Во дополнение на доказната постапка, обвинителката Адела Бојчевиќ ги повика обдуцентите проф. д-р Златко Јaќевски и д-р Ана Ивчева да сведочат кои повреди на жртвата Ивана се од падот, а кои од насилството и дали утврдиле други повреди постари од 2.3.2026 година, денот кога Ивана се самоуби.

Д-р Јаќевски рече дека останува во целост со наодот од обдукциите на телата на Ивана Јовановска и на Катја Јовановска, како и дека оставува во целост и со наодот со телесниот преглед на Стојанче Јовановски.

– Освен повредите од падот кои ги имате констатирано кај Ивана Јовановска, дали констатиравте и други повреди од насилен карактер? – праша обвинителката.

– При обдукцијата на Јовановска во пределот на левата страна од брадата констатиравме три дискретни жолтеникаво кафеникави крвни подливи, кои се округли по форма со димензии од 0,7 на 0,7 сантиметри, а на растојанија од 1 сантиметар, кои укажуваат на динамична тврда сила под притисок и кои се настанати отприлика една седмица пред смртта. Во пределот на десната страна од вратот, под работ на долната вилица констатиравме три дискретни виолетови крвни подливи, со димензии од 0,5 на 0,5 сантиметри кои исто укажуваат на дејство на тапа тврда сила под притисок, а се настанати непосредно пред смртта. Тоа непосредно значи дека повредите се настани истиот ден или ден пред смртта – објасни д-р Јаќевски.

Тој додаде дека при анализа на крвта кај покојната Ивана не се констатирани никакви наоди на присуство на алкохол, лекови или психоактивни супстанци.

– Со анализа на крвта и на урината кај лицето Стојанче Јовановски, во урината е констатирано присуство на кокаин, со концентрации 307,5 нанограми на милилитар, како и бензодијазепини, лекови за смирување, во концентрација поголема од 1.000 нанограми на милилитар. Понатаму, на направената квалитативна анализа на гасна хроматографија со масен спектар во крвта кај Јовановски е констатирано присуство на дијазепам, а во урината нордијазепам и метаболит на кокаин, во фаза на разградување – рече д-р Јаќевски.

Д-р Ана Ивчева повтори дека кај Ивана се констатирани повреди од левата страна од брадата и од десната страна на вратот.

– Тие од левата страна на брадата се од постар датум, крвните подливи на вратот се свежи повреди. Крвните подливи на десната страна од брадата, според изгледот, се настанати со притисок од јагодиците од прстите, од врв на прсти – рече Ивчева.

Одбраната побара да појасни што мисли под свежи повреди, а д-р Ивчева одговори дека се мисли на повреди настанати на денот на настанот или ден претходно.

Судијата Ивица Стефановски праша кога точно се настанати свежите повреди и дали затоа што се настанати од врв на прсти значи дека се од шлаканица.

– Не може со сигурност да кажеме дали се од истиот ден или од еден ден претходно, бидејќи периодот е краток. За два дена крвниот подлив не може да ја промени својата боја. Кога настанува еден крвен подлив, тоа значи раскинување на крвните садови под кожата и настанува излевање на крвта во околното ткиво. Крвниот подлив на кожата се гледа како виолетова или темновиолетова промена. За да се разгради, потребни се неколку дена, па така, за крвниот подлив да премине од виолетова во жолтеникава боја се потребни 3 до 5 дена. Во зависност од локализацијата, големината, силата со која е настанат, подливите се изразени со различен степен на виолетово пребојување. Конкретно, за случајот не може да се направи дистинкција дали подливот под долната вилица од десната страна е со старост од еден или два дена поради тоа што на хемоглобинот му треба подолго од 2-3 дена да почне да се разложува и да ја промени бојата – појасни докторката.

Судијата праша дали свежите повреди може да се настанати 2 до 3 часа пред смртта на Ивана Јовановска, а д-р Ивчева потврди дека може.

Дали смртта на Ивана оневозможила да се појават други подливи од повреди критичниот ден? – праша судијата, а докторката рече „не“.

Завршни зборови се закажани на 28 април.

The post ВО УРИНАТА НА СТОЈАНЧЕ ИМАЛО ПРИСУСТВО НА КОКАИН И ДИЈАЗЕПАМ Обдукцијата покажала дека Ивана имала модрици една недела пред смртта appeared first on plusinfo.mk.

Обвинетиот Стојанче Јовановски во продолжението на денешното рочиште рече дека по случката со дрогата, неговото возило било одземено и бидејќи сакал да купи друго возило почнал да работи дополнителна работа. Затоа поретко се гледал со Ивана, но кај неа забележал поинаков однос, вознемиреност и напнатост. Ја прашал, што ѝ е, а таа му рекла дека Мартин ѝ се заканувал дека никогаш нема да ја види Катја и дека мора да престане да живее со мене и да оди кај мајка ѝ.

– Ѝ одговорив да не се вознемирува, дека јас ќе го решам проблемот. Десетина дена пред критичниот ден, мојата сопруга ми го даде телефонот за да симнам апликација за нарачување храна. Видов дека има и апликација за следење, ја отворив и во неа имаше местоположба полициска станица Карпош. Се сетив дека таму ми е возилото, кое е запленето. Ја прашав зошто ставила џи-пи-ес во мојата кола, таа почна да плаче, падна на колена да ми се извинува, дека морала тоа да го направи под присила од Мартин. Ми објасни како ми ја подметнале дрогата во возилото. Мартин ја уценувал со видеоклиповите, ѝ рекол да ми стави џи-пи-ес во колата за да знае каде е во секој момент. Ивана му го дала мојот резервен клуч, со кој Мартин го отклучил возилото и ја ставил дрогата. Ја замолив сето ова што ми го кажува мене, да го каже и на Суд кога ќе ме повикаат. Сѐ уште има џи-пи-ес во моето возило, кое е во ПС Карпош. Таа се согласи и вети дека повеќе во животот нема да има никаков контакт со Мартин. Јас се надевав дека ќе го исполни ветувањето – рече Стојанче.

Пред критичниот ден, тој рече дека бил на дополнителната работа, се вратил дома изморен, а утрото го разбудила вибрација на телефонот, од порака која пристигнала на профилот на Ивана. Пораките биле скриншотови од нејзиниот Тик-ток, од разговор со Трајче хазел.

– Сѐ уште ги имам пораките. Веднаш ѝ заѕвонив на Ивана, но таа ми спушташе. Се упатив кон нејзиното работно место кое е во близина на нашата зграда. Кога стигнав, ја видов Ивана и колата на Мартин како заминува. Се сетив на видеата со нивните сексуални опдноси, ветувањето дека никогаш повеќе нема да биде со него, сфатив дека сѐ е лага и фарса. Од револт замавнав кон неа и ѝ реков да му се јави на Мартин да се врати. Го извадив мојот телефон и ѝ ги покажував пораките што Ивана ми ги пишуваше пред критичниот ден. Пишуваше дека не сака да се разведе од мене, дека не сака да го продадеме станот, дека сака со мене да живее, увидела дека згрешила и дека нема да се повтори. Сите овие разговори постојат во мојот уред. Таа ми рече дека не знам каков психопат е Мартин, дека секој ден ѝ ѕвони и оди кај неа на работа. Во тој момент Мартин дојде, го прашав што бараш ти воопшто со неа. Тој почна да ме смирува со зборовите „чекај, има многу работи што не ги знаеш, таа нѐ лаже и двајцата“. Јас дојдов зашто дознав дека разговара со еден полицаец Трајче и дека и со него имала сексуални односи. Кога ми рече, јас се изреволтирав уште повеќе и пак замавнав кон Ивана. Им реков дека не можам да ги гледам и дека треба да одам да се пријавам во Кривичниот суд. Мартин ми кажа дека има уште многу да ми кажува за Ивана, да одиме заедно кон Кривичен и ќе ми каже по пат – рече Стојанче.

Тргнале кон судот, а кога Ивана слушнала дека Мартин има многу да му кажува за неа, таа се обидела да влезе на задното седиште.

– Мартин сакаше да ја спречи, ѝ рече „немој да мислиш дека ако си ти во колата дека нема да кажам сѐ“. Мартин ми кажа дека со Ивана биле во постојана комуникација, излегувале додека јас работев втора работа. Ивана ја заспивала Катја и оделе на паркингот спроти нашата зграда и дека имале сексуални односи. Јас револтиран ја прашав зошто ме лаже, таа негираше. Но Мартин го извади неговиот втор телефонски уред и ми покажа комуникација со Ивана на Ватсап, со видео снимки и слики од нив двајца. Го прашав зошто ми ја подметнале дрогата, а дека вистината порано или подоцна ќе се докаже. Ивана рече дека Мартин ѝ се заканувал, а Мартин ја праша „кој ти се заканувал?“, се сврте и со десната рака ја удри по лицето. Таа како да изгуби свест. Јас почнав да ѝ довикувам „Ивана, Ивана“. Мартин ми кажа дека тој ѝ го зел телефонот и ги прочитал нашите разговори во кои Ивана ми кажува дека не сака да се разведе од мене. И во тој момент Мартин се изнервирал и почнал да ја тепа. Таа наводно паднала во несвест – рече Стојанче.

