Градоначалничката на Скопје, Данела Арсовска од името на Градот му се заблагодари на стручниот тим на јавното претпријатие „Водовод и канализација“ за добро завршената работа со монтажата на главниот водоводен приклучок и на игличест затворач-вентил на железарскиот цевковод со профил Ф1600.

„Од името на Град Скопје сакам да истакнам благодарност до тимот на „Водовод и канализација“ кој под раководство на директорот Тони Миновски беше целосно ангажиран и во подготвителната и во изведбената фаза на овој комплексен технички зафат за изведба на главен водоводен приклучок и за монтажа на игличест регулациски вентил, што е потфат кој се прави еднаш на 60 години за подобрување на водоснабдувањето и притисокот на водата, како и за намалување на загубите на вода“, се вели во соопштението од Град Скопје.

Со реализација на овој проект, се додава, се подобруваат хидрауличките услови во водоводната мрежа, со монтирање на игличест регулациски  вентил во ново изведена мерно регулациска  шахта со пропратна хидротехничка опрема.

„Се изврши и поврзување на постоечкиот магистрален цевковод Ф1600 милиметри кај Железара, со постоечкиот магистрален цевковод Ф700 на булеварот Александар Македонски, кој се напојува од градскиот магистрален цевковод Ф1600 преку новопредвидениот магистрален цевковод Ф700мм, кој ќе биде поставен по должината на новопредвидениот булевар Хрватска. Со ваквото поврзување се создадаваат услови за формирање на циркуларен прстен за поврзување на двата магистрални цевководи во градот Скопје“, соопшти Град Скопје.

Во соопштението градските власти ја цитираат и честотката што ја доби тимот на „Водовод“ од Здружението на инженери на Македонија:

„Во време кога мнозинството државни институции и јавни претпријатија во Македонија реализацијата на сензитивни и технички комплексни активности им ги доверуваат на надворешни, најчесто странски компании, ЈП „Водовод и канализација – Скопје“ направи преседан вреден внимание. Со целосно внатрешни капацитети, сопствен инженерски и технички персонал, успешно реализираше еден од најкомплексните технички зафати во последните децении: монтажата на игличест затворач-вентил на железарскиот цевковод со профил Ф1600. Оваа интервенција воопшто не беше рутинска, туку стануваше збор за високо сензибилна операција, со реални ризици по стабилноста на системот и со потреба од прецизна координација и инженерска решителност и храброст. Тимот на инженери и техничари не само што се соочи со технички ризици, како што се појава на воздушни џебови или потенцијално оштетување на клучните сегменти од мрежата, туку покажа и извонредна организациска зрелост: 70% од времето го насочија во детални подготвителни активности, а 30% во ефикасна и безгрешна изведба, која траеше цели 28 часа непрекината работа“, се вели во честитката од Инженери на Македонија.

За разлика од други сектори, каде честопати домашниот инженерски кадар се маргинализира за сметка на „посмели“ надворешни изведувачи, овде сведочиме на спротивен пример – пример на доверба во сопствените сили и знаење, се додава.

„Овој успех не треба да остане незабележан. Тој испраќа јасна порака дека Македонија располага со способни, храбри и стручни инженери и техничари, подготвени да раководат со клучни системи и да изведуваат интервенции од највисоко ниво на сложеност. Техничкиот тим на „Водовод“ покажа што значи одговорност, стручност и посветеност, реализирајќи проект кој директно го зајакнува водоснабдителниот систем на главниот град и обезбедува сигурност за десетици илјади граѓани. Успехот на овој тим не е само интерна победа, тоа е порака и предизвик до сите институции да им веруваат на своите луѓе и да им доверуваат сложеи задачи , бидејќи инженерите знаат да се справат со сите предизвици“, се вели во честитката од Инженери на Република Македонија до тимот на скопското водоводно претпријатие.

The post 📷„СО ИНЖЕНЕРСКА РЕШИТЕЛНОСТ И ХРАБРОСТ ВОДОВОД НАПРАВИ ПРЕСЕДАН ВРЕДЕН ЗА ВНИМАНИЕ“ Со сопствени инженери реализираше комплексен зафат на кој се чекаше со децении appeared first on plusinfo.mk.

„Во изминатите две децении, овој проект постојано се вклучуваше во изборните програми на најголемите политички партии, како ВМРО-ДПМНЕ, која во својата програма за 2024 година повторно го потврди овој проект како приоритетен. Со поддршката на 400.000 гласачи и 58 пратеници во Собранието, ВМРО-ДПМНЕ има јасен мандат од граѓаните да го реализира ветувањето за Чебрен. Покрај тоа, и опозицискиот СДСМ, заедно со ЗНАМ, исто така го поддржуваат овој проект, што покажува широк политички консензус за неговата важност.

