Случајот со Артан Груби се одолговлекува, додека граѓаните чекаат одговор. Човекот кој со години беше живата архива на ДУИ, човекот што знае каде се потписите, договорите, пазарите и аферите на старата власт, сè уште не се соочува со институционален епилог, велат од Вреди во денешното соопштение.

– Артан Груби, заедно со бегалецот Перпарим Бајрами, се сомничи за злоупотреби во вредност од 8 милиони евра во случајот „Државна лотарија“. Ова не е обичен предмет, туку едно од најтешките досиеја на системот на ДУИ, каде што политиката, бизнисот, лотаријата и власта биле измешани за приватни интереси. Затоа, прашањето што само по себе се наметнува е: кој го одолговлекува овој случај? Кој има интерес Артан Груби да молчи? Кој се плаши од тоа што може да открие архивата на ДУИ? – велат од Вреди.

Според партијата, во овој случај не може да се заобиколи ниту името на Ислам Абази.

-Јавноста добро памети дека Артан Груби вработил негова блиска роднина, а потоа ја префрлил во АЕК. Денес, кога случајот „Груби“ се движи со полжави чекори, граѓаните имаат право да прашаат дали ова е случајност или дел од мрежа што произведува заштита, молк и недопирливост -велат оттаму.

Од партијата бараат одговор и дејствување.

-Случајот „Груби“ не смее да заврши во фиока. Не смее да се претвори во нов пазар на политичкото подземје, бидејќи секое одолговлекување на правдата ја нарушува довербата на граѓаните и европскиот пат на државата – велат од Вреди.

The post СЛУЧАЈОТ ГРУБИ НЕ СМЕЕ ДА ЗАВРШИ ВО ФИОКА Вреди прашува – кој го одолговлекува? appeared first on plusinfo.mk.

Приговорот од ЕСМ е доказ дека обвинителката Катерина Коларевиќ постапила непрофесионално, а Ислам Абази ја потврдил оваа контроверзна одлука за скандалот „Мазут“, којшто е тежок 167 милиони евра набавки на мазут за ТЕЦ Неготино, изјави денеска Антонио Милошоски, пратеник на ВМРО-ДПМНЕ.

– Ова потврдува дека истрагата којашто ја водела обвинителката Коларевиќ била претежно паушална и дел од доказите за кривичната одговорност неосновано иземала како изговор за прекинување на постапката – вели тој.

Според него, приговорот на ЕСМ до Вишото јавно обвинителство дава правна можност за преиспитување на решението за скандалот „Мазут“ и за корекција на контроверзното решение за прекин на истрагата од Коларевиќ и Абази.

– Приговорот на ЕСМ е нова околност според којашто прекинатата истрага за мазут може да продолжи, бидејќи ЕСМ е оштетено правно лице коешто ги побива изјавите на Коларевиќ и Абази како обвинителски тандем којшто им дал повластена улога и им поклонил поголема верба на исказите на Капушевски, Јахоски, Адријан Муча, Ерџан Сулкоски, а воопшто го немале ниту достапен Васко Ковачевски. И затоа сметаме дека е време самото обвинителство да си ги искористи своите средства, своите институции за да ја коригира ваквата контроверзна и лукративна одлука на обвинителскиот тандем Коларевиќ и Абази – рече Милошоски.

Тој порача дека е време Обвинителството да нема свои повластени бизнис или политички партнери и сите оние за коишто постои основан и сериозен сомнеж за незаконито дејствување при набавката на мазутот 167 милиони евра да одговараат како и секој друг осомничен и да имаат можност своите докази да ги изнесат пред судските органи.

The post ПРИГОВОРОТ НА ЕСМ Е ДОКАЗ ДЕКА КОЛАРЕВИЌ И АБАЗИ НЕ ПОСТАПИЛЕ ПРОФЕСИОНАЛНО Милошоски со нови моменти за случајот „Мазут“ appeared first on plusinfo.mk.

Премиерот Христијан Мицкоски денеска со остри критики се осврна на случајот со сомнежите за шпионажа во Кабинетот на претседателката Гордана Сиљановска-Давкова во Вила Водно, обвинувајќи дека зад случајот стојат „структури од минатото“ и лица кои ги нарече „шпионски талог на општеството“.

