исламски Archives - plusinfo.mk

ДОБИВАЛ ТАЈНИ ПЛАНОВИ ЗА ШИРЕЊЕ ИСЛАМСКИ РАДИКАЛИЗАМ, СЕ СРЕЌАВАЛ СО СРПСКИ АГЕНТИ Советникот на Заев, Виктор Петрушевски вмешан во аферата во Косово за соработка со српската служба БИА

плусинфо — Sat, 29 Aug 2026 10:02:52 +0000

Името на Виктор Петрушевски, поранешниот советник на Зоран Заев за локална самоуправа, е дел од актуелната афера објавена во медиумите во Косово за наводната поврзаност на Фатмир Шехоли, познат политички аналитичар, со српската Безбедносно-информативна агенција, пишува МКД.мк.

Специјалното обвинителство на Косово на 25 август против Фатмир Шехоли покрена обвинение за шпионажа и уцена. Шехоли е медиумски работник во периодот на Милошевиќ, човек со признато искуство во српските безбедносни структури, во Косово функционер/советник и активист за меѓуетнички односи и познат телевизиски политички аналитичар.

Според наводите на Специјалното обвинителство, на 20 и 21 декември 2024 година Шехоли преку Ватс ап комуницирал со Петрушевски, а од комуникациите, според обвинението, произлегува дека презел активности за организирање физичка средба со Бојан Димиќ, човек на БИА.

Во комуникација од 22 декември 2024 година, според објавените делови од обвинението, Шехоли му се обратил на Петрушевски со порака дека треба да биде подготвен да даде одговори на лицето со кое ќе разговара.

Обвинителството тврди дека на 25 декември 2024 година средбата била реализирана. Во комуникациите од тој ден, според обвинението, Шехоли му кажал на Петрушевски дека се наоѓа во ресторанот, а потоа му го испратил телефонскиот број за кој истражителите утврдиле дека го користел Бојан Димиќ.

Косовското обвинителство го идентификува Димиќ како службеник на БИА, а други косовски извори го наведуваат како директор на Дирекцијата за борба против тероризмот и меѓународниот организиран криминал во рамките на српската служба.

Уште една точка од обвинителниот предмет го поврзува контактот „Виктор Македонија“ со Петрушевски. Според обвинението, на 5 август 2025 година Шехоли му испратил документ означен како „Top Secret 2“ на лице заведено како „Виктор Македонија“.

Косовските медиуми пишуваат дека документот содржел наводен политички и стратешки план поврзан со ширење на исламскиот радикализам во Косово и во регионот. Во него се зборува за изградба и проширување на верски објекти и за создавање мрежи со влијание во спортот, медиумите, музиката и во политиката.

Според обвинителството, документот бил дел од поширокиот материјал што требало да покаже какви информации и документи разменувал Шехоли со лица поврзани со српските безбедносни структури.

Петрушевски за ТВ Алсат изјавува дека со Шехоли разговарал за бизнис и дека не знаел за неговата наводна поврзаност со српските служби.

Името на Петрушевски во материјалите се појавува и во контекст на лице заведено во телефонот на Шехоли како „Виктор Македонија“. Според косовските медиуми токму совпаѓањето на ова име со подоцнежното споменување на Виктор Петрушевски во обвинителните материјали е причината поради која тие го идентификуваат лицето како Петрушевски.

Тој ги отфрла сите информации за наводна негова поврзаност со каква било разузнавачка мрежа.

„Со Фатмир се запознав пред 2-3 години на една средба каде што беше и тој. Ми се претстави тогаш како директор на еден институт. По извесен период почнавме да комуницираме за политичките и економските случувања во регионот“, изјави Петрушевски за „Алсат“.

Според неговото сведоштво, Шехоли подоцна се интересирал подетално за неговата деловна активност, особено во периодот кога актуелна била темата со јагленот. Петрушевски вели дека Шехоли му кажал оти има силни врски во Србија и може да го поврзе со лица кои би можеле да му помогнат во бизнисот.

„Ми испрати контакт-број од лице од Србија. Кога дознав за кого станува збор и дека истиот нема врска со овој бизнис, решив никогаш да не контактирам“, изјавил Петрушевски.