Проектот Чебрен е стратешки и од клучно значење за енергетската независност и безбедност на Република Македонија. Со инсталиран капацитет од најмалку 333 MW, тој е планиран да ја обезбеди потребната флексибилност и стабилност на енергетскиот систем, особено по затворањето на термоелектраните РЕК Осломеј и РЕК Битола, кое согласно ‘Зелената транзиција’ се очекува да се случи до 2028 година. Изградбата на Чебрен не е само инвестиција во инфраструктурата, туку во енергетскиот и во економскиот суверенитет на Македонија, што ќе ја намали зависноста од увоз на електрична енергија и ќе го зајакне домашниот производствен капацитет.

Во текот на 2023 година, нашето Здружение водеше успешна кампања против доделувањето на концесијата за Чебрен на странски компании, особено спротивставувајќи се на предлогот да биде доделена на грчкиот конзорциум PUBLIC POWER CORPORATION. Ние инсистираме на тоа дека овој капитален проект треба да се изгради и управува од страна на Македонија, што ќе гарантира долгорочни економски и социјални придобивки за нашите граѓани.

Затоа ги повикуваме Владата и Министерството за енергетика да ја преземат иницијативата и да ги вклучат потребните финансиски средства за ‘Проектот Чебрен’ во Буџетот за 2025 година. Неопходно е да се избегнат понатамошни одложувања и несигурност кои само дополнително ќе ги зголемат трошоците и ќе ја отежнат енергетската транзиција.

Со ова обраќање, исто така одговараме на неодамнешните тврдења во медиумите дека нашето Здружение е ‘замолчено’ поради политички притисоци. Нашето единствено мото е заложба во интерес на државата и граѓаните, а не во корист на која било политичка партија. Ние бараме вистински инвестиции во енергетскиот сектор, кои ќе обезбедат долгорочна стабилност и развој.

Време е Владата да ги исполни своите ветувања и да го започне проектот кој е од витално значење за иднината на нашата земја!“, се наведува во писмото на инженерите испратено до Владата.

The post ИНЖЕНЕРИ БАРААТ ДРЖАВАТА ДА ПОЧНЕ ДА ГО ГРАДИ ЧЕБРЕН Во Буџетот за 2025 година да се најдат пари за хидроцентралата наместо да се дава на странци appeared first on plusinfo.mk.

Процесот на аплицирање за учество во иницијативата GEG North Macedonia на Групацијата Лимак ќе биде отворен од денес и ќе трае до 15 ноември годинава. Заинтересираните студентки кои ги исполнуваат условите можат да се пријават, а детални информации за конкурсот можат да се најдат на веб – страницата: https://northmacedonia.globalengineergirls.com.

Како и претходните години, студентките што ќе се пријават на овој, трет конкурс на иницијативата GEG North Macedonia, ќе имаат можност да добијат стипендија, менторска поддршка, обуки за стекнување дигитални и „меки“ вештини, учество во различни активности и работилници како дел од тридневното GEG дружење во Истанбул, како и можности за практикантска работа и вработување.

На претходните конкурси интересот за можностите што ги нуди иницијативата GEG North Macedonia беше голем меѓу младите студентки кои се едуцираат за да изградат кариера во техничките области. Изразувајќи задоволство од досегашниот интерес за иницијативата, Еда Јегиналтај-Курт, член на Управниот одбор на Лимак Скопје и на Фондацијата Лимак и градежен инженер со повеќе од 30 години професионално искуство во градежната индустрија, како и ментор во програмата на Global Engineer Girls North Macedonia, истакна: „Посветени сме на создавањето родова еднаквост и зголемување на учеството на жените во инженерските професии. За мене една од најважните работи во мојата кариера е можноста да се мотивираат и поттикнуваат нашите идни колешки. Ме прави среќна што вредноста на нашата иницијатива беше веднаш препознаена во заедницата и уште на самиот почеток имаше голем интерес помеѓу младите жени и девојки кои сакаат да станат инженерки. Поддршката што ја добиваат преку иницијативата GEG North Macedonia им овозможува покрај другите бенефити, да стекнат знаење и искуство од индустријата и да ги развијата своите таленти во СТЕМ областа. Се надеваме дека преку оваа наша иницијатива ќе продолжиме да градиме добра основа за одржлив економски развој, преку поголема вклученост на жените во овие области“.

Иницијативата GEG се залага за родова еднаквост и јакнење на жените во општеството, преку поголема вклученост во јавниот живот и во сфери и професии каде што има простор за поголема застапеност. Се работи за меѓународна филантропска иницијатива која произлезе од организациската култура на Групацијата Лимак за зголемување на застапеноста на жените во СТЕМ областите. За прв пат иницијативата Global Engineer Girls започна да се спроведува во 2015 година во Турција, а од пред две години нејзините активности се проширија и во Северна Македонија и Косово.