Одговарајќи на новинарско прашање дали располага со информации за случајот и дали може да открие повеќе детали, Мицкоски изјави:

– Па, видете, тоа се шпионски талог на општеството, структури од минатото. Коишто се наоѓале во кабинетите како глодари на некои поранешни политичари. Претседатели, премиери и така натаму.

Тој посочи дека овие лица се претставувале како група вработени и испраќале анонимни дописи до обвинителствата.

– И тие се претставуваат како група вработени и испраќаат анонимни дописи до обвинителства – рече Мицкоски.

Во својата изјава премиерот го спомена и шефот на Обвинителството за гонење организиран криминал и корупција, Ислам Абази.

– Се разбира, таму е Ислам Абази, веднаш да истрча и да создаде паника во јавноста дека нешто се случувало – изјави премиерот.

На крајот, Мицкоски порача дека нема намера повеќе да ги коментира лицата кои ги нарече „глодари“.

– Јас не би ги коментирал овие глодари, бидејќи мислам дека треба да ги заборавиме – рече Мицкоски.

Според ОЈО ГОКК, предметот бил отворен во декември 2025 година по известување од МВР – Сектор за компјутерски криминал, а се однесува на сомнежи дека доверливи електронски податоци од Кабинетот на претседателката биле неовластено копирани и можеби завршиле кај странски разузнавачки структури.

Од Обвинителството соопштиле дека со месеци бараат копии од видео надзорот од Вила Водно, но дека досега не добиле повратни информации од МВР за обезбедувањето на снимките.

The post ГЛОДАРИ ОД МИНАТОТО РОВАРАТ ВО КАБИНЕТОТ НА ШЕФОТ НА ДРЖАВАТА Мицкоски вели дека Ислам Абази шири паника appeared first on plusinfo.mk.

Катерина Коларевиќ, обвинителката која ја стопираше истрагата за случајот „Мазут“ тежок 167 милиони евра, според ВМРО-ДПМНЕ е дел од мрежа на блиски релации меѓу СДСМ, ДУИ и обвинителско-судскиот систем.

Дали Коларевиќ по насока на шефот на ОЈО ГОКК Ислам Абази и насока на Венко Филипче, Зоран Заев и Али Ахмети ја стопирала постапката, прашува ВМРО-ДПМНЕ.

Партијата обвинува дека таткото на Коларевиќ е еден од „семејните кадри“ унапредени во времето на СДСМ и ДУИ и дека унапредувањето е типична политичка номинација, а не професионален развој.

„Павле Марков, во 1998 година од тогашната влада на СДСМ е избран за државен правобранител, додека, пак, мајка ѝ Вера Маркова, во 2004 од коалицијата СДСМ и ДУИ е избрана за уставен судија“.

Понатаму во текстот се спомнува блискоста на Ислам Абази со шефот на ДУИ, Али Ахмети, како комшии во Зајас.

„За блискоста на Ислам Абази со Ахмети како комшија од Зајас, на кого според јавно достапни фотографии може да се види како на глава му седи неговиот брат Фекри Ахмети, сите знаат“.

ВМРО-ПМНЕ обвинува дека обвинителката Коларевиќ, блиска до СДСМ и ДУИ, добро знае дека во економскиот криминал или штета на државниот буџет, како што е случајот со ТЕЦ Неготино, се утврдува со економско вештачење, а не со изјави дадени од некомпетентни и неовластени лица вработени во ЕСМ.

„И од ЕСМ јасно потенцираа дека испитаните лица во постапката, не биле ниту одговорни, ниту компетентни лица да проценат штета и да утврдат економски криминал со набавката на мазутот.

Но, со скандалозната одлука за стопирање на истрагата за овој случај тежок 167 милиони евра за кој постојат силни индиции и сомнежи за перење пари и тендерски криминал, станува јасно дека решението на Абази и Коларевиќ не е поткрепено со правно-обвинителски аргументи, туку веројатно е добро подмачкано со прескапиот мазут“, соопшти ВМРО-ДПМНЕ.

