Владата преку Министерството за транспорт инвестира речиси 9 милиони евра во инфраструктурниот развој на Велес – истакна заменик-претседателот на Владата и министер за транспорт, Александар Николоски.

Тој, денеска, заедно со премиерот Христијан Мицкоски, престојуваше во работна посета на општина Велес, каде што со градоначалникот Марко Колев направи увид на многубројните проекти што се реализираат со поддршка на Владата и Министерството.

– Со гордост можам да кажам дека Владата преку Програмата за инфраструктурни проекти во општините и преку проектот што го имаме со Светската банка инвестира речиси 9 милиони евра, што е исклучително значајна сума за развојот на инфраструктурата. Денеска гледаме почнување со работа на две улици, а една е веќе завршена, и драго ми е што преку соработката што ја имаме со Светската банка веќе се завршени три проекти во вредност од половина милион евра, а тоа се улиците 8 Мај, Љубљанска и Луј Пастер, и исто така сега набргу беше завршена и зградата во која има социјални станови – изјави Николоски.

Вицепремиерот нагласи дека Владата ќе продолжи со силната поддршка за Општина Велес и во наредниот период.

– Ќе продолжиме да ја поддржуваме Општина Велес, да соработуваме со градоначалникот, Советот и со пратениците, а преку координацијата што ја прави премиерот да обезбедиме уште повеќе проекти, кои ќе се реализираат во интерес на граѓаните – порача Николоски.

The post 9 МИЛИОНИ ЕВРА ЗА ИНФРАСТРУКТУРАТА ВО ВЕЛЕС Николоски најави нови проекти во координација со општината appeared first on plusinfo.mk.

Со новите законски решенија за урбанистичко планирање и градење, надмината е досегашната правна празнина и создадена е рамка за изградба на дата центри во државата. Иако сè уште нема конкретни иницијативи од приватниот сектор, државата сериозно размислува за изградба на државен дата центар со цел заштита на институциите и зголемување на сајбер безбедноста, посочи министерот за транспорт и вицепремиер Александар Николоски денеска по увидот во реконструираната улица Лазар Димитров во општина Кисела Вода.

Одговарајќи на новинарски прашања за локациите на овие центри и усогласувањето на подзаконските акти, тој нагласи дека примарната цел е да се фати чекор со светските трендови во оваа област, која досега воопшто не била регулирана.

– Сакавме да фатиме чекор со времето, имајќи предвид дека ова е она што го прави светот, бидејќи кај нас законската регулатива воопшто го немаше предвидено. Бевме во една сива зона, ниту беше забрането, ниту беше дозволено и сметавме дека е добро да ја уредиме оваа материја. Досега од приватен инвеститор не дошла иницијатива за ваква инвестиција. Се надевам дека ќе дојде во следниот период. Инвестицијата може да е државна и може да е приватна. Мислам дека е паметно за Македонија во идниот период да размислува за една државна инвестиција за да ги заштитиме државните институции. Се сеќавате што се случуваше на пример со Фондот за здравство пред некоја година. Така што од безбедносни причини мислам дека е паметно за нас како држава да се заштитиме и да имаме систем којшто целосно го контролира – посочи Николоски.

Во однос на обезбедувањето на просторот и начинот на реализација, Николоски појасни дека пристапот ќе зависи исклучиво од тоа дали станува збор за државен или за приватен проект.

– Доколку правиме таков државен дата центар, тогаш секако локацијата ќе ја обезбеди државата. А доколку се работи за приватна инвестиција, тогаш целокупната инвестиција и во купување на земјиште и во урбанизација ќе биде на приватниот инвеститор. А како што кажав досега немаме таков инвеститор, што значи дека и ние кога го носевме законот, иако знам дека остави кај некој впечаток дека наменски го носиме, не го носевме наменски, туку сакавме да создадеме правна рамка за потенцијални и инвеститори и инвестиции. Дали тие ќе дојдат за една година, за пет или за десет… Ние сега рамката ја имаме – вели Николоски.

Прашан дали идејата е ваквата инфраструктура да биде наменета за државната администрација и за образовните институции за поевтино користење, тој истакна дека процесот би требало да биде во надлежност на Министерството за дигитализација, потенцирајќи ја неопходноста од организиран безбедносен систем наместо досегашната практика на изнајмување ресурси.