The post НОВА ИНИЦИЈАТИВА GLOBAL ENGINEER GIRLS НА ГРУПАЦИЈАТА ЛИМАК Отворен конкурс за млади девојки и жени од техничките факултети appeared first on plusinfo.mk.

Инженерите од овие две компании ја демонстрираа својата експертиза во областа на мехатроника, со фокус на одржливи енергетски решенија и електрична мобилност.

Иновативни решенија за управување со енергија

Инженерот Војдан Андонов од ФЕРОИНФЕСТ го презентираше новоразвиениот „PLC“ систем за управување со батериските системи за складирање на електрична енергија.

– Овој систем, кој е резултат на двегодишно истражување и развој, овозможува ефикасно управување со вишокот електрична енергија произведена од фотоволтаични системи – истакна Андонов.

Електрично возило за чистење со најсовремени технологии

Инженерот Филип Ташевски ја претстави најновата иновација на БРАКО – електричното возило за чистење „GM720ze“.

– Овој модел, кој се одликува со управување на сите четири тркала и други напредни решенија, е резултат на интензивна соработка со германскиот институт ТУВ и се очекува да го револуционизира пазарот на комунални возила – објасни Ташевски.

Автоматизација на мали хидроелектрани

Инженерот Филип Андрески ја истакна важноста на автоматизацијата во управувањето и мониторингот на малите хидроелектрани. ФЕРОИНВЕСТ, како лидер во оваа област, разви „SCADA“ системи кои овозможуваат оптимално искористување на хидроенергетските потенцијали.

Соработката помеѓу индустријата и академијата

И ФЕРОИНВЕСТ и БРАКО имаат долга традиција на соработка со Машинскиот факултет во Скопје. Ова партнерство овозможува континуиран развој на кадри и примена на најновите технологии во производството.

Презентациите на  ФЕРОИНВЕСТ и БРАКО на настанот „RE-MEMBER 2024“ ја потврдија позицијата на македонските компании како лидери во областа на мехатронике и одржливих технологии. Со своите иновативни решенија, овие компании даваат значителен придонес во развојот на македонската економија и подобрување на квалитетот на живот на граѓаните.

The post 📷 ФЕРОИНВЕСТ И БРАКО ДЕЛ ОД „RE-MEMBER 2024“ Инженерите на двете компании ги презентираа најновите технолошки достигнувања appeared first on plusinfo.mk.

Во акција на Безбедносно-информативната агенција (БИА), Воено-безбедоносната агенција (ВБА), МВР и Вишото јавно обвинителство во Ваљево, вчера се уапсени тројца инженери од српската фабрика за производство на оружје и муниција „Крушик“ поради постоење основи за сомнение дека сториле кривично дело шпионажа затоа што во текот на 2024 година континуирано контактирале со државјани на Северна Македонија, вработени во компанијата „АТС груп“, на чело со Шевкет Демировски, јави дописникот на МИА од Белград.

– Осомничените М.О. (1987), Д. Л. (1960) и Д. М. (1961), се поранешни и сегашни инженери во холдинг компанијата „Крушик“ од Ваљево, кои од оваа фирма неовластено изнесувале доверлива деловно-техничка документација и ја предавале на странска организација, на штета на безбедносните, одбранбените, воените и други интереси, како и слабеење на моќта на Република Србија – се прецизира во соопштението на МВР.

По налог на Вишото јавно обвинителство Ваљево, на осомничените им е одреден притвор до 48 часа и со кривична пријава ќе бидат изведени во обвинителството.

Како што дознава РТС, постојат основи на сомнение дека инженерите кои беа приведени имале континуирани контакти со државјани на Северна Македонија, вработени во компанијата „АТС груп“, на чело со Ш. Д. (Шевкет Демировски).

Овој македонски бизнисмен беше уапсен на 11 ноември 2019 година во акција на БИА, ВБА и Вишото јавно обвинителство во Белград, заедно со пензиониран инженер во „Први партизан“ од Ужице и уште двајца инженери во таа фирма, поради сомневања дека како сопственик на „АТС груп“ од Скопје, преку пензиониран инженер во „Први партизан“ дошол во сопственост на деловно-техничка документација и податоци поврзани со технологијата на изработка на одредени машини, односно до технологијата на изработка на оружје и муниција која ја развива „Први партизан“.

Меѓутоа, по само еден месец, Ш. Д. беше пуштен со кауција од 200.000 евра за да се брани од слобода. Обвинителот во овој случај ја отфрли кривичната пријава против него, откако на 21.01.2021 година на име опортунитет платил 29.393.925 динари. Македонскиот бизнисмен на тој начин беше ослободен од сомнение за кривичното дело поткуп при вршење на стопанска дејност.