Потоа, во автомобилот Мартин го повлекол телефонот од раката на Ивана и таа се разбудила. Кога стигнале пред Кривичниот суд Стојанче му рекол на Мартин да остане за да му раскаже сѐ. Кратко се задржал пред судот, а кога излегол, вели дека Ивана не им дозволувала да разговараат насамо.

– Мартин почна да кажува дека Ивана во исто време се гледала со тројца. Дека континуирано ме провоцираше да бидам агресивен, за да ѝ наштетам на Ивана. Мартин ми покажа видеоснимки од него и Ивана и јас замавнав кон неа. Не се сеќавам дали ја удрив. Ивана рече дека ќе пријави во полиција, Мартин ѝ рече да пријави и дека ќе биде тука и ќе каже што се случило. Дојдоа полицајци, направија записник, ние кажавме дека сами ќе си го решиме проблемот. Полицајците ѝ рекоа на Ивана да си замине. Јас и Мартин се качивме во кола, се упативме кон булеварот, но нѐ пресретна црна „сеат ибица“, која ни нареди да излеземе. Ни кажаа дека истата личност пак пријавила вознемирување. Тогаш Ивана се приближи, а Мартин ѝ кажа „кажи што имаш оти немам време, треба да одам“. Полицијата ја праша кого сака сега да пријави, бидејќи Мартин почна да се однесува агресивно. Ивана почна да негира и рече дека никого не сака да пријави. Полицајците заминаа. Јас и Мартин повторно се упативме со неговото возило, за да ме остави дома. Но, ми ѕвонеше телефонот, јас не се јавив, па му ѕвонеше на Мартин. Кога видов, му реков на Мартин да не ја качува Ивана во кола. Но, тој ми рече, ќе ја качам и ќе видиш што ќе ѝ направам. Ја почекавме, таа се качи и Мартин почна да раскажува дека не сум бил свесен со каква личност сум живеел. Ѝ рече дека му било доволно од нејзиното лажење и дека ќе одиме да ја земеме Катја и ќе ги однесам кај мајка ѝ – рече Стојанче.

Откако Ивана ја зела Катја од „Песталоци“, Стојанче ја зел Катја во раце.

– Мартин рече „види какво детенце имаш, нели ти е жал да го изгубиш, јас да сум на твое место подобро би се убил отколку ова да го направам“. Јас си играв со Катја и стигнавме пред нашата зграда. Ивана инсистираше да се качи сама со Катја во станот. Јас се спротиставив и се качивме сите заедно. Кога сакав да влезам во станот за да ги почекам додека се спремаат, ми се вратија мислите за тоа што ми го подметнаа во колата и им го кажав тоа. Мартин почна да негира и ме влечеше со сила да излезам од станот. Јас се спротиставував, но Катја се вознемири и затоа јас го напуштив станот. Се симнавме јас и Мартин. Ивана ми ѕвонеше, јас не ѝ се јавив, па му ѕвонеше на Мартин и му кажала дека ќе ми се јави мене на камера. Се јавив на камера и Ивана беше со Катја во раце. Катја беше во лила џемперче. Почнав да викам „Ивана, Ивана“, се упатив кон влезот на зградат и слушнав силен тресок. Се упативме двајцата кон пролазот меѓу зградата и кафулето и Мартин почна да вика „Ивана, Ивана, Ивана паднала“. Јас кога го слушнав тоа се вознемирив уште повеќе, излегов на улицата, се фрлив пред кола, колата ме удри по ногата. Ја отворив вратата и им реков да свртат десно за да ми помогнат. Потоа се јавив во брза помош, со намера дека ќе им помогнат, дека се живи. Потоа не се сеќавам, дојдоа полицајци, почнаа да ме смируваат, да ми велат „добри се, добри се“ – сведочеше Стојанче.

Тој додаде дека идејата да се земе Катја порано била на Мартин. На прашањето дали Ивана постојано била вработена, Стојанче одговори дека била вработена, но примањата ѝ се движеле од 25.000 до 35.000 денари и затоа тој работел допонителна работа за да можат нормално да функционираат.

– Зошто Ивана ти ја поклони својата половина од станот? – праша адвокатот.

– Затоа што мајка ѝ ѝ соопштила дека таа има каде да живее, а од станот каде живеела претходно нема право да бара дел. А бидејќи мојата мајка индиректно во станот вложи 20.000 евра и живеевме од парите што јас ги заработувам, Ивана ми кажа дека е најпаметно станот да гласи на мое име. Затоа тоа го направивме – рече Стојанче.

Јавната обвинителка немаше вкрстени прашања за Стојанче.

ОБВИНИТЕЛКАТА ВЕЛИ ДЕКА СТОЈАНЧЕ СЕ СТАВА ВО УЛОГА НА ЖРТВА Таа тврди дека нема докази дека Мартин ѝ се заканувал на Ивана

The post МАРТИН МУ РЕКОЛ НА СТОЈАНЧЕ ДЕКА ИВАНА ГИ ЛАЖЕЛА ДВАЈЦАТА Јовановски сведочеше за дрогата, за удирањето, за критичниот ден appeared first on plusinfo.mk.

На денешното рочиште во Кривичниот суд сведочи Стојаче Јовановски, сопруг на Ивана Јовановска, која на 2.3.2026 година изврши самоубиство, скокајќи од 6. кат од нејзиниот стан во Тафталиџе, при што во смрт ја однесе и нивната 6-годишна ќерка Катја.

Тој одговараше на прашања на неговиот адвокат Давор Ангелевски. Рече дека односите со Ивана во почетокот биле нормални. Живееле во изнајмен стан, а потоа мајка му Цветанка им дала пари за учество за стан во 2021 година.

– Односите ни беа нормални сѐ до 2022 година, кога јас отидов во мобилара во Аеродром да ѝ го земам телефонот на сопругата, при што прочитав пораки и видов видеа од колегата од работа Благоја Андуревски. Ја прашав за што се работи, таа негираше. Ја повикав нејзината мајка Љубица, со намера дека мајка ѝ ќе ја насочи дека Ивана погрешила. Но кога таа дојде, односот не беше како што претпоставував дека ќе биде. По 5 минути откако Љубица пристигна, на вратата заѕвони полиција. Јас им ја објаснив ситуацијата, полицајците направија записник и си заминаа. Ивана ме молеше да не се разведуваме поради детето и јас ја послушав – рече Стојанче со треперлив глас.

– Што се случи на почетокот на 2025 година? – праша адвокатот.

– Инстаграм профилите ни беа заеднички логирани и прочитав комуникација помеѓу неа и колегата Мартин Саздов. Разговорите на почеток беа на другарска база, но постепено преминуваа во поприватни разговори. Јас ги соочив Мартин и Ивана да ми објаснат за што се работи. Тие негираа и ми рекоа дека сум параноичен. На 16 август 2025 година бевме на свадба кај моја братучетка во Штип. Мојата сопруга се опијани, беше видно пијана и при враќањето од Штип јас видов дека се допишува со Мартин на вибер и застанав за да прочитам што разговараат. Ивана му кажуваше „се враќам со овој, а Катја спие позади“. Мартин ѝ рече дека и тој во моментот се враќа од Штип. Јас ја соочив, таа почна да негира и ја отвори совозачката врата од колата, со намера да не можам да ѝ го земам телефонот за да ги прочитам разговорите. Ѝ реков штом Мартин се враќа накај Скопје, значи ти сакаш со него да продолжиш. Таа ми рече штом така мислиш, сега ќе ја земам и Катја со мене. Ја отвори задната врата каде што Катја спиеше – рече Стојанче и почна да плаче. Ја зеде Катја и излезе од кола – продолжи Стојанче.

Тој вели дека Ивана со Катја тргнала по спротивната насока на автопатот.

