Во чест на државниот празник 11 Октомври – Денот на народното востание, денеска во „Кристалната сала“ на Собранието беа доделени Државните награди „11 Октомври“, највисокото признание за животно дело во областа на науката, уметноста, стопанството и јавниот интерес.

Оваа година, наградата за животно дело во областа на културата и уметноста им беше доделена на актерката Теута Ајдини-Јегени, проф. Летка Димовска-Полизова, и продуцентот Иво Јанкоски, а во науката и образованието – на проф. д-р Константин Димитров и академик Глигор Јовановски.

Наградите ги врачуваше професор доктор Светозар Антовиќ, декан на Медицинскиот факултет и претседател на Одборот за доделување на наградата.

– Ова не е само награда, туку и обврска, обврска да се продолжи патот на нашите претци преку наука, култура и општествена одговорност. Лауреатите се жив доказ дека револуционерниот дух не згаснува, туку се преобразува во идеи и дела што ја градат нашата иднина – истакна Антовиќ.

Тој додаде дека Македонија денес претставува „вистински мозаик на традиции“, кој придонесува за нејзината богата духовна, културна и научна сцена.

– Додека се навраќаме на храброста од 1941 година, мора да ги препознаеме и предизвиците со кои се соочуваме денес, патот кон Европската Унија бара системски реформи, повеќе отчетност и посилни институции – рече тој, нагласувајќи дека образованието и знаењето се темелот на секоја просперитетна држава.

Признание за врвни имиња од македонската култура и наука

На настанот беше истакнат придонесот на добитниците:

Теута Ајдини-Јегени – актерка со импресивна кариера и бројни главни улоги во театар, телевизија и филм.

Летка Димовска-Полизова – хорски диригент и културен амбасадор кој ја афирмира македонската сакрална и профана музичка традиција ширум светот.

Иво Јанкоски – продуцент и промотор на македонската култура и уметност преку музика, филм, дизајн и сценски проекти.

Академик Глигор Јовановски – врвен научник во областа на хемијата со меѓународно признат истражувачки придонес.

Проф. д-р Константин Димитров – водечки експерт за енергетска ефикасност и одржлив развој, со повеќедецениска работа во науката и иновациите.

Од името на добитниците, се обрати професорот Константин Димитров, кој истакна дека признанието е инспирација за сите идни генерации.

– Оваа награда е доказ дека со истрајна работа и љубов кон татковината, успехот е достижен. Нека биде поттик за младите дека Македонија ќе расте преку знаење, уметност и човечност – рече Димитров.

The post ДОДЕЛЕНИ ДРЖАВНИТЕ НАГРАДИ „11 ОКТОМВРИ“ Признание за животно дело на најистакнатите имиња од науката и уметноста appeared first on plusinfo.mk.

Во премиерната епизода на поткастот „Бизнис клуб“ претседателот на Стопанската комора на Северна Македонија, Бранко Азески разговара со Иво Јанкоски, сопственик на продукциската куќа „Трето уво“, човек кој остави траен белег во македонската култура и музичка индустрија. Во разговорот Јанкоски, кој воедно е креатор и продуцент на серијалот „Бизнис клуб“, посочува дека поткастот е создаден за да ги афирмира македонските бизнисмени кои, и покрај нивните значајни достигнувања, често остануваат на маргините на медиумската сцена.

– Имаме луѓе кои успешно го водат бизнисот и во земјата и надвор од границите на државата, го билдаат македонскиот БДП, вработуваат илјадници луѓе и ја движат економијата напред. Но, за жал, тие ретко добиваат медиумска видливост. Сакавме да создадеме содржина која ќе биде спротивност на скандалите и негативните вести. Така се роди идејата во дигиталните медиуми да креираме една интересна содржина која ќе направи афирмација на таквите млади и успешни бизнисмени и која ќе биде спротивност на содржините исполнети со црна хроника, со скандали и со претставување на личности кои немаат суштински што да кажат – истакна Јанкоски.

Иво Јанкоски е дипломиран економист, но познат како продуцент, менаџер, издавач и промотор кој ја основал првата македонска независна издавачка куќа „Трето уво“. Во разговорот со Азески, тој зборува и за предизвиците во музичката индустрија во Македонија и прави споредба со светските музички состојби и трендови. Тој исто така ги пренесува почетоците и соработката со групата „Леб и сол“, Влатко Стефановски, Анастасија, Кирил Џајковски, Вања Лазарова. Зборува и за настанот Балкански музички плоштад и основањето на М2 Продукција, која откри многу нови таленти.

Зошто Стопанската комора?

Серијалот „Бизнис клуб“ е заеднички проект на Стопанската комора на Северна Македонија и „Трето уво“. Според Јанкоски, Комората е природен партнер за овој потфат, бидејќи таа претставува заеднички именител за македонскиот бизнис сектор.

– Комората е местото од каде тргнуваат главните текови во економијата, каде се решаваат предизвиците со кои се соочува бизнис секторот, но и се раѓаат новите идеи за развој на позитивна бизнис клима – вели Јанкоски.

Улогата на Бранко Азески

Како домаќин на поткастот, Азески внесе доза на искуство и визија. Тој е човек со долгогодишно искуство, добар познавач на бизнисот и бизнис-состојбата во нашата земја, но и на премрежијата низ кои поминаа нашите компании трасирајќи го патот на македонската економија; човек познат и признат од бизнис заедницата кај нас, во регионот и пошироко и човек со најмногу бизнис релации во земјава и пошироко.

Погледнете ја премиерната епизода на поткастот „Бизнис клуб“.

The post 🎥 ПОТКАСТ КОЈ ЌЕ ПРОМОВИРА УСПЕШНИ БИЗНИСМЕНИ Иво Јанкоски прв гостин во „Бизнис клуб“ на Азески appeared first on plusinfo.mk.