– Мое мислење е, секако на ниво на Влада треба да донесеме одлука дека процесот би го водело Министерството за дигитализација, но мислам дека е паметно да размислуваме во оваа насока, затоа што сега ние сите изнајмуваме, а изнајмуваме најчесто од Мајкрософт или Телеком. Начелно тоа е во ред, но никогаш не се знае, повторувам, знаете што се случи со Фондот за здравствено осигурување, а имаше и одредени други такви ситуации. Дел институции сами прават заштита и нема еден организиран систем. Така што е паметно како држава, безбедноста не е само во војска и во полиција, туку е и тука да ние се заштитиме. Со ова веќе имаме правна рамка да се заштитиме како држава – рече Николоски.

The post ИДЕЈАТА Е ДРЖАВЕН ДАТА ЦЕНТАР ДА ГИ ШТИТИ ИНСТИТУЦИИТЕ Правна рамка за градење има, инвестицијата може да биде и приватна appeared first on plusinfo.mk.

Оваа колумна им ја посветувам на припадниците на науката кои се грижат да добиеме супер модерни, економски исплатливи и еколошки одржливи геолошко-рударско-металургиски комплекси за обоени и благородни металични суровини и ако ги земеме предвид во тони бакарот, златото, среброто, платината, индиумот, парадиумот, иридиумот итн. по глава жител, тогаш ние сме повеќе од богата држава. Само да напоменам, кај научниците, а пред се кај металурзите, еден и еден се единаесет (1 и 1 = 11), а еден плус еден е еднакво на два (1+1=2). И не постојат тези со контратези на веќе докажани тези, каде од ново ќе се констатира констатирана константа. Тоа е разликата помеѓу науката и…

За жал граѓаните на Македонија се под силен наплив на дезинформации кои доаѓаат од личности кои ловат во матно, за да си ги задржат своите удобни пратенички фотелји или пак очекуваат да падне некој проект од некое анархистичко-либерталистичко-еколошко крило од каде би имале некаков соодветен надоместок.

Еве како манипулираат. Пратеник од Струмичко, кој има бизнис со земјоделски производи, во емисија вели дека тој им верувал на странците, ама не им верувал на домашните институции и затоа не можело да има рудник. Само да му објаснам на ова чудо од пратеник дека тој е во домашна институција и ние те плаќаме. Глумец пак, ни вели дека не можело да има рудник во струмичко зашто полето го ранело целиот Солунски Фронт. Јас уште сум „забезекнут“ од каде му е тезава. Не е вистина секако.

Друг па пратеник од Гевгелиско убедува пустиот дека референдумите спроведени против отворање на рудници биле успешни. Господинов има завршено Правен Факултет, а за негова жал треба да му соопштам дека Уставниот Суд ги прогласи за неуставни, а Уставот е закон над законите.

Ја убедувам целата публика дека гореспоменатите јавни личности и пред се пратеници се извртувачи на тези, кои веројатно гледаат само личен интерес во сите процеси кои се поврзани со геолошко-рударско-металургиски комплекси.

Јас сум убеден дека овие личности не разбираат ниту тронка од научниот процес за добивање на метали. И кога користат зборови дека ќе се употребува цијанид за добивање на злато, јавно кажувам дека со закон е забранета неговата употреба и тоа значи дека сите не дезинформираат и шират невистини. Цијанид или цијанидни супстанци нема и не смеат да се користат во ниту еден новоотворен рудник во Македонија и тоа е затворено прашање за сите во индустријата и науката, освен за оние кои немаат други аргументи „против“ па упорно се држат до своите манипулации.

Еве мал научен дел за читателите за „Употреба на цијанид во металургијата и индустријата за бои: процеси, предизвици и подобни алтернативи со тиосулфат.“

Како размислуваат металурзите?

Цијанидот има историска важност, но неговата токсичност и формирањето на бакарно цијанидни комплекси го ограничуваат неговото користење кај оксидни бакарно златни руди.

Тиосулфатот претставува практична и поеколошка алтернатива во многу случаи, со услов дека се оптимизираат процесите и се обезбеди соодветен третман на отпад.

• Цијанидот е важен реагент за екстракција на злато и за синтеза на пигменти како Берлинско сино.

• Тиосулфатот е ветувачка алтернатива за екстракција на злато од овие руди; бакарните јони (Cu²⁺) можат да делуваат како катализатори.

