Американскиот претседател Доналд Трамп изјави дека американските претставници ќе бидат во Исламабад во понеделник на понатамошни преговори со Иран, јави ДПА.

„Моите претставници одат во Исламабад, Пакистан. Тие ќе бидат таму утревечер, на преговори“, напиша Трамп во долгата објава денеска на социјалните медиуми.

Трамп изјави дека Иран вчера извршил „сериозни прекршувања“ на прекинот на огнот, но дека сè уште верува дека може да постигне мировен договор. Не прецизираше што точно смета за прекршување на примирјето.

„Договорот ќе се случи. На еден или друг начин. На убав или на жесток начин. Ќе се случи. Можете да ме цитирате“, рече Трамп, кој се огласи и на социјалната мрежа Truth.

„Вчера, Иран одлучи да отвори оган во Ормускиот Теснец, со што целосно го прекрши нашиот договор за прекин на огнот! Многу од истрелите беа насочени кон француски брод и товарен брод од Обединетото Кралство. Тоа не беше убаво, нели?“

Првата рунда преговори меѓу Иран и САД во Исламабад заврши минатиот викенд без опипливи резултати, оставајќи сомнеж дали може да се најде решение за војната што ја започнаа САД и Израел на 28 февруари пред да истече моменталниот прекин на огнот во среда, потсетува германската агенција.

Главна точка на сопнување остана повторното отворање на Ормускиот Теснец, клучниот воден пат за глобалната трговија со нафта.

Во тоа што се чинеше како знак дека дипломатските напори зад сцената постигнуваат напредок, Иран во петокот објави дека повторно го отвора мореузот, но веќе вчера ја повлече одлуката откако Трамп изјави дека САД ќе ја одржат својата поморска блокада на иранските пристаништа додека не се постигне мировен договор.

Трамп меѓудругото викендов изјави САД „нудат многу фер и разумен договор“.

„Се надевам дека ќе го прифатат, бидејќи ако не го сторат тоа, САД ќе ги срушат сите електрани и сите мостови во Иран.“

The post ТРАМП ГО ОБВИНИ ИРАН ЗА ПРЕКРШУВАЊЕ НА ПРИМИРЈЕТО Продолжуваат преговорите во Исламабад appeared first on plusinfo.mk.

Македонија е меѓу трите европски држави што презеле најобемни мерки за ублажување на ефектите од ценовните шокови, а од утре се очекува ново поевтинување на бензините и дизел-горивото за денар и половина, најави денеска премиерот Христијан Мицкоски.

Како што рече Мицкоски на прес-конференција, според податоците на Меѓународниот монетарен фонд објавени на 15 април, државата се наоѓа на трето место во Европа според обемот на преземените мерки како процент од бруто-домашниот производ, насочени кон амортизирање на последиците од енергетската криза и покрај, како што наведе, тврдењата на поранешната влада на СДСМ и ДУИ дека мерките или доцнеле или не биле потребни.

– Она што е важно да се истакне е дека нашите политики не се изолирани, туку се во целосна линија со светските трендови. Според последните анализи на европско ниво, според ММФ, во Европа сме меѓу првите три држави кои промениле најмногу работи и примениле најмногу мерки за справување со ценовните шокови. И токму тоа може да го видиме овде на слајдот, инаку се сеќавате дека изминатиов период СДС и останатите коалициони партнери во поранешната влада како што е ДУИ велеа дека доцниме со мерките, дека тие мерки не биле доволни итн. Но, според податок објавен од ММФ на 15 април, а тоа е пред четири дена, можете да забележите дека ние како држава сме на третото место според мерките коишто сме ги примениле како процент од БДП во Европа. Лажеа за мигранти, лажеа дека ќе сме банкротирале, лажеа дека ќе нема за пензии, уште што ли сѐ не излажаа, па така излажаа и за мерките коишто ги применивме и подготвени ја пречекавме енергетската криза којашто, ќе повторам, не зависи од нас, туку зависи од геополитичките, светски случувања. Од слајдот можете да видите и дека практично како држава сме на третото место и тоа е нешто коешто во минатото за владата на СДСМ и ДУИ претставуваше нешто коешто е невозможно. Ефектите од овие политики денес се јасно видливи – рече Мицкоски.

