На граничниот премин Евзони, при влез во Грција, во саботата е уапсен 46-годишен државјанин на Македонија за кого италијанските власти имаат распишано европска потерница поради случај поврзан со трговија со дрога од 2007 година.

Според грчката државна новинска агенција АНА-МПА, италијанските власти преку европската потерница бараат негово екстрадирање во Италија, каде што треба да ја издржи изречената казна за трговија со 35 килограми кокаин.

Делото, според информациите содржани во европската потерница, наводно било извршено во 2007 година. Кокаинот бил внесен преку Шпанија, а потоа стигнал до Неапол, Италија.

46-годишникот бил уапсен од полицајци од областа Пеонија, откако влегол во Грција преку граничниот премин Евзони во Килкис.

По апсењето, тој се очекува да биде изведен пред Обвинителството при Апелацискиот суд во Солун, каде што треба да се спроведе европската потерница и да започне постапката за негово екстрадирање во Италија.

The post МАКЕДОНЕЦ УАПСЕН НА ЕВЗОНИ Италија го барала за случај со 35 килограми кокаин appeared first on plusinfo.mk.