• Еколошките регулативи и третманот на отпад се клучни за намалување на негативните ефекти.

• Македонија мора да се преориентира кон тиосулфат и да ги употреби сите форми на нови достапни технологии за максимално квалитетно и рационално рециклирање и третман на отпад.

Цијанидот за Македонија мора да стане историја, но за сите рудници.

Сепак, Европа како континент мора да се прилагодува на заштитата на здравјето на луѓето, како и одржлив развој на земјоделието преку чисти почва, води и воздух. И затоа новите рудници имаат можност да се докажат на ова поле со научен пристап и со сериозна општествена одговорност. Затоа се нуди од страна на металурзите долгорочно квалитетно решение.

Сепак, клучните препораки за Македонија и Европа се исти: примена на тиосулфат каде е соодветно; оптимизација на амонијак и pH; рециклирање на реагенсите; строго следење на еколошките регулативи.

Да живее Македонија!!!!

The post Кај науката нема место за „романтичарски“ дезинформации appeared first on plusinfo.mk.

Полската компанија за производство на бакар и сребро „KGHM“ најави дека до 2030 година се обврзува на инвестиции тешки над 32 милијарди злоти (8,55 милијарди долари), со цел да се постигнат нови долгорочни цели во производството и во профитот. Планот, наречен „Стратегија 2055+“, има за цел постигнување на прилагодена основна добивка од производство на бакар од 730.000 тони до 2030 година.

Македонија, иако поседува бакар не може да се пофали со инвестиции. Долг период сериозна е само најавата за ископ на бакар од наоѓалиштето во Иловица и Штука. Од компанијата „Еуромакс ресоурцес“ најавија инвестиција од околу 350 милиони евра само во текот на изградбата, а со тоа проектот би претставувал најголема гринфилд инвестиција во државата. Очекуван е и просечен годишен приход од 180 милиони евра, кој ќе придонесе во зголемување на БДП за дополнителни 3%, а силно влијание ќе има и врз македонскиот извоз. Просечната годишна вредност на извозот за време на 23-годишното работење би изнесувало над 180 милиони евра годишно што претставува зголемување од околу 4% на македонскиот извоз.

Засега единствен активен рудник за бакар е „Бучим-Боров дол“, кој ги исцрпува своите капацитети, а претходно нереализирани остануваа повеќе инвестиции, меѓу кои и за рудници за бакар на Кожуф и во Казандол.

Инаку, амбициозните планови во Полска предвидуваат и KGHM да обезбеди снабдување со руда поблиску до своите полски топилници и да ги намали трошоците за логистика. Компанијата очекува околу 80% од производството на бакар да доаѓа од домашни ресурси, а остатокот од рудници во странство.

„По 2035 година, сакаме KGHM да биде модерна индустриска групација за повеќе суровини“, изјави извршниот директор Ремигиуш Пашкевич, додавајќи дека компанијата планира да изгради нов рудник наречен „KGHM 2.0“ во Полска.

Новата Стратегија, исто така, става нов акцент на операциите во странство. Од KGHM изјавија дека речиси 80% од планираните инвестиции ќе одат во нејзиниот основен бизнис во земјата, но остатокот ќе биде наменет за инвестиции во Чиле, САД и Канада. Се очекува да бидат потпомогнати рудникот „Сиера Горда“ во Чиле, во кој KGHM поседува 55% удел, и рудникот „Робинсон“ во Невада.

– Сакаме позицијата на нашите средства во странство да расте, бидејќи тоа го гради глобалниот кредибилитет на компанијата и отпорноста на структурните промени – рече заменик-извршната директорка Ана Собиерај-Козакиевич.

Претходно Европската Унија утврди над 47 стратешки проекти на тлото на Унијата, односно голем број рудници, во 13 земји-членки: Белгија, Франција, Италија, Германија, Шпанија, Естонија, Чешка, Грција, Шведска, Финска, Португалија, Полска и Романија, за ископ на критични минерални суровини и за нив се предвидени забрзани процедури за дозволи. Забрзана процедура е предвидена и во нацрт законот кај нас, а од критичните минерали по кои трага ЕУ, Македонија може да се пофали со бакар, никел, антимон и други.

The post ПОЛСКА ВЛОЖУВА 8,55 МИЛИЈАРДИ ДОЛАРИ ЗА ИСКОП НА БАКАР Кај нас уште не се реализира ниту инвестицијата од 350 милиони евра во Иловица appeared first on plusinfo.mk.