Тој додава дека Шехоли му препорачал контакт и со неколку други лица, со кои, како што вели, имал кратка средба, но не продолжил комуникација со нив.

Сосема поинаква слика произлегува од обвинителните материјали. Специјалното обвинителство на Косово на 25 август поднесе обвинение против Фатмир Шехоли за две кривични дела – шпионажа и уцена.

Според обвинението, Шехоли бил регрутиран од српската БИА и во периодот до неговото апсење во октомври 2025 година дејствувал според наредби и задачи на службеници на оваа агенција. Обвинителството тврди дека тој собирал и пренесувал податоци, информации и документи поврзани со политичките активности, безбедносната состојба и функционирањето на институциите на Косово.

Шехоли е обвинет и за уцена на лице од Косово, од кое, според обвинението, барал повеќе од 13.000 евра. Предметот е пред Основниот суд во Приштина, а првото рочиште е закажано за 7 септември.

Петрушевски бил директор на АД „Аеродромски услуги“, а во јануари 2021 година бил назначен за советник на премиерот Зоран Заев за локална самоуправа. Во актуелните косовски извештаи Петрушевски е опишан како бизнисмен од Македонија. „Алсат“ објави дека денес тој се занимава со бизнис во областа на нафтените деривати и градежништвото. Телевизијата, повикувајќи се на свои проверки, наведува дека во неговото криминално досие има само една официјална кривична пријава од 24 ноември 2005 година.

На 18 април 2017 година ВМРО-ДПМНЕ објави дека членот на извршниот одбор на СДСМ и раководител во „Куманово гас“ Виктор Петрушевски, бил фатен со поголема сума на пари од српските цариници.

„Петрушевски беше фатен од српските царински служби како тајно и незаконски изнесува поголема сума пари. Според првичните наоди Петрушевски успеал готовината да ја сокрие од македонските цариници, но бил откриен од српска страна. Виктор Петрушевски освен што е член на извршниот одбор на СДСМ е поставен и за раководител на комерцијален сектор на „Куманово гас“. Јасно е дека толкава сума евра во готово не се заработува од плата и од чесно работење. Се поставува прашањето чии пари на црно изнесувал Петрушевски? Уште поважно е прашањето за кого биле наменети тие пари и кој требало да биде исплатен“, објави тогаш ВМРО-ДПМНЕ.

Од партијата се сомневаат дека парите биле наменети за српската невладина организација КАНВАС и за Сорос, кои ја организирале Шарената револуција во државата.

„На каков начин се заработуваат овие пари и дали истите служат за подмирување на трошоците за поранешните обуки, кои КАНВАС им ги држеше за тоа како со боја да уништуваат институции, згради, улици, споменици, сè она што е Македонија“, соопшти тогаш ВМРО-ДПМНЕ.

The post ДОБИВАЛ ТАЈНИ ПЛАНОВИ ЗА ШИРЕЊЕ ИСЛАМСКИ РАДИКАЛИЗАМ, СЕ СРЕЌАВАЛ СО СРПСКИ АГЕНТИ Советникот на Заев, Виктор Петрушевски вмешан во аферата во Косово за соработка со српската служба БИА appeared first on plusinfo.mk.

ПОЧНА РАМАЗАНСКИОТ ПОСТ Прочистување за верниците од исламска вероисповед

МИА — Sat, 02 Apr 2022 08:03:02 +0000

Верниците од исламска вероисповед рано изутринава го почнаа рамазанскиот пост, што трае 30 дена и завршува на 1 мај. За време на постот верниците од изгрејсонце до зајдисонце се воздржуваат од јадење и пиење.

Според исламската религија, постот, кој е еден од исламските столбови е задолжителен за сите верници за нивно физичко и душевно прочистување. Верниците мора да се воздржуваат од лоши зборови и дела со цел општо човечко прочистување. Постењето е верска обврска за секој полнолетен, здрав муслимански верник, но не е обврзувачко болните, бремените жени и работниците кои вршат тешка физичка работа.

По рамазанскиот пост, на 2 мај е Рамазан Бајрам, кој се чествува три дена. Тогаш целото семејство се собира на празнична трпеза, а се посетуват роднините и пријателите. Рамазан е деветтиот месец во Исламскиот календар.