„Вечерње новости“ тогаш објави дека Демировски, кој прибирал документација од фабриката за муниција „Први Партизан“ од Ужице, делото го сторил со цел да изработи машина за производство на муниција со калибар 12,7 мм во погоните на некогашната фабрика за муниција „Сувенир“ во Македонски Брод, како и во фабриката за оружје во Катар, каде е косопственик.

Фабриката „АТС груп“ е сместена во индустриската зона Визбегово и произведува композитни производи и производи наменети за опрема на армијата и полицијата во делот на балистичка заштита и балистичка безбедност. Тоа значи шлемови, елеци и други реквизити за лична заштита на професионалните војници и полицајци. „АТС Груп“ развива нови производи за елитните специјални сили. Производството е под континуиран надзор на експерти образовани за наменско производство и под надворешна контрола на странски деловни партнери според ISO 9001 стандардите. Производството е според стандарди и препораки кои ги бараат НАТО и САД.

„Атс груп“ е гринфилд инвестиција од три милиони евра која на почеток започна со вработување на 80 лица. Годишниот обрт на производството на компанијата достигнува и до 30 милиони евра. Финалниот производ е наменет за извоз на странските пазари  во Европа, Турција и во Катар.

Провладините медиуми во Србија, акцент на веста за апсењето на трите лица поради шпионажа го ставаат на обвинителката Милена Божовиќ која во 2021 година ја отфрли кривичната пријава против Шевкет Демировски, наведувајќи дека „таа во јавноста е позната како една од неколкуте обвинителки што ја потпишаа опозициската иницијатива „ПроГлас“, иако на јавните обвинители им се забранува каква било политичка активност.

Порталот МКД.мк објави дека Демировски иако бил осомничен за шпионажа добил македонски дипломатски пасош.

– Оваа приватна инвестиција од 3 милиони евра со за почеток нови 80 работни места е особено драга за нас бидејќи доаѓа од наш сограѓанин кој долги години живее и работи дома и во странство – рече тогашниот премиер Зоран Заев на отворањето на фабриката на „АТС груп“ пред 5 години.

The post СРПСКИ ИНЖЕНЕРИ ШПИОНИРАЛЕ ЗА МАКЕДОНСКА ФИРМА ЗА ОРУЖЈЕ Како Демировски од „АТС груп“ доаѓал до доверливи информации за правење муниција за НАТО appeared first on plusinfo.mk.

Врз основа на Законот за достап до информации Здруѓението официјално доставило барање за одговори до Министерството за информатичко општество и администрација, до Државната изборна комисија, а информирани се и претседателот на државата и јавното обвинителство.

Инженерите потсетуваат дека помеѓу 2021 и 2022 година со сајбер-напади беа таргетирани седум јавни институции, особено веб-страниците со официјален владин домен (gov.mk);

На 15 јули 2020 година за време на предвремените парламентарни избори со дистрибуирано одбивање на услуга (DDoS), беше нападната официјалната веб-страница на Државната изборна комисија. На 8 февруари 2023 година информатичкиот систем на Фондот за здравствено осигурување беше хакиран со ransomware вирус.

Со оглед на тоа што ни престојат претседателски и парламентарни изборни процеси, Здружението на инженери прашува дали се преземени сите мерки за информатичка безбедност за да се обезбеди непречен изборен процес.

The post ПО ХАКЕРСКИОТ НАПАД ВРЗ МЕПСО ДРЖАВАТА МОРА ДА ГО ВКЛУЧИ АЛАРМОТ! Заштитете ги податоците, особено зашто доаѓаат избори, предупредуваат инженерите appeared first on plusinfo.mk.

Бизнисмени велат дека засега се оставени сами да се борат со проблемот, но велат крајно време е државата да подразмисли да го скрати времето на примање на социјалните додатоци и да овозможи привилегии за вработување на студенти и за работа на пензионери. На подолг рок да се овозможи во образовниот процес предност да му се даде на стручното образование. Како едно од решенијата се посочува и увозот на работници, но тоа да бидат стручни, образовани, а не општи работници кои треба да се дообучуваат и наместо директно да се вклучат во процесот на работа за нив да се троши дополнително време за обука, па потоа да заминат во други земји. Тие очекуваат повисоки квоти за странски работници и за годинава.

Според последните податоци на Државниот завод за статистика, најмногу слободни работни места има во трговијата 1.687, градежништвото 983, хотелиерството 566 и транспортот 469. На крајот на минатата година во земјава имало 105.452 невработени. Повеќе од половина од слободните работни места се во средните и големите компании.

Во јануари годинава тој број се зголемил на 105.803 невработени, според податоците на Агенцијата за вработување. Од нив 63.697 се без образование, 25.097 се со средно образование, а 6.749 се високо образование.

