Адвокатката Ивана Коцевска, која го брани Дејан Јованов, првообвинет за пожарот во дискотеката „Пулс“ во Кочани, на денешното рочиште побара Обвинителството по службена должност да поведе постапка поради заканите на родителите на загинатите кон нејзиниот клиент, како и јавноста да биде исклучена од судењето. Барањето е во врска со заканите на минатото рочиште, кога на барањето мерката притвор на Јованов да му биде заменета со куќен притвор поради здравствени причини, дел од родителите викнаа „Пуштете го Деко, ние ќе му пресудиме“, „Срамота“  и „Кучко“.

– Имајќи го предвид претходното рочиште, кога пред почетокот јас како бранител на првообвинетиот побарав укинување на притворот без притисок на јавноста, токму јавноста без никаква почит кон Судот упати закана кон Дејан Јованов и навреда кон мене. Јас бев фрапирана од таквото однесување на јавноста. Сега официјално поднесувам предлог за исклучување на јавноста од натамошниот тек на постапката, бидејќи судот е должен да воспостави ред во оваа судница. Судот е должен да ја исклучи јавноста поради реакции со кои се ускратува правото на обвинетите да ги бранат своите тези. Кај обвинетите постои впечаток дека се осудени уште пред завршување на постапката и дека има селективност во примена на мерките за обезбедување присуство – рече Коцевска.

Од јавноста во оваа постапка имаше директни закани кон првообвинетиот и барам тие да бидат исклучени, потенцира адвокатката Коцевска.

Таа наведе и дека на крајот на минатото рочиште родителите на загинатите ѝ го блокирале патот на излегување од паркингот пред судницата, поради што интервенирала полицијата.

– Јас сум тука да бранам клиент, а не да стравувам за мојата безбедност – додаде Коцевска.

Судијката Диана Груевска-Илиевска рече дека лицата за кои Коцевска бара исклучување не се јавност, туку оштетени во постапката и дека биле предупредени за однесувањето на рочиштето.

Таа нагласи дека досега ниедна закана не е нотирана во записник, без разлика од која страна е.

– Првин ќе се опоменува, потоа ќе се исклучува и ќе се казнува. Се знае кога се исклучува јавноста, а тие во овој период не се јавност, туку оштетени во постапката. Ако има потреба, може индивидуално да се исклучува – изјави судијката.

Во врска со инцидентот на паркингот, судијката рече дека се преземени мерки со измени во распоредот на паркингот.

Обвинителството реагираше на предлогот на Коцевска посочувајќи дека се знае кога и во кои околности се исклучува јавноста.

– Предлот е целосно неоснован, како незаконит. Исклучувањето на јавноста не се однесува на странките и на оштетените. Во конкретниот случај беше правилно постапено од судот и беше изречена усна опомена – изјави обвинителката.

Во врска со гонењето по службена должност поради заканите, обвинителката рече дека веројатно станува збор за забуна и дека треба да се имаат предвид интензитетот на заканите и реалната можност за нивното остварување, односно, дека заканите не се со таков интензитет за да има основ да се поведе постапка.

ЈО додаде и дека причините поради кои одбраната на Јованов бара исклучување на јавноста не се предводени во Законот за кривична постапка.

На денешното рочиште Судот соопшти дека Обвинителството дало негативно мислење на барањата за укинување на куќниот притвор на обвинетиот службеник од Министерството за економија, Беким Хаџиу и на мерката притвор на обвинетиот Тодор Јованов, брат на првообвинетиот. На ова реагираа бранителите на двајцата обвинети, кои рекоа дека однесувањето на Обвинителството ги преминало границите во однос на мерките за обезбедување присуство кое веќе преминува во казнување на обвинетите.

Одбраната на обвинетите Јане Јанчевски и Мартин Георгиев изнесе барања за укинување на мерката куќен притвор, посочувајќи дека повеќе не опстојуваат причините за неговото определување.

Обвинителството информираше дека добиле изјава од родителот на сведокот Дарио Трифунов, во која се вели дека тој е во странство и нема да присуствува на денешното судење, како и во блиска иднина, а притоа не оставил информација како да се стапи во контакт со него.

– Затоа предлагаме да се чита неговиот исказ даден во истрагата, бидејќи ова лице како сведок е недостапно на органите на прогон – рекоа од Обвинителството.

Судот информира дека добиле известување од МВР дека и сведокот Александра Пепеларовска не е достапна на органите на прогон.

Денешната расправа продолжува со сослушување на директорот на Институтот за судска медицина, Александар Станков, кој ќе зборува за обдукциските наоди на загинатите.

Обвинителството на минатото рочиште ги изведе обдукциските наоди и мислења од Институтот за судска медицина за причините на смртта на жртвите, како и медицинската документација за повредените.

