За време на гостувањето во радио емисијата „Heart Breakfast“, принцот Вилијам зборуваше за неодамнешното патување на принцезата Кејт во Италија, што беше нејзино прво службено патување во странство по борбата со ракот. Но, освен нејзината вклученост во проекти поврзани со развојот во раното детство, нешто друго го привлекло неговото внимание.

– Не знаев дека зборува италијански – коментираше водителката Аманда Холден откако претходно, за време на нејзината посета на Реџо Емилија, принцезата од Велс им зборуваше на децата на италијански.

– Искрено, ниту јас – одговори принцот Вилијам со смеа, што го насмеа и колегата водител Џејми Тикстон. Тој додаде и дека неговата сопруга „очигледно го освежила своето знаење од пред доста време.

За време на нејзиниот дводневен престој во Италија, принцезата Кејт им се претстави на децата како „Катарина“, италијанската верзија на нејзиното име Катерина, и им зборуваше италијански.

– Зборувам малку италијански. Како се викате? Јас сум Катарина – им рече таа на најмалите за време на посетата на градското собрание во Реџо Емилија.

Британските медиуми потсетуваат дека Кејт студирала италијански јазик и историја на уметност во Фиренца за време на нејзината „година пауза“ во 2000 година, неколку месеци пред да го запознае принцот Вилијам на универзитетот во Шкотска.

Вилијам не криеше колку е горд на својата сопруга по нејзиното враќање на јавните должности.

– Многу сум горд. Таа помина низ многу во последните години и навистина се радуваше на ова патување во Италија. Мило ми е што сè помина толку добро – рече принцот за време на емисијата снимена на островот Скили.

Тој беше особено емотивен кога зборуваше за нејзината улога во семејството.

– Таа е неверојатна мајка и сопруга. Нашето семејство буквално не можеше да функционира без неа – рече Вилијам.

Кејт Мидлтон минатата година објави дека е на лекување од рак, што доведе до нејзино привремено повлекување од јавноста, а на почетокот на 2025 година потврди дека е во ремисија.

The post 🎥 ПРИНЦОТ ВИЛИЈАМ ИЗНЕНАДЕН ОД КЕЈТ „Не ни знаев дека зборува италијански!“ appeared first on plusinfo.mk.

За првпат во нашата земја од оваа учебна година во средното училиште „Никола Карев“ во Скопје почнува со работа билингвална паралелка на италијански јазик, каде учениците ќе го изучуваат италијанскиот јазик шест часа неделно и на крајот од четиригодишното школување ќе добијат сертификат Б2 за познавање на италијанскиот јазик.

– Навистина ми е драго што денеска, на 1 септември можеме да објавиме отворање на нова паралелка, билингвална на италијански јазик, за првпат во историјата на нашата држава – изјави министерката за образование и наука Мила Царовска по посетата на средното училиште „Никола Карев“.

Италијанскиот јазик ќе се изучува со два часа редовен и четири часа дополнителен курикулум.

– Ќе се изучуваат културата, книжевноста, уметноста и историјата. Учениците на крајот од четиригодишното школување ќе добијат сертификат Б2 за познавање на италијанскиот јазик, што многу лесно ќе им овозможи да се запишат на некој од универзитетите во Република Италија – рече директорот на училиштето, Андреј Манолев.

Во италијанската паралелка годинава се запишани 23 ученици во прва година, кои наставата ќе ја посетуваат во две смени.

– Голема благодарност до директорот на гимназијата, министерката за образование, Амбасадата на Република Италија, кои заедно со Градот Скопје овозможија да внесеме новина во средното образование, на нашите ученици – рече градоначалникот на Скопје Петре Шилегов.

Италијанскиот амбасадор Андреа Силвестри рече дека има зголемен интерес за изучување на италијанскиот јазик и култура во нашата земја.

– Во 2018 година Владата донесе закон со кој се овозможува италијанскиот јазик да се изучува во примарно учичиште, што е многу важно. Денес има речиси 2.000 ученици во примарните и секундарни училишта низ целата земја. Важно е дека има интерес и од учениците и од родителите – рече Силвестри.

The post ПРВА ПАРАЛЕЛКА НА ИТАЛИЈАНСКИ ЈАЗИК 32 деца се запишаа во овој клас во „Никола Карев“ appeared first on plusinfo.mk.