– Бројката на отворени работни места во хотелиерството е далеку повисока. Можеби сè повеќе од 1.000 работни места кои се непополнети и тешко се пополнуваат. Во наредниот период се очекува да се зголеми таа бројка. Дел од хотелиерите се обидуваат да ги пополнат преку вработување странци од Непал, Филипините и од Индија. Очекуваме со измени на законот за работни односи под посебни услови да се овозможи студентите да работат, како и да се отвори можност и за пензионерите. Сето тоа ќе помогне да се ублажи недостигот од работници – вели Крсто Блажевски, претседател на здружението на хотелиери ХОТАМ.

Тој не очекува големи поместувања на работниците во секторот со отворањето на пазарот во рамки на Отворен Балкан, но очекува да се привлечат специјалисти во туризмот за кои ќе бидат обезбедени и повисоки плати ако дојдат на неколкумесечна работа во Македонија.

– Можно е дел од туристичките работници од зимските центри во Србија на пример да побараат работа во летните туристички центри кај нас, но најмногу се очекува да доаѓаат на привремена работа специјализирани работници како шеф за специјална храна на пример или други специјалисти. Се разбира за тоа ќе треба да бидат и соодветно платени но и да се направат повеќе законски измени за привремено вработување – вели тој.

Блажевски вели дека државата мора да го спроведе процесот на увоз на работници за да опстанат компаниите.

– Не треба да чекаме да има 0 невработени па да почнеме да размислуваме за проблемот. За почеток треба да се зголемат квотите – додава тој.

Андреа Серафимовски, претседател за Здружението на градежници, вели дека компаниите се оставени сами на себе да се снаоѓаат како да дојдат до работна сила.

– Дел од компаниите преку странски посредници донесоа работници од Индија, Непал и Пакистан, но дали е направена добра работа со ова допрва ќе се види бидејќи и ова има позитивни и негативни ефекти врз компаниите. Можно е во иднина и да ги изгубиме поради нискиот стандард, а може да профитираме ако паметно и со државна стратегија ги водиме работите во однос на градежните компании и работниците. Веќе ги видовме негативните работи од стратегијата капиталните инвестиции да ни ги градат странски компании. За странците главно работат нивни работници, а нашите заминуваат во странство. Инженерите ни одат, бидејќи не сакаат да бидат потценети и да бидат втора или трета рака, па потоа се чудиме зошто никој не сака да студира градежништво. Сѐ на сѐ има добри и лоши работи – вели Серафимовски.

Според него, и Отворен Балкан може да се гледа низа призмата на добрите и лошите работи кои ќе ги има градежништвото.

– Како компании можеме да ја искористиме градежната експанзија и подем во двете други земји, посебно Србија, но во однос на работниците може да имаме драстичен одлив на кадарот кој заминува за подобри услови. Сѐ ќе зависи од државната стратегија – додава тој.

Архитектот и член на здружението на градежници Никола Велковски, пак, вели дека иако на градежништвото му требаат близу 1.000 работници, не секогаш решението е во увоз на работна сила, туку главно треба да се дејствува со системски закони кои нема да дозволуваат уживање на државна социјална помош, промена во образованието и запирањето на иселувањето.

– Најголем број од работните места во градежништвото 70 до 80% се за работници и тоа квалификувани и неквалификувани во делот на занаетчиските работи. Но, 15 до 20% од потребите се за инженери, градежни, електроинженери за градежништво, инженери од хидраулика и слично кои речиси и ги немаме бидејќи опаѓа бројот на студенти на градежниот факултет или оние кои завршуваат веднаш заминуваат во странство. Но решението не е во увоз на странски работници кои главно се неквалификувани и за кои дополнително треба да се троши на обуки за да можат да се приклучат во работата – вели тој.

Според него, со ангажман на државата и добро согледување на состојбата на пазарот на труд, социјалната заштита и образованието можат да се постигнат ефекти без да се увезуваат работници од надвор.

– Потребна е реформа на системот за социјална помош и тоа во времетраењето на добивањето на помошта од државата за работоспособни лица. Може да им се даде одредена помош, но да се инсистира тие да бараат работа и да се преквалификуваат. Така државата ќе може да ги насочи парите кон другите социјални мерки, а овие луѓе да почнат да работат. Друг многу важен сегмент е тоа што сè уште сме заглавени во социјалистичкото време кога требаше да се учи факултет за да се заработува. Сега, на пример од одделни занаетчиски дејности, столар, гипсари…, кои се потребни во градежништвото може да се заработи многу, но младите не ги сакаат овие занимања. Тука треба да работиме – вели Велковски.

Во однос на отворањето на пазарот на труд во рамки на Отворен Балкан тој вели дека не очекува многу да се подобри состојбата со кадар во трите земји, бидејќи градежниците повеќе одат во Хрватска и во Словенија и од таму бегаат во европските земји.