Понатаму, ВМРО-ДПМНЕ прашува:

„Од овие прости причини се јавува потребата да се постави прашањето, дали поради тоа обвинителката Коларевиќ во случајот со мазутот тежок 167 милиони евра, не постапувала со главен мотив да ја открие вистината, туку за да го заташка, како што ја стопираше постапката, за од кривична одговорност да ги спаси Васко Ковачевски, Адријан Муча, Асмир Јахоски и другите блиски до Ахмети, Заев и Филипче“.

Оттука ВМРО-ДПМНЕ го тврди следното:

„Или подиректно, дали Коларевиќ како обвинителка поради свои интереси и по насоки од блискиот до ДУИ, Ислам Абази, кои доаѓаат директно од врхушката на СДСМ и ДУИ, односно од Ахмети, Заев и Филипче, ја сопре постапката за овој случај вреден 167 милиони евра?

Очекуваме одговори, затоа што јавноста има право и заслужува да ја знае целата вистина, додека Советот на јавни обвинители има обврска да го истражи работењето и постапувањето и на Абази и на Коларевиќ.

За да се воспостави правна држава и да се врати довербата на граѓаните во правосудството, која сега е минорни 2%, потребно е и обвинителите да подлежат на професионална, дисциплинска и кривична одговорност, доколку се докаже нивно противправно делување.

Македонија заслужува правда и одговорност“,

The post ИСПЛИВА „СЕМЕЈНАТА“ ВРСКА НА СДСМ И КОЛАРЕВИЌ Дали „Мазут“ е стопиран по налог на Абази, СДСМ и на ДУИ? appeared first on plusinfo.mk.

Додека Филипче сонува со отворени очи власт во Македонија, нека почне од самиот себе и нека ги повика Заев и останатите да ги вратат украдените пари и да одговараат пред правдата – реагираше со соопштение ВМРО-ДПМНЕ на денешната прес-конференција на СДСМ, одржана од претседателот на партијата Венко Филипче.

„Венко Филипче на прес-конференција објави некаков си фронт и го нарекол „За вистина и правда”. А, во таканаречениот фронт учесници се единствено, самиот Филипче и неговите партиски другари, исто како него, лојалисти на Зоран Заев, поставени во партиското раководство на СДСМ токму од Заев.

И така обединети, малкумината партиски другари останати и поставени во СДСМ токму од Заев, единствено со отворени очи сонуваат власт, иако знаат дека народот не ги сака и за нив не гласа. Тоа им го покажаа на четири последователни изборни циклуси, а на последниот ги донесе до биолошкиот минимум од одвај 130 илјади гласа, со што СДСМ стана трета партија во државата и петта во градот Скопје.

Ако навистина Филипче е загрижен за државата и граѓаните како што глуми на прес конференциите, не мора да чека некој да го донесе на власт, зошто граѓаните секако нема го гласаат на избори, нека ги повика поранешните владини функционери од СДСМ кои ја опљачкаа државата и ги осиромашија граѓаните, на чело со Зоран Заев, да ги вратат украдени пари и да се предадат на органите на прогонот.

Може Филипче и тој да биде пример за останатите и нека биде прв кој тоа ќе го направи за да се истражи целата негова инволвираност во набавките на модуларните болници, каде тој лично ја правел тендерската спецификација и потпишувал анекси за зголемување на цената за 20%, кои веројатно завршиле по приватни џебови, што како таа во Тетово, граѓаните со живот ги платија.

Исто така, Филипче не мора со отворени очи да сонува да дојде на власт за да го донесе таканаречениот нивен закон за нулта толеранција на корупција и не мора да го чека европското обвинителство, прво нека ги повика штетниците во обвинителството како Ислам Абази и Катерина Коларевиќ да ја ослободат институцијата од каде што ги штитат токму криминалците на СДСМ и ДУИ, нешто што е многу очигледно по стопирањето на постапката за случајот „Мазут” за сторен криминал тежок 167 милиони евра.

Наместо заштита од компромитираните и од нив избрани кадри во судството и обвинителството, СДСМ и Филипче нека побара нивно заминување и целосна истрага за набавките на јаглен за потребите на РЕК Битола од фирма која на Венко Филипче му подарила луксузен џип Ауди Q8, и сомнителните милионски трансакции од истата фирма на сметка на фирма на Заев во Бугарија, каде што на иста адреса и Филипче имал фирма.