– Излегов и ѝ реков барем детето врати ми го. Таа рече нема да ти го вратам. Ја прескокна банкината и ми рече „не доаѓам со тебе, ќе си одам со друг“. Ја молев да се качи во кола, дека е греота да ја вознемирува Катја. Таа не сакаше. Ми рече „ќе те пријавам во полиција“. Јас се качив во моето возило, стигнав до првата патарина, го свртев возилото и се вратив назад. Цело време ѝ ѕвонев на телефонот, со намера дека во темницата ќе го видам светлото на телефонот, за да ги земам. Три часа ѝ ѕвонев, никој не ми се јавуваше. Продолжив по автопатот, за да ги здогледам, ама никаде не ги видов. Не се ни сеќавам како стигнав во Скопје. Ѝ ѕвонев до утрото, утрото бев прва смена на работа во Пожарна. Потоа ѝ се јавив попладнето. Таа ми кажа дека на мајка ми пријателка Соња дошла и ги зела од автопатот и ги однела кај тетка ѝ Вера во Автокоманда. Тогаш Ивана ми кажа дека ќе живее кај мајка ѝ и кај тетка ѝ, бидејќи јас сум имал голема недоверба во неа, а таа никогаш не ме лажела. По извесен период од недела-две, ми се јави мајката на Мартин, Маја Саздова и ми рече „морам нешто да ти кажам Стојанче, се срамам од женскиот род што постои ваква личност“. Ми рече дека Ивана била кај нив вечерта кога сме се враќале од свадбата во Штип. И дека секоја вечер Ивана спиела кај Мартин, а Катја ја оставала кај мајка ѝ да ја чува, па утрото Ивана и Мартин ја носеле заедно на училиште – рече Стојанче и почна силно да плаче.

Кога го дознал тоа, Стојанче вели дека уште истиот ден почнал да ја следи Ивана.

– Ја најдов пред зградата на мајка ѝ, на Партизанска, возеше електричен тротинет кон Универзална сала. Видов дека после Универзална, Мартин ја чекаше со кола, го ставија тротинетот во гепек и стигнаа во Керамидница. Го паркираа возилото и тргнаа пешки покрај кеј. Јас од далеку ги видов како се гушкаат и се бакнуваат. Му се приближив на Мартин за да се пресметам со него физички. Мартин ми кажа да се смирам, оти се собраа повеќе луѓе. Ми рече ќе одиме на друго место за да се пресметаме сами. Јас се согласив, ми рече да одиме спроти училиштето „Мухајло Пупин“ во Триангла. Стигнав прв, а тој дојде со неговиот другар Тони. Во тој момент Мартин извади калашников, го впери кон мене и ми рече дека ќе ме убие. Јас му ја фатив цевката и му реков да пука. Уште имам белег на левото рамо каде што ме удри со цевката. Дојде чуварот од интернатот и рече дека повикал полиција. Мартин кога слушна се качи во кола и почна да бега. Јас за да го застанам, го удрив со моето возило во неговата задна лева врата. Не успеав, тој продолжи да вози, избега. Моето возило остана неподвижно, па повикав пајак и го однесоа на сервис. Потоа ми се јави на телефон, ми се закануваше, рече дека мора да му ја платам штетата. Му реков да дојде пред мојата зграда за да му платам. Тој дојде со уште тројца другари кои јас не ги познавам. На сите им кажав дека никогаш нема да му ја платам штетата на возилото. Тој се согласи и ми рече дека е во љубовна врска со Ивана – рече Стојанче.

По некое време, продолжи тој, Ивана поднела документи за развод и му соопштила дека сака Катја да ѝ припадне нејзе, а тој да плаќа алиментација. Стојанче се согласил и отишле во социјалната служба за да го потврди барањето.

– Кога Ивана виде дека сум сериозен и ги почитувам нејзините одлуки, почна да ми пишува на вибер дека згрепила, дека не сака да се разведе од мене, дека сака повторно да бидеме заедно, но и било страв дека ако му каже на Мартин дека нешто лошо ќе ми направи. Во разговорите меѓу мене и Ивана, кои сѐ уште ги имам, пишува дека Мартин ѝ се заканува дека ако повторно нѐ види заедно ќе ме убие, ќе ми го демолира станот, дека ќе ми ја запали колата, ќе ми подметне дрога за да се ослободи од мене. Ги имам разговорите во мојот телефон, од октомври 2025 година. Додека беше со мене Ивана, му пиша на Мартин дека не сака да имаат комуникација. Тој ѝ ѕвонеше, ѝ пишуваше дека ќе се самоубие, дека испил повеќе видови апчиња, ѝ праќаше слики каде имаат интимни односи, ќе ги пушти на сајтови за возрасни. Јас ѝ реков да не се вознемирува за тоа, дека има соодветно решение. По извесен период престана да ѝ пишува – сведочеше Стојанче.

Еден ден наставничката на Катја им се јавила и им рекла дека дошло непознато лице да ја земе Катја од школо. Тој и Ивана веднаш отишле во училиштето „Песталоци“, каде го видоле Мартин како стои на влезот.

– Го прашав, што бараш ти да ја земаш мојата ќерка од училиште. Сакаш ли да ја киднапираш, му реков. Му се заканив дека ќе го пријавам во полиција. Тој почна да бега и избега од училиштето. Ја земавме Катја и поради овие ситуации јас одлучив со ќерката и со Ивана да посетиме повеќе места надвор од Скопје. Имам фотографии каде сме биле и што сме правеле. По извесно време се вративме на секојдневните обврски. На 29.12.2025 година, јас бев трета смена на работа во пожарната во Ѓорче, која е веднаш до полициската станица. Утрото во 7 кога излегов од работното место на кружниот тек во Ѓорче црно порше ми уклучи флешери, јас застанав. Излегоа три лица во цивилна облека и веднаш ме прашаа дали во возилото имам нешто недозволено. Јас зачудено им одговорив дека излегувам од истото место од каде излегоа и тие. Тие ми рекоа дека знаат, но имаат дојава дека во ова возило има нешто недозволено и мора да го проверат. Јас се согласив. Тие извршија преглед на моето возило и во задниот дел извадија кеса со зелена и бела боја. Јас веднаш негирав, дека тоа не е мое, дека прв пат во животот го гледам. Тие ме приведоа во полициската станица Карпош. Телефонот и личните работи ми ги оставија на масата, без дозвола да ги користам. Во 9.40 часот, три пати до исклучување, на вибер ми ѕвонеше потпишано Н.Н. лице. Јас немав дозола да се јавам и не се јавив. Инспекторите ме однесоа дома, направија претрес и ми го вештачеа телефонот. Не најдоа ништо што би ме поврзало со тоа што ми го најдоа во возилото. Утредента ме пуштија со мерки на претпазливост, да се јавувам секој понеделник во суд, додека не се извадат ДНК и отпечатоци од работите што беа пронајдени во возилото. Кога ме пуштија, јас веднаш заѕвонив на бројот што ми ѕвонеше кога бев приведен. Ми се јави Тони, другарот на Мартин, со кого 4 месеци не сум имал контакти. Го прашав зошто ми ѕвонел тој ден кога бев приведен. Ми рече дека утрото видел возило како моето пред Ист гејт. Му реков дека не сум бил јас и заврши разговорот – додаде Стојанче.

ВО УРИНАТА НА СТОЈАНЧЕ ИМАЛО ПРИСУСТВО НА КОКАИН И ДИЈАЗЕПАМ Обдукцијата покажала дека Ивана имала модрици една недела пред смртта

The post СТОЈАНЧЕ ТВРДИ ДЕКА ИВАНА ГО ИЗНЕВЕРУВАЛА СО МАРТИН Вели дека самата излегла од возилото ноќта на автопатот appeared first on plusinfo.mk.

Обвинителката Адела Бојчевиќ на денешното продолжение на судењето на обвинетиот Стојанче Јовановски во Кривичниот суд изведе повеќе материјални докази, меѓу кои и видеоснимки на кои се гледа неговата покојна сопруга Ивана Јовановска како плаче и го обвинува дека ја тепал.

Ивана Јовановска си го одзеде животот на 2 март 2026 година со скок од 6. кат од станот каде живеела со насилниот сопруг во скопската населба Тафталиџе, а притоа со себе во смрт ја однесе и нивната 6-годишна ќерка Катја.

На Стојанче Јовановски му се суди за 3 кривични дела: Телесна повреда, Загрозување на сигурноста и за Наведување и помагање во самоубиство.

На првата снимка, направена од телефонот на Јовановски на 10 февруари годинава, Стојанче ја снимал Ивана непосредно откако таа го пријавила на 112 за семејно насилство.  Се гледа Ивана како стои во ходникот пред вратата од нивниот стан и му зборува на Стојанче плачејќи, со скрстени раце, како да се брани. Му вели: „Не ме удирај веќе“, по што се држи за главата и плаче. Стојанче одговара: „Добро, не те удирам“. На тоа Ивана му одговара: „Зошто ме удираш, зошто ме удри, ајде кажи ми?“. Стојанче се смее.

Ивана повторно му вели: „Зошто ме удри?“ и со левата рака се држи кај бубрезите. Стојанче се обидува да ја отвори вратата пред која стои Ивана и се смее, ја исмева Ивана и ја имитира со зборовите: „Еве кај ме удри“. Ивана му кажува дека го пријавила за семејно насилство.

