Во наредните денови се очекува да се разговара за принципите и за можна промена на ресори и имиња, рече копретседателот на Вреди и градоначалник на општина Чаир, Изет Меџити, одговарајќи на новинарски прашања по отворањето на Албанскиот саем на книгата денеска во Скопје.

Меџити рече дека се договорени со партнерите во Владата дека ќе има реконструкција.

– Деновиве треба да седнеме и разговараме за принципите и дали ќе одиме со промена на ресори, имиња и така натаму – изјави Меџити.

Премиерот Христијан Мицкоски, завчера одговарајќи на новинарско прашање по отворање на новиот базен „Карпош“, најави дека во втората половина на јуни ќе седне со владините партнери за да разговара за натамошните чекори во однос на работата на Владата.

– Во втората половина на јуни ќе седнеме со владините партнери и ќе разговараме за понатамошните чекори. Тогаш ќе се добие и појасна слика за идната структура – рече Мицкоски.

Во врска со тоа какви други промени ќе има, Мицкоски рече дека тоа е динамичен процес и дека во моментот се посветени на внатрепартиските реорганизации и преструктуирања.

– Планираме тие активности да ги завршиме до средината на јуни, а потоа, во втората половина на месецот, да седнеме со коалициските партнери и да разговараме за следните чекори – додаде Мицкоски.

The post ВЛАДИНИТЕ ПАРТНЕРИ ЌЕ РАЗГОВАРААТ И ЗА ПРОМЕНА НА РЕСОРИ Меџити потврди дека во јуни ќе има реконструкција appeared first on plusinfo.mk.

Градоначалникот на Скопје, Орце Ѓорѓиевски, денеска во Брисел учествува на седницата на Заедничкиот консултативен комитет при Европскиот комитет на регионите, форум посветен на соработката меѓу локалните власти од земјите членки на Европската Унија и кандидатите за членство.

На настанот присуствуваат претставници на локалната и регионалната власт од земјите на ЕУ, како и од државите кандидати за членство.

Според него, седницата е можност за размена на искуства, зајакнување на соработката меѓу општините и дискусија за предизвиците поврзани со процесот на европска интеграција, со посебен фокус на улогата на локалната власт во овој процес.

„Интеграцијата во Европската Унија останува стратешки приоритет на Македонија, а општините имаат клучна улога и во евроинтеграцискиот процес и во спроведувањето на реформите. Тие се директни партнери во приближувањето на локалните стандарди кон европските и во исполнувањето на агендата за интеграција“, објави Ѓорѓиевски на Фејсбук.

Тој посочи дека фокусот на дискусиите е ставен на продолжувањето на реформските процеси, патот кон членство во Европската Унија и зајакнувањето на улогата на локалната самоуправа како значаен фактор во приближувањето на државата кон европското семејство.

На седницата присуствуваа и градоначалниците на Чаир и на Центар, Изет Меџити и Горан Герасимовски.

Меџити, исто така, истакна дека интеграцијата во ЕУ останува стратешки приоритет на Македонија.

„Во овој процес, локалната самоуправа има незаменлива улога како алка што ги поврзува реформите со конкретните потреби на граѓаните и ги доближува европските стандарди до локално ниво“, објави Меџити на Фејсбук.

The post ОПШТИНИТЕ СЕ ЗНАЧАЕН ФАКТОР ЗА ЕВРОПСКИТЕ ИНТЕГРАЦИИ Македонски градоначалници на дебата во Брисел appeared first on plusinfo.mk.

Гласачите бараа да нè видат како една партија и голем чекор е од петмина лидери партијата да има двајца копретседатели, вели Изет Меџити, копретседател на Вреди и градоначалник на Чаир.

Вреди сега е единствена републичка партија од Липково до Струга, ДУИ има само 3 општини, АА само 2 општини, рече тој и додаде дека многу луѓе им се приклучуваат.

Меџити посочи дека тој не треба да објаснува зошто Арбен Фетаи и Фатмир Лимани, министри во Владата, заминуваат од Вреди. Рече дека тие ќе бидат реконструирани наскоро, а смените во Владата ќе бидат на крајот на мај или почетокот на јуни.

– Тие се самоелиминираа од Вреди – рече Меџити во интервју за телма.

Кажа и дека не знае зошто Фетаи, иако е министер во Владата, не доаѓа на работа.

