Во местото Горице, во близина на Брчко, во Босна и Херцеговина, се урнал воен хеликоптер на ЕУФОР. Леталото е целосно уништено, а според неофицијални информации во несреќата загинале три лица. Од ЕУФОР потврдиле дека во инцидентот учествувало нивно летало, но во првичното соопштение не ги потврдиле информациите за загинатите.

Од ЕУФОР потврдиле дека несреќата се случила во текот на рутинска операција во областа на Брчко.

„ЕУФОР може да потврди дека денеска, за време на рутинска операција во областа на Брчко, се случила несреќа во која се урнало едно од нашите летала“, соопштиле од меѓународните сили.

Оттаму навеле дека во несреќата нема повредени цивили и дека не се оштетени цивилната инфраструктура, имотот или возилата.

„ЕУФОР спроведува целосна и темелна истрага за инцидентот и ќе објави повеќе информации кога ќе бидат утврдени фактите и кога ќе биде соодветно“, се наведува во соопштението.

Од ЕУФОР истовремено ги повикале граѓаните да не шират дезинформации за несреќата и да ги следат исклучиво официјалните канали за информирање.

На местото на падот веднаш пристигнале припадници на полицијата на Дистриктот Брчко, пожарникари и екипи на итната медицинска помош. Поширокото подрачје било обезбедено, а се очекува полицијата дополнително да ја информира јавноста за околностите на несреќата. Причините за падот засега не се познати.

The post 📽️ СЕ УРНА ХЕЛИКОПТЕР НА ЕУФОР КАЈ БРЧКО, ИМА ЗАГИНАТИ Три лица го загубиле животот во несреќата, леталото е целосно уништено appeared first on plusinfo.mk.