Во еден момент Ивана му се обраќа: „Дрогата ти го исуши паметот, се утепа од дрогирање, со дрога во гепек те фатија, глумиш дека не е твоја зашто не ти се оди во затвор“.

На тоа, Стојанче ја обвинува сопругата дека заедно со Мартин Саздов му ја подметнале дрогата во неговиот автомобил. Ја навредува со погрдни зборови.

На втор видеозапис се гледа дека Ивана стои во ходникот пред вратата со Стојанче и се расправаат. Таа е видно вознемирена и плаче, а Стојанче цело време ја снима и се смее. Стојанче ѝ вели на Ивана „да му се тргне“, на што таа му одговара со плачење: „Што да ти се тргнам, што ме тепаш цело време?“.

Ивана ја поткрева блузата и пак ја спушта и му вели: „Сега викна полиција и чекај си ја, да им кажеш што имаш направено, зашто ме истепа и ми викна полиција“.

Потоа му се обраќа со зборовите: „По бубрези ме маваш зашто сам ми имаш кажано дека татко ти мавал по бубрези кога бил полицаец, за да не се познава. А по скали што ме бутна во болница пред сведоци, што сакаше да ме убиеш и што те пријавив? Колку пати ме имаш тепано? Во систем колку пријави има дека има семејно насилство од твоја страна“, вели Ивана.

Обвинителството презентираше и две видеоснимки од моментот кога Стојанче Јовановски заедно со Мартин Саздов и Ивана Јовановска пристигнуваат кај Кривичниот суд со возилото на Саздов на критичниот ден околу 11.30 часот, што е два часа пред самоубиството. Се гледа како обвинетиот Јовановски гестикулира со рацете, вика и ѝ објаснува нешто и ја удира Ивана со шлаканица. Камерата што го снимила инцидентот е од катната гаража „Судска палата“, а присутен на настанот е и Мартин Саздов. Ивана се јавува да повика полиција. Полицајците пристигнуваат и разговараат со Мартин, Ивана и со Стојанче. По разговорот, потпишуваат некакви документи. Потоа сите тројца влегуваат во возилото и заминуваат.

На втората снимка во близина на судот, Ивана пак повикува полиција.

Обвинителството презентираше и вешт наод и мислење во кое еден психолог и еден психијатар утврдиле јасна и директна причинско-последична врска меѓу долготрајното семејно насилство на Стојанче Јовановски и психичката состојба на Ивана Јовановска.

Обвинителството на Судот му достави и податоци извлечени од мобилниот телефон на Стојанче Јовановски, договорот за дар на станот, обдукциските извештаи од телата на Ивана и на Катја, извештаи од Центарот за социјални работи Скопје, документација од Клиниката за дигестивна хирургија, извештаи од претресот на станот итн.

The post „МЕ УДИРАШ ПО БУБРЕЗИТЕ ЗА ДА НЕ СЕ ПОЗНАВА, ОТИ ТАКА ТЕ НАУЧИ ТАТКО ТИ ПОЛИЦАЕЦОТ?“ Дрогата ти го исуши паметот, му вели Ивана на Стојанче appeared first on plusinfo.mk.

Обвинителката Адела Бојчевиќ продолжи со изведување докази против Стојанче Јовановски, кому му се суди за 3 кривични дела извршени врз неговата сега покојна сопруга Ивана Јовановска, која се самоуби со фрлање од 6 кат од нејзиниот стан, при што во смрт ја понесе и нивната 6-годишна ќерка Катја.

Бојчевиќ рече дека во доказите има записници, поплаки, анализи на снимки, записник од полиција за сите настани во кои се инволвирани Ивана и Стојанче, повеќе пријави од граѓани, меѓу кои и пријава од 20.12.2025 година дека машко лице се обидело да убие женско лице. Меѓу доказите се и лекарски извештаи од ТОАРИЛУЦ и од Психијатрија, извештај од училиштето „Јохан Хајнрих Песталоци“, анализа од вештачење мобилни телефони, како и дигитален запис од увид, односно, фото-албум од увидот со 51 фотографија со вознемирувачка содржина од настанот од 2.3.2026 година. Беше изведен и извештај од прегледани видео-записи од кафе-барот „Сома“ пред зградата на улицата Теодосиј Гологанов, кој беше презентиран во судницата.

– Едното видео трае 5 минути, од 2.3.2026 година во 14.05 часот. Се забележува како на бетонската подлога пред кафе-барот од горе паѓаат две лица, при што едно лице паѓа директно на подлогата, а другото при падот се одбива и се приближува кон лево на бетонската подлога. Неколку секунди подоцна до двете тела се приближува машко лице, видно во паника, се фаќа за главата. Ќе се гледа и видео од внатрешоста на кафулето, каде седат гости, на кое наеднаш се слуша звук, трескот. Се забележува како гостите стануваат од масите, вознемирени се и гледаат кон надвор, кон плочникот, каде паднале двете лица. Потоа се забележува паника и се слушаат пискотници – ја опиша обвинителката снимката и го пушти видеото од внатрешноста на кафе-барот „Сома“, на кое присутните во судницата го видоа моментот кога едно лице треснув на земјата со силен звук, веднаш пред кафе-барот.

Обвинителката потоа изведе како доказ службена белешка од 2.3.2026 година од прегледан видео-запис од училиштето „Нова“, на улицата Прашка.

– Ова видео трае 20 минути, а на него се гледа улицата Прашка. Во реално време од 11.6 часот се забележува како возило БМВ заминува од Карпош кон Центар. По една минута се гледа како Стојанче доаѓа пеш и застанува со Ивана на тротоарот пред училиштето. По една минута Стојанче ја удира Ивана силно по лицето, Ивана се повлекува и се затресува. Продолжуваат да се расправаат, Ивана се држи за лицето и седнува на оградата. Во 11.09 минути Ивана станува, се држи со едната рака по лицето, продолжуваат да се расправаат. По 1 минута се гледа како доаѓа возило БВМ, во сопственост на Мартин Саздов. Тој излегува, па сите тројца стојат до возилото и разговараат. Потоа Стојанче повторно ја удира Ивана со десната рака со шлаканица од десната страна од лицето, а нејзината глава се трга на страна од силината на ударот. Мартин застанува меѓу нив и го тргнува на страна Стојанче. Го фаќа за рацете за да престане да ја удира. Стојанче е видно вознемирен и зборува, објаснува нешто. Продолжуваат да разговараат, Стојанче прави некакви гестикулации, а Мартин повторно застанува меѓу нив. Но, Стојанче повторно ја удира Ивана со десната рака, со шлаканица по десната страна на лицето. Мартин се обидува да го оттргне Стојанче. Продолжуваат да се расправаат. Стојанче е видно агресивен, мафта со главата и нешто држи во рацете, најверојатно телефон. Потоа се качуваат во возилото. Ивана се обидува да влезе во возилото, а Мартин се обидува да ја спречи. Но, Ивана му ја трга раката, го бутка и влегува во возилото на задното седишта. Потоа тој низ отворена врата нешто ѝ зборува. Стојанче седнува напред, на совозачкото седиште. Во 12.07 часот возилото тргнува кон улицата Лондонска, односно, во насока кон студентскиот дом „Гоце Делчев“ – рече обвинителката.

Таа изведе докази и од камерите на Сејф сити.

– Се презентира пдф фајл, каде се гледа движењето на БМВ-то на 2.3.2026 година – рече обвинителката и презентираше каде се движело возилото на сведокот Мартин Саздов на критичниот ден.

И СТОЈАНЧЕ ЈА ПРИЈАВИЛ ИВАНА ДЕКА ГО ТЕПА Презентирани аудио снимки со вознемирувачка содржина

ИВАНА ГО ПРИЈАВИЛА СТОЈАНЧЕ ДЕКА ЧУВА ДРОГА ВО СТАНОТ Соседите пријавувале семејно насилство и дете како плаче и вреска

The post ОБВИНИТЕЛСТВОТО ПРИКАЖА ВИДЕО НА КОЕ СЕ ГЛЕДА КАКО ИВАНА ПАЃА ПРЕД ЗГРАДАТА Фотографиите од увидот по трагедијата не беа прикажани во судницата appeared first on plusinfo.mk.

Во продолжението на денешното рочиште против Стојанче Јовановски обвинителката Адела Бојчевиќ презентираше 9 фајлови кои се однесуваат на пријави, а пријавители се обвинетиот Стојанче, покојната Ивана, мајката на Стојанче, мајката на Ивана, како и други граѓани кои пријавиле малтретирање и тепање. Обвинителката најави дека ќе ги презентира хронолошки.