– Не верувам дека ќе се случи одлив на кадри меѓу трите земји, бидејќи квалификуваните градежници, тие што управуваат машини и секако инженерите имаат друга цел, а тоа се големите европски економии каде што заработуваат. Тоа е резултат на сличниот стандард во овие три земји – вели Велковски.

The post НЕДОСТИГААТ ОКОЛУ 10.000 РАБОТНИЦИ ВО МАКЕДОНСКИТЕ КОМПАНИИ Увозот на работна сила тапка во место, Отворен Балкан е нова закана за одлив на кадарот appeared first on plusinfo.mk.

Пратениците на пленарната седница закажана за в среда во второ читање треба да го разгледаат предлог законот за стратешкиот проект за изградба на когенеративна гасна централа во Скопје во скратена постапка. Стратешкиот инвеститор е грчки „Митилинеос“ кој треба да ја изгради оваа централа во Гази Баба (на просторот на поранешна Железарница, каде што ЕСМ веќе има таква централа) со инсталирана моќност за производство на електрична енергија од 130 до 165 MWe и топлинска енергија од 90-105 MWh. Се очекува годишното производство на електрична енергија да изнесува околу 1.150 MWh електрична енергија и 275 MWh топлинска енергија.

Најавата за нова инвестиција во енергетскиот сектор која ќе ја реализира странска фирма наиде на реакции од страна на енергетичари, експерти и инженери од земјава кои сметаат дека и овој проект како проектот „Чебрен“ треба да го гради државата, а не странски инвеститор кој ќе добие огромен број бенефиции на штета на државата. Дел од нив во постапката за прогласување на стратешки инвеститор за овој проект гледаат коруптивна зделка.

Инвестицијата ќе чини 290 милиони евра од кои 49.750.000 евра ќе даде државата како директна финансиска поддршка. Според она што може да се види од предлог законот државата не планира да добие удел во оваа енергетска инвестиција, но затоа пак државното ЕСМ има обврска да ги купува произведената струја и топлина од инвеститорот. Цената на струјата не е утврдена. Инвеститорот ќе има право на гарантиран слободен пристап до пазарот на електрична енергија и приоритетен пристап до електропреносниот систем со приоритет при диспечирање на електричната енергија произведена од постројката. Дополнително државата се обврзува дека ќе формира нова индустриска зона „Енергија Скопје“ во Гази Баба за која институциите треба итно да реагираат.

Договорот е на 30 години со можност за продолжување или раскинување. Владата се обврзува и дека во период од 10 години од започнувањето со работа, остварените 15 годишни добивки од страна на стратешкиот инвеститор од работата на постројката нема да ги даночи со нови даноци.

„Стратешкиот инвеститор има доставено до Владата банкарска гаранција од 8,7 милиони евра како обезбедување за исполнувањето на обврските на стратешкиот инвеститор во однос на реализирањето на стратешкиот инвестициски проект согласно условите од договорот“, се вели во предлог законот.

Во законот се наведува и дека реализацијата на стратешкиот проект е итна и приоритетна.

„Органите се должни навремено да ги спроведуваат дејствата со цел навремено реализирање на стратешкиот инвестициски проект. Непостапувањето на органите ќе се смета за премолчено одобрување“, се вели во законот.

Експерти, енергетичари и инженери сметаат дека е недозволиво инвестиција од 290 милиони евра, колку што е едногодишна рата за автопатот од коридорот 8 на конзорциумот „Бехтел и Енка“, да ја гради странска фирма. За нив е спорно и тоа што во светски рамки ваква инвестиција е дозволено да изнесува 130 милиони евра, но уште попроблематично е тоа што земјава не знае по која цена ќе ја купува струјата, а на инвеститорот му доделува и финансиска помош од близу 50 милиони евра. Според нив, овој проект од потребен се претвори во корупциска зделка.

Ова е нов „Чебрен“, вели професорот Ристо Цицонков кој смета дека владата и пред крајот на мандатот и во предизборен период се обидува да протне еден ваков крајно неповолен проект за државата.

– Не сум го видел предлог-законот, но од она што веќе е објавено во јавноста може да се види дека владата по секоја цена сака овој инвеститор да го задржи. Таа му нуди бесплатно земјиште, веќе изградена инфраструктура, го ослободува од даноци и што е крајно нелогично, му плаќа 50 милиони евра за да ја гради централата, се обврзува да ја купува струјата, но не знае по која цена. Тоа навестува дека цената ќе биде берзанска. Па јавно прашувам зошто се прави сето ова и зошто е важен овој инвеститор? Според мене, со вакви бенефиции овој инвеститор треба да ѝ плати на државата затоа што ќе гради централа и остварува сигурни приходи, а не да добие подарок пари за да гради – вели Цицонков.