Владата предводена од ВМРО-ДПМНЕ во изминатите две години реализирала и започнала 60 спортски инфраструктурни проекти во вкупна вредност од над 21 милион евра, соопшти денеска владејачката партија, оценувајќи дека спортот повторно е поставен меѓу националните приоритети.

Од ВМРО-ДПМНЕ истакнуваат дека инвестициите во спортската инфраструктура не претставуваат само изградба и реконструкција на објекти, туку и вложување во младите генерации и поттикнување на здрави животни навики.

„Владата предводена од ВМРО-ДПМНЕ инвестира во спортската инфраструктура и го враќа спортот на местото што го заслужува, меѓу клучните национални приоритети. Со конкретни инвестиции се создаваат подобри услови за развој на младите, за спорт и за нови спортски успеси“, велат од партијата.

Според соопштението, меѓу капиталните проекти што се реализирани или се во тек се реконструкцијата на спортската сала „Расадник“, атлетските патеки во Велес и Гевгелија, спортската сала во Радовиш, како и реконструкцијата на спортската сала на УКИМ.

Во тек, како што наведуваат, се и изградбата на нови спортски сали во Општина Аеродром, Крушево и Воената академија во Скопје, како и изградбата на новите трибини на градскиот стадион во Тетово.

Од ВМРО-ДПМНЕ додаваат дека паралелно се градат нови спортски сали, мултифункционални игралишта, стадиони и базени, со што ќе им се овозможат подобри услови за спорт на илјадници деца, млади и рекреативци.

„Владата на ВМРО-ДПМНЕ останува посветена на реализација на нови капитални проекти, затоа што силната спортска инфраструктура е темел за успешен спорт, поздрави генерации и посилна Македонија“, се наведува во соопштението.

Од партијата порачуваат дека инвестициите во спортот ќе продолжат и во наредниот период, оценувајќи дека тие носат долгорочни придобивки за државата и идните генерации.

The post НАД 21 МИЛИОН ЕВРА ЗА СПОРТОТ Владата инвестира во 60 проекти низ Македонија appeared first on plusinfo.mk.

Во последните години сведоци сме дека секоја јавна расправа за рударството, а особено за проектот „Иловица – Штука“, сè почесто се претвора во натпревар кој погласно ќе зборува, наместо кој ќе понуди повеќе факти. Веруваме дека е време оваа дебата да се врати таму каде што припаѓа – кај науката, експертите и институциите.

Кога се носат одлуки што ќе имаат влијание врз животната средина, здравјето на луѓето, економијата и иднината на државата, најважен треба да биде мирниот глас на науката, а не најгласните пораки на луѓе кои без соодветна стручност се претставуваат како експерти за рударство, геологија, хидрологија, економија, право и сè друго.

Ја изразуваме нашата поддршка за универзитетските професори и експерти кои во изминатиот период јавно ги презентираа своите стручни ставови за современите рударски технологии и проектот „Иловица – Штука“, а поради тоа беа изложени на лични напади и дискредитации. Во едно демократско општество, научната аргументација треба да се поттикнува, а не да се замолчува преку притисоци и јавен линч.

Во современите демократии, ваквите одлуки не се носат преку Фејсбук-објави, политички пароли или јавни притисоци. Тие се носат врз основа на научни анализи, експертски мислења, законски процедури и независни институции.

Денес постои огромна разлика помеѓу рударството од пред неколку децении и современото рударство. Науката и технологијата направија огромен исчекор. Современите технологии овозможуваат експлоатација со значително повисоко ниво на контрола, управување со ризиците и заштита на животната средина отколку што било возможно во минатото. Токму затоа секој проект треба да се оценува според конкретната технологија што е предвидена, а не според претстави и искуства од друго време или од сосема различни проекти.

Во случајот со „Иловица – Штука“, надлежните институции имаат обврска внимателно да ги разгледаат сите стручни анализи, идната Студија за оцена на влијанието врз животната средина, мислењата на научната јавност и сите законски критериуми. Ако проектот не ги исполнува пропишаните услови, не треба да добие дозвола. Но, ако ги исполнува највисоките законски, технички и еколошки стандарди, тогаш одлуката мора да биде донесена врз основа на факти, а не под притисок на најгласните.

