Советот на јавни обвинители за следната недела ја закажа седницата за давање мислење за пријавените кандидати на огласот за именување на нов јавен обвинител на Република Северна Македонија.

На дневен ред на 38. седница на Советот на јавни обвинители, закажана за вторник – 17 февруари 2026 година, е само една точка – давање мислење на Владата на РСМ по предлог за именување на Јавен обвинител на РСМ.

Советот на ЈО, согласно законските рокови, треба во рок од 15 дена да даде позитивно или негативно мислење до Владата, по што Владата до Собранието предлага еден од кандидатите што добил позитивно мислење.

Владата на седница на 3 февруари донесе заклучок во однос на петте кандидати за јавен обвинител и во согласност со законските одредби, ги достави до Советот на јавните обвинители, откако Собранието, претходно ја информирало Владата за завршување на огласот за јавен обвинител и ја доставило листата со кандидати.

Собраниската прес-служба не ги открива имињата на кандидатите, но како што некои од пријавените и сами потврдија, станува збор за сегашната в.д. државна јавна обвинителка Анита Тополова-Исајловска, обвинителката Ленче Ристовска, судијата од Кривичниот суд, Ненад Савевски, поранешниот претседател на Кривичниот суд, Владимир Панчeвски, и обвинителката од скопското Обвинителство, Лидија Раичевиќ.

Еден од петтемина пријавени би требало да го наследи Љупчо Коцевски, кој поднесе неотповиклива оставка во декември лани, а на негово место како в.д. државен јавен обвинител дојде обвинителката Тополова-Исајловска, која беше единствен кандидат, но не може да биде на позицијата подолго од шест месеци.

Постапката за избор на нов државен јавен обвинител почна со огласот што го распиша Собранието на 12 јануари годинава, со рок за пријавување од 15 дена од денот на објавувањето во „Службен весник“. Кандидатите мора да имаат непрекинат работен стаж од најмалку 10 години како јавни обвинители или судии од областа на кривичното право.

Според Законот за Јавното обвинителство, добиените кандидатури се препраќаат до Владата. По пријавувањето, Владата бара мислење од Советот на јавните обвинители за сите кандидати. Советот е должен да достави образложени мислења во рок од 15 дена. Доколку Советот не даде позитивно мислење за ниеден од пријавените кандидати, Владата не може да утврди предлог и му предлага на Собранието распишување нов оглас. Со 61 глас од пратениците ќе треба да биде избран новиот државен јавен обвинител.

The post СЛЕДНАТА НЕДЕЛА ЌЕ СЕ ОДЛУЧУВА ЗА ДРЖАВЕН ЈАВЕН ОБВИНИТЕЛ Советот на ЈО ќе даде мислење за петтемина кандидати appeared first on plusinfo.mk.

Државниот јавен обвинител Љупчо Коцевски имаше доволно време да се покаже како бескомпромисен борец за правдата, за жал, таа доверба не ја оправда, изјави денеска премиерот Христијан Мицкоски одговарајќи на новинарско прашање по одлуката на Владата за разрешување на главниот обвинител.

– Имаше тој доволно можност да се размавне, да се покаже како бескомпромисен борец за правдата во оние случаи каде што има основано сомнение за сторен криминал, но, очигледно дека барањето изговори и купувањето време се нечија карактерна особина. Така што, мислам дека тој имаше доволно време да покаже, за жал таа доверба не ја оправда и сега владата почнува еден процес, а Парламентот ќе го заврши – изјави премиерот Мицкоски.

Мицкоски додаде дека чесно би било Коцевски самиот да се повлече од функцијата, за да се скрати периодот за избор на нов јавен обвинител.

– Мислам дека чесно и доблесно од него би било самиот да се повлече, да можеме да го скратиме овој период, да можеме да избереме републички обвинител, кој што ќе биде бескомпромисен борец против криминалот и корупцијата во Македонија – додаде Мицкоски.

• ПРАТЕНИЦИТЕ ЌЕ МУ „ПРЕСУДАТ“ НА ОБВИНИТЕЛОТ ЉУПЧО КОЦЕВСКИ Мислењето на Советот за јавни обвинители не може да го спаси

Вчера Владата го задолжи Министерството за правда да преземе активности за поведување на постапка за разрешување на државниот обвинител. Како што рече портпаролката Марија Митева, Владата е разочарана од постапувањето на Јавниот обвинител надвор од законските надлежности, граѓаните се разочарани од системот кој не функционира, а секојдневното продолжување на ваквите состојби резултира со нарушена доверба и нефункционирањето на правната држава.

The post МИЦКОСКИ ГО ПОВИКА КОЦЕВСКИ САМ ДА СЕ ПОВЛЕЧЕ Што побрзо да се избере нов, бескомпромисен државен обвинител appeared first on plusinfo.mk.