Кога ќе се истражат сите овие случаи, кога ќе има одговорност за овие и други криминални и корупциски делувања од страна на Заев, Филипче и останатите, и кога парите ќе се вратат во буџетот, ќе има и за повисоки плати, за повисоки пензии, ќе има повеќе пари и за земјоделците, за повеќе градинки, училишта, болници и за чесните кадрите во судството и обвинителството кои правдата ќе истераат до крај.

И уште нешто, џабе му е еуфоријата на Венко Филипче за победата на Бугарија на Евровизија и слугувањето на бугарските интереси како послушен пиун на Румен Радев, тоа не му носи политички поени кај македонските граѓани. Затоа што граѓаните дополнително ја гледаат поданоста и измеќарството на туѓите агенди, наспроти и на штета на македонските национални интереси“ – се вели во соопштението на ВМРО-ДПМНЕ.

The post ФИЛИПЧЕ СО ОТВОРЕНИ ОЧИ СОНУВА ВЛАСТ Ако сака да се бори со корупцијата нека почне од Заев appeared first on plusinfo.mk.

Имаме сведоштва од обвинители и судии дека Зоран Заев, Радмила Шеќеринска и Оливер Спасовски биле тие кои кажувале кој ќе се гони, а кој не, а телефонски повик меѓу раководители на институции не е криминал – оцени ВМРО-ДПМНЕ во соопштение.

„Обвинителката Лејла Кадриу од поранешното СЈО, јавно сведочеше дека Зоран Заев и Радмила Шеќеринска, оделе навечер во тогашните канцеларии на СЈО, и на обвинителите Ленче Ристовска, Гаврил Бубевски, Фатиме Фетаи и Лиле Стефанова им диктирале кој предмет да се работи, кој не, и кој поединец да биде опфатен со одреден предмет, а кој да биде изземен од политичкиот прогон кој го извршуваа, благодарение на Катица Јанева.

Поранешен судија на Врховниот суд, Ристо Катевеновски јавно изјави дека бил разрешен откако не дал позитивно мислење за случајот со Мерцедесот и Гордана Јанкуловска, утредента на вонредна седница на Судски совет, веќе бил разрешен од функцијата. Во кратки црти, Катевеновски бил разрешен затоа што не постапил по политичка директива.

Да не ја заборавиме и Добрила Кацарска, која делуваше по насоки на Заев, за што и стана Уставен судија, и за Вилма Русковска од обвинителството, која по насока на Заев бараше 200 години затвор за уставобранителите, за дело кое не соодвествува со реалноста. Тогаш СДСМ молчеше и не ги осудуваше тие случувања.

Сега СДСМ реагира за телефонски разговор помеѓу претседател на Влада и државен јавен обвинител. Што е тука криминал, ако премиер побара да се информира за скандалот со ослободување од одговорност за милионски криминал во ТЕЦ Неготино? Вака, СДСМ директно се вклучува во одбрана на Васко Ковачевски кој е ослободен во бегство од политичкото обвинителство водено од Ислам Абази, кадарот на Али Ахмети, Зоран Заев и Венко Филипче“ – пишува ВМРО-ДПМНЕ.

The post ИМАМЕ СВЕДОШТВА ДЕКА ЗАЕВ, ШЕКЕРИНСКА И СПАСОВСКИ НАРАЧУВАЛЕ КРИВИЧЕН ПРОГОН Телефонски повик меѓу раководители на институции не е криминал appeared first on plusinfo.mk.

Премиерот Христијан Мицкоски е шокиран од одлуката на Обвинителството за гонење организиран криминал и корупција да ја запре истрагата за случајот со набавката на мазут за ТЕЦ Неготино и очекува нејзино преиспитување.

Во овој случај се опфатени поранешниот директор на ЕСМ, Васко Ковачевски, како и сопствениците на компаниите кои ја снабдувале ТЕЦ Неготино со мазут.