Тој смета дека овој капацитет треба да го гради државата, бидејќи износот на инвестицијата не е голем и државата може да го поднесе.

И професорот Константин Димитров смета дека овој капацитет треба да го гради државата и во него да бидат вклучени домашни кадри.

„Во светски рамки, инвестицијата не смее да надмине 130 милиони евра. Имаме примери од соседството за такви реализирани постројки. Дали има коруптивни елементи? Јас не верувам, затоа што членовите на Владата се заколнаа дека ќе му служат на народот! За да му посакаме добредојде на овој стратегиски инвеститор е подготвен Закон за државна помош во износ од 50 милиони евра. Наши пари, собрани од граѓаните, му се доделуваат како стимулација. Кои се придобивките на граѓаните во Македонија, особено во Скопје, со изградбата на оваа постројка? Ќе купуваме електрична и топлинска енергија со гарантирано количество и со пазарна цена (а можеби и малку поскапо). Ако не ја преземеме од редица причини (перфектно наброени во договорот), пак ќе му платиме како да ја произвел и испорачал“, пишува Димитров во својата последна колумна.

Тој прави и пресметка колку пари ќе се трошат од касата на државата на овој стратешки инвеститор.

„За да биде јасно колку треба да му платиме на овој стратегиски партнер на годишно ниво и за време на периодот за концесија, основната пресметка за споредба е цената на АД ЕСМ и просечната пазарна цена: На годишно ниво, како разлика во цените е сумата од 94 милиони евра. За 30 години, таа разлика е речиси 3 милијарди евра (2.825 милиони). Дополнителна придобивка е зголемувањето на емисијата на јаглен двооксид. Ама веќе сме навикнати на оваа состојба“, пишува Димитров.

Маријан Ненов од невладината „Но пасаран“ смета дека и овој проект мириса на корупциска зделка која ќе ја плати народот.

– Ваков проект ѝ е потребен на земјава, но треба да го градиме ние, а не странски инвеститор кој ќе добие низа привилегии кои прават овој проект од потребен да прерасне во корупциска зделка. Со овој проект си ставаме трн во здрава нога – вели тој.

Ненов, како и поголемиот број енергетски експерти смета дека земјава треба сама да гради вакви когенеративни централи кои треба да бидат со помала моќност, но повеќе на број.

– Вакви централи треба да бидат со моќност од 70 до 100 MWe и да се градат на периферијата на градовите кои потоа ќе ја користат топлинската енергија за загревање. Прво да се почне со градовите до кои веќе е дојден гасоводот, а потоа со тек на време и до другите градови – вели тој.

Здружението инженери поддржани и од група граѓани испрати допис до секој пратеник поединечно, со барање да не се даде поддршка на неколку, како што е наведено, штетни предлог закони кои го нарушуваат енергетскиот суверенитет на земјата. Меѓу нив е и гасната  когенеративна централа во Скопје.

Во него се наведува дека, освен 50 милиони евра што ќе ги добие инвеститорот, државата ќе треба да плаќа околу 25 милиони евра годишно за емисија на јаглерод диоксид, но годишно ќе губи по 1,2 милијарди евра колку што ќе заработи инвеститорот за 30 години.

„Македонија годишно ќе губи помеѓу 15 и 35 милиони евра со тоа што цените за електричната и топлинската енергија со која Договорот не обврзува да ги купуваме од „Митилинеос“ се од 15 % до 35 % повисоки од берзанските. Земјата ќе плаќа 10 пати повисока маржа од нормалната за производство на електрична и топлинска енергија бидејќи „Митилинеос“ добива загарантирана маржа на годишно ниво од 43,7 милиони евра за електричната енергија (38 евра/MВч) и 4,4 милиони евра за топлинската енергија (16,2 евра/MWч), или вкупно над 48 милиони евра годишно. Македонија ќе му плаќа на „Митилинеос“ 4 милиони евра годишно за старт на постројката. Инвеститорот добива загарантиран профит од над 40 милиони евра годишно без да има никаков ризик од одлуките на нашиот правен систем, бидејќи со предложениот закон сите одлуки на Врховниот суд ќе бидат неважечки за „Митилинеос“, а штетите од неговото работење ќе мора да ги плати Македонија. Законот за јавни набавки не важи за „Митилинеос“ и во целост се исклучува влијанието на нашата судска власт и надлежност се дава само на Арбитражниот суд во Париз за било каков евентуален спор. Предвидени се бројни пенали што Македонија ќе треба да му ги плаќа на „Митилинеос“ ако не исполни некоја своја обврска од предложениот закон за стратешка инвестиција. Инвеститорот ќе има чист профит од најмалку 1,2 милијарди евра за 30 години колку што трае договорот за стратешко партнерство, а по 30 години не мора да ѝ ја врати електраната на Македонија“, се наведува во писмото.

