Македонија ќе има најдобри автопатишта во регионот, вели вицепремиерот и министер за транспорт Александар Николоски.

Речиси три децении немаше инвестиции во патната инфраструктура, Ние како Влада ги придвижуваме работите и работиме на неколку фронтови, рече тој во поткастот „Риштази“.

– Македонија ќе има одлични автопатишта, би рекол, најдобри во регионот во следниве години како ќе ги завршуваме проектите. Факт е дека ние изгубивме најмалку 3 децении, мислам на последните две децении на 20 век, 80-тите и 90-тите години, и првата деценија на 21. век, така што едно 30 години речиси никакви инвестиции во патната инфраструктура нè донесе во ситуација каква што не донесе. Први големи инвестиции почнаа да се случуваат таму некаде 2013-2014 година, па после имаше одредени застои, се обидуваме како Влада повторно да ги задвижиме. Ние работиме на многу фронтови – истакна вицепремиерот Николоски.

Речиси го завршивме источното крило на Коридор 8, сега интензивно работиме и на изградба на нови автопати на западното крило на Коридор 8, додаде тој.

– Имено од Страцин до Крива Паланка се изгради експресен пат, изградивме и рехабилитиравме обиколница на Крива Паланка и граничниот премин со Бугарија, сега одиме на втора фаза на проширување на граничниот премин. Со ЕУ ќе го работиме потегот од Куманово до Страцин. На западното крило веќе интензивно работиме на Тетово-Гостивар. Без разлика што беше потпишан овој договор пред оваа Влада да биде избрана, реалните градежни активности на терен започнаа со изборот на оваа Влада. Работиме, исто така, на Гостивар до Букојчани, популарната Стража, исто така почнаа активностите со оваа Влада. Тоа е најтежок терен, практично планините се совладуваат таму. При крај сме на евалуација со Европската банка за обнова и развој за уште еден автопат. Тој автопат е од Букојчани до Кичево. Така што, тоа ќе биде комплетно нов автопат, кој ќе го почнеме. И од таму веќе е Кичево-Охрид кој интензивно се работи – истакна вицепремиерот Николоски.

За година и половина завршивме 37 километри на автопатот Охрид-Кичево и ги пуштивме во сообраќај и тоа е доказ дека многу сериозно ги водиме проектите, додаде.

– Проблемот е на предходната влада која што од политички причини тој проект го напушти. Факт е дека 7 години владата на Зоран Заев на СДСМ и ДУИ, тој проект не го работеше. Од причина што тие решија политички да го напуштат, нели отвораа и судски процеси и така натаму. И ние не можеме да преземаме одговорност за 7 години од претходната влада, Кога бевме избрани, метро асфалт немаше на Охрид-Кичево. Така што, според мене, на Охрид-Кичево велам дека се работи година и пол. Претходно не се работело. Едно е да се работи, па да не се заврши, друго е да воопшто не се работи. Така што овие година и половина на Охрид-Кичево покажува дека ние сме многу сериозни и дека многу сериозно ги водиме проектите и тоа е најдобар доказ дека ги завршуваме и проектите кои што се после нас – истакна Николоски.

За автопатот Скопје-Блаце, додаде, имаме дел кредит, дел грант со ЕБОР и со договор со ЕБОР да одиме според нивните правила, затоа што за да се изгради еден инфраструктурен објект најважно е да се обезбедат средства.

– Имајќи предвид дека ги обезбедуваме од таму, ги следиме нивните правила. И според нивните правила сме во финална фаза на избор на изведувач. Очекувам за максимум недели, не месеци,  Европската банка за обнова и развој да го избере изведувачот и после тоа да почнат да работат. Таму рок за завршување е 3,5 години според правилата на банката, имајќи предвид дека и делницата е пократка – рече Николоски.

За авиосообраќајот истакна дека за година и половина се отворени 28 дестинанции, што е двојно од претходно.

– На пример, скопскиот аеродром беше со 38 дестинации пред да бидеме ние избрани, охридскиот беше со 6. Вкупно имавме 44 дестинации, сега на тоа додаваме уште 28 дестинации. Скопскиот аеродром на територија на поранешна Југославија, според мерењето на „Екс ЈуАвиејшн“ е аеродром со најголем раст. Двата наши аеродроми во првите 4 месеци оваа година надминаа 1.300.000 патници. Имавме до 30% повеќе патници од минатата година, а лани, пак, поминавме 3.000.000. Оваа година очекуваме да поминеме над 3.500.000 патници, што за држава од 1.800.000 жители е огромна работа, скоро двојно од бројот на жители, и она што по мене е најзначајно, во услови на глобална криза во авиоиндустријата, пред сè заради војната во Иран – рече тој.

Рече и дека Вреди е стабилен партнер во Владата.

– Ние имаме партнер во Владата и јасно е кој е партнерот во Владата. Ние не сме луѓе кои работат позади грб, зборувам за себе, за премиерот и за најтесниот тим во ВМРО-ДПМНЕ и никогаш нема никому да работиме позади грб. Имаме чесен однос со нашиот партнер Вреди, коректна соработка и тоа ќе остане така – вели вицепремиерот Николоски.

На прашањето дали ќе имаат соработка со новата партија на Зијадин Села, вицепремиерот Николоски истакна дека таквата опција не е можна.

The post МАКЕДОНИЈА ЌЕ ИМА НАЈДОБРИ АВТОПАТИ ВО РЕГИОНОТ Наскоро почнува изградбата на Скопје-Блаце, ќе се гради и Букојчани-Кичево appeared first on plusinfo.mk.