– Со неверување ја слушнав таа вест. Второ, бев шокиран од тоа што го слушнав. Добро е што АД ЕСМ, поранешно ЕЛЕМ, кога ќе ја добие одлуката ќе вложи жалба. И очекувам дека случајот ќе биде вратен на преразгледување и повторна анализа. Затоа што ако тоа не се случи, Обвинителството за гонење на организиран криминал дефинитивно го губи својот кредибилитет – рече Мицкоски.

Тој не сака да го коментира Обвинителството што го води Ислам Абази.

– Обвинителството за гонење на организиран криминал со овој обвинител, со Ислам Абази, сме го коментирале и не треба друго да кажам. Јавноста знае за каков обвинител станува збор – рече Мицкоски.

Тој додаде дека на темата вчера разговарал и со јавниот обвинител Ненад Савески.

– Вчера разговарав и со јавниот обвинител Ненад Савески. Тој ме информира дека не бил информиран за одлуката на обвинителството што го води Ислам Абази. Така, претпоставувам дека по поднесената жалба на АД ЕСМ, повторно ќе се разгледа и анализира – рече Мицкоски.

Обвинителката од Обвинителството за гонење организиран криминал Катерина Коларевиќ вчера соопшти дека истрагата е запрена бидејќи не биле пронајдени доволно докази за кривично дело, ниту била утврдена штета за државата.

Истрагата беше отворена по кривична пријава на МВР, во која се тврдеше дека преку спорните набавки е направена штета од над 167 милиони евра и постоеле сомнежи за перење пари.

The post МИЦКОСКИ ШОКИРАН ОД ОДЛУКАТА НА ОБВИНИТЕЛСТВОТО ДА ЈА ЗАПРЕ ИСТРАГАТА ЗА МАЗУТОТ Очекува преиспитување на случајот по жалбата на ЕСМ appeared first on plusinfo.mk.

Досега, во македонското правосудство и обвинителство, не е забележан случај на ваков тежок милионски сомнеж за криминал, којшто се наоѓал во ЈО ГОКК, и е од висок јавен интерес да биде затворен, пред да биде доставен во судот, рече Антонио Милошоски, член на Извршниот комитет на ВМРО-ДПМНЕ и пратеник.

Ислам Абази тврди дека не вршел никакво влијание врз никој обвинител да се донесе ваква одлука за запирање на гонењето на овој сомнеж за криминал од 167 милиони евра.

– Ислам Абази лаже, затоа што како шеф на ЈО ГОКК, надлежен е еднаш неделно да добива брифинг од подредениот обвинител, за ваквите крупни случаи, а исто така овластен е доколку некој понизок обвинител реши дека не сака, или смета, дека нема основ ваков случај да се води, Ислам Абази може да одлучи, случајот да продолжи да се гони, или да го предаде во надлежност на друг обвинител. Наместо да го направи тоа, Ислам Абази, дал согласност овој тежок 167 милиони евра случај да се затвори, и наместо да биде обвинител којшто ќе гони организиран криминал и корупција, Ислам Абази си ја препишал улогата на судија, да го затвори случајот, пред истиот да влезе во судските процедури – рече Милошоски.

Според него, секогаш обвинителството одлучувало доказите што ги има да ги презентира во обвинителен акт, а потоа на судските органи да им овозможи да ја донесат конечната одлука, а на обвинетите да им овозможи да докажуваат дали се невини или на обвинителството да докаже дали се виновни.

– Затоа сметаме, дека овој пат Ислам Абази, многу очигледно е дека одлуката за затворање на овој случај Мазут, ја донел врз основа на лукративно политички основи, а не на правни или обвинителски аргументи. Зошто Ислам Абази е противречен? Затоа што пред една година, обвинителството коешто го води тој, побара притвор за четири лица осомничени во овој случај, и сметаше дека овие четири притворени лица можат да се дадат во бегство или да извршат влијание врз сведоци. Во исто време, Васко Ковачевски, веќе беше во бегство. Како може истото обвинителство кое што барало притвор за четири лица од случајот Мазут, тежок 167 милиони евра, денес да тврди дека нема основ за да се продолжи овој предмет. Со вакво постапување, обвинителот Ислам Абази, ќе го претвори ЈО ГОКК во обвинителство за извинување на осомничените за тежок криминал, и за плаќање на обесштетување за тоа што биле во притвор. Но на крајот, обесштетувањето кое што ќе треба да им се плати на Асмир Јахоски, на Ардијан Муча, на Ерџан Сулкоски и на Ратко Капушевски, нема да го плати ниту Ислам Абази, ниту неговите ментори Ахмети, Заев и Филипче, туку ќе го плати државниот буџет – рече Милошоски.