Премиерот истакна дека енергетската криза е предизвикана од глобалните геополитички случувања и дека не е резултат на домашните политики, додавајќи дека ефектите од владините мерки денес се јасно видливи, особено во услови на корекција на цените на светските берзи.

Тој истакна дека земјата се соочува со период на изразена глобална неизвесност и дека ценовните шокови на енергентите не се резултат на домашните политики, туку на геополитичките состојби, особено кризите на Блискиот Исток и турбуленциите на светските пазари. Во вакви услови, нагласи, обврска на Владата е навремено да реагира и да ги заштити граѓаните и економијата.

Мицкоски информира дека Регулаторната комисија за енергетика утре се очекува да донесе одлука со која цените на бензините и дизелот ќе се намалат за околу денар и половина. Во сила останува и мерката договорена со компанијата ОКТА, според која до крајот на април бензините ќе имаат попуст.

– Истовремено, во сила останува мерката што претходно ја договоривме со ОКТА, според која до крајот на април бензините ќе имаат попуст од два денари по литар, а дизел-горивото од три денари по литар. Со тоа, повторно може да се заклучи дека сме држава со најниски цени на горивата – истакна Мицкоски.

Според премиерот, со овие мерки Македонија е држава со убедливо најниски цени на горивата во регионот и меѓу најниските во Европа. Нагласи дека цената на бензинот од 95 октани во земјава се движи меѓу 1,27 и 1,31 евро за литар. За споредба, посочи дека во Грција и Албанија таа цена изнесува над два евра, додека повисоки цени има и во Србија, Бугарија, Црна Гора, Босна и Херцеговина, Хрватска и Словенија.

– Убедливо најевтини цени. И она коешто го слушам изминативе денови, а исто имав можност да слушам накратко едно интервју дадено од претходниот претседател на владата, господинот Ковачевски дека и тогаш кога била кризата во 2022 сме имале најниски цени во регионот што е лага, не е вистина. Не се такви цените тогаш во 2022 година и ќе ве потсетам тогаш инфлацијата беше со двоцифрен број проценти на месечно ниво, сега е 4,9 поради тоа што минатата година во истиот тој месец имавме мерки, така што основата со којашто се споредува е прилично ниска и тие мерки траеја и овој месец бидејќи минатата година Велигден беше на 21 април. Се сеќавате имавме рамазанска и велигденска кошница, така што очекувам веќе од мај работите да доаѓаат на нивото коешто ги очекуваме – нагласи тој.

Премиерот оцени дека ефектите од владините политики се веќе видливи и дека, покрај интервенциите кај ДДВ и акцизите, Владата има долгорочен, холистички пристап за стабилизирање на економијата.

– Сакам да потенцирам дека ова не е краткорочна политика, туку дел дел од поширок, би рекол холистички пристап на Владата за стабилизирање на економијата во услови на криза. Паралелно со овие мерки работиме и на зајакнување на домашната економија, зголемување на конкурентноста и создавање услови за долгорочен раст. Ќе продолжиме внимателно да ја следиме состојбата и да реагираме. Нашиот пристап останува ист, без еуфорија, но со јасна стратегија, факти и резултати. Нашата обврска е една да обезбедиме стабилност, сигурност и подобар животен стандард за граѓаните – порача Мицкоски.

Во одговор на новинарско прашање, премиерот појасни дека одлуката за измените кај акцизите и данокот на додадена вредност е донесена по истекот на првиот пакет мерки, кој важеше во првите два месеца од енергетската криза.

Вчера завршил првиот, интервентен бран на мерки, со кои беа намалени акцизите и ДДВ за горивата. Во тој контекст, кај дизел-горивото ДДВ повторно е вратен на 18 проценти, наместо претходните 10 проценти, бидејќи во изминатиот период дизелот бележел поголем ценовен раст во однос на бензините.

