочи професорот од Градежниот факултет.

Стручната анализа за состојбата на двата објекта е направена бесплатно од работната група што тој ја кооридинираше затоа што, вели, чувствувале општествена одговорност и затоа што тоа е најмалку што можат да направат за наш факултет и за наши студенти. Работната група понатаму не е вклучена во процесот, но му стојат на располагање на МОН во следните фази од овој проект. Марковски смета дека новото проектирање ќе трае до есен и дека би било добро ако до крајот на оваа година МОН распише тендер за изведувач на градежните работи.

Градежниот и Архитектонскиот факултет почнаа да работат и на проектот на Македонски железници – Инфраструктура за чистење и целосно реновирање на Железничката станица-Скопје, што треба да почне да се реализира наредната година. Марковски за МИА вели дека идејата е да ѝ се врати некогашниот сјај на главната железничка станица, со тоа што ќе бидат вметнати модерни материјали и содржини, но ќе се задржи автентичноста.

Неговата порака е дека објектите кои се белег на главниот град мора да ја зачуваат суштината и, како што рече, да се има цивилизациски однос кон историското наследство и авторските дела.

The post ПО НОВ ПРОЕКТ ЌЕ СЕ ДОГРАДУВААТ ДВЕТЕ ЗГРАДИ КАЈ РЕКТОРАТОТ НА УКИМ Објектите е предвидено да ги користи Факултетот за информатички технологии appeared first on plusinfo.mk.

Европската Унија прави пресврт во енергетската политика. Нуклеарната енергија сега се смета за клучна алатка за постигнување енергетска независност, намалување на емисиите на CO₂ и стабилизирање на мрежата во ерата на растечка побарувачка на енергија поради центрите за вештачка интелигенција и електричните возила.

Нуклеарната енергија минатата година сочинуваше 24% од вкупното производство на електрична енергија во ЕУ.

Се проценува дека побарувачката за електрична енергија во Европа ќе се зголеми за 50-80%. Обновливите извори како што се ветерот и сонцето сè уште не можат да произведат толку голема количина енергија, па затоа нуклеарната енергија треба да служи како „батерија“ за стабилност на мрежата.

Иако некои земји како Германија и Австрија сè уште се скептични, повеќето членки на ЕУ сега ја поддржуваат нуклеарната енергија како дел од „зелената“ транзиција.

„Нуклеарната енергија заедно со обновливите извори може да игра клучна улога во решавањето на предизвиците пред нас, од стабилноста на мрежата до декарбонизацијата и безбедноста на снабдувањето“, вели европскиот комесар за меѓународна соработка и развој Јозеф Сикела истакнува Сикела.

„Зелените“ здруженија за заштита на животната средина едногласно ги осудуваат ваквите планови. Тие се плашат дека ќе го поништат сè што е направено со години за заштита на животната средина.

Функционерите на ЕУ велат дека е можно да се усогласат заштитата на климата и нуклеарниот развој. Решението се мали модуларни реактори (SMR) – помали, поевтини и побезбедни од класичните големи нуклеарни реактори.

Во 2024 година, ЕУ ја започна Европската индустриска алијанса за SMR за да го забрза нивното воведување.

Во јуни оваа година, Европската комисија го објави осмиот извештај за нуклеарните програми, кој покажува дека нуклеарната енергија ќе бара значителни инвестиции, приближно 241 милијарда евра до 2050 година.

Од тоа, 205 милијарди евра би биле инвестирани во нови нуклеарни централи, а 36 милијарди евра би биле искористени за продолжување на животниот век на постојните реактори.

Овој извештај јасно нагласува дека се потребни сите извори на нискојаглеродна енергија (не само обновливи извори) за да може ЕУ да ги исполни своите климатски и енергетски цели.

Се предвидува дека инсталираниот нуклеарен капацитет низ цела ЕУ ќе порасне од 98 гигавати во 2025 година на околу 109 гигавати до 2050 година.

Од Европската алијанса за енергетски истражувања велат дека е важно да се започне со проширување на капацитетите на постојните нуклеарни централи каде што е можно, но и да се продолжи со големи инвестиции во искористување на можностите на сонцето, ветерот и реките.

Политичките промени во дел од земјите на ЕУ се исто така клучни, со слична порака дека реалноста мора да се прифати.

Белгија го укина законот за постепено затворање на нуклеарните реактори, отворајќи ја можноста за изградба на нови.

Со новата влада, Германија го омекна својот традиционален антинуклеарен став и сега ја гледа нуклеарната енергија „на исто ниво со обновливите извори“ во законодавството на ЕУ.

Данска размислува за укинување на четириесетгодишната забрана за нуклеарна енергија, со посебен фокус на модуларната технологија.

Италија донесе закон за подготовка за враќање на нуклеарната енергија и планови за напредни модуларни реактори. Владата на премиерката Џорџија Мелони ја одреди 2030 година како година за враќање кон нуклеарната енергија.

Полска, која е зависна од јаглен, започна нуклеарна програма, а почетокот на работата на првата нуклеарна централа е планиран за 2033 година.

И во Шпанија, владата е под притисок да се откаже од планираното затворање на нуклеарните централи, особено по големото затемнување минатата пролет.

The post ЕВРОПА СЕ ВРАЌА НА НУКЛЕАРНАТА ЕНЕРГИЈА Ќе инвестира 205 милијарди евра во нови централи appeared first on plusinfo.mk.

Првиот двокатен висечки мост со кабел во Кина е отворен за сообраќај во источната кинеска покраина Анхуи, објави новинската агенција Синхуа. Ова е 11-ти мост преку реката Јангце во покраината Анхуи.

Tracking One Year of Progress on the Yanji Yangtze River Bridge
The Yanji Yangtze River Bridge is the world’s first suspension bridge with four main cables of different sags.
It connects Ezhou and Huanggang, serving as a key river-crossing project in Hubei.
The bridge is… pic.twitter.com/Dcyt0pgVWG

— Jimu Focus (@jimuglobal) November 5, 2025

Проектот ги поврзува автопатите, меѓуградските железници и товарните линии, овозможувајќи транспорт помеѓу железниците и речниот сообраќај. Патниот дел од мостот, долг 11,9 километри, беше пуштен во употреба вчера.

 

View this post on Instagram

 

A post shared by Economic Daily (@economicdaily__china)

Се очекува новиот мост значително да ја подобри транспортната мрежа во делтата на реката Јангце и да придонесе за економскиот развој на регионот. Објектот е дизајниран и изграден според високи еколошки стандарди, бидејќи минува низ Националниот природен резерват „Делфини на реката Тонглинг“ и заштитено подрачје со извор на вода за пиење.

The post 📷 📽️ ПОГЛЕДНЕТЕ ГО ОВА ЧУДО ОД 11,9 КИЛОМЕТРИ Двокатен висечки мост отворен во Кина appeared first on plusinfo.mk.