Македонија се гордее, напиша денеска Ганка Цветанова на Икс, партнерката на алпинистот и кардихирургот Сашко Кедев, која објави видео од моментот кога пред неколку дена тој ја оствари историската мисија и го искачи врвот Г1 на планината Каракорум во Пакистан.

Со искачувањето на овој врв тој стана првиот Македонец и единствен во поширокиот регион кој ги искачи сите 14 врвови што се повисоки од 8.000 метри и највисоките врвови на сите 7 континенти (7 Summits).

Sashko Kedev #G1
Mission accomplished #14×8000 #7Summits #Macedonia pic.twitter.com/o8P2BdwrQo

— Ganka Cvetanova (@gankacv) July 25, 2025

Со тоа докторот и член на МАНУ ја впиша Македонија во историјата на светската алпинистичка елита.

Кога ќе се каже дека алпинист ги „освоил сите 14 врвови над 8.000 метри“, тоа значи дека го постигнал еден од најголемите и најтешките подвизи во историјата на алпинизмот — искачување на сите 14 планински врвови на Земјата кои се повисоки од 8.000 метри. Овие врвови се наоѓаат во Хималаите и Каракорум — планинските масиви што се протегаат низ Непал, Кина (Тибет) и Пакистан. Сите се познати по екстремно тежок пристап, непредвидливо време, ниски температури и опасности од лавини, одрони, смрзнување и т.н.

Овие 14 „осумилјадници“ се нарекуваат и „смртоносна зона“ (death zone), бидејќи над 8.000 метри надморска височина човечкото тело не може долго да преживее без дополнителен кислород. Поради тоа, подвигот бара извонредна физичка и психолошка подготвеност, алпинистичко искуство, логистика, поддршка и неверојатна издржливост. Досега, само околу 50 луѓе во светот успеале да ги искачат сите 14 врвови – и тоа некои по години, дури и со децении труд и напори.

• САШКО КЕДЕВ ГО ОСВОИ И ВРВОТ Г1 ВО ПАКИСТАН Стана првиот Македонец кој ги искачил сите 14 врвови над 8.000 метри

Фактот дека македонскиот кардиохирург Сашко Кедев се вброи во таа ексклузивна група е настан од светски ранг. Тој не е професионален алпинист, туку лекар и научник, што го прави подвигот уште повпечатлив. Со ова, Кедев стана не само првиот Македонец што го постигнал овој рекорд, туку и еден од ретките луѓе во светот кои успеале да го направат тоа во зрелиот животен период, паралелно со друга професионална кариера.

Овој подвиг е симбол на човековата способност да ги поместува границите на можното. Освојувањето на сите 14 осумилјадници претставува круна на алпинистичката кариера и вечен запис во историјата на спортот и човечките достигнувања. Тоа е приказна за дисциплина, храброст и упорност што инспирира и надвор од планините.

Прв кој го постигна овој подвиг беше италијанскиот алпинист Рајнхолд Меснер во 1986 година.

The post 🎥 КЕДЕВ ЈА ОСТВАРИ СВОЈАТА ИСТОРИСКА МИСИЈА ВО АЛПИНИЗМОТ Само околу 50 луѓе во светот го постигнале неговиот подвиг appeared first on plusinfo.mk.