– Првиот запис е од 29.6.2025 година во 21.20 часот, пријавител е Ивана Јовановска. Се слуша како Ивана, многу вознемирена, со викање се јавува на 192 и вели дека сака да го пријави нејзиниот сопруг кој ја тепа. По гласот се слуша дека е многу вознемирена. Објаснува дека се наоѓа во Чаир, не ја знае адресата каде е, а сопругот не ѝ ја кажува адресата. Бара да ја најдат по локацијата на телефонот. Операторот ја упатува по локација да се јави на 112. Во позадина се слуша друг женски глас кој вика, „Ивана“ – рече обвинителката и го пушти аудиозаписот.

Во следниот презентиран аудио запис од 29.8.2025 година во 13.53 часот, пријавител е Љубица Стојановска, мајката на Ивана.

– Се слуша Љубица Стојановска, мајката на Ивана, со трепет во гласот и вознемирена, се јавува во полиција и пријавува дека ќерка ѝ Ивана е во бракоразводна постапка и има мака. Кажува дека Ивана отишла во станот да земе некои работи и дека таму бил сопругот Стојанче. Пријавува галама и дека Стојанче ја тепа. Додава дека не му е прв пат да ја тепа Ивана. Ја дава адресата на станот, улица Теодосиј Голаганов, ама не се сеќава на бројот на зградата и вели 59. Објаснува дека е бела зграда на 6. кат. Му вели на операторот дека и на 19-20 јануари во 1 часот ноќе комшиите пријавиле малтретирање. Му вели на операторот дека не може да ја добие Ивана и е загрижена. За цело време пријавителката Љубица е многу вознемирена и плаче, тешко зборува и се издишува и неколку пати повторува дека не му е прв пат на Стојанче да ја тепа нејзината ќерка – рече обвинителката и ја пушти аудио снимката.

Следниот аудио запис што го презентираше обвинителката е од сведокот Ивана Белчева од 19.12.2025 година во 13.02 часот.

– Се јавува пријавителката на 192 видно вознемирена, со трепет во гласот. Вели дека е кај „Тинекс“ во паркот кај вовчето во Ѓорче Петров.Вели дека маж и жена кои не ги познава се тепаат пред детето. Пријавителката вели дека го зела детето во раце за да не гледа, ама тие го зеле и сакале да си одат. Вели дека таткото ја тепа мајката пред детето. Ги моли полицајците што побрзо да дојдат – рече обвинителката и го пушти аудио записот од пријавата.

Беше презентиран и фајл, во кој пријавител е мајката на Стојанче, Цветанка Јовановска, од 20.12.2025 година, 19.05 часот.

– Овде цело време се слуша Катја како гласно плаче. Пријавител е женско лице кое тешко дише, како да собира сила. Цветанка пријавува дека настанот се случува на Теодосиј Гологанов 96. Во позадина се слуша плачењето на Катја што е толку гласно што Цветанка не се слуша што зборува. Катја силно плаче и вели „ќе ја убие мама“. На прашање на операторот што има таму, Цветанка одговара обид за убиство. Катја го засилува плачот и викањето и со силен глас вика „татко ми ќе ја убие мајка ми“. Цветанка пријавува дека детето е многу потресено и го зела детето со себе. Додава дека и детето е тепано, удирано. Катја низ плач вели „и мене ме удри и мене ме удри“ – рече обвинителката и го пушти аудио записот, кој беше исклучително вознемирувачки.

Обвинетиот Стојанче Јовановски по ова стана од местото во судницата и дофрли нешто, а судијата го опомена да не дофрла.

Обвинителката продолжи со изведување аудио запис во кој пријавител е обвинетиот Јовановски. Записот е од 10.2.2026 година, 17.03 часот.

– Се слуша како Стојанче ја пријавува Ивана за семејно насилство. Пријавува дека неговата жена го малтерира и не го пушта од дома. Пријавува дека Ивана му се заканува дека ќе го тепа и дека самата ќе се претепа. Вели дека настанот се случува во станот каде живеат. Му кажува на операторот дека Ивана и претходно го удирала неколку пати, ама досега не ја пријавувал. Додава дека е во тек постапка за развод и дека сè уште живеат заедно – вели обвинителката.

Следниот прикажан ауди фајл беше од критичниот ден, наутро, на 2.3.2026 година. Пријавител е Ивана Јовановска.

– Се слуша само како Ивана и Стојанче се расправаат на висок тон. Стојанче вели „Кажи ја вистината“. Во еден дел е неразбирливо, па Ивана му вели дека ја кажува вистината – рече обвинителката.

И во следниот презентиран запис пријавителка е сега покојната Ивана Јовановска. Пријавата е од 2.3.2026 година, 11.25 часот.

– Се слуша расправија, викање меѓу Ивана и Стојанче. Ивана за цело време му вика, „не те местам“. Го прашува „зошто ми се закануваше сега бе“? Стојанче ѝ вели „сакаш ли да те однесам во станица да пријавиш“. Ивана пак го прашува „зошто ми се закануваш, ништо ти немам направено, не сум рекла, не сум рекла“. Стојанче почнува да вика „нема шанси, лажеш“ и се слуша како ја удира Ивана. Таа почнува да вика „престани да ме удираш, престани да ме удираш“. Стојанче уште погласно вика „не лажи“. Ивана за цело време се брани „дали јас те имам наместено, дали ти реков дека Мартин те има наместено, немам кажано такво нешто. Сѐ што имаш направено си имаш направено сам“. Цело време таа го повторува ова. Ивана му вели „сакаш ли да одиме во Пролеќе, а ако сакаш да одиме кај Трајче“. Стојанче со висок тон ја прашува „што сакаш?“. Таа му вели „сакам да живеам со тебе“. Му вели „не ме мавај, не ме мавај“. Стојанче прашува „дали ти се закануваше?“. Ивана одговори „да, ми се закануваше дека ќе ми го уништиш животот“. Стојанче вели „ќе ти го уништам животот“. Ѝ вика на Ивана, „ниту Катја ќе ја видиш, ништо нема да видиш. Ако сакаш пријави ме, кај сакаш иди. Ќе лежам во затвор, ќе излезам“. Потоа ѝ вели „подобро убиј ме“. И пак го повторува истото. Потоа ѝ вели „друго немаш избор, памти ми го ова“ – рече обвинителката, по што го пушти исклучително вознемирувачкото аудио, снимено неколку часа пред самоубиството на Ивана.

На аудиото Ивана силно и вознемирено се дере на сиот глас, гласно се дере и Стојанче и се слуша како ја удира Ивана.
На ова аудио, во траење од околу 2 ипол минути, се слуша и операторот кој неколку пати повтори „Ало, полиција“, ама никој не му се обрати.

Во еден момент додека се презентираше снимката обвинетиот Стојанче рече во судницата „Мартин е ова“, по што судијата го опомена дека ќе го отстрани од судницата.

Одбраната реагираше дека на снимката се слушаат тројца. Обвинителката додаде дека на крајот од снимката се слуша како Стојанче вели „ќе ве тепам и тебе и него“.

Обвинителката потоа презентираше уште една пријава од Ивана Јовановска од критичниот ден во 12 часот.

– Ивана се јавува на 192 и кажува дека сака да пријави семејно насилство. Таа е вознемирена и е на раб да заплаче. Кажува дека се наоѓа пред судот и дека пред малку разговарала со полициски службеници на кои им рекла дека не сака да пријави, ама сега сака да пријави. Рече дека сопругот Стојанче е со неа. Додава дека е на паркинг кај Судска палата и ако може полицијата побрзо да дојде – рече обвинителката.

Последниот прикажан фајл во судницата е од критичниот ден кога Стојанче бара да се викне брза помош.

– Пријавител е Стојанче Јовановски, на 2.3.2026 година во 14.04 часот. Стојанче, многу вознемирен, низ викање бара да се прати брза помош на Теодосиј Гологанов 96, каде, како што вели, жена со мало дете се фрли од балкон. „Ве молам, мало дете“, повторува – рече обвинителката и го пушти записот на кој се слуша како Стојанче вика брза помош и многу силно вреска.

ИВАНА ГО ПРИЈАВИЛА СТОЈАНЧЕ ДЕКА ЧУВА ДРОГА ВО СТАНОТ Соседите пријавувале семејно насилство и дете како плаче и вреска

The post И СТОЈАНЧЕ ЈА ПРИЈАВИЛ ИВАНА ДЕКА ГО ТЕПА Презентирани аудио снимки со вознемирувачка содржина appeared first on plusinfo.mk.

Поради изнесување вознемирувачка содржина во доказите обвинителката Адела Бојчевиќ побара внимателен и одговорен пристап во известувањето на јавноста, за да не дојде до дополнителна виктимизација на жртвите во процесот против Стојанче Јовановски, чија сопруга Ивана Јовановска се фрли од 6. кат во скопската населба Тафталиџе на 2 март 2026 година, понесувајќи ја во смрт и нивната 6-годишна ќерка Катја.