Првиот ден од Рамазан Бајрам е државен празник.

Во пресрет на Рамазанскиот пост, поглаварот на Исламската верска заедница, реисул-улема Х. Хфз. Шаќир ефенди Фетаи истакна дека месецот Рамазан е месец на многу благослови, случај на формирање на нашата личност, на нашето духовно и физичко прочистување, на оплеменување на нашата душа, на нашето тело, на нашето размислување, на зајакнување на нашите меѓусебни врски, негување, почит и продлабочување на љубовта еден кон друг.

Тој им порача на верниците да се обраќаат со молитва кон Возвишниот Алах да се прекинат сите воени судири, бидејќи, како што вели, во такви судири страдаат невини луѓе, кај луѓето се отвораат неизлечени рани кои формираат психологија на насилство, омраза, убивање и истребување на човечкото суштество.

– Овој месец е и добар повод за наше помирување, за пружање помош на оние кои имаат потреба – особено на сиромашните и немоштените, бидејќи само така ќе бидеме поблиску до задоволството и простувањето на Семоќниот Алах. Дозволете ми во име на ИВЗ на РСМ и во мое име да ги изразам моите срдечни честитки во оваа прилика, со молитва до Семоќниот Алах да ни даде сила на верата, висока свест, непоколеблива волја, дека со најголема посветеност да го извршуваме постот. Нашите искрени Ибадети и молитви – особено нашите молитви за мир и толеранција се во согласност со зборовите на Мухамед (а.с.): „Кој го пости месецот Рамазан со вера (искрено и надевајќи се дека ќе биде награден од Алах за тоа), сите претходни гревови ќе му бидат простени“. Ви посакуваме убав почеток, пријатна атмосфера на месецот Рамазан и нека е благословен овој голем и свет месец.“О верници, пропишан ви е постот како што им беше пропишан и на оние пред вас за да бидете богобојазливи” (Ел: Бекарету: 183) – посочува Фетаху во неговата порака.

Во овој месец, потенцира тој, обавуваме еден од столбовите на Исламот – постење на неговите денови, што е задолжителна обврска, каде што се воздржуваме од јадење и пиење и правење лоши дела заради Возвишениот Алах.

– Преку постот ја докажуваме нашата посветеност на Создателот, формираме висока свест за нашата позиција на Земјата да бидеме во служба на доброто и да го избегнуваме злото од себе и од луѓето воопшто. Овој месец е месец на знаењето, бидејќи во него е објавен императивот да се чита, да се учи, да се истражува, за да се знае креативноста на Семоќниот Алах. Преку постот и знаењето ја разбираме главната цел на животот, а тоа е грижата за човекот, која се изразува преку мир, толеранција, хуманост и солидарност. Во оваа средина на нашата поврзаност со Создателот, ние се обраќаме кон Неговото Величество со нашите молитви да прости пропусти, грешки и гревови – истакнува Фетаху во пораката по повод почнувањето на Рамазанскиот пост.

The post ПОЧНА РАМАЗАНСКИОТ ПОСТ Прочистување за верниците од исламска вероисповед appeared first on plusinfo.mk.

Зехофер: Исламскиот тероризам е голема опасност за Германија

МИА — Fri, 06 Nov 2020 09:30:11 +0000

Германскиот министер за внатрешни работи Хорст Зехофер во Бундестагот ја истакна акутната опасност од терористички напади со исламистичка заднина во Германија, но истовремено ги отфрли избрзаните барања за законски измени по терористичките напади.

– Нивото на опасност од терористички напади во Германија е непроменето високо – рече министерот за внатрешни работи Зехофер за време на седница во Бундестагот посветена на заканите од исламскиот тероризам.

Зехофер укажа на тоа дека само оваа година во Германија се регистрирани три терористички напади со исламистичка заднина, како и дека извршителот на нападот во Виена во понеделникот имал контакти со членови на исламистичката сцена и во Германија.

– Преку случајот во Виена, имаме врски и со потенцијално опасни исламисти во Германија, рече Зехофер, не наведувајќи детали.

The post Зехофер: Исламскиот тероризам е голема опасност за Германија appeared first on plusinfo.mk.