Истовремено, не смееме да ја занемариме ниту економската страна на ова прашање. Македонија има потреба од нови продуктивни инвестиции, нови работни места и поголем извоз. Проекти како „Иловица – Штука“ имаат потенцијал да донесат стотици директни и илјадници индиректни работни места, значителни приходи за државниот буџет и општините, нови можности за домашните компании и силен поттик за развојот на југоисточниот регион. Во услови кога земјата се соочува со иселување на младите, недостаток на инвестиции и потреба од повисок економски раст, секоја развојна можност заслужува професионална и објективна оценка.

Затоа ги повикуваме Владата, надлежните министерства и сите институции да продолжат да ги носат своите одлуки врз основа на науката, стручноста и законите. Само така ќе обезбедиме и максимална заштита на животната средина и здравјето на граѓаните, но и можност Македонија да го искористи својот природен потенцијал за повисок животен стандард, економски развој и подобра иднина за младите генерации.

Државата има обврска да ги слуша експертите. Гласот на науката можеби е потивок од вревата на дневните расправи, но токму тој е најсигурниот патоказ кога се одлучува за иднината на Македонија.

The post НАМЕСТО НАЈГЛАСНИОТ ЗА ИЛОВИЦА-ШТУКА, ДРЖАВАТА ДА ГО СЛУШНЕ НАЈСТРУЧНИОТ Одлуките бараат научен пристап на база на факти appeared first on plusinfo.mk.

Македонското здравство добива значителна финансиска поддршка од над 573 милиони денари, односно зголемување на буџетот за 7,6%. Во ребалансот на државната каса, здравствената заштита за граѓаните е мерлив и опиплив приоритет. Од претходните 7,566 милиони денари, сега се предвидени над 8,139 милиони денари. Ова претставува едно од најголемите и најзначајните промени во новото буџетско прекројување – изјави Моника Трајанова, пратеник на ВМРО-ДПМНЕ на денешната прес-конференција.

– Значаен дел од овие пари, односно 300 милиони денари се предвидени за развојните програми на Министерството за здравство, што во пракса значи нови инвестициски проекти и модернизација на македонскиот здравствен систем. Над 60 милиони денари ќе се слеат во ставките, здравствени услуги, медицинска опрема и здравствени објекти. Зголемување над 187 проценти, односно дури 460 милиони денари се предвидени за реконструкција и доградба на јавните здравствени установи.

Но, здравствената заштита не опфаќа само модернизација и нови апарати, туку достапност до здравствена нега за секој еден граѓанин. Па така, во делот на социјалните трансфери, средствата за здравствена заштита се зголемуваат за 1,185 милиони денари, што е чекор напред кон зголемена здравствена заштита за најранливите категории на граѓани.

Со прекројувањето на државната каса, средства се насочени и кон енергетска ефикасност на јавните здравствени установи, како и проекти за намалување на оперативните трошоци на македонските болници. А една од главните карактеристики на ребалансот е зголемената фискална одговорност, доказ за домаќинско работење, а притоа државата да овозможи вистинска грижа за граѓаните – рече пратеничката Трајанова.

The post БУЏЕТОТ ЗА ЗДРАВСТВО СЕ ЗГОЛЕМУВА ЗА ПОВЕЌЕ ОД 7,6% Дополнителни 9,3 милиони евра за развојни програми, опрема, реконструкции и подобри услуги appeared first on plusinfo.mk.

Оваа Влада историски прави најголеми издвојувања за општините, а за тоа е доказ овој ребаланс кој денес го разгледуваме во Комисијата за финансирање и буџет. Ова го истакна заменик-министерот за финансии Николче Јанкуловски во рамки на амандманската распорава по предлог ребалансот на Буџетот за 2026 година во рамки на матичната собраниска Комисија за финансирање и буџет кој потенцираше дека буџетот е лимитирана и ограничена категорија каде треба да се задоволат сите најнеопходни потреби и секако онаа развојна компонента за која Владата се обврзала да ја реализира пред грааѓаните.