На денешното рочиште во Кривичниот суд се изведуваат материјални докази против Јовановски од страна на Јавното обвинителество. На Јовановски му се суди за 3 кривични дела: Телесна повреда, Загрозување на сигурноста и за Наведување на самоубиство и помагање на самоубиство. Според обвинението, Стојанче со тепање и малтретирање, со сурово и нечовечко постапување, создал чувство на страв и безнадежноост кај Ивана, која без да ги контролора своите постаплки, скокнала од станот со малолетното дете.

Обвинителката како докази изведе известувања од МВР, оддел за крвни деликти, записникот од увидот на местото на трагедијата, изготвен на 3.3.2026 година, како и презентација на аудио записи од ЦУК. Таа најави презентација на аудио записи од 2024, 2025 и од 2026 година.

– Во цедето од 2024 има фотографија од пријава во системот, во која се гледа пријавител на настан, Цветанка Јовановска, мајката на Стојанче, пријавата е од 30.6.2024 година. Вториот фајл е аудио, се јавува сосетка која пријавува вознемирување што доаѓа од станот до неа на улицата Митрополит Гологанов 96. Кажува дека има бучава, галама, дека мало дете плаче и вреска. Дали се тепаат, таа не знае и сака да остане анонимна – рече обвинителката и го пушти аудио записот пред Судот.

Обвинителката Бојчевиќ потоа презентираше докази од 2025 година.

– Во овој фолдер е фотографија од пријава во систем од анонимен пријавител на 21.1.2025 година во 1 часот и 8 минути. Вториот фајл е запис од таа пријава, од машко лице кое бара да остане анонимен, се јавува од Теодосиј Гологанов 96 и вели дека во соседниот стан комшиите се дереле, а жената дошла кај нив и кажала дека сопругот ја тепа и дека таа сега е кај нив дома – рече обвинителката.

Потоа таа презентираше два аудио записа од 15.10. 2025 година. Во едниот Ивана бара помош на 112 за да влезе во станот, а во другиот Ивана го пријавува Стојанче дека тој во станот чува дрога.

– Се слуша како се јавува Ивана Јовановска и го прашува операторот каде треба да се обрати кога некој ѝ го има заклучено станот и не ја пушта да влезе. Прашува каде да се обрати да ѝ го отворат станот во кој живее. Операторот ѝ вели да се обрати во Куќниот совет, а ако не добие помош, ќе викнат пожарникари. Ивана вели дека Куќниот совет нема клучеви и бара да ја поврзат со полиција. Операторот пак ѝ вели да се јави во Куќниот совет, а потоа ќе викнат пожарникари да ја скршат вратата. „Значи пожарникарите ќе ја скршат вратата“, прашува Ивана и додава дека нема проблем со тоа – рече обвинителката.

Бојчевиќ презентираше и аудио запис за пријава за дрога.

– Во овој фајл Ивана на 112, го пријавува Стојанче дека чува дрога, а тој во тој момент е заклучен во станот и не ја пушта да влезе. Вели во мојот стан сопругот чува дрога. Оператотот бара податоци за пријавителот, а таа бара да ја поврзат со полиција. Таа потоа се обраќа до Стојанче, кој е внатре во станот „Ќе отвориш или да те пријавам“, по што се исклучува – рече обвинителката.

Процесот го води судијата Ивица Стефановски.

The post ИВАНА ГО ПРИЈАВИЛА СТОЈАНЧЕ ДЕКА ЧУВА ДРОГА ВО СТАНОТ Соседите пријавувале семејно насилство и дете како плаче и вреска appeared first on plusinfo.mk.

Александар Стојановски, брат на покојната Ивана Јовановска, денеска сведочеше за оставинската постапка, за делбата на имотот и за односот со обвинетиот Стојанче Јовановски. Тој рече дека не е убеден дека сестра му доброволно се враќала кај Стојанче, туку дека била уцената. Исто така, рече дека некои нејзини чекори биле чудни и неразбирливи за нејзиното пошироко семејство.

На прашање на обвинителката Адела Бојчевиќ тој го опиша односот меѓу покојната Ивана и обвинетиот Стојанче и рече дека во почетокот имал сознанија дека сѐ е во ред освен „мали кавги и недоразбирања што се нормални во брак“.

– Пред да се земат, имавме заеднички пријатели и познаници. Откако стапија во брак, тие заеднички пријатели постепено се губеа, веќе не се дружеа со мојата сестра. Сестра ми беше порано многу социјална, се дружеше. Заедно со мене почна да волонтора во Црвен крст, беше дружељубива. На крајот на 2024, почетокот на 2025 година забележав промена во нејзиното однесување, особено во нејзините пораки на социјалните медиуми. Во тој период ми кажа дека има мали проблеми што ги решава и дека сѐ ќе биде како што треба. Од почетокот на 2025 до август, престана да ми испраќа фотографии од Катја. На целото семејство ни стана сомнително дека нешто се случува. По настанот на автопатот во Штип, Ивана и Катја дојдоа да живеат во станот на мајка ми и тогаш Ивана почна да ни раскажува. Ми се довери дека има сериозни проблеми и ѝ треба помош да ги реши. Татко ми ангажираше адвокат за да почне бракоразводна постапка. Ивана ми се довери за станот. Рече дека се сомнева дека обвинетиот има направено фалсификат и дека без нејзина согласност го префрлил станот на свое име. Ивана не била на нотар. Ова го знаеше и адвокатот што го ангажираше нашиот татко. Таа рече дека има доказ и дека ќе му го даде на адвокатот, ама тоа не се случи. Рече дека има и дополнителни докази за некои активности на обвинетиот во нејзиниот телефон и дека се плаши. Ѝ реков да ги извади од телефонот, да ги стави на УСБ и да ни ги даде на мене и на адвокатот, оти од тој момент сериозно се загриживме за неа – сведочеше братот на Ивана.

– Дали забележавте дека Ивана се плаши од сопругот? – праша обвинителката.

– Да, во неколку наврати. Еднаш кога Стојанче сакаше да ја види Катја. Ивана не му забрануваше, ама јас ја видов како стои на тераса и се тресе од страв дека нешто може да се случи. Од моментот кога дојде кај нас, но и во јануари, кога се врати во нејзиниот стан, таа ја исклучи апликацијата Фејсбук, и повеќе не ја користеше. Најмногу комуницираше со нас физички, ни кажа на мене и на мајка ми дека телефонот ѝ е контролиран, дека Стојанче често ѝ го проверува, за да види со кого комуницира. Комуницираме само кога Ивана отиде во болница во јануари. Ивана ни покажа пораки во кои Стојанче ѝ се заканува за некои 5.000-6.000 денари кои му фалеле. Беше решена да го пријави во полиција за закани. По неколку дена Стојанче беше фатен со дрога. Тогаш Ивана, на наше чудење, реши да се врати со Катја кај него дома. Тоа не можевме да го разбереме – рече братот на Ивана.

Тој рече дека во неколку наврати ѝ помагал на Ивана со позајмици, но дека стравувал дека парите ќе се искористат за адвокат за Стојанче во случајот со дрогата. Тој додаде и дека кога било во болница Ивана, вршеле притисок да ѝ се направи да се направи колоноскопија за да се види дали повредата е од удар, бидејќи се сомневале дека болката во стомак е од тепање.

Тој рече дека Ивана му рекла дека Стојанче имал пиштол и дека ѝ се заканувал со Катја и со станот.

Во периодот кога починал татко им, Александар рече дека Мартин Саздов им помогнал околу погребот и бил со нив.

– Како брат почувствував потреба да го довршам тоа што го почна татко ми и се активираше барањето за развод, а Катја и Ивана да останат кај мајка ми во станот. Ивана ни кажа дека Стојанче ѝ се закнувал дека ќе ѝ го земе станот. Ѝ побарал 30.000 евра да го исплати и да си оди. Сестра ми побара да ѝ помогнам. Се согласив, ѝ реков дека тоа треба полека да го решиме, ама мора да бидеме сигурни дека нема да биде измамена, парите да ѝ се земат и ништо друго да не се случи – рече Александар.

Тој рече дека пробувале да ја разубедат Ивана во врска со станот, дека таа размислувала да ги доуреди собите за да живеат со Катја кај мајка ѝ и дека и Катја била расположена за тоа.

– Кога Стојанче почна почесто да ја гледа Катја, таа почна да се затвора, да не ни се доверува, на моменти ни велеше „вие многу сакате се да знаете“. Почна да ѝ зборува на Ивана „зошто ти не сакаш да се смириш со мојот татко?.“ Почнавме да се сомневаме дека тоа е резултат на влијание од Стојанче – додаде тој.