Во пожарот во дискотеката „Пулс“ во Кочани на 16 март 2025 година, за време на настап на групата ДНК, загинаа 63, а беа повредени 222 лица.

За пожарот им се суди на 35 луѓе и на 3 фирми за Тешки дела против општата сигурност, а времето на извршување на кривичното дело е од 2012 година до денот на трагедијата. Обвинението го застапува тим од 15 јавни обвинители.

The post РОДИТЕЛИТЕ Ѝ ГО БЛОКИРАЛЕ ПАТОТ НА АДВОКАТКАТА НА ГАЗДА ДЕКО Коцевска побара да бидат гонети поради заканите дека ќе му пресудат ако оди во куќен притвор appeared first on plusinfo.mk.

Пуштете го, ние ќе му пресудиме, гневно реагираа денеска родителите на загинатите млади лица во пожарот во дискотеката „Пулс“ во Кочни откако на почетокот на рочиштето адвокатката на првообвинетиот, сопственикот Дејан Јованов – Деко, повторно побара ефективниот притвор да му биде заменет со куќен, поради влошената здравствена состојба. Бранителката Ивана Коцевска реагираше до Судот зошто сè уште нема одлука по барањето, иако било поднесено на 20 април.

– Барам Судот да покаже малку човечност и хуманост. Кој било друг човек да беше обвинет во ваква здравствената состојба немаше да продолжи во притворски услови и молам одлуката да биде донесена без пристрасност и без влијание од јавноста – рече адвокатката на Јованов.

Таа до Судот достави извештај од преглед што на обвинетиот Јованов му бил извршен вчера

Присутните родители реагираа жестоко.

– Срамота. Пуштете го, ние ќе му пресудиме – повикаа тие.

Коцевска побара ваквите изјави да бидат внесени во записник и родителите да бидат отстранети од судницата. Судијката Диана Груевска-Илиевска рече дека засега ќе даде само предупредување.

Во врска со предлогот Јовановски да биде пуштен од притвор Обвинителство рече дека дополнително ќе се произнесе писмено, со оглед дека одбраната доставила дополнителна медицинска документација. На ова Коцевска возврати дека предлогот е поднесен пред 8 дена и дека Обвинителството досега имало доволно време да ја разгледа медицинската документација,

Судот праша дали Обвинителството може да се изјасни во моментот.

– Обвинителството не може да даде позитивно мислење – рече обвинителот Борче Јанев.

Укинување на актуелната мерка куќен притвор побара и одбраната на обвинетиот Беким Хаџиу, исто така, поради нарушено здравје.

– Предлагам укинување на мерката куќен притвор за Беким Хаџиу поради нарушено здравје. Има хронична хипертензија, или висок крвен притисок кој не се спушта под 180 со 110, а има закажано и хируршки зафат. Поради ова, Хаџиу има препорака за дневни пешачења надвор. Предлогот е испратен до Кривичниот совет кој го одби предлогот, затоа се обраќам до Судечкиот совет кој ги има сите извештаи. Бараме определување на поблаги мерки, бидејќи нема опасност од бегство – рече одбраната.

Одбраната на Тодор Јованов, братот на Дејан Јованов-Деко побара да се укине притворот за него, бидејќи тој во целост дал исказ за сите прашања кои биле од интерес на истрагата.

– Ние дадовме и гаранции во кои негови пријатели дадоа под хипотека куќи. Во врска со опасноста од бегство, тој нема од што да бега. Тој има фамилија тука. Го молам Судот куќниот притвор да биде определен во Скопје, каде што неговата сопруга има престојувалиште – рече одбраната.

Одбраната на поранешниот директор на Дирекцијата за заштита и спасување (ДЗС), Шабан Салиу, побара да му биде укината една од актуелните пет мерки за претпазливост.

Пожарот во дискотеката „Пулс“ во Кочани избувна на 16 март 2025 година за време на настап на групата ДНК и претставува една од најтешките трагедии во поновата историја на земјата. Судењето го води судијката Дијана Груевска-Илиевска, а обвинението го застапува тим од 15 јавни обвинители.

ОБДУКЦИЈАТА ПОКАЖАЛА ДЕКА 59 ЖРТВИ ЗАГИНАЛЕ ОД ТРУЕЊЕ СО ЈАГЛЕРОД МОНОКСИД Презентирани причините за смртта по пожарот во „Пулс“

The post „ПУШТЕТЕ ГО ДЕКО, ПА НИЕ ЌЕ МУ ПРЕСУДИМЕ“ Родителите на загинатите во Кочани гневни поради барањето да оди во куќен притвор appeared first on plusinfo.mk.