Во врска со ДУИ рече дека Вреди не цели звучни имиња од опозициската партија да дојдат кај нив, туку да привлечат експерти.

Прашан за европската интеграција на Македонија, Меџити рече дека ние не стоиме лошо во однос на реформите и дека премиерот Христијан Мицкоски е европски настроен, ги сака европските вредности и оти „сите треба да помогнеме да се најде решение“ на главната пречка. Според него, за решавање на ова прашање се потребни 80 пратеници, а тие имаат само 11, но исто така треба да се вклучат и ЕУ, САД, медијатори…

Главните цели на Вреди се фискална децентрализација, поголем простор за прекугранична соработка и посилна улога на општините во средното и во основното образование.

Тоа што општините должат пари, според Меџити, не значи дека не треба да се работи на фискална децентрализација. Како пример ја посочи Општина Охрид која била една од најзадолжените општини, а сега тоа го има надминато, а Гостивар е задолжена од други причини и треба да се праша зошто е тоа така.

За фискалната децентрализација, Вреди предлага таа биде за сите 80 општини. Меџити признава дека има политички мотиви и дека сакаат зајакнување на децентрализацијата која е дел од Рамковниопт договор. Но, додава, тоа е барање и на ЗЕЛС.

Според него, во земјата треба да има 50-60 општини по бројот на жители и територијата.

Меџити вели дека граѓаните ги почуствувале ефектите од проектите од унгарскиот кредит, а за тие проекти се правела двојна проверка и во општините и во владата.

Коментирајќи ја одлуката на Обвинителството за гонење организиран криминал за прекинување на истрагата за мазутот за ТЕЦ Неготино, Меџити рече дека ова покажува и докажува дека треба длабока реформа во судството и во обвинителството.

– На крај уште ќе треба и да им се извиниме – рече тој.

Во врска со Законот за игри на среќа, рече дека тој бил еден од столбовите на Вреди и оти сега со новиот закон казината ќе треба да бидат 500 метри подалеку од училиштата, а во Чаир, според него, можеби нема да има ниту едно. Исто така, додаде тој, ќе има построги правила за рекламирање, но треба да се има предвид дека во оваа индустрија има и вработени.

– Нашите градови веќе нема да личат на Лас Вегас – рече Меџити.

За законот за правична застапеност рече дека е при крај, дека тој бил во Венецијанска комисија и сега е вратен до Владата, а неговото носење е „прашање на денови“.

The post МИНИСТРИТЕ ФЕТАИ И ЛИМАНИ СЕ САМОЕЛИМИНИРАА ОД ВЛАДАТА Вреди сега е единствена партија застапена од Липково до Струга appeared first on plusinfo.mk.

Коалицијата Вреди вечерва на Конгрес во Скопје во присуство на 850 делегати се обедини во еден политички субјект.

Копретседателот на партијата Вреди и градоначалник на Чаир Изет Меџити во своето обраќање рече дека има моменти во историјата кога политиката престанува да биде натпревар и се претвора во неопходност.

Според него, ова се моменти кога времето бара не само промени, туку и единство.

Истакна дека се собрале заедно различни сили, со различни истории и искуства кои честопати оделе во спротивни насоки.

– Сепак, во тој момент, иако разликите не исчезнаа, тие сили се здружија околу поголема цел: да се стави крај на долгата ера на стагнација и да се отвори ново поглавје за Албанците во Северна Македонија. Ова не беше лесен сојуз, но беше неопходен сојуз. Бидејќи зад нас беше долго и тешко поглавје, со институции оптоварени со скандали, со канцеларии каде што се играше фудбал и со наместени политички случаи, каде што правдата се користеше како оружје за пресметка и замолчување на противникот. Таквото поглавје бараше крај. А секој таков крај бара храброст. Затоа дојде овој сојуз – рече Меџити.

Првиот вицепремиер и министер за европски прашања, Беким Сали, во својот говор нагласи дека обединувањето на овој ентитет пренесува јасна порака за единство и за евроатлантска ориентација.

Потсетувајќи се на протестите пред 10 години во Скопје Сали рече дека денеска, на Денот на Европа, ова обединување ја докажува насоката на Вреди.

– Можеме да имаме алтернативи за сè, но европската интеграција е ориентација без алтернативи. Ова е патување кое се гради со кредибилни институции и со секојдневна одговорност кон граѓаните – рече Сали.

