Претседателот на Владата Христијан Мицкоски ги отфрли обвинувањата дека постои некаков договор со државниот јавен обвинител Љупчо Коцевски.

– Тоа денеска го кажа пратеникот Апасиев на собраниската говорница, тој тоа го претстави како на ти го, дај ми го. Видете возможни се такви сценарија и таков тип на небулози кои што се шират, но работата е секогаш многу поедноставна од тоа како изгледа. Никој од нас не вели дека е задоволен од работата на Љупчо Коцевски, но ќе беше аматерски неиздржано ако ние во услови на еден ваков случај, на една ваква трагедија како што е овој, продолжиме со процесот на смена. Тогаш ние каква порака ќе испратевме? Дека ние игнорираме сè , игнорираме истрага и сè што е вклучено таму, за да реализираме некаква си наша цел. Не мислам дека тоа е политички искусно и умно – вели Мицкоски.

Во врска со обвинувањата од Апасиев, премиерот потенцираше дека Апасиев е далеку од тоа што се претставува.

– Тоа што јас денеска во Собрание го споменав е само континуитет на сите оние навреди, конструкции кои што овој политичар ги рефлектира, најчесто на социјалните мрежи или на собраниската говорница, каде ужива имунитет. И ценам дека ова е само почеток, ќе следат уште многу други работи, откривање на работи дека далеку се тие од тоа што се обидуваат на вештачки начин да се претстават, не само тој, туку и тие од неговото опкружување. Политичката партија Левица кон крајот на ноември 2024 година купува во центарот на Скопје деловен простор, тој призна дека е подрум и приземје, 420 метри квадратни, по цена со ДДВ 295.000 евра. Би рекол или е подарок заради остварување на некаква цел или договорот има и втор дел кој што ние не го гледаме, и затоа јас реков органите сето тоа да го проверат – нагласи Мицкоски.

Тој додаде дека метар квадратен вреди најмалку 3 пати повеќе од тоа што тие го платиле и што Град Скопје го проценува.

– Нели Левица беше против извршители, но извршители кога продаваат ваков тип на имот не им пречат. Па тој извршител кој што е за тој објект е истиот извршител на Соравиа кој што ќе се продава на лицитација таму некаде после 20 април. И двете имаат иста финансиска институција која ги обединува, а тоа е Првата инвестициона банка, банка која функционира во македонскиот банкарскиот систем, а е сопственост на бугарски бизнисмени – рече премиерот Мицкоски.

The post МИЦКОСКИ ГИ ОТФРЛИ ОБВИНУВАЊАТА НА АПАСИЕВ ЗА ДОГОВОР СО КОЦЕВСКИ Премиерот најави разоткривање на Левица appeared first on plusinfo.mk.

Владата ќе ја сопре постапката за разрешување на државниот јавен обвинител Љупчо Коцевски, најави денеска премиерот Христијан Мицкоски, во одговор на новинарско прашање. Тој рече дека е задоволен од добрата координација на Министерството за внатрешни работи и Јавното обвинителство што резултираше со 34 осомничени лица по пожарот во дискотеката „Пулс“ во Кочани.

Мицкоски потсети и дека освен за Кочани, каде загинаа 59 лица, а 200 се повредени, јавноста е чувствителна и на други случаи од минатото, па во овој период е важно како ЈО ќе се однесува кон нив.

– Во овој момент, имајќи ја предвид чувствителнатата ситуација во општеството, планираме постапката за разрешување да ја застанеме во онаа фаза во која сега се наоѓа. Цениме дека на обвинителите кои работат, особено во Кочани, треба да им дадеме шанса да сработат. Задоволни сме, има заедничка акција меѓу МВР и ЈО која резултираше со 34 осомничени лица. Случајот ќе се проширува, ќе биде опфатен секој за кој има и најмал соммеж за поврзаност со овој случај. Но, јавноста е чувствителна и на некои случаи од минатото. Да видиме, да почекаме дали ЈО има амбиција да ги разгледа, да констатира некои неправилности и дали би можело повторно да ги разгледува, па да видиме дали навистина сме сите за правда или за селективна правда. Го охрабруваме ЈО да се движи во таа насока и секој што направил грешка, да биде казнет – рече премиерот Мицкоски.

Советот на јавни обвинители утре на седница како точка на дневен ред има разгледување на предлогот од Владата за разрешување на државниот обвинител Љупчо Коцевски.

По несреќата во Кочани, во јавноста се споделуваа реакции и за претходните несреќи со жртви кои настанале поради корупција или нефункционирање на институциите, како што беа автобуските несреќи на „Дурмо турс“ и на „Беса транс“, како и пожарот во модуларната болница во Тетово.

The post ВЛАДАТА ЌЕ ЈА СОПРЕ ПОСТАПКАТА ЗА РАЗРЕШУВАЊЕ НА ДРЖАВНИОТ ОБВИНИТЕЛ КОЦЕВСКИ Мицкоски смета дека ЈО треба да преразгледа и други несреќи од минатото appeared first on plusinfo.mk.