Тој повторно побара оставка од Абази од шеф на ОЈО ГОКК, бидејќи како што рече, Абази ги прогласил за невини сите, без да почне судскиот процес, каде што може и обвинетите и обвинителството да се докажуваат.

The post АБАЗИ ГИ ПРОГЛАСИ ЗА НЕВИНИ ЈАХОСКИ, КАПУШЕВСКИ И КОВАЧЕВСКИ Милошоски вели дека обештетувањето за притворот ќе треба да им го плати државата appeared first on plusinfo.mk.

Правосудството ја изгуби и последната доверба по прекинот на истрагата за мазутот, не може за ситни случаи да има казни, а за милионски афери молк, вели пратеникот на ВМРО-ДПМНЕ Љупчо Пренџов.

Тој остро реагираше на одлуката на обвинителството раководено од Ислам Абази да ја постапка поврзана со набавката на мазут за потребите на ТЕЦ Неготино, случај вреден 167 милиони евра. Пренџов оцени дека ваквиот потег дополнително ја намалува и онака ниската доверба на граѓаните во правосудниот систем.

– Оние 2% доверба кои што ги уживаше судството, денес можеби се 1% а можеби се 0%, и со право. Она коешто утрово се случи, навистина ги поминува сите граници на нормалното, сите граници на минимална пристојност на функционирање на судството и е многу загрижувачки. Очекувам во следниот период оштетениот во случајот, ЕСМ, да поднесе барање, жалба до Вишото обвинителство, и овој срам на ОЈО ГОКК да се покрие – рече Пренџов во гостување на Алфа.

Пратеникот порача дека институциите мора да продолжат со борбата против криминалот и корупцијата и покрај жилавите структури кои се обидуваат да ги заштитат своите интереси. Изрази уверување дека случајот повторно ќе се најде пред судските органи и дека во наредниот период ќе има разврска по жалбената постапка.

– Ние секојдневно се бориме со криминалот и корупцијата, сакам да им порачам дека ќе бидат поразени и дека правда ќе има во Република Македонија. Ова се последните крици во овие 2 години, да се вратиме на „како до сега“, на политички опструирани случаи, да се вратиме на она, да одговараат луѓе за 300 ќебапчиња, а украдени 300 милиони да биде нешто нормално. Тие ќе изгубат за многу кратко време – вели Пренџов.

КАДАРОТ НА ФИЛИПЧЕ, ЗАЕВ И НА АХМЕТИ ИСПОРАЧУВА ЗА БАНДАТА Милошоски побара оставка од Ислам Абази по запирањето на истрагата за ТЕЦ Неготино

The post ДОВЕРБАТА ВО ПРАВОСУДСТВОТО ПАДНА НА НУЛА Прекинот на истрагата за мазутот во ТЕЦ Неготино ги поина сите граници appeared first on plusinfo.mk.

Над 50 илјади евра досега се потрошени за истражната постапка за набавките на мазут за ТЕЦ Неготино, информираше обвинителката Катерина Коларевиќ на денешен брифинг.

Шефот на Основното јавно обвинителство за гонење организиран криминал и корупција, Ислам Абази, изјави дека ниту како јавен обвинител, ниту како раководител, не вршел притисок или влијание врз обвинителите во предметите по кои постапуваат.

– Јас ни како обвинител, ни како виш, на ниеден обвинител не сум му сугерирал, ниту пак сум ја загрозил неговата самостојност. На ниеден јавен обвинител не сум вршел притисок или влијание да донесе каква било одлука – изјави Абази на брифинг со новинари, одговарајќи на обвинувањата што претходно ги упати ВМРО-ДПМНЕ.

Обвинувањата од Милошоски

Реакцијата на Абази следува по прес-конференцијата на Антонио Милошоски, кој обвини дека раководителот на ОЈО ГОКК донел, како што рече, „контроверзна наредба“ за запирање на постапката за набавките на мазут за ТЕЦ Неготино, вредна 167 милиони евра.