Во врска со оставинската постапка за имотот на нивниот татко, сите четворица наследници усно се согласиле целиот имот да се префрли на мајката. На неколку закажани средби кај адвокат и кај нотар Ивана не дошла. Таа рекла дека се консултирала со адвокати и дека нема да има никаков проблем ако не се разведе во моментот, дека Стојанче нема никаква шанса да земе од тој имот. Потоа продолжиле со оставинската постапка и планот за делба на четири дела.

На закажаниот термин на нотар Ивана повторно не се појавила.

– Не ми креваше на телефон, почнавме да си пишуваме пораки. Се случуваше нешто чудно, оти тоа не беше начинот на комуникација на Ивана. Ѝ реков дека треба да завршме, да не се оддолжува процесот, а во порака добив одговор дека таа преку суд ќе среди сите еднакво да ги добиеме деловите, дека не може вака и дека ќе се слушнеме преку адвокати. Дека Ивана треба да ја земе колата од татко ми. Така сфатив дека тоа го пишува некој друг, затоа што сестра ми веќе знаеше дека ќе го поделиме имотот на 4 дела, а колата ќе ја земе мајка ни, а пораките беа како некој прв пат да слуша за тоа. Ова ми дојде многу сомнително – рече Алексаднар.

Дента кога требало да одат на нотар, Ивана не дошла, но Стојанче му се јавил на Александар и му се заканувал дека ќе го запали имотот на мајка им.

– Дали ја прекинавте постапката за оставина? – праша обвинителката.

– Да. Сфативме дека ако продолжиме мојата сестра ќе биде во голем ризик со нејзиниот дел што ќе ѝ припадне, да располага некој друг. Вратата на станот на мајка ни во секој момент беше отворена за сите деца да се вратат дома ако имаат проблем – рече Александар.

Адвокатот на обвинетиот Јовановски го праша Александар дали Ивана доброволно се враќала кај Стојанче?

– Не. Покрај сите овие работи и уцени и закани и стравот за Катја, особено кога беше во болница и постојано ја бараше Катја, јас не сум убеден дека сестра ми доброволно се враќала кај Стојанче – рече Александар.

Тој одговори дека заканите на Стојанче дека ќе го запали имотот не биле пријавени во полиција.

– Не се пријавени. По приведувањето на Стојанче за дрога Ивана едвај чекаше тој процес да заврши, оти поради количината на дрога сметаше дека казната затвор ќе биде долга, па таа ќе биде послободна. Ние не сакавме дополнително да оптоваруваме, па затоа тие закани не се пријавени – објасни тој.

По ова сведочење јавната обвинителка го повлече предлогот да сведочи мајката на Стојанче, Цветанка Јовановска, оти смета дека веќе се расветлени потребните факти, па нејзиното сведочење нема дополнително да придонесе за доказната постапка.

На следното рочиште ќе се изведуваат материјални докази.

The post БРАТОТ НА ИВАНА Е УБЕДЕН ДЕКА ТАА СЕ ВРАЌАЛА КАЈ СТОЈАНЧЕ ПОРАДИ ЗАКАНИ И УЦЕНИ Оставинската постапка била прекината поради ризик Стојанче да располага со делот на Ивана appeared first on plusinfo.mk.

Наставничката на Катја Јовановска сведочеше денеска во судот. Таа рече дека на првата родителска средба не биле присутни родителите на Катја, Ивана и Стојанче, туку мајката на Ивана. Мајката на Ивана со плачење ѝ рекла дека Ивана не е состојба да дојде поради семејно насилство што го трпи дома. Наставничката го известила училишниот психолог за тоа.

– Психологот ми даде насоки да ја следам ученичката. По некој ден, девојчињата си играа и забележав дека Катја падна на подот. Ги прашав дали играат некоја игра или прават драматизација на некоја приказна. Катја рече дека татко ѝ кога ја удирал мајка ѝ, таа така паѓа. Веднаш го известив психологот и таа разговараше со Катја. Катја ѝ рекла дека нејзините родители се разведени и дека таа е со мајката. Психологот ја повика на разговор Ивана и ја упатила Ивана каде да се обрати во случај на семејно насилство. Понатаму се изгледаше дека е во ред. На почетокот кога ја учевме темата „кој сум јас, кое е моето семејство“, Катја ја црташе само мајката. Кога ја прашав зошто, рече „јас сум со мама“. Катја се однесуваше како и сите други деца. Не покажуваше потиштеност, не покажуваше вознемиреност или затвореност. Беше отворена со сите ученици, изгледаше среќно, другаруваше со сите и не помисливме дека нешто се случува во семејството. Нејзините цртежи секогаш беа ведри, со убави бои, лицата на луѓето и сонцето ги црташе насмеани. Така беше сѐ до пред Нова година. На крајот на октомври во училница влезе татко ѝ на Катја, јас реков дека не е дозволено родители да влегуваат и училница. Тој се претстави, Катја кога го виде се израдува. Учениците сите му пријдоа и му дадоа комплименти дека е многу дотеран. По неколку минути влезе и Ивана и заедно заминаа – сведочеше наставничката.

Таа рече дека Катја од училиште најчесто да ја носела мајка ѝ или баба ѝ, а татко ѝ ниту еднаш. Најчесто ја земала Ивана, а еднаш вујкото на Катја.

На прашањето дали Стојанче доаѓал на училиште, таа одговори:

– Дојде уште еднаш, нервзоен, бараше број од родител на еден ученик за кој рече дека ја задевал Катја. Мојот совет беше дека тие се деца и дека ние имаме механизми да ги решиме проблемите меѓу децата, дека тоа се нормални, секојдневни…

– Дали бевте на работа на критичниот ден, 2 март? – праша обвинителката.

– Тој ден ја донесе бабата, влезе и ни го предаде ранцот. На пауза забележав дека Катја не го носи дуксерот од униформата, ја прашав, рече дека не знае, мајка ѝ веројатно го испрала. Беше облечена во блуза и во елек кои беа нови и на кои стоеја етикетите. Рече вчера бевме во шопинг со мама, беше многу среќна. Во 12 часот направивме примопредавање со колешката, јас си заминав. Колешката ми се јави вечерта околу 20 часот, вознемирена, затоа што една од родителите ѝ се јавила и ѝ рекла дека Катја и мајката се мртви. Ми рече дека Ивана ѝ се јавила околу 11.30 и ѝ рекла дека тој ден Катја од училиште ќе ја земе нејзината мајка. Но околу 13.30 Ивана била во училиштето, учениците биле надвор на физичко. По часот Ивана ја зела Катја. Сакам да додадам, секогаш кога мајка ѝ ќе ја земеше Катја, таа беше многу среќна. И тој ден двете биле среќни, се гушкале и се бацувале – рече наставничката на Катја.

The post НАСТАВНИЧКАТА ДОБИЛА НАСОКИ ОД ПСИХОЛОГОТ ДА ЈА СЛЕДИ КАТЈА На критичниот ден бабата требало да ја земе од школо, но дошла Ивана appeared first on plusinfo.mk.

Мартин Саздов денеска сведочеше дека во моментот кога Ивана заедно со Катја скокнала од терасата му се јавила на Стојанче со вклучена камера. Сведокот рече дека ја видел Ивана на камерата од телефонот како стои со Катја во рацете на терасата и сфатил што ќе направи. Почнал да вика да не прави глупости, но кусо потоа слушнал силен тресок.

Претходно Саздов раскажа што се случувало пред критичниот настан, на 2 март 2026 година.

Ивана цело време му пишувала на Мартин дека веќе не може да издржи, дека ѝ е многу тешко, дека не може да го поднесе Стојанче, дека е психички падната и многу исплашена.

– Ѝ се лутев што не си оди кај мајка ѝ. Еден ден пред 2 март, вечерта, Ивана ми пиша „Мартин, те молам не ме оставај, многу ми е тешко, не можам да го издржам ова.“ Но јас вечерта сум заспал и не сум ѝ вратил одговор на пораката. Утрото се облеков и отидов кај неа на работа, да ја видам, околу 10.30, во близина на училиштето Нова. Ја прашав дали бара помош од некој полицаец кого видов дека има заследено на Тикток. Таа негираше. Јас не верував, му се јавивме, јас го прашав дали Ивана му се жалела и барала помош, тој негираше. Ја замолив да оди кај мајка ѝ, ѝ реков не дај боже, еден ден ќе те убие. Таа велеше дека не може да го остави станот, дека ќе остане на улица, дека Катја си ја бара собата. Јас веќе не знаев што да направам, сакав да си одам и ѝ реков „ако ти треба нешто, побарај ме“. Таа сакаше да ме задржи. Ѝ реков да оди на работа, дека ќе зборуваме друг ден. Немаше минута-две, кога ми се јави  исплашена и рече „те молам врати се, Стојанче е тука“. Кога стигнав, Стојанче почна да ја тепа, почнав да го влечам, му реков да не ја удира – сведочеше Мартин.