Покрај оваа гасна централа владата веќе најави дека ЕСМ бара стратешки партнери и за изградба на комбинирани гасни централи во Битола, на местото на РЕК Битола, и во Неготино.

The post ДОГОВОРОТ СО „МИТИЛИНЕОС“ ЗА ГАСНА ЦЕНТРАЛА Е ВТОР „ЧЕБРЕН“! Никако не смее да помине во Собрание, алармираат инженерите appeared first on plusinfo.mk.

Со иницијативата се предлага донесување Закон за финансирање на изградбата на водостопанско-енергетските објекти со име „Проект Чебрен”, како интегрално решение по должината на сливот на Црна Река, како составен дел од Стратегијата за развој на енергетиката во Република Северна Македонија до 2040 година.

„Целта на оваа Иницијатива е активностите на државните институции кои ќе бидат делегирани за спроведување на овој капитален проект од стратегиски интерес за државата, да се стават во законски рамки за да се овозможи непречена реализација, без обѕир која политичка партија ја формира Владата.

Некои од основните прашања и одговори, кои ја поткрепуваат потребата за донесување на овој Закон се:

Дали е потребно овој капитален проект да се изгради? ДА!

Дали Македонија може да раководи со реализацијата на овој проект? ДА!

Дали е лесно да се реализира овој проект? НЕ!

Дали реализацијата на овој проект е Проблем ? НЕ, таа е ПРЕДИЗВИК за македонското општество.

Дали Македонија може финансиски да го поднесе овој проект? ДА, преку интелигентно финансиско управување“ – се вели во воведот на Иницијативата која е потпишана од повеќе од 20 инженери и јавни личности.

Иницијаторите бараат пратениците во Собранието и Владата, користејќи го своето право и должност, да ја прифатат оваа иницијативата и да го донесат овој Закон.

Во иницијативата се опишува текот на постапката за реализацоија на овој проект:

„Потребно е целата досегашна инвестициско-техничка документација од секторите на електростопанство, земјоделие, животна средина, академските институции да се собере на едно место. Врз основа на длабинска анализа, експертска работна група ќе дефинира најдобро прифатливо решение во однос на националните интереси на Република Северна Македонија за кое ќе се изработи соодветна проектна документација (Идеен проект). Идејниот проект треба да биде ревидиран од реномирана ревизорска компанија. Следува изработката на главни проекти со кој ќе се дефинира реалната цена за изградба на овој проект. После тоа може да се пристапи кон изработка на План за реализација на Проектот во сите негови фази во кој е вклучен и начинот на финансирањето и протокот на паричните средства.

Креирањето на соодветната правна рамка, која јасно ќе ги дефинира основите врз кои ќе се врши реализацијата и ќе се уредуваат внатрешните односи, претставува приоритетна задача сама по себе од највисоко ниво. Законот треба да биде подготвен со јасни и прецизни законски и подзаконски норми, без простор за толкување на законските решенија, со што се постигнува целта при спроведување на законот во практиката“.

The post ЧЕБРЕН МОЖЕМЕ САМИ ДА ГО ИЗГРАДИМЕ, ЕВЕ КАКО СЕ ПРАВИ ТОА! Инженерите покренаа иницијатива прво да се донесе посебен закон appeared first on plusinfo.mk.

„Претставката ја поднесовме поради сомневање дека со општите акти на Владата во постапката при подготовката и реализацијата на јавниот повик за доделување концесија за користење вода за производство на електрична енергија со изградба на хидроелектрични централи на Црна Река се направени бројни суштински, правни, економски и стручно-научни недостатоци со кои се загрозуваат суверенитетот, територијалната целина и основите на економските односи определени со Уставот, како и уредувањето на територијата за потребите на одбраната предвидени со Планот за одбрана на Републиката согласно одредбите од Законот за одбрана“, се вели во соопштението.

Здружението на инженери очекува надлежните органи да постапат по претставката и да го замрзнат процесот за потпишување на договор за јавно-приватно партнерство сѐ додека не се истражат, потврдат или отфрлат нивните сомневања.

Преставката, како што се вели во соопштението, е испратена до Уставниот суд, Државното правобранителство, Државната комисија за спречување на корупцијата, Државниот завод за ревизија, Јавното обвнителство и Бирото за јавни набавки.

Од Здружението на инженери сметаат дека проектот за изградба на хидроцентралата Чебрен по пат на јавно-приватно партнерство е штетен и со него се нарушува електроенергетската независност на земјава и се дава на управување воден ресурс кој е веројатно најзначаен во овој век.

The post ДАВАЊЕТО НА ЧЕБРЕН ПОД КОНЦЕСИЈА ЌЕ БИДЕ ГРЕШКА НА ВЕКОТ! Здружението на инженери со претставка бара да се замрзне проектот appeared first on plusinfo.mk.