– Кај данокот на додадена вредност кај дизелот, го имплементиравме ДДВ-то да биде 18 проценти, да не биде 10, завршува периодот на таа мерка. Со оглед на движењето на цената на дизел горивата заклучивме дека со враќањето на данокот 18 отсто, повторно ќе имаме намалување на цената на дизел горивото, имајќи го предвид просекот од минатата недела – појасни Мицкоски.

Кај бензините, пак, Владата одлучила да го задржи намалениот ДДВ од 10 проценти и во текот на оваа и наредните две недели, со цел да се спречи дополнително поскапување и да се задржат стабилни цените на овој енергент.

The post МАКЕДОНИЈА МЕЃУ ТРИТЕ ЕВРОПСКИ ДРЖАВИ СО НАЈОБЕМНИ МЕРКИ ПРОТИВ КРИЗАТА Следува ново поевтинување на горивата appeared first on plusinfo.mk.

Главниот преговарач на Иран, Мохамед Багер Галибаф соопшти за напредок во преговорите со САД, но предупреди дека конечниот договор е сè уште далеку, пренесуваат агенциите.

Влијателниот претседател на иранскиот Парламент, кој заедно со американскиот потпретседател Џеј Ди Венс учествуваше во преговорите одржани на 11 и 12 април во Исламабад, вчера имаше телевизиско интервју.

– Сè уште сме далеку од завршување на дебатите – рече Галибаф.

Тој соопшти за постигнат „напредок во преговорите“, но додаде дека „многу разлики остануваат и некои фундаментални точки сè уште не се решени“. Галибаф прецизираше дека несогласувањата се однесуваат на нуклеарната програма на Иран и затворањето на Ормускиот Теснец.

– Нагласивме дека немаме апсолутно никаква доверба во Соединетите Американски Држави – јасно стави до знаење претседателот на иранскиот Парламент.

Галибаф увери дека Иран се согласил на двонеделното примирје, кое стапи на сила на 8 април, само затоа што тоа го побарале Соединетите Американски Држави.

– Победивме на терен, непријателот не постигна ниту една од своите цели, а Иран исто така има контрола врз Ормускиот Теснец – сумираше тој.

Трамп вчера соопшти дека имал „многу добри разговори“ со Техеран, забележуваат агенциите. Во исто време, тој го предупреди Техеран да не го уценува Вашингтон со закани дека ќе го држи Ормускиот Теснец затворен.

Ниедна страна не даде детали за преговорите вчера, само неколку дена пред да истече кревкото примирје во војната меѓу САД и Израел против Иран во среда, 22 април. Конфликтот, кој сега е во осмата недела, и во кој загинаа илјадници луѓе во Иран, се прошири во Либан и ги зголеми цените на нафтата поради практичното затворање на Ормускиот Теснец, преку која пред војната се пренесуваше една петтина од светската сурова нафта.

The post ГЛАВНИОТ ПРЕГОВАРАЧ НА ИРАН ВЕЛИ ДЕКА ИМА НАПРЕДОК, НО ДЕКА ДОГОВОРОТ Е ДАЛЕКУ Несогласувањата се за нуклеарната програма на Иран и за затворањето на Ормус appeared first on plusinfo.mk.

Секоја акција на американските сили што ја нарушува контролата на Иран врз Ормускиот Tеснец, вклучително и отстранувањето мини, Иран ја смета за кршење на примирјето, соопшти синоќа претседателот на иранскиот Парламент, Мохамед Багер Калибаф.

– Американците во последните денови ја објавија својата блокада, тоа е неодговорна и погрешна одлука. Невозможно е ако ние не можеме да поминеме низ Ормускиот Теснец, други да можат да го сторат тоа. Ако САД не ја укинат блокадата, транзитот низ Ормускиот Теснец сигурно ќе биде ограничен – рече Калибаф.

Според него, Иран би отворил оган врз американски воен брод стациониран во близина на Ормускиот Теснец во случај тој „да се приближи уште повеќе“ до Теснецот во однос на моменталната позиција.