Тогаш Стојанче му рекол дека Ивана му рекла дека тој го наместил. Ивана негирала. Потоа повторно почнал да ја тепа, а Мартин ги разделил.

– Му реков на Стојанче качи се во кола, да си одиме, а на Ивана ѝ реков да оди на работа. Ми беше страв да ги оставам таму. Стојанче влезе во возилото, влезе и Ивана. Ѝ реков да оди на работа, не сакаше. Го прашав Стојанче каде да го возам, ми рече да го носам во суд дека треба да се пријави. По пат ја навредуваше, на Партизанска почна да ја дави. Почна да вика „Немојте да мислите дека ви се плашам“. Се сврте, со колената се качи на седиште и почна да ја мава Ивана со боксови и да ја дави. Ивана се онесвести. Јас го влечев, застанав среде улица на Партизанска за да ги разделам. Се свртев да видам дали Ивана е добра. Стојанче ми рече „Остави ја, глуми, сега ќе ѝ го земам телефонот, ќе видиш како ќе стане.“ Почна да ѝ го влече телефонот, Ивана се освести. Стојанче почна да се смее и да вели „виде ли како глуми“. Стигнавме пред судот, не се сеќавам дали таму ја удри. Возилото го паркиравме зад судот. Ѝ реков на Ивана да земе такси и да си оди. Со Стојанче одевме кон судот, а таа одеше зад нас. Кога стигнавме кај скалите Стојанче сакаше пак да ја удри, му реков немој, ќе те пријави, ќе си направиш проблем. Ивана почна да кажува дека не рекла дека сум го наместил Стојанче за дрога. Се свртев, ѝ реков „добро, знам“ за да се тргне – рече Мартин.

Откако Стојанче се пријавил во судот, тргнале кон колата. Ивана стоела до возилото и зборувала на телефон. Кога стигнале, Ивана го избришала разговорот со кој контактирала. Стојанче ја прашал со кого зборувала, а таа рекла дека зборувала со мајка ѝ. Стојанче инсистирал да види, мислел дека го пријавувала во полиција. Ја навредувал. Ивана не сакала да му го даде телефонот, за да не ѝ го скрши.

– Ѝ реков дај ми го мене, нека види од мои раце. Виде дека нема ништо. Ивана рече дека сака да разговара со Стојанче насамо, отидоа на страна, јас стоев до колата. Тој пак почна да ја тепа, ја удри со двете раце одеднаш во главата. Јас се стрчав, го тргнав. Ивана го зеде телефонот, се јави во полиција и рече дека сака да пријави насилство. Стојанче ја навредуваше, ѝ рече „ништо не можеш да ми направиш“ и се смееше. Рече „ќе видиш со кого си имаш работа“. Ја навредуваше сѐ додека дојде полиција. Полицајците дојдоа, ја тргнаа Ивана на страна и разговараа, па го тргнаа и Стојанче на страна и разговараа. Полицајците им ги вратија личните катри и им рекоа на двајцата: решете си го проблемот. Ѝ реков на Ивана качи се во такси, оди на работа. Со Стојанче влеговме во кола, ми рече да го носам дома. Ивана одеше накај судот. Кога тргнавме, полицајците застанаа до нашето возило и рекоа да застанеме, зашто пак има пријава за закани. Ја викнаа Ивана, ја прашаа кој ѝ се заканувал, а таа молчеше. Полицајците почнаа да викаат „ако уште еднаш пријавиш ќе ѝ пишеме казна за лажно пријавување. Им реков да не ѝ пишуваат казна и да ја остават да си оди – сведочеше Мартин.

Ивана тргнала повторно накај судот, а Мартин и Стојанче влегле во кола. По една минута Ивана му се јавила на Мартин и побарала насамо да зборува со него. Стојанче не дозволил да зборуваат насамо. Мартин ја прашал дали сака да оди да си земе работи од дома и да ја носи кај мајка ѝ, а таа потврдиле. Само инсистирала прво да ја земат Катја од школо. Ја земале Катја и тргнале кон станот на улицата Теодосиј Гологанов. Стојанче по пат ѝ се заканувал на Ивана, ја навредувал, ја бркал од станот.

– Дали ѝ се заканувал бидејќи сметал дека е наместен за дрогата? – праша обвинителката.

– Да. Ѝ рече ќе видиш што ќе ти направам, Катја ќе ти ја земам. Ништо е ми можете, не ви се плашам на двајцата, ако одам во затвор, ќе излезам ќе те убијам. Ивана ми кажуваше дека и во претходните денови така ѝ се заканувал, дека ќе ја убие после затвор. Ѝ покажувал пиштол. Ми велеше „не знаеш каков психопат е, ќе нѐ убие.“ Јас ѝ велев, ќе решат институциите сѐ што треба. Кога стигнавме пред зградата, сакав да ги почекам долу, ама Стојанче ми рече да влезам во гаражата „Не може таа да оди сама во мојот стан, ќе ме намести нешто.“ Му реков „нека се качат да си земат работи, нема ништо да ти земе.“ Тој одговори „Не, нема да ја оставам сама, ќе се качиме сите заедно.“ Јас не сакав да се качам, ми беше непријатно, ама ми беше страв да ги оставам сами горе, па се качивме сите. Отклучија, јас стоев пред вратата, Ивана и Катја влегоа, Стојанче влезе по нив. Ѝ рече „земи што ти треба и губи се“. Ивана му одговори „Излези ти, јас само да го спакувам ранчето на Катја, да си одбере што сака да земе.“ Стојанче сакаше пак да ја урди, а Катја ја гушкаше Ивана за ногата. Го фатив за рака, го повлеков, тој рече „Оваа пак ќе ме намести, ќе ми остави нешто дома.“ Ѝ реков на Ивана „еве нека стои малку подотворена вратата, јас ќе бидам пред врата, земи си што треба.“ Ивана ја затвори и ја заклучи вратата. Не се слушаше ништо од станот, јас заѕвонив, прашав „како си Ивана“, рече „еве за 5 минути сме спремни.“ После ја отвори вратата, рече „јас не сакам да си одам, ќе легнеме малку со Катја да спиеме“. Му реков на Стојанче „ајде да се симнеме доле.“ Стојанче викаше „ќе видиш што ќе ти направам“, Ивана беше со Катја во раце, гушнати. Ѝ велеше ќе ја сменам бравата, ќе го земам станот, ќе ти ја земам Катја, не ти го враќам дарот. Ивана само се насмеа и рече „прави што сакаш“. Влезе и заклучи. Јас и Стојанче се симнавме доле. Мислев дека ќе се предомисли, дека ќе се симне. Јас во еден момент се посомневав да не направи нешто Ивана, му го реков тоа и на Стојанче. Тој рече „не, таа не се убива, не умира“. Ивана му заѕвони на Стојанче, нешто зборуваа. Го прашав што е, а тој рече дека не ја разбрал. Го стави телефонот во џеб. Претпоставував дека му рекла дека нешто ќе направи, а тој си го стави телефонот во џеб и го исклучил звукот. Таа пак му ѕвонела, ама тој го стишал телефонот и не чул. Ивана ми се јави мене, рече „можеш ли да му кажеш на Стојанче да се јави на камера“. Му се јави, Стојанче ја вклучи камерата. Јас ѕирнав, ја видов Ивана како стои со Катја во рацете на терасата и сфатив што ќе направи. Викав „Ивана, немој да си направила глупост.“ Потрчав кон влезот и слушнав силен тресок (сведокот почна да плаче). Истрчав да видам што се случува, ја видов Ивана во крв целата. Почнав да трчам, мислев Катја е горе, па ми текна дека е заклучено, па се вратив назад, а кога стигнав ја видов и Катја до нејзе. Викав ве молам викајте брза помош, не знаев што да направам – рече Мартин.

– Што направи Стојанче кога слушна тресок? – праша обвинителката.

– Почна да трча накај главата улица. Јас истрчав накај Ивана и Катја. Не отиде да ги види – рече сведокот.

Во тој момент се уфрли Стојанче и рече „Јас истрчав да барам помош, немав храброст да ги видам“.

The post ИВАНА МУ СЕ ЈАВИЛА НА СТОЈАНЧЕ СО ВКЛУЧЕНА КАМЕРА ПРЕД ДА СКОКНЕ ОД ТЕРАСА Саздов се посомневал дека Ивана ќе посегне по себе, но Стојанче го уверувал дека нема appeared first on plusinfo.mk.