– Постојоано работиме на зголелмување на издвојувњата од државниот Буџет кон програмите на надлежните министерства, во случајот Министерството за транспорт, Министерството за животна средина и просторно планирање,  а преку АА програмата за финансирање на инфраструктурни проекти тука се и Министерството за култура, Министерството за образование и Министерството за социјална политика, демографија и млади. Со овој Ребланс за инфраструктурни проекти во општините, за сите 80 општини ги зголемуваме предвидените од 2,6 милијарди денари на 4,2 милијарди денари во корист на подобрување на животот на граѓаните. Преку Министерството за транспорт и врски со Проектот за локални патишта сумата со ребаланост изнесува 566 милиони денари и исто преку Министерството за транспорт и врски програмата со Проектот за олеснување на трговијата и транспортот  ја зголемуваме од 246 минилони денари на 620 милиони денари. Овие се бројки показатели на волјата на Владата не само на хартија, туку и на терен дека реализира и дека ќе реализира уште повеќе проекти – посочи заменик-министерот.

Тој потенцираше дека секое населено место е важно, и дека приоритетите ги одредуваат општините и врз основа на тоа аплицирале во рамки на програмата АА во локалната самоуправа и надлежните министерства.

The post СО РЕБАЛАНСОТ СИТЕ 80 ОПШТИНИ ДОБИВААТ ПОВЕЌЕ ПАРИ Вкупната сума е зголемена за 1,6 милијарди денари appeared first on plusinfo.mk.

Велика Британија стравува дека нема да има доволно минерали за да ја покрие побарувачката од индустријата, која е неопходна за да се постигнат целите од зелената транзиција. Потребата од литиум, бакар и други минерали, неколкукратно ќе се зголеми до 2040 година. Додека Британија го поттикнува рударството на островот, Македонија не може да се пофали со нов рудник, иако изобилува со бакар. Во наоѓалиштето за бакар Иловица, утврдени се околу 500 милиони тони руда, во кои, според проценките, има 410.000 тони бакарна руда. Па така, пресметките, но и планот на инвеститорот предвидуваат просечно годишно производство на над 10.000 тони бакар во Иловица. Доколку ова се преведе во бројки, рудникот во Иловица, на инвеститорот „Еуромакс ресоурсес“, ќе биде во топ 3 извозни компании во Македонија.

Пред само неколку месеци британски инвеститори остварија средби со претставници од Министерството за енергетика, рударство и минерални суровини, но нема детали околу проектите за кои се разговарало и дали меѓу темите бил и македонскиот бакар. Истражувањата на Британскиот геолошки истражувачки центар покажуваат дека Велика Британија најверојатно ќе остане зависна од увоз на критични минерали и покрај тоа што го стимулира домашното рударство, па ќе мора да бара поддршка од земји партнери.

„Брзиот раст на производство на електричните возила, ветерните турбини и фотоволтаиците значи дека, на краток рок, примарното снабдување со минерали кое се експлоатираат директно од земјата ќе остане од суштинско значење за задоволување на секторите во раст и пополнување на празнините во снабдувањето. Ова вклучува континуирана зависност од увоз на литиум, бакар, никел, кобалт, манган и ретки земни елементи и ја нагласува важноста на диверзификацијата на синџирот на снабдување, одговорното снабдување и стратешките меѓународни партнерства“, оценува Британскиот геолошки истражувачки центар.

На неодамнешната Конференција за рударството во Обединетото Кралство, беше потенцирано дека природниот капитал на земјата претставува економска можност од огромни размери, но сепак останува исклучителен предизвик да се обезбедат финансии за проекти за критични минерали.

„Тука во Корнвол, никогаш не сме ја загубиле нашата гордост кога станува збор за минералите, но сега повторното оживување на рударството ја враќа надежта во нашите заедници. Не станува збор само за работни места, туку и за развој на инфраструктура и општествени подобрувања, и ова е возбудливо време ако добро ги изиграме картите. Сепак, сега треба да ја искористиме големата поддршка за нашата индустрија и да преземеме холистички пристап кон истражувањето, експлоатацијата, преработката, развојот на вештини и рециклирањето на минерали за да се осигураме дека Корнвол ќе се справи со предизвикот и ќе се придружи на останатите проекти низ Велика Британија за обезбедување на домашни резерви на критични минерали што ни се потребни за да го живееме модерниот живот“, истакна во обраќањето пратеникот Перан Мун.

Според инвеститорите, сега е време да се започнат рударските проекти.