– Доколку тој се приближеше, дефинитивно ќе отворевме оган врз него – рече Калибаф, додавајќи дека ја информирал американската делегација за оваа можност за време на преговорите во Пакистан.

Иранската револуционерна гарда синоќа соопшти дека Ормускиот Теснец ќе остане затворен поради кршење на прекинот на огнот од страна на САД. Во соопштението, гардата наведува дека неколку бродови поминале низ Ормускиот Теснец завчера, но дека „поради кршење на условите на прекинот на огнот, американскиот непријател не ја укинал поморската блокада на иранските бродови и пристаништа“.

„Затоа Ормускиот Теснец ќе биде затворена сè додека не се укине оваа блокада“, се додава во синоќа објавеното соопштение.

Во исто време, Иранската револуционерна гарда предупреди дека ниту еден брод не смее да се помести од своето сидро во Персискиот Залив и во Оманското Море, а приближувањето кон Ормускиот Теснец ќе се смета за соработка со непријателот, додека секој брод што ќе ги прекрши овие услови ќе биде цел на напад.

The post ОТСТРАНУВАЊЕТО МИНИ ЗА ИРАН Е КРШЕЊЕ НА ПРИМИРЈЕТО Секоја акција на САД што ја нарушува контролата врз Ормус ги вознемирува Иранците appeared first on plusinfo.mk.

Властите во Иран делумно го ослободија пристапот до интернет и повторно дозволија телефонски разговори со странство по речиси 50-дневни ограничувања воведени по почетокот на конфликтот со САД и Израел.

Според информациите од Техеран, повторно се дозволени меѓународни повици преку фиксна телефонија, а повиците преку мобилни телефони остануваат блокирани.

Дел од онлајн-услугите, вклучително и оние на „Гугл“, повторно се достапни, но функционираат нестабилно.

Иранските власти во голема мера го ограничија пристапот до интернет на крајот на февруари дозволувајќи користење само на таканаречениот национален интернет, што овозможува пристап исклучиво до одобрени домашни веб-страници. Некои од воените и безбедносните структури задржаа неограничен пристап до интернет.

Владата во Иран ги правдаше мерките дека се донесени од безбедносни причини, а одредени аналитичари сметаат дека ограничувањата биле насочени и кон спречување ширење информации за последиците од војната и за севкупното расположение во земјата.

Од минатата седмица во сила е двонеделно примирје меѓу САД и Иран.

The post ПО 50 ДЕНА ИРАН ДОЗВОЛИ ТЕЛЕФОНСКИ РАЗГОВОРИ СО СТРАНСТВО Делумно е ослободен пристапот до интернет appeared first on plusinfo.mk.

Американскиот претседател Доналд Трамп синоќа изјави дека Иран се согласил да нема нуклеарно оружје повеќе од 20 години.

Трамп им рече на новинарите пред Белата куќа дека договорот со Иран е „многу блиску“ и дека треба да биде добар договор без нуклеарно оружје, објави Би-Би-Си.

Тој нагласи дека постои „многу силна позиција“ дека Иран нема да има нуклеарно оружје дури и по тој период, додавајќи дека всушност нема временско ограничување од 20 години.

– Да бидеме искрени, нема ограничување од 20 години – нагласи Трамп.

Тој исто така рече дека би размислил за патување во Пакистан за да потпише мировен договор доколку САД и Иран постигнат договор за прекин на војната.

– Би отишол во Пакистан, да. Ако договорот биде потпишан во Исламабад, можеби ќе одам. Тие сакаат да одам – рече Трамп.

Трамп претходно вчера посочи дека нова рунда разговори со Иран би можела да се одржи во текот на викендот и рече дека не е сигурен дека е потребно продолжување на прекинот на огнот со земјата.

Тој рече дека Иран е заинтересиран за постигнување договор и посочи дека е „подготвен да прави работи денес што не беше подготвен да ги прави пред два месеца“.

На прашањето што ќе се случи ако САД и Иран не постигнат траен договор, Трамп рече дека воените напади повторно ќе бидат засилени, објави Си-Ен-Ен.

