Топлотниот бран што ја зафати Грција донесе високи ноќни температури во областа Атика, поширокиот регион на Атина, што во одредени делови, синоќа, кусо пред полноќ достигнаа и до 32-33 степени, јави дописничката на МИА од Атина.

Според податоците од метеоролошката служба „Метео“ на Националната опсерваторија во Атина, високите ноќни температури во комбинација со високата влажност на воздухот во грчката метропола создадоа услови на спарнина и жештина.

Мапата што ја објави „Метео“ покажува дека во 23.45 часот во повеќе делови на пошироката област Атика температурата била над 30 степени.

Топлотниот бран во Грција, според прогнозите, се очекува да продолжи и во следните денови, а за денеска, поради високите температури и многу високата опасност од пожари, областа Атика и уште 11 други региони, односно делови од централна Грција и Евија, Кикладските Острови и островите во северниот дел на Егејското Море се во состојба на мобилизација – Red Code (црвен код).

Од Министерството за климатска криза и цивилна заштита на Грција информираа дека при состојба на мобилизација (Red Code) „националниот механизам се става во целосна готовност, со активирање и распоредување на потребниот човечки потенцијал, како и материјални средства и опрема соодветни на потребите“, со цел навремено справување со вонредни состојби.

The post АТИНА ЦЕЛА НОЌ ПОД ВРШНИК Ноќните температури достигнаа 33 степени appeared first on plusinfo.mk.