Геополитичката шаховска табла повторно се тресе. Украинскиот претседател Володимир Зеленски се најде меѓу две спротивставени струи. Русија ги заострува преговорите. Соединетите Американски Држави бараат избори и референдум во Украина.

Весникот „Фајненшл тајмс“ објави дека Вашингтон побарал од Киев да одржи претседателски избори до 15 мај. Истовремено, да организира и референдум за можен мировен договор со Москва. Според истиот извештај, безбедносните гаранции од САД би зависеле од исполнувањето на тој рок.

Извори за британскиот весник тврдат дека украинските власти веќе почнале подготовки. Планот предвидувал кратки рокови. Изборите и референдумот требало да се одржат напролет.

„Не“ за 24 февруари

Истовремено, „Киев Индипендент“ објави демант од Кабинетот на претседателот Зеленски. Извор близок до кабинетот изјавил дека Зеленски не планира да објави избори или референдум на 24 февруари.

– Не планирал такво нешто. Кога нема безбедност, нема ништо друго – рекол изворот.

Датумот 24 февруари носи силна симболика. Тоа е четвртата годишнина од почетокот на целосната руска инвазија во 2022 година. Според „Фајненшл тајмс“, токму тогаш Зеленски можел да ја соопшти одлуката. Киев сега ја негира таа можност.

Избори во војна, дилема без преседан

Последните претседателски избори во Украина се одржаа во 2019 година. Нови избори требаше да има во март 2024 година. Поради воената состојба, гласањето беше одложено.

Зеленски во декември 2023 година изјави дека е подготвен да организира избори во рок од 60 до 90 дена. Тој тогаш нагласи дека САД и европските партнери мора да помогнат за безбедно одржување на процесот.

„Како да размислуваме за избори кога Русите убиваат луѓе?“

Сега дилемата повторно се отвора. Украински функционери порачуваат дека безбедноста е предуслов.

– Ако Русите секојдневно убиваат луѓе, како можеме сериозно да размислуваме за избори во наредните недели? Никој не е против избори, но мора да има безбедност – соопштиле од Кабинетот.

Западен функционер за „Фајненшл тајмс“ оценил дека кај Украинците се создава впечаток оти целиот процес се врзува со реизборот на Зеленски. Тоа дополнително ја политизира дебатата.

The post ЗЕЛЕНСКИ МЕЃУ ДВА ОГНА Вашингтон бара избори и референдум, Киев бара безбедност во мракот appeared first on plusinfo.mk.

Специјалниот пратеник на американскиот претседател Доналд Трамп за Украина, Кит Келог даде позитивна оценка за мировниот план на САД и очекува руско-украинската војна наскоро да заврши.

Келог е уверен дека Трамп ќе ја заврши војната, која ја опиша како „најдолгата војна во Европа од Втората светска војна“.

– Ние во војската секогаш велиме дека најтешкиот дел е да се стигне до последните 10 метри. Ние сме оддалечени околу два метра. Речиси сме таму – изјави тој за Фокс њуз.

Тој рече дека неодамна разговарал со украинската страна и дека Украинците „навистина им веруваат на Американците“.

– Рамката е таму за да се дојде до заклучок… Мислам дека можеме да ги убедиме Украинците да го сторат тоа, и мислам дека можеме да ги убедиме Русите подоцна. Тоа е добар план. Има работи во него што треба навистина да се кодифицираат и навистина да се објаснат малку подетално, но речиси сме таму – рече тој.

Тој додаде дека украинскиот претседател Володимир Зеленски би можел да отпатува во Соединетите Држави за да го потпише договорот, но „сè уште нема гаранции“.

– Во планот има една точка и мислам дека е исто така важна, дека ќе има избори. Планот многу јасно вели дека Украина мора да има избори во рок од 100 дена. Тоа ќе биде интересен процес. Мислам дека мора да ги имаат, тоа ќе ги смири луѓето, ќе го смири слободниот свет, но тоа е една од одредбите во планот – истакна тој.

The post НА 2 МЕТРА СМЕ ДО КРАЈОТ НА ВОЈНАТА Келог откри дека во планот стои Украина да има избори во рок од 100 дена appeared first on plusinfo.mk.