– Ако нема договор, борбите продолжуваат – заклучи тој.

The post ТРАМП ВЕЛИ ДЕКА ИРАН СЕ СОГЛАСИЛ ДА НЕМА НУКЛЕАРНО ОРУЖЈЕ ПОВЕЌЕ ОД 20 ГОДИНИ Ако нема договор, борбите продолжуваат appeared first on plusinfo.mk.

Обединетите нации објавија дека започнале иницијатива за безбеден транзит на ѓубрива низ Ормускиот Теснец предупредувајќи дека земјоделците во некои делови од светот веќе ја прескокнуваат сеидбата, со слаби изгледи за жетва.

Иницијативата ја води Канцеларијата на ОН за проектни услуги (UNOPS), која во изминатите две недели во Њујорк организираше состаноци со земјите-членки за развој на механизам за безбеден транзит на комерцијални бродови за ѓубрива низ Ормускиот Теснец, изјави директорката за комуникации на UNOPS, Жулиет Тума.

Разговорите ги води извршниот директор на UNOPS, Хорхе Мореира да Силва, и тие сè уште се во тек, додаде Тума. Според неа, предложениот механизам треба да овозможи непречен и безбеден транзит на комерцијални бродови што пренесуваат ѓубрива и слична стока и да ги ублажи потенцијалните хуманитарни последици во земјите во Азија и во Африка кои користат ѓубрива.

Некои земјоделци во Јужна Америка веќе ја прескокнаа втората сеидба на пченка, а оние во Африка сè уште имаат малку време да се погрижат за жетвата, која би можела да биде значително послаба без ѓубриво, според извор за британски медиуми.

Компаниите сакаат механизам што би ја вратил слободата на пловидба, без поморска придружба и транзитни такси, изјави извор запознаен со разговорите, додавајќи дека иницијативата на крајот би можела да се прошири и на други стоки.

Агенцијата за храна и земјоделство на ОН предупреди дека остриот пад на сообраќајот на танкери, за повеќе од 90 проценти, го загрозува земјоделското производство и снабдувањето со храна.

The post СЕ ПРЕГОВАРА ЗА БЕЗБЕДЕН ТРАНЗИТ НА ЃУБРИВА НИЗ ОРМУС Сеидбата се прескокнува, жетвата ќе потфрли appeared first on plusinfo.mk.

Воената блокада на целиот сообраќај што влегува и излегува од иранските пристаништа од страна на СAД почна денеска во 16:00 часот по средноевропско време, откако пропаднаа мировните преговори во Пакистан за време на викендот.

Корпусот на исламската револуционерна гарда на Иран се закани со одмазда.

Американскиот претседател Доналд Трамп објави дека иранската морнарица е „целосно уништена“ и додаде дека ќе уништи и помали бродови ако се приближат до американската блокада на иранскиот брег.

„Иранската морнарица лежи на дното на морето, целосно уништена – 158 бродови. Она што не го погодивме беа нивните помали бродови што ги нарекуваат „бродови за брз напад“ затоа што не ги сметавме за толку голема закана“, напиша Трамп на Truth Social. Тој упати предупредување дека сите ирански бродови што ќе се приближат до американската блокада ќе бидат уништени.

Цените на нафтата повторно надминаа 100 долари за барел, а берзите паднаа, бидејќи се очекува неуспешните преговори и блокадата дополнително да ја нарушат глобалната економија. Ограничувањата ќе се применуваат по должината на Персискиот Залив, Оманскиот Залив и Арапското Море источно од Ормуската Теснина, соопшти Центарот за координација на поморската трговија на Велика Британија (UKMTO) во предупредување до своите бродови, и ќе го опфатат „целиот ирански брег, вклучувајќи ги пристаништата и енергетската инфраструктура“. Ограничувањата ќе се применуваат и за бродови што пловат под какво било знаме и имаат врски со „ирански пристаништа, нафтени терминали или офшор објекти“.

На неутралните бродови што моментално се наоѓаат во иранските пристаништа „им е даден ограничен рок да ги напуштат“ тие области, додаде UKMTO.

