Вечерва на платото пред Спортскиот центар „Јане Сандански“ во Скопје беше свечено затворен Европскиот младински олимписки фестивал – ЕМОФ 2025. Присутни беа спортистите од 48 европски земји, дел од 15 спортски дисциплини, кои во изминатите денови настапуваа на натпреварите во Скопје и во Куманово.

На церемонијата се обрати претседателот на Македонскиот олимписки комитет, Даниел Димевски, кој ја изрази својата гордост за успешната организација и истакна дека Македонија, иако мала, има огромно срце и љубов кон спортот.

– Вие сте сегашноста и иднината. Ви благодарам за пожртвуваноста, резултатите и спортскиот дух. Поставивте бројни олимписки, европски и лични рекорди и токму затоа ЕМОФ 2025 ќе остане запаметен. Горд сум што Македонија беше ваш дом оваа недела – порача Димевски.

Претседателот на Европскиот олимписки комитет, Спирос Капралос, им се заблагодари на сите спортисти, тренери, волонтери и организатори кои го направија Фестивалот спектакуларен.

– Со длабоки емоции го затворам ЕМОФ 2025. Покажавте дека спортот е многу повеќе од победа. Во оваа недела видовме фер-плеј, другарство и неверојатна енергија. Вашите настапи се следеа ширум Европа. Ви благодарам што ја направивте оваа манифестација посебна – рече Капралос.

Фестивалот, кој се одржа од 20 до 26 јули, помина во знакот на извонредни спортски достигнувања, меѓународно пријателство и безрезервна поддршка од публиката. Најуспешна нација беше Италија, која освои вкупно 50 медали, од кои 19 златни и токму таа ќе биде домаќин на следното, 19-то издание на ЕМОФ.

The post СВЕЧЕНО ЗАТВОРЕНИ ИГРИТЕ ЕМОФ 2025 Илјадници млади спортисти се збогуваа со Македонија appeared first on plusinfo.mk.