Милошоски тврдеше дека Абази постапувал под политичко влијание и дека со одлуката од одговорност биле ослободени лица блиски до партии од поранешната власт.

Според него, без обвинение останале поранешниот директор на ЕСМ, Васко Ковачевски, кој е во бегство, како и бизнисмените Асмир Јахоски и Ратко Капушевски.

Тој ја доведе во прашање и одлуката обвинителството да не го третира бегството на Ковачевски како дополнителна индиција во предметот, оценувајќи дека со тоа била нарушена довербата во правосудството.

Обвинителството ја запре истрагата

Во меѓувреме, Основно јавно обвинителство за гонење организиран криминал и корупција официјално соопшти дека по едногодишна истражна постапка е донесена наредба за запирање на истрагата за набавките на мазут за ТЕЦ Неготино.

Од обвинителството наведуваат дека од прибраните докази не било утврдено дека осомничените ги сториле кривичните дела што им се ставале на товар, ниту дека постои друго кривично дело што се гони по службена должност.

– Од прибраните докази не се утврди дека осомничените ги сториле кривичните дела што им се ставаа на товар, ниту е утврдено постоење друго кривично дело што се гони по службена должност – се наведува во соопштението.

Што покажала истрагата

Според ОЈО ГОКК, во текот на постапката биле анализирани обемна документација, финансиски и договорни документи, вештачења и искази на сведоци од АД ЕСМ, ТЕЦ Неготино и економски оператори со лиценца за трговија со мазут.

Обвинителството оценило дека набавките биле спроведувани во услови на прогласена енергетска криза и согласно законските исклучоци од Законот за јавни набавки, со цел да се обезбеди непречено производство на електрична енергија.

– Истрагата утврди дека постапките биле спроведувани транспарентно. ЕСМ имало цел да ги вклучи сите оператори што поседувале лиценци за трговија со мазут, во интерес на побрза испорака – наведуваат од обвинителството.

Од таму додаваат дека дел од компаниите не учествувале во постапките поради деловни и економски проценки, високите количини, потребните банкарски гаранции и ризиците на тогашниот енергетски пазар.

Нема утврдена штета

Во образложението се наведува дека мазутот бил навремено и континуирано испорачуван и дека во критичниот период немало рестрикции во снабдувањето со електрична енергија.

Обвинителството тврди дека не е утврдена штета ниту за АД ЕСМ, ниту за државниот буџет.

– Напротив, од доказите произлезе дека измените на годишниот план за јавни набавки и склучувањето на анексите биле спроведени со одлуки на надлежните органи на АД ЕСМ, со цел обезбедување доволни количини мазут за непречено функционирање на ТЕЦ Неготино – посочуваат од ОЈО ГОКК.

Во однос на сомнежите за перење пари, обвинителството заклучува дека исплатените средства не претставуваат противправно стекната имотна корист и дека трансакциите не можат да се третираат како перење пари или прикривање незаконски стекнати средства.

Осомничените остануваат на слобода

Со запирањето на истрагата, без обвинение останаа Јахоски, сопственик на Пуцко Петрол, и Капушевски, сопственик на РКМ, кои беа меѓу главните осомничени во предметот вреден 167 милиони евра.

Јахоски во текот на постапката беше во притвор, а подоцна се бранеше од слобода со гаранција од над два милиони евра, додека Капушевски цело време се бранеше од слобода.

Истрагата опфати вкупно 13 лица, меѓу кои и Ковачевски, како и повеќе поранешни функционери и службени лица од енергетскиот сектор.

По донесената наредба за запирање на постапката, сите осомничени остануваат на слобода, а оштетеното правно лице има право на приговор до Вишото јавно обвинителство во Скопје во рок од осум дена.

The post НЕ СУМ ВЛИЈАЕЛ НА НИТУ ЕДЕН НАЧИН ВРЗ СЛУЧАЈОТ „МАЗУТ ЗА ТЕЦ НЕГОТИНО“ Абази ги отфрла обвинувањата од Милошоски appeared first on plusinfo.mk.