„Не е пријавено дека преминувањето низ Ормуската Теснина до или од неирански дестинации е попречено од овие мерки; сепак, бродовите може да се соочат со воено присуство, насочени комуникации или процедури за проверка за време на транзитот“, се вели во соопштението.

Се подготвуваат дополнителни упатства за бродовите во врска со ограничувањата.

Тесниот воден пат помеѓу Иран и Оман, Ормуската Теснина е главната рута за транспорт на нафта од земјите богати со нафта како што се Саудиска Арабија и Кувајт до остатокот од светот.

Иран ја контролира северната страна. Околу 20 милиони барели нафта минуваат низ него секој ден, или околу една петтина од дневното светско производство, според американската Администрација за енергетски информации, која го нарекува овој премин „критично тесно грло за нафта“. Според EIA, „постојат многу малку алтернативни опции за транспорт на нафта надвор од теснината ако е затворена“.

Околу една петтина од светската трговија со течен природен гас се одвива и преку Теснината.

The post ПОЧНА ВОЕНАТА БЛОКАДА НА ИРАНСКИТЕ ПРИСТАНИШТА Иран се закани со одмазда appeared first on plusinfo.mk.

Американскиот претседател Доналд Трамп го обвини Иран дека не го исполнил ветувањето за отворање на Ормускиот Теснец и преку својата мрежа „Трут соушал“ (Truth Social) порача дека Техеран ги крши меѓународните закони и ја загрозува глобалната безбедност.

„Иран вети дека ќе го отвори Ормускиот Теснец и свесно не го стори тоа, предизвикувајќи вознемиреност и страдање кај многу народи низ светот. Тие тврдат дека поставиле мини во морето, иако речиси целата нивна морнарица е уништена. Мора веднаш и брзо да започне процесот на отворање на тој меѓународен пловен пат“, напиша Трамп.

Тој додаде дека е целосно информиран од потпретседателот Џеј Ди Венс и од специјалните пратеници Стив Виткоф и Џаред Кушнер за 20-часовниот состанок со иранските претставници одржан во Исламабад. Трамп истакна дека иако неговите претставници развиле коректен однос со иранските преговарачи Мохамад Багер Галибаф, Абас Арагчи и Али Багери, тие останале непопустливи за најважната тема.

„Важно е само едно, Иран не сака да се откаже од своите нуклеарни амбиции. Како што зборувам со години, Иран никогаш нема да има нуклеарно оружје“, дециден е американскиот претседател, кој упати и благодарност до пакистанското раководство за медијацијата.

The post ИРАН НЕ ГО ИСПОЛНИ ВЕТУВАЊЕТО ДЕКА ЌЕ ГО ОТВОРИ ОРМУС Трамп бара да се отвори Теснецот appeared first on plusinfo.mk.

Јеменското движење на Хутите вети дека ќе ги ескалира воените операции против Вашингтон и Тел Авив доколку продолжат нападите врз Техеран, се посочува во соопштение од т.н. министерството за надворешни работи на движењето.

„Во случај на обнова на агресијата на Америка и на непријателскиот Израел против Иран и ‘оската на отпорот’, ставот на Јемен е цврст: активно учество и ескалација на воените операции“, се наведува во соопштението.

Хутите истакнаа дека изјавите на американското раководство за подигнување на конфликтот на ново ниво ги гледаат како поттик за преземање сопствени акции.

Движењето се вклучи во конфликтот на страната на Иран еден месец по неговиот почеток. Нивниот лидер, Абдел Малик ал Хути, претходно изјави дека нивните сили успешно ги спречиле САД и Израел да го користат Црвеното Море за напади врз Исламската Република, додека тензиите остануваат високи и во стратешката Ормуска Теснина.

The post ЈЕМЕНСКИТЕ ХУТИ СЕ ЗАКАНИЈА СО ОДМАЗДА ЗА СЕКОЈ НАПАД ВРЗ ТЕХЕРАН Најавија ескалација на воените операции против Вашингтон и Тел Авив appeared first on plusinfo.mk.