„Најдоброто време да се засади дрво беше пред 20 години, а второто најдобро време е сега, па затоа мора да се здружиме за да развиеме индустрија за критични минерали во Велика Британија без понатамошно одложување. Треба да овозможиме долгорочни инвестиции за да ги забрзаме проектите за минерали, да го поттикнеме производството, да ја овозможиме енергетската транзиција и да му бидеме од корист на локалното население низ целата земја“, нагласи основачот на „Корниш Литиум“, Џереми Вратхол.

Инаку, во британската „Визија 2035 – Стратегија за критични минерали“, е истакнато дека очекуваат дека до 2035 година годишната побарувачка за бакар да се удвои, додека побарувачката за литиум да се зголеми за 1.100%. Како што економиите низ целиот свет ја спроведуваат зелената транзиција, побарувачката за овие минерали само ќе се зголемува, бидејќи енергетските извори и транспортот стануваат сè позависни од технологијата со ниски јаглеродни емисии. На глобалниот пазар, како што се додава во документот, во последниве години сме сведоци на сè поконцентрирани синџири на снабдување со преработка и рударство и таквата концентрација значи дека синџирот на снабдување е особено ранлив на шокови како што се природни катастрофи, војна или геополитички последици.

The post РУДАРСТВОТО ЈА ВРАЌА НАДЕЖТА НА ЗАЕДНИЦАТА Британија стимулира нови окна за бакар, а кај нас инвестициите како Иловица се саботираат appeared first on plusinfo.mk.

Инвестициите во Неготино само во делот на улици и плоштади, комунални проекти, паркови, изнесуваат над 4 милиони евра, што креираат нови слика за Неготино. Поддршката на Владата за Неготино и за другите општини е огромна и континуирна, порача денеска од Неготино, заменик претседателот на Владата Александар Николоски.

Тој заедно со премиерот Христијан Мицкоски и градоначалничката Марија Нацева, извршија увид во изградба на инфраструктурни проекти во Неготино што се реализираат со поддршка на Владата.

Притоа се изврши увид во реконструкција на ул. „29-ти Ноември”, проект кој се реалиизра преку Министерството за транспорт, во вредност од 28.7 милиони денари. Исто така извршија увид и во изградбата на кружен тек, инвестиција од 9, 8 милони денари.

– Во моментов, само преку програми кои што се од Владата, преку Министерството за транспорт, се инвестираат некаде околу 246 милиони денари или над 4 милиони евра во изградба на улици, водоводни и канализациони системи, понатaму паркови, кружен тек, плоштад. Така што, бројни се проектите коишто се работат или ќе се работат во Неготино.

Ќе продолжиме во следниот период да ја поддржуваме општината, да ја поддржуваме градоначалничката, а со новите можности кои што се отвораат, исто така, ќе разговараме и за нови проекти. Навистина е задоволство да се биде денес во Неготино, да се види колку многу проекти или се завршуваат, или се работат, или ќе почнат да се работат.

Мило ми е што со една нова енергија, која што градоначалничката ја внесе, се забрзуваат голем број проекти со поддршката со Советот, со поддршката, исто така, од пратеникот, со поддршката од Владата и лично од премиерот Мицкоски.

Овде имаме навистина една комплетно нова слика за општина Неготино. Мислам дека тоа многу значи и за локалното население и за локалното стопанство. Дополнително во општина Неготино преку двата повици на Владата за инфраструктурни проекти, се реализраат 12 проекти за подобрување на урбаното живеење и локалната економија – изјави Николоски.

Премиерот Мицкоски рече дека во моментов во Македонија во тек се повеќе од 1.200 проекти и целата земја е едно големо градилиште.

– Да се заблагодарам за посветеноста на мојот колега од Владата и впрочем на сите колеги од Владата бидејќи денеска Македонија е едно големо градилиште, се гради на повеќе од 1.200 локации, низ целата територија на државата. Нешто што досега е незабележано во поновата историја на независна Македонија. И ќе продолжиме и понатаму да ги довршуваме овие проекти.

Единствено лоша вест сето ова коешто се случува во државата е оние коишто не и мислат добро на државата, оние коишто не сакаат Македонија да успее, само тие не успеваат да го видат сето она коешто оваа Влада и овие градоначалниците го прават за граѓаните – рече премиерот Мицкоски.

The post 📷 СО ИНВЕСТИЦИИ ОД 4 МИЛИОНИ ЕВРА ЈА МЕНУВАМЕ СЛИКАТА ЗА НЕГОТИНО Николоски за владината поддршка во локалната инфраструктура appeared first on plusinfo.mk.