Тој нагласи дека Вреди се гради како сериозна политичка структура, со теренска организација, младински и женски форуми, како и со вклучување на професионалци, со цел да биде блиску до граѓаните насекаде. Сали стави посебен акцент на младите луѓе и на жените, нагласувајќи ја потребата од создавање можности за нив да ја градат иднината на земјата, како и важноста од зајакнување на општините преку децентрализација.

Копретседателот на Вреди и градоначалник на Тетовом Билал Касами, рече дека Вреди не е само сојуз на партии, туку друга култура на креирање политики.

– Вреди треба да стане уште една албанска политичка култура. Помирна, посериозна, поинституционална и поодговорна кон граѓанинот. Не ни е потребна политика што живее од кавги. На Албанците им е потребна политика што гради, планира и размислува надвор од мандатот. Затоа, важно е да кажеме и што претставуваме. Ние сме партија од десниот центар. И не го кажуваме ова како нешто што звучи добро на хартија. Го кажуваме затоа што веруваме во некои многу јасни вредности – рече тој.

Според него, вредностите на Вреди се чесност и работа.

– Веруваме во семејството како прво место каде што човекот учи доверба, одговорност и љубов кон другите. Веруваме во чесна работа, во личноста која станува рано за да го издржува своето семејство, во претприемачот кој презема ризици, создава и не очекува сè од државата. Веруваме во нашиот идентитет, во јазикот, во културата, во верата и во оние духовни вредности кои нè држеле заедно дури и во времиња кога имавме малку можности, но многу достоинство. Но, веруваме и во модерна држава. Во институции кои функционираат. Во професионална администрација. Во правда која е еднаква за сите, а не мајка за еден, а маќеа за друг – рече Касами.

На конгресот присуствуваше и македонскиот премиер Христијан Мицкоски.

Косовскиот премиер Албин Курти кој беше гостин на Конгресот во своето обраќање кажа дека овој Конгрес има единствена симболика токму затоа што се одржува на 9 мај, на Денот на Европа.

– Тоа е потсетник дека модерна Европа е изградена врз урнатините на фашизмот, супремацијата и војните. ЕУ е родена како проект на мир преку антифашизам и просперитет преку демократија. Ова е од особено значење за Балканот – рече тој.

Потпретседателот на Демократската партија на Албанија, Лучијано Бочи го опиша обединувањето на оваа коалиција во партија како момент од посебно политичко значење за Албанците во регионот.

Градоначалничката на општина Прешево, Ардита Синани, испрати порака за поддршка на првиот Конгрес на политичката партија Вреди, нагласувајќи ја важноста на политичкото обединување на Албанците во Македонија.

Во работниот дел од конгресот ќе бидат усвоени 5 резолуции, меѓу кои резолуција за жените со која се бара 40 проценти застапеност на жените во процесите на донесување одлуки во новиот политички субјект, резолуција за млади и резолуција за децентрализација.

The post ВРЕДИ СЕ ОБЕДИНИ ВО ПАРТИЈА ОД ДЕСНИОТ ЦЕНТАР Нуди помирна, посериозна и поинституционална култура, одговорна кон граѓанинот appeared first on plusinfo.mk.

ДУИ ја боли Изет Меџити, затоа што заедно со народот ги испрати во опозиција, соопшти коалицијата Вреди.

Народот вели, каде што те боли забот, таму оди јазикот, додава Вреди.

„ДУИ повторно го пушти стариот филм. Нека запомнат добро: Изет Меџити не е производ на канцеларии и милувања од Али Ахмети. Тој има мандат од Албанците, како градоначалник и како пратеник. Со глас, со терен, со луѓе. Не како Бујар Османи, Блерим Беџети, Фатмир Бесими и кликава на ДУИ, кои политиката ја сфатиле само како качување на фотелја, тендери и личен комодитет. Разликата е голема. Изет бил меѓу народот во маало, додека тие биле во канцелариите на извршната власт и во пазарите за моќ“, се вели во соопштението на Вреди.

Денес најголемите „љубители на фотелји“ се во ДУИ, се додава.

„Таму каде што мала група луѓе околу Али Ахмети ја приватизирале партијата, го туркаат посветениот активист напред како топовско месо, само за самите да се вратат на власт, во фотелји, во тендери и во удобност. Бујар Османи повеќе од 3.700 дена министер, Блерим Беџети повеќе од 5.500 дена на функции и сè уште зборуваат за „заштита на Албанците“. ДУИ Албанецот го гледала само како број за глас, додека функциите како семејно наследство“, соопшти Вреди.

Оваа демагогија повеќе не поминува, порача колаицијата.

„Народот ги прочита. Тие сè уште сонуваат за времето на Груевски, Будимпешта им изгледа како адреса за спас, додека Мијалков го паметат како златен партнер на владеењето. Веќе две години ги лажат активистите дека ќе се вратат на власт, а одговорот за оваа политичка измама го добија не така одамна на локалните избори, каде Вреди ги разби, победувајќи во 10 општини“, се вели во соопштението на коалицијата Вреди.

The post ДУИ СИ ГИ СМЕТА ФУНКЦИИТЕ ЗА СЕМЕЈНО НАСЛЕДСТВО Вечните љубители на фотелји не знаат да живеат во опозиција appeared first on plusinfo.mk.

Градоначалникот на Општина Чаир, Изет Меџити, започна акција за отстранување на старите и напуштени возила од улиците во општината, со цел ослободување на јавниот простор и подобрување на редот во населбите.

Според него, стотици возила кои со години биле оставени без функција и зафаќале јавни површини, се отстрануваат етапно. Со ова се создаваат повеќе слободни паркинг-места за жителите, се олеснува сообраќајот и се зголемува безбедноста.

– Оваа акција носи поквалитетен урбан живот – повеќе простор за паркирање, почисти улици и подобра организација на сообраќајот – истакна Меџити.

The post ОПШТИНА ЧАИР ГИ ОТСТРАНУВА ХАВАРИСАНИТЕ ВОЗИЛА Стотици возила зафаќаат јавни површини appeared first on plusinfo.mk.

Вреди го одржи својот прв конгрес на 9 мај, на Денот на Европа, кога ќе ја официјализира трансформацијата во политичка партија. Ова го најави градоначалникот на скопската општина Чаир и лидер на Демократското движење, дел од владејачката коалиција Вреди, Изет Меџити, во емисијата „Само вистина“ на телевизија Канал 5.

Меџити посочи дека изборот на датумот има симболично значење и ја одразува определбата на коалицијата кон европските вредности и интегративните процеси.

Според најавите, новиот политички субјект ќе биде позициониран како десничарска партија и ќе функционира со модел на заедничко раководење, со двајца копретседатели – Билал Касами и Изет Меџити.

– Идеолошки ќе бидеме ориентирани центар-десно. Сега се работи на операционализирање на новата платформа – рече тој.

Со одржувањето на конгресот, Вреди треба да го заокружи процесот на политичко консолидирање и да го дефинира своето понатамошно дејствување на политичката сцена.

The post ВРЕДИ ЌЕ ГО ОФИЦИЈАЛИЗИРА ПРЕМИНОТ ВО ПАРТИЈА НА 9 МАЈ Закажан првиот конгрес appeared first on plusinfo.mk.

Градоначалникот на Општина Чаир, Изет Меџити, го означи почетокот на работите за реконструкција и трансформација на Старата чаршија, една од најзначајните инфраструктурни интервенции во ова историско подрачје во последните децении.

Проектот опфаќа површина од 1.567 м² и предвидува реставрација на калдрмата со травертински камен, со што се зачувува историската автентичност на Чаршијата, како и целосна модернизација на подземната инфраструктура, вклучувајќи водовод, канализација, електрична мрежа и оптичка инфраструктура.

Интервенцијата вклучува и ново осветлување во традиционален стил, уредување на пешачките површини и поставување урбана опрема, со што се создава функционален и атрактивен простор за граѓаните и посетителите.

– По повеќе од пет децении без сериозни интервенции, започнуваме вистинска трансформација на Старата чаршија. Ова е инвестиција што го враќа урбаното достоинство, функционалноста и живоста на овој историски простор – изјави Меџити.

Вкупната вредност на инвестицијата изнесува околу 29 милиони денари. Се планира Чаршијата повторно да стане модерен, функционален простор со зачуван историски идентитет.

The post ПО 50 ГОДИНИ СТАРАТА ЧАРШИЈА ЌЕ СЕ РЕНОВИРА Калдрмата ќе се смени со травертински камен appeared first on plusinfo.mk.

Во присуство на премиерот Христијан Мицкоски, министерката за образование Весна Јаневска и градоначалникот на општина Чаир Изет Меџити, денеска беше поставен камен-темелник на новиот кампус на Универзитетот „Мајка Тереза“ во Скопје.

– Проектот е вреден околу 42 милиони евра и претставува најголемата досегашна инвестиција во албанското образование во Македонија. Новиот универзитетски кампус ќе се гради според современи стандарди и ќе понуди модерни услови за студирање, научно-истражувачка работа и академски развој, претворајќи ги Скопје и Чаир во значаен универзитетски центар за Албанците, во земјата и во регионот. Поставувањето на камен-темелникот на овој кампус е историски момент за албанското образование – истакна Меџити.

Според него, изградбата на кампусот на Универзитетот „Мајка Тереза“ ќе создаде нови можности за младите Албанци да студираат на модерен универзитет и на својот јазик, подготвувајќи се за предизвиците на глобалниот пазар на знаење и економија.

Премиерот Мицкоски оцени дека овој проект претставува значаен чекор во развојот на високото образование во земјата и стратешка инвестиција што ќе влијае со децении врз академскиот, научниот и општествениот развој.

– Со започнувањето на изградбата на новиот, модерен кампус на Универзитетот „Мајка Тереза“ во Скопје, ја потврдуваме нашата цврста определба – да инвестираме во знаење, во младите и во развојот на високото образование. Владата донесе одлука со која се обезбедени вкупно 42 милиони евра за реализација на овој значаен проект. Од нив, 40 милиони евра се наменети за изградба на објектите, а околу 2 милиони евра за надзор на градбата, со цел целиот процес да се реализира професионално, квалитетно и транспарентно – рече Мицкоски.

Новиот кампус ќе се гради на површина од 31.000 метри квадратни, и ќе претставува современ академски комплекс, со модерни објекти, амфитеатри, студентски простори, спортски сали, базен и инфраструктура која ќе одговара на потребите на современото високо образование.

– Нашата цел е јасна – младите луѓе да имаат можност да студираат, да се развиваат и да ја градат својата кариера тука, во својата држава. Универзитетите мора да бидат центри на знаење, истражување и иновации. Места каде што се создаваат идеи, каде што се развиваат нови технологии и каде што се подготвуваат генерации кои ќе ја водат државата напред. Универзитетот „Мајка Тереза“ е важен дел од таа академска мрежа – рече Мицкоски и додаде дека е уверен дека овој кампус ќе стане место каде ќе се создаваат нови научници, инженери, професори, лидери и визионери.

The post ПОЧНА ИЗГРАДБАТА НА НОВИОТ КАМПУС НА УНИВЕРЗИТЕТОТ „МАЈКА ТЕРЕЗА“ Владата обезбеди 42 милиони евра за проектот appeared first on plusinfo.mk.

На локација во Топанско Поле, во општина Чаир, денеска се поставени 3 подземни контејнери.

Во присуство на директорот на ЈП „Комунална хигиена“ Драги Митковски и градоначалникот на Чаир Изет Меџити беа промовирани најмодерните проекти за урбана чистота и ред – поставување подземни контејнери, проект кој ќе се реализира низ цел Чаир.

– Овој проект е голем чекор напред. Разлика која се гледа и чувствува. Ова значи помалку ѓубре надвор. Помалку неред. Повеќе хигиена за секое семејство. Овој систем ќе ја одржува околината поуредна. Почиста. Побезбедна. Отпадот се складира под земја, подалеку од очите и подалеку од непријатните миризби. Просторот на земјата се ослободува. Улиците изгледаат многу подобро. Животната средина станува попријатна за живеење – напиша Меџити на Фејсбук.

Досега се поставени контејнери на 5 локации, а на секоја локација има по 3 подземни контејнери. Денеска е поставена шестата локација, така што од денеска во Чаир има 15 подземни контејнери.

– До крајот на годината овој систем ќе го поставиме на 15 локации и над 50 подземни контејнери ќе бидат во функција на нашите граѓани. Чаир добива нов изглед. Одиме кон европски стандард. Со големи инвестиции. Со работа што се гледа. Со резултати што се чувствуваат секој ден. Ова е грижа за животната средина. Грижа за вашето здравје. Грижа за квалитетот на животот во Чаир – напиша Меџити.

The post ПОДЗЕМНИ КОНТЕЈНЕРИ ВО ЧАИР До крајот на годинава ќе има 50 подземни контејнери на 15